Линклар

Шошилинч хабар
22 ноябр 2019, Тошкент вақти: 23:14

Ўзбекистон хабарлари

ХТВ узоқ жойлардаги мактабларнигина автобус билан таъминлай олади

Ўзбекистонлик мактаб ўқувчилари (иллюстратив сурат).

Ўзбекистон Халқ таълими вазирлиги мамлакатдаги мактабларнинг барчасини икки ойда автобуслар билан таъминлаш имкониятига эга эмас ва ҳозирча энг зарур бўлган узоқ жойлардаги мактабларнигина автобус билан таъминлай олади. Бу ҳақда вазирлик матбуот хизмати маълумот тарқатди.

ХТВ хабарномасида 2 ноябрь куни президент Шавкат Мирзиёев томонидан ўтказилган йиғилишда 2019 йилнинг 1 январигача жойлардаги мактаб филиалларини асосий мактабга айлантириш вазифаси қўйилганини эслатиб ўтилган.

“Асосий мактаб ташкил этиш мақсадга мувофиқ бўлмаган жойларда эса ўқувчиларнинг асосий мактабга боришлари учун автобус хизматлари йўлга қўйилиши масаласини ўрганиб чиқиш кераклиги таъкидланди. Бу ташаббус қишлоқ болаларини ҳам яхши шароитларда ўқишини таъминлаш ўқувчилар узоғини яқин қилишга қаратилган”, дейилади баёнотда.

Халқ таълими вазирлиги ўз тасарруфида 9600 дан зиёдроқ мактаб борлиги, икки ой ичида барча мактабларни автобуслар билан таъминлаш имконсизлигини билдирган.

“Шунинг учун бу масала биринчи навбатда энг зарур бўлган узоқ жойлардаги мактаблар учун кўзда тутилади”, дейилади хабарномада.

Кун янгиликлари

Иқтисодиёт университетида талабалар учун қатъий форма бекор қилинди

Тошкент давлат иқтисодиёт университети

Тошкент давлат иқтисодиёт университети (Нархоз) талабалари учун қатъий форма бекор қилинди, эндиликда университет талабаси исталган кийимда ўқишга келиши мумкин.

Бу ҳақда хабар қилган "Халқ сўзи"га кўра, ўқув юрти 25 ноябрдан бошлаб беш кунлик таълим тизимига ўтади. Талабалар душанба-жума кунлари ўқишга боради. Шанба ва якшанба кунлари дам олиш куни бўлади.

Жорий ойда университети ректори Баҳодир Ҳодиев ишдан олиниб, унинг ўрнига Олий ва ўрта махсус таълим вазирининг биринчи ўринбосари Конгратбой Шарипов тайинланганди.

Фуқаролиги бекор қилиниши мумкин бўлган ўзбекистонликларнинг 105- рўйхати эълон қилинди

Ўзбекистоннинг Қозоғистондаги элчихонаси фуқаролиги бекор қилиниши мумкин бўлган ўзбекистонликлар рўйхатини эълон қилди.

Элчихона эълон қилган "105- рўйхат"да ҳаммаси бўлиб 1210 фуқаронинг исм-фамилияси келтирилган.

«Ўзбекистон Республикасининг Фуқаролиги тўғрисида»ги қонунга мувофиқ қуйидаги ҳолларда Ўзбекистон Республикаси фуқаролиги йўқотилиши мумкин:

1) шахс чет давлатда ҳарбий хизматга, хавфсизлик хизмати идораларига, полицияга, адлия идораларига ёки давлат ҳокимияти ва бошқарувининг бошқа идораларига ишга кирганлиги натижасида;

2) агар чет элда доимий яшовчи шахс уч йил ичида узрли сабабларсиз консуллик ҳисобига турмаган бўлса;

3) агар Ўзбекистон Республикаси фуқаролиги ёлғонлиги шак-шубҳасиз маълумотлар ёки сохта ҳужжатлар тақдим этиш натижасида олинган бўлса;

4) агар шахс чет давлат фойдасини кўзлаб фаолият юритиш ёки тинчлик ва хавфсизликка қарши жиноятлар содир этиш орқали жамият ва давлат манфаатларига жиддий зарар етказган бўлса;

5) агар шахс чет давлатнинг фуқаролигини олган бўлса.

Чет давлатнинг фуқаролигини қабул қилган шахс ушбу факт ҳақида ўттиз кун ичида Ўзбекистон Республикасининг ички ишлар органларига ёки чет элдаги консуллик муассасаларига хабар бериши шарт.

Ўзбекистон Республикаси президентининг фармони чиққан кундан бошлаб Ўзбекистон Республикасининг фуқаролиги йўқотилади.

Президент Ядро физикаси институти фаолиятини қўллаб-қувватлашга қарор қилди

“Ядро физикаси институти илмий-тадқиқот фаолиятини қўллаб-қувватлаш чора-тадбирлари тўғрисида”ги Президент қарори қабул қилинди.

Бу ҳақда хабар қилган Адлия вазирлигига кўра, қарор билан ядро фанлари ва технологияларини ривожлантириш, ушбу йўналишда илмий тадқиқотларни олиб бориш тизимини тубдан такомиллаштириш мақсадида Ядро физикаси институти фаолиятининг асосий йўналишлари белгиланди.

Жумладан, олий ўқув юртидан кейинги таълим институти фаолияти самарадорлигини таъминлаш, юқори малакали кадрлар тайёрлаш ва иқтидорли ёшларни ҳар томонлама қўллаб-қувватлаш институт фаолиятининг асосий йўналишларидан биридир.

Қарор билан Фанлар академияси Ядро физикаси институти фаолиятини такомиллаштириш бўйича мақсадли дастур ҳамда 2020-2024 йилларга мўлжалланган илмий-тадқиқот ишлари дастури тасдиқланди.

2020 йилнинг 1 январидан бошлаб:

Институт ходимлари меҳнатига ҳақ тўлаш, бино ва иншоотларини сақлаш харажатларини молиялаштириш, шунингдек, жорий харажатларини қоплаш Давлат бюджети маблағлари ҳисобига амалга оширилади;

Институтда илмий-техник дастурлар доирасидаги фундаментал тадқиқотларнинг амалга оширилиши тўхтатилади ва бўшаган бюджет маблағлари Институтни сақлаш харажатларининг молиялаштирилишига йўналтирилади.

Пенсия таъминоти тизими ўзгаради

Президент Мирзиёев раислигида аҳолини ижтимоий муҳофаза қилишнинг устувор масалаларига бағишлаб 21 ноябрда ўтказилган йиғилишда давлат раҳбари минимал давлат пенсияси ёки пенсия жамғармасига ажратиладиган тўпланиб борадиган пенсиялардан иборат уч даражали пенсия таъминоти тизимига ўтиш бўйича топшириқ берди.

Давлат раҳбари матбуот хизматининг хабар беришича, президент уч даражали пенсия таъминоти тизимига ўтиш орқали пенсия бадалини тўлашдан манфаатдорликни ошириш зарурлигини таъкидлаган.

Бунда, биринчи даражада давлат минимал пенсия миқдорини белгилайди. Иккинчи даражада ходимнинг иш ҳақидан муайян сумма ушланиб, унинг шахсий ҳисоб-варағида тўпланади ва Марказий банк қайта молиялаштириш ставкасидан кам бўлмаган фоиз ҳисоблаб борилади. Учинчи даражада ходим пенсия жамғармасига ажратиладиган маблағ миқдорини ўзи белгилайди.

"Бу тизим қўлланилса, фуқаро кафолатли давлат пенсиясини олиш билан бирга ўз хоҳишига қараб, пенсия ёшида қанча пенсия олишини ўзи белгилаш имконига эга бўлади", - дейилади хабарда.

Шу боис Молия вазирлигига Жаҳон банки ва нуфузли молия ташкилотлари экспертлари билан ҳамкорликда пенсия тизимини ислоҳ қилиш концепциясини ишлаб чиқиш, шунингдек, ижтимоий суғурта турларини қайта кўриб чиқиш бўйича топшириқлар берилди.

Озодликнинг қамоқ ва ҳибсхоналар учун масъул амалдорлар ишдан олинганига оид хабарини ҳукуматдаги манбалар тасдиқлади

Ишдан олинганлар орасида ИИВ Қоровул қўшинлари қўмондони, генерал-майор Дмитрий Пан ҳам бор.

Ички ишлар вазири ўринбосари Муҳиддин Жўраев ҳамда ИИВ Қоровул қўшинлари қўмондони Дмитрий Пан лавозимидан озод қилингани тўғрисида Озодлик 21 ноябрда хабар қилган эди.

Бу хабарни ҳукуматдаги ахборот манбаси тасдиқлагани тўғрисида 22 ноябрда gazeta.uz хабар қилди.

Озодлик хабар қилганидек, Ўзбекистон ички ишлар вазирининг жамоат тартибини сақлаш бўйича ўринбосари Муҳиддин Ўткирович Жўраевни лавозимидан озод қилиш тўғрисидаги ҳужжатни мамлакат бош вазири Абдулла Арипов ўқиб бергани хабар қилинди.

Бу ҳақдаги қарорни 18 ноябрда президент Шавкат Мирзиёев имзолаган.

Муҳиддин Жўраев 2018 йил декабри охирида ички ишлар вазири ўринбосари лавозимига тайинланган эди. Аввал у Сирдарё вилоят ИИБ бошлиғи (2016−2018 йиллар) ҳамда Тошкентнинг Мирзо Улуғбек тумани ИИБ бошлиғи (2014−2016) лавозимларида фаолият кўрсатган.

"ИИВнинг бошқа масъул ходимларининг ҳам лавозимларидан четлаштирилгани ҳақидаги хабарлар келиб тушмоқда. «Газета.uz» айни вақтда фақатгина ИИВ Қоровул қўшинлари қўмондони генерал-майор Дмитрий Валерьевич Паннинг лавозимдан озод қилинганини тасдиқлата олди", деб хабар қилди сайт.

Ҳар бир туман ва шаҳарда театр, ашула ва рақс ансамбли ташкил этиш ҳақида кўрсатма берилди

Иллюстратив сурат.

“Ўзбекистон халқ артисти”, “Ўзбекистон халқ рассоми” каби фахрий унвонларга эга бўлган ижодкорлар, “Ниҳол” мукофоти совриндорлари ҳокимларга ижодий маслаҳатчи сифатида бириктирилади.

Бу борада Вазирлар Маҳкамаси 21 ноябрь куни қабул қилган “Қорақалпоғистон Республикаси, вилоятлар ва Тошкент шаҳрида ёшларни маданият ва санъат муассасаларига кенг жалб этиш орқали уларнинг бўш вақтларини мазмунли ташкил қилиш тизимини янада ривожлантириш тўғрисида”ги қарорда мана шу меъёр белгиланди.

Қарорга асосан маданият ва санъат масалалари бўйича ижодий маслаҳатчилар ўз фаолиятини жамоатчилик асосида олиб боради.

Ижодий маслаҳатчиларнинг асосий вазифаси тегишли ҳудуддаги ёшларни маданият ва санъатга кенг жалб этиш юзасидан ҳокимликларга методик, ижодий ва ташкилий жиҳатдан ёрдам беришдан иборат.

Шунингдек, қарорга кўра 2019 йил якунига қадар ҳар бир туман ва шаҳар марказий маданият марказида жамоатчилик шаклида биттадан театр жамоаси, вокал чолғу ансамбли, ашула ва рақс ансамбли ҳамда намунавий болалар ансамбли ташкил этилади.

Ақтўбе вилоятида бузилган автобусдан 55 ўзбекистонлик қутқарилди

2018 йилнинг 18 январь куни Ақтўбеда автобус ёниб, 52 ўзбекистонлик ёниб кетган эди.

Қозоғистоннинг Ақтўбе вилоятида бузилиб қолган автобусда бўлган Ўзбекистоннинг 55 нафар фуқароси тезкор равишда иссиқ жойга эвакуация қилинди.

Ўзбекистон Ташқи ишлар вазирлигининг билдиришича, воқеа 20 ноябрь юз берди. “Самара—Чимкент” йўналишида ҳаракатланаётган ва ичида 57 киши, шу жумладан, 55 нафар Ўзбекистон фуқароси бўлган автобус Ақтўбе вилояти Хромтау туманида техник носозлик туфайли тўхтаб қолган

Фавқулодда вазиятлар бўйича Ақтўбе вилоят департаменти қутқарувчилари автобус йўловчиларини иссиқ жойга эвакуация қилганлар. Вазирлик йўловчилар орасида тиббий ёрдамга муҳтожлар йўқлигини билдирди.

Хабарда айтилишича, автобусга ёз мавсуми учун мўлжалланган ёнилғи қуйилган ва у музлаб қолган. Айни пайтда автобусни таъмирлаш ишлари олиб борилмоқда.

2018 йилнинг 18 январь куни “Самара-Чимкент” автойўлининг Ақтўбе вилоятидан ўтадиган қисмида автобусда кетаётган 52 нафар Ўзбекистон фуқароси тириклайин ёниб кетган эди.

Воронеждаги қурилишда ишлаган икки ўзбекистонлик ҳалок бўлди

Иллюстратив сурат.

Россиянинг Воронеж шаҳридаги қурилишлардан бирида19 ноябрь куни Ўзбекистоннинг икки фуқароси ҳалок бўлди.

Ташқи ишлар вазирлигининг билдиришича, қурилаётган объект яқинида ўзбекистонликларни 13-қаватдан тушган ғиштлар босиб қолган.

Ҳозирда тергов органлари томонидан Россия Жиноят кодексининг 109-моддаси 3-қисми (эҳтиётсизлик туфайли ўлимга олиб келиш) бўйича жиноят иши қўзғатилди ва тергов олиб борилмоқда.

"Элчихона Ўзбекистон Бандлик ва меҳнат муносабатлари вазирлиги ҳузуридаги Ташқи меҳнат миграцияси агентлигининг ваколатхонаси билан биргаликда ҳамюртлар жасадларини ватанга жўнатиш учун консуллик-ҳуқуқий ва ташкилий масалаларни ҳал этишда ёрдам бермоқда", дейилади хабарда.

Бир кунда уч вилоятда беш киши ис газидан заҳарланиб вафот этди

Иллюстратив сурат.

Учта вилоятида бир кун ичида беш киши ис газидан заҳарланиб вафот этди.

Бош прокуратуранинг билдиришича, 20 ноябрь куни Сирдарё вилоятининг Боёвут тумани, Тошкент вилоятининг Ангрен шаҳри ва Навоий вилоятининг Хатирчи туманида охири ўлим билан якунланган ис газидан заҳарланиш ҳолатлари қайд этилди.

Мазкур ҳолатларда жами учта оиладан беш киши вафот этган. Улардан уч нафари эркак ва икки нафари аёл кишидир. Бир бола шифохонага ётқизилди.

Бу сўнгги бир ой ичида ис газидан заҳарланиб ўлиш билан боғлиқ Озодликка маълум бўлган тўққизинчи ҳодисадир. Бу ҳодисаларда жами 27 одам вафот этган.

"Ўзтрансгаз” 2018 йилнинг январь-апрель ойлари оралиғида Ўзбекистонда 58 одам ис газидан заҳарланиб вафот этгани, 54 одам эса жабрланганини билдирган.

Ёшлар иттифоқи етакчиси қалбаки пул ясаганликда гумон қилинмоқда

Касби туман ҳокимлигида Ёшлар иттифоқи етакчиси бўлиб ишловчи, 1995 йилда туғилган Б.А. қалбаки пул чиқарганликда гумон қилинмоқда.

Бу ҳақда хабар қилган ЎзАга кўра, Ёшлар иттифоқи етакчиси Касби тумани “Муғлон” МФЙ ҳудудидаги ижарага олган тикувчилик цехида қалбаки пул ишлаб чиқараётганлиги фош қилинган, ундан 172 дона 50.000 сўмлик, рангли принтердан тўлиқ чиқарилмаган 84 дона 50.000 сўмлик пуллар, “EPSON” рангли принтери ва “LENOVO” ноутбуки тегишли тартибда ҳужжатлаштириб олинган.

Қалбаки пул ясалаётгани Қашқадарё вилоят ИИБ Коррупция ва иқтисодий жиноятларга қарши кураш бўлими ва Касби туман ИИБ ЖҚБ тезкор вакиллари томонидан олиб борилган тезкор тадбир давомида фош қилинган.

А.Б. дан тегишли тартибда ҳужжатлаштириб олинган АВ0304117 серия рақамли 172 дона 50.000 сўмлик купюра “Давлат белгиси” корхонасида тайёрланмаганлиги ва рангли пуркагичли принтер ёрдамида тайёрланганлиги кўрсатилган.

Мазкур ҳолат юзасидан Касби тумани ички ишлар бўлими тергов бўлими томонидан 2019 йил 19 ноябрь куни А.Б нисбатан жиноят иши қўзғатилиб, тергов ҳаракатлари олиб борилаётгани хабар қилинди.

Жаҳонгир Ортиқхўжаевнинг номзоди Тошкент шаҳар кенгаши депутатлигига кўрсатилди

Тошкент шаҳар ҳокими Жаҳонгир Ортиқхўжаев

Тошкент шаҳар ҳокими Жаҳонгир Ортиқхўжаевнинг номзоди Тошкент шаҳар кенгаши депутатлигига 48-“Тинчлик” сайлов округидан кўрсатилди.

Бу ҳақда хабар қилган qalampir.uzга кўра, Ортиқхўжаевнинг номзоди Тадбиркорлар ва ишбилармонлар ҳаракати Ўзбекистон Либерал демократик партияси томонидан кўрсатилган.

Сайт маълумотларига қараганда, Жаҳонгир Ортиқхўжаев 1975 йилда Тошкент шаҳрида туғилган. Миллати – ўзбек. Маълумоти – олий. 1996 йилда Тошкент давлат иқтисодиёт университетини тамомлаган.

1996-2011 йилларда “Жаҳонгир” МЧЖ директори;

2011-2017 йилларда “Артел Инжиниринг” МЧЖ директори;

2017-2018 йилларда Ўзбекистон Республикаси Вазирлар Маҳкамаси ҳузуридаги “Tashkent city” халқаро ишбилармонлик маркази ҳудудида объектларни қуриш ва улардан фойдаланиш дирекцияси ДУК раҳбари лавозимларида ишлаган.

2018 йилнинг апрель ойидан бошлаб Тошкент шаҳар ҳокими лавозимида фаолият юритиб келмоқда.

Маълумот ўрнида, 2018 йилнинг 1 июль куни бўлиб ўтган сайлов натижаларига кўра, Ўзбекистон либерал-демократик партиясидан Жаҳонгир Ортиқхўжаевнинг номзоди илгари сурилди ва Халқ депутатлари Тошкент шаҳар Кенгашининг депутати этиб сайланди. Унинг номзоди 23-“Мойқўрғон” сайлов округида ЎзЛидеп партиясидан кўрсатилганди.

2018 йилнинг 18 сентябрь куни Жаҳонгир Ортиқхўжаев Ўзбекистон Республикаси Марказий сайлов комиссияси қарори билан Олий Мажлис Сенати аъзоси сифатида рўйхатга олинди.

Давлат органларига хусусийлаштириш натижаларини қайта кўриб чиқиш ташаббуси билан чиқиш тақиқланди

Давлат тасарруфидан чиқариш ва хусусийлаштириш натижаларини, шу жумладан, объектларнинг қийматини баҳолаш натижаларини қайта кўриб чиқиш ва бекор қилиш масалалари юзасидан давлат органлари, шу жумладан, назорат, ҳуқуқни муҳофаза қилувчи органлар ва судлар томонидан ташаббус билан чиқиш хусусий мулкнинг дахлсизлигини бузиш сифатида баҳоланади ҳамда бундай ишлар кўриб чиқиш учун қабул қилинмайди.

Бу меъёр, Адлия вазирлигининг хабар қилишича, мамлакат президенти имзолаган “Мамлакатда бизнес муҳитини янада яхшилаш ва тадбиркорликни қўллаб-қувватлаш тизимини такомиллаштириш чора-тадбирлари тўғрисида”ги қарорда белгилаб қўйилди.

  • Озодлик 2017 йил августида ўша йил январидан бошлаб турли инстанциядаги Ўзбекистон судларининг кейинги 25 йил давомида давлат тасарруфидан чиқарилиб¸ фуқароларга хусусий мулк сифатида сотилган объектларни қайтадан давлат ихтиëрига қайтариш ҳақида қарор чиқариши кўпайиб бораётгани тўғрисида ёзган эди.
  • Озодликка хусусий тадбиркорлардан келаëтган мурожаатларда “президент қарор ва оғзаки топшириқлари” билан оқланаëтган бундай суд қарорларининг Ўзбекистон конституцияси ва қатор қонунлар билан кафолатланган хусусий мулк дахлсизлигига зид экани айтилган эди.

МСК: Депутатликка номзодлар орасида бир неча йил муқаддам вафот этган шахс йўқ

Ўзбекистон Республикаси Марказий сайлов комиссияси (МСК) вафот этган шахс депутатликка номзод сифатида рўйхатга олинганлиги ҳақидаги маълумот тасдиқланмаганини хабар қилди.

МСК 20 ноябрь куни бир неча йил олдин вафот этган шахс депутатликка номзод сифатида рўйхатга олингани тўғрисида ижтимоий тармоқларда пайдо бўлган хабарлар юзасидан текширув бошлаганини маълум қилган эди.

Марказий сайлов комиссиясининг кейинроқ маълум қилишича, бу маълумот ўз тасдиғини топмаган.

15 ноябрда Марказий сайлов комиссияси Олий Мажлис Қонунчилик палатаси депутатлигига партиялардан кўрсатилган номзодларни расман рўйхатга олган.

Олий Мажлис Қонунчилик палатасига ва маҳаллий кенгашларга сайлов 22 декабрда бўлиб ўтади.

Унивеситетларни битираётган педагогларнинг ярми мактабда ишламайди

Бир йилда 20 минг нафарга яқин педагог университетларни битирса, шундан 10 минг нафари педагог бўлиб қолади, қолганлари бошқа соҳага ўтиб кетади.

Бу ҳақда Ёшлар иттифоқи марказий кенгаши раиси Алишер Саъдуллаев баёнот бергани тўғрисида kun.uz хабар қилди.

Саъдуллаевнинг айтишича, Халқ таълими вазирлиги томонидан халқ таълими тизимини 2030 йилгача ривожлантириш концепцияси ишлаб чиқилган бўлиб, унда педагоглар тайёрлаш тизимидаги муаммолар ечими таклиф этилган.

«Масаланинг энг муҳими ечими, ХТВ томонидан ишлаб чиқилган 2030 йилгача мўлжалланган концепция Олий таълим вазирлигининг 2030 йилгача мўлжалланган концепцияси билан мос равишда интеграция қилинсагина, яъни муаммолар биргаликда ҳал қилинсагина, масалага ечим топилиши мумкин. Йўқса у муаммолигича қолиб кетаверади», деган Алишер Саъдуллаев.

ФВВ 25 ноябргача Қамчиқ довони хавфли бўлишидан огоҳлантирди

Қамчиқ довонида қор кўчкиси (Озодлик архивидан)

Фавқулодда вазиятлар вазирлигининг Гидрометеорология хизмати маълумотларига таяниб хабар қилишича, 21-25 ноябрь кунлари А-373 «Тошкент-Ўш» автомобиль йўлининг «Қамчиқ» довони қисмида вақти-вақти билан қор ёғади, туман тушиб, кўринувчанлик 50 м.гача пасаяди, шамол тезлиги секундига 17-22 м.гача кучаяди, йўлда қор уюмлари, яхмалак ҳосил бўлиши кутилмоқда.

Вазирлик шу муносабат билан йўл-транспорт ҳодисалари билан боғлиқ фавқулодда вазиятларнинг олдини олиш мақсадида, довондан ўтувчи ҳайдовчиларга автомобилларнинг техник ҳолатини тўлиқ кўздан кечириш, довон орқали етарли даражада ёқилғи-мойлаш маҳсулотлари билан ҳаракатланиш; автотехникаларнинг қиш мавсумида ҳаракатланиш учун махсус шиналар билан алмаштириш каби тавсияларни берди.

1 кунда 3 туманда 5 киши ис газидан заҳарланиб ҳалок бўлди

Иллюстратив сурат

20 ноябрь куни Сирдарё вилоятининг Боёвут тумани, Тошкент вилоятининг Ангрен шаҳри ва Навоий вилоятининг Хатирчи туманида ўлим билан якунланган ис газидан заҳарланиш ҳолатлари қайд этилди.

Ўзбекистон Бош прокуратураси матбуот хизматига таяниб, gazeta.uzнинг хабар қилишича, учта оила аъзолари қурбон бўлди. Беш киши - уч эркак ва икки аёл ҳаётдан кўз юмди, бир бола шифохонага ётқизилди.

Прокуратура органлари ҳодисалар юзасидан дастлабки тергов ҳаракатларини олиб бораётгани хабар қилинди.

Янги йилдан имтиёзли кредитлар бериш бекор қилинади

Иллюстратив сурат.

Ўзбекистонда 2020 йилнинг 1 январидан имтиёзли равишда кредитлар бериш амалиёти бекор қилинади. Бу ҳақда президент Шавкат Мирзиёев 19 ноябрда имзолаган “Инфляцион таргетлаш режимига босқичма-босқич ўтиш орқали пул-кредит сиёсатини такомиллаштириш тўғрисида”ги фармонда белгиланди.

Айни пайтда фармон билан “фоиз харажатларининг маълум бир қисмини компенсация қилиш механизмларини жорий этиш орқали тижорат банкларига фоиз ставкаларини мустақил белгилаш ҳуқуқи” берилади.

Фоиз ставкалари Марказий банкнинг қайта молиялаштириш ставкасидан кам бўлмаган даражада белгиланади. Лекин ипотекани кредитлаш бўйича давлат дастурлари ҳамда пахта хомашёси ва бошоқли дон экинларини етиштириш учун қишлоқ хўжалиги маҳсулотлари ишлаб чиқарувчи корхоналарга ажратиладиган кредитлар бундан мустасно бўлади.

Айни пайтда Ўзбекистонда қайта молиялашнинг устама ставкаси 16 фоизни ташкил қилади. “Ҳар бир оила тадбиркор” дастури асосида кредитлар 8 фоиз, “Ёшлар- бизнинг келажагимиз” дастури асосидаги кредитлар 7 фоиз устама билан берилади.

Афғонистондаги ота-онасиз қолган болаларга гуманитар ёрдам етказиб берилди

Афғонистонлик болалар.

Ўзбекистондан Афғонистоннинг Мозори Шариф шаҳрига гуманитар ёрдам етказиб берилди. Бу ҳақда “Ўзбекистон темир йўллари” ширкати 20 ноябрь куни хабар берди.

Маълум қилинишича, гуманитар ёрдам ота-она қаровисиз қолган болалар учун бадиий адабиётлар, ўқув қуроллари, кийим-кечак ва спорт жиҳозларидан иборат бўлган.

Гуманитар ёрдамни тўплаш акцияси Ўзбекистон халқаро ёшлар ассоциацияси томонидан «Тинчлик учун!» шиори остида 1 сентябрдан 1 октябргача ўтказилган.

“Мазкур акциядан мақсад жамоатчиликни Афғонистондаги этник ўзбеклар ва ота-онасиз қолган ёшлар муаммоларидан хабардорлигини ошириш бўлган”, дейилади хабарда.

Термизда 700га яқин дайди ит ва мушук йўқ қилинди

Иллюстратив сурат.

Термиз шаҳрида ўтган 10 ой мобайнида 672 та қаровсиз дайди ҳайвон йўқ қилинди. Бу ҳақда шаҳар ҳокимияти «Маҳалла» телеканалининг «Репортёр» дастурида намойиш этилган танқидий лавҳага жавобан маълум қилди.

«Маҳалла» телеканалида 25 октябрда намойиш этилган лавҳада Термиздаги чиқиндихоналарда дайдиб юрган итларнинг тобора кўпайиб бораётгани, бунга мутасадди ташкилотлар бефарқ қараётгани танқид қилинган эди.

“Ҳозирда шаҳар Давлат санитария эпидемология назорати маркази ҳамда маҳалла фуқаролар йиғинлари билан ҳамкорликда қўшимча ишчи кучларини жалб қилган ҳолда дайди ҳайвонларни ушлаш ва йўқотиш ишларини жадаллаштириш билан боғлиқ чора-тадбирлар белгилаб олинди”, дейилади хабарда.

Аввалроқ Бухорода 10 мингга яқин дайди ит ва мушук йўқ қилингани ҳақида хабар берилганди.

Сўнгги 13 йилда биринчи марта ўзбек ва қозоқ футболчилари беллашади

Иллюстратив сурат.

Футбол бўйича Ўзбекистон миллий терма жамоаси Қозоғистон термаси билан сўнгги 13 йилда биринчи марта ўртоқлик учрашуви ўтказади.

Championat.Asia нашрининг 20 ноябрда билдиришича, Ўзбекистон терма жамоаси бош мураббийси Вадим Абрамов бу ҳақда келишувга эришилгани ҳақида маълум қилган.

Абрамов Ўзбекистон футбол ассоциацияси ва Қозоғистон футбол федерацияси учрашувни 2020 йилнинг баҳорида ўтказишни режалаштирганини айтган. У учрашув қайси давлатда ўтишини айтмади.

Аввалроқ қозоқ матбуоти Ўзбекистон ва Қозоғистон футбол расмийлари учрашув ўтказиш масаласида музокаралар ўтказаётганини ва учрашув Тошкентда ўтиши режалаштирилаётганини билдирган эди.

Президент Тошкентда асос солинган IT-паркни бориб кўрди

Шавкат Мирзиёев

Президент Мирзиёев 20 ноябрь куни Тошкентнинг Мирзо Улуғбек туманидаги Дастурий маҳсулотлар ва ахборот технологиялари технологик парки фаолияти билан танишди.

Бу ҳақда хабар қилган ЎзАга кўра, ушбу IT-парк Президентнинг 2018 йилда Ҳиндистонга давлат ташрифи чоғида эришилган келишув асосида, Ўзбекистон Республикаси Ахборот технологиялари ва коммуникацияларини ривожлантириш вазирлиги билан Ҳиндистон Республикасининг Электроника ва ахборот технологиялари вазирлиги қошидаги Дастурий технологиялар парклари жамияти ҳамкорлигида ташкил этилган.

Вазирлар Маҳкамасининг 2019 йил 10 январдаги қарорида технопарк фаолиятини йўлга қўйиш чора-тадбирлари белгиланган, шу мақсадда дирекция тузилган, июлда унинг дастлабки биноси фойдаланишга топширилди.

Мазкур технопарк резидентлари сифатида рўйхатдан ўтган корхоналар 2028 йилнинг 1 январига қадар солиқлар ва божхона тўловларидан озод этилган. Бу соҳа мутахассисларига катта мадад бўлиб, технопаркка қизиқишни оширмоқда. Қисқа вақтда унинг резидентлари сони 300 дан ортди.

2019 йилда 5441 киши Ўзбекистон фуқаролигига қабул қилинди

Президент Шавкат Мирзиёев 2019 йил бошидан буён жами 5441 кишини Ўзбекистон фуқаролигига қабул қилиш тўғрисидаги 25 та фармонни имзолади.

Бу ҳақда хабар қилган ЎзАга кўра, 1991 йилдан 2007 йилга қадар республикада жами 482 нафар фуқаролиги бўлмаган шахс Ўзбекистон фуқаролигига қабул қилинган.

2007 йилдан 2016 йилнинг декабрига қадар эса, бир киши ҳам Ўзбекистон фуқаролигига қабул қилинмаган.

2016 йилнинг декабрида Шавкат Мирзиёев 179 кишига фуқароликни бериш тўғрисидаги биринчи фармонни имзолади.

2017 йилда 10 та фармон билан 1064 нафар шахс, 2018 йилда 15 та фармон билан 2759 нафар шахс фуқароликка қабул қилинди.

Уч йил ичида жами 51 та фармон билан 9443 шахс фуқароликка қабул қилинди.

Айни пайтда, Озодликка келаётган маълумотларга қараганда, Ўзбекистон фуқаролигига қабул қилинишини кутаётганлар кўп. Улардан бирининг хати Озодликнинг SizdanTelegram рукнида 19 ноябрда эълон қилинди.

Яқин қариндошларга тегишли автомобилни ишончномасиз бошқаришга рухсат берилди

Транспорт воситаси эгасининг суғурта полисида кўрсатилган яқин қариндошлари (ота-она, эр (хотин), болалар, ака-укалар, опа-сингиллар) транспорт воситасини нотариал тасдиқланган ишончномасиз бошқаришига рухсат берилди.

Адлия вазирлигининг хабар қилишича, бу тартиб нотариат тизими такомиллаштирилганлиги муносабати билан ҳукуматнинг бир қатор қарорларига киритган ўзгартириш ва қўшимчаларда акс этган.

Янги тартибга биноан транспорт воситаси эгасининг талаби билан суғурта компаниялари томонидан суғурта полисида қариндошлик даражаси кўрсатилади.

Шунингдек, қарор билан суғурта полиси бланкасининг янгиланган шакли тасдиқланди.

Қарор билан Йўл ҳаракати қоидаларига киритилган ўзгартиришларга кўра, ДЙҲХХ органлари томонидан суғурта полисида кўрсатилган яқин қариндошлардан транспорт воситасини бошқариши ҳақида ишончнома ҳамда қариндошликни тасдиқловчи ҳужжатлар талаб қилинмайди.

Ўзбекистон Жанубий Корея инвестициялари ҳимоя қилинишини кафолатлади

Жанубий Корея президенти Мун Чжэ Иннинг 2019 йилнинг 19 апрелда Тошкентда кутиб олиниши.

Президент Шавкат Мирзиёев Ўзбекистон ва Корея Республикаси ҳукумати ўртасида инвестицияларни ўзаро рағбатлантириш ва ҳимоя қилиш тўғрисидаги битимни тасдиқлади.

Мазкур битим икки давлат ўртасида 2019 йилнинг 19 апрелда Жанубий Корея президенти Мун Чжэ Иннинг Ўзбекистонга расмий ташрифи доирасида имзоланган эди.

Халқаро ҳуқуқ меъёрларига асосан бу каби битимларда шартнома тарафлари инвестицияларини ҳар томонлама ҳуқуқий жиҳатдан ҳимоя қилиш, ётқизилган сармояларни миллийлаштиришни тақиқлаш, тўловларни ўтказишда эркинлик бериш, инвесторларга етказилган зарарни қоплаш ҳамда давлат ва инвесторлар ўртасидаги низоларни ҳал этиш каби мажбуриятларни ўз зиммаларига оладилар.

Ўзбекистон бундан аввал бу каби битимларни Россия, Тожикистон, Қозоғистон, Хитой каби давлатлар билан имзолаган.

Нурободда газ ташувчи MAN портлаши оқибатида яна 6 автомашина ёниб кетди

«Тимур ГАЗ» МЧЖга тегишли автомашиналар тураргоҳида ёнган машиналар. Тергов департаменти фотосуратлари.

Самарқанд вилояти Нуробод туманидаги автомашиналар тураргоҳида суюлтирилган газ ташишга мўлжалланган MAN юк машинаси портлаши ортидан яна олтита автомашина ёниб кетди.

Ички ишлар вазирлиги ҳузуридаги Тергов департаментининг хабар беришича, 20 ноябрь куни «Самарқанд—Ғузор» автомобиль йўлининг 33-километрида жойлашган «Тимур ГАЗ» МЧЖга тегишли автомашиналар тураргоҳида суюлтирилган газ ташишга мўлжанланган MAN русумли юк атомашинаси номаълум сабаларга кўра ёна бошлаган.

Ёнғин оқибатида юзага келган портлаш оқибатида автотураргоҳда турган суюлтирилган газ ташиш учун мўлжанланган 2 та MAN, 1 та «ЗИЛ» , «ДАФ» ва «ЗИЛ» русумли юк автомашиналари, Hyundai русумли экскаватор ёниб кетган.

Ҳодиса содир бўлган жойга тергов-тезкор гуруҳи, ФВВ ходимлари ва тез тиббий ёрдам автомашиналари жалб қилинган.

Дастлабки маълмотларга кўра, ҳайдовчиларнинг бир нафари тан жароҳати олиб шифохонага мурожаат этган.

Ҳозирда ёнғин келиб чиқиш сабаби аниқланмоқда.

Давомини ўқинг

XS
SM
MD
LG