Линклар

Шошилинч хабар
30 июн 2022, Тошкент вақти: 18:44

Халқаро хабарлар

Лука Модрич Криштиану Роналдуни ортда қолдириб, "Олтин тўп" соҳиби бўлди

Хорватиялик футболчи Лука Модрич.

Хорватиялик футболчи Лука Модрич 2018 йил учун «Олтин тўп» соҳиби бўлди. У «Олтин тўп»га номзод бўлган Криштиану Роналду ва Антуан Гризманни ортда қолдирди.

Хорватия терма жамоаси ва Мадриднинг «Реал» клуби ярим ҳимоячиси бўлган Лука Модрич май ойида «Реал» таркибида Чемпионлар Лигаси ғолиби бўлган. Июль ойида эса Хорватия терма жамоаси таркибида финалга чиққан.

Ноябрь ойида ФИФА Лука Модрични «Йил ўйинчиси» деб эълон қилган эди.

2008 йилдан бери то шу кунгача Криштиану Роналду ва Лионелю Месси беш мартадан «Олтин тўп»га эгалик қилган. Жорий йилда Роналду иккинчи, Месси эса бешинчи ўринни олди.

"Олтин тўп" мукофоти 1956 йилда France Football журнали томонидан таъсис этилган. Мазкур мукофот совриндори спорт журналистлари ўртасида ўтказиладиган овоз бериш орқали аниқланади.

2010 йилдан бошлаб “Олтин тўп” “ФИФАнинг энг яхши йил ўйинчиси” мукофоти билан бирга берила бошланган ва соврин номи “ФИФА Олтин тўпи”, деб ўзгартирилган эди. Бироқ 2016 йилдан бошлаб France Football ФИФА билан ҳамкорликни тўхтатди ва “Олтин тўп”ни мустақил равишда бера бошлади.

Кун янгиликлари

Франция президенти: Россия Украина билан урушда ғалаба қозонмаслиги шарт

Франция президенти Макрон НАТО саммитида нутқ сўзламоқда.

Россия Украина билан урушда ғалаба қозонмаслиги шарт, негаки бу Европа Иттифоқи хавфсизлиги учун таҳдид бўлади. Франция президенти Эммануэль Макрон НАТОнинг Мадридда ўтаётган саммитида мана шундай баёнот берди.

Макрон саммит иштирокчиларига НАТО шарқий йўналишда ўз кучларини кучайтириш тўғрисида қарор қабул қилганини ва бу қарор Москва таҳдидлари ортидан қабул қилинганини эслатиб ўтди.

Макрон фикрича, Россиянинг Украинага уруш очганини, Кремль иддао қилганидай, НАТОнинг Россияга агрессия қилиши эҳтимоли билан оқлаб бўлмайди.

Франция президенти ўз нутқи давомида Европа Иттифоқи Россиядан нефть ва газ сотиб олишни қисқартириш мақсадида ўз ички энергетика бозорини ислоҳ қилиши зарур.

Бундан аввал Макрон 15 июнь куни Украина президенти ва ушбу мамлакатнинг бошқа вакиллари “қачондир” Россия билан сулҳ музокаралари олиб боришига тўғри келиши ҳақида гапирган эди. Макроннинг бу каби баёнотлари Киевда норозилик уйғотган.

НАТО Бош котиби Столтенберг жорий саммит натижаларига баҳо берар экан, уни тарихий дея баҳолади. Унга кўра, НАТОга аъзо давлатлар лидерлари саммити кўп нарсаларни ўзгартирди. Жумладан, Россия иттифоққа таҳдид солувчи давлат сифатида тан олинди.

Саммитда Украинани бундан буён ҳам қўллаб-қувватлаш тўғрисида қарор қабул қилинди. Саммит иштирокчилари Украинага яқин кунларда яна 400 миллион евролик ёрдам кўрсатишга келишиб олди.

Бундан ташқари саммитда НАТОни кенгайтириш тўғрисидаги қарор маъқулланди. Россия Украинага бостириб кирганидан сўнг Швеция ва Финляндия ташкилотга аъзо бўлишга ариза берди.

НАТО аъзоси бўлган Туркия дастлаб бунга қарши чиқди, аммо 28 июнда Анқара бу икки давлат билан муросага эришди. Швеция ва Финляндиянинг НАТОга аъзо бўлиши тўғрисидаги протокол 5 июль куни имзоланиши кутилмоқда.

ОАВ: Honor Россияга смартфонларни Ўзбекистон орқали экспорт қилмоқчи

Хитойнинг смартфонлар ишлаб чиқарувчи Honor ширкати ўз маҳсулотини Россия бозорига тўғридан-тўғри экспорт қилишни тўхтатди, деб хабар берди Москванинг “Ведомости” нашри 30 июнь куни.

Нашр бу маълумотни Honor ширкати дистрибюторларидан биридан олганини, Honor бу борада “Ведомости” сўровига жавоб қайтармаганини таъкидлаган.

Хабарда айтилишича, Honor март ойидаёқ экспортни тўхтатгани аниқ бўлган. Айни пайтда ширкат ўз маҳсулотини Россияга “параллел импорт” қилиш учун Арманистон ва Грузиядан ҳамкор изламоқда.

“Параллел импорт доирасида смартфонларни Россияга экспорт қилиш борасида Ўзбекистон билан келишувга эришилди”,-деб айтган “Ведомости” манбаси.

Нашрнинг ёзишича, Honor “паралел импорт”ни ташкил қилиш ортидан АҚШ санкцияларини четлаб ўтишни кўзламоқда.

Ўзбекистон томони ҳозирча бу хабарга муносабат билдирмади. Аввалроқ АҚШ Россиянинг “Радиавтоматика” ширкатига микросхемалар сотган ва бу билан ширкатга санкцияларни четлаб ўтишга кўмаклашган Ўзбекистоннинг Promcomplektlogistic компаниясини санкциялар жорий этилган корхоналар рўйхатига киритгани хабар қилинган эди.

Россия Бош вазири Михаил Мишустин 30 март куни “параллел импорт” учун жавобгарликни бекор қилиш тўғрисидаги қарорни имзолаган. Бироқ Давлат думаси “параллел импорт”га рухсат берувчи қонунни 21 июнда тасдиқлади. “Параллел импорт” деганда маҳсулотларни Россияга ишлаб чиқарувчининг ва маҳсулотни ишлаб чиқариш ҳуқуқига эга бўлган шахснинг рухсатисиз олиб кириш тушунилади.

Иқтисодчиларнинг билдиришича, 2022 йилнинг иккинчи чорагида Honor Россия смартфон бозорида 4,2 фоиз улушга эга бўлган ва 5-ўринни эгаллаган.

Қозоғистон: Январь воқеаларида қўлга олинган олти киши қийноқлар оқибатида ўлган

Январь воқеалари пайтида Толдиқўрғон шаҳрида собиқ президент Нурсултон Назарбоев ҳайкали қулатилган эди.

Қозоғистонда Январь воқеалари пайтида қўлга олинганлардан олти нафари қийноқлар оқибатида ҳалок бўлгани тўғрисида 29 июнь куни Бош прокурор ўринбосари Асет Чиндалиев хабар берди.

Унга кўра, қўлга олинганларни ҳибсда қийноққа солганликда гумонланган Миллий хавфсизлик қўмитасининг 8 зобити ва бир нафар полиция ходими қамоққа олинди. Бундан ташқари яна 15 зобит “митингга чиққан одамларни қийнаган”ликда ва “уларни ноқонуний равишда сўроқ қилган”ликда гумонланмоқда.

Аввалроқ Бош прокуратура Январь воқеаларида қўлга олинган 25 киши қийноққа солингани тасдиқлангани, терговчилар уларнинг танасига иссиқ дазмол босгани ҳақида билдирган.

Бош прокурор ўринбосари Асет Чиндалиев январдаги тартибсизликлар пайтида 232 киши ҳалок бўлганини айтди.

Бундан аввал қозоқ ҳукумати 230 киши ҳалок бўлгани, уларнинг 19 нафари ҳуқуқ-тартибот ходими эканини билдирган. Биргина Олмаотанинг ўзида 149 тинч фуқаро ўлгани айтилади.

Манғистау вилоятининг Жанаўзен шаҳри аҳолиси 2 январь куни газ нархи қимматлаганига норозилик сифатида намойишга чиқан эди. Кейинроқ бу намойишлар бутун мамлакатга ёйилди. 5 январдан сўнг қатор шаҳарларда, жумладан, Олмаотада намойишлар тартибсизликларга айланиб кетган ва ўқ отилган.

БМТ Украинанинг 30 шаҳрида тинч аҳоли ўлдирилганини тасдиқлади

БМТнинг Инсон ҳуқуқлари бўйича бошқармаси мониторинг хизмати Украинадаги урушда инсон ҳуқуқлари бузилишига оид ҳисоботни 29 июнь куни эълон қилди. Ҳисоботда 24 февралдан 15 майгача бўлган давр қамраб олинган.

Мазкур давр мобайнида БМТ экспертлари Украинада тинч аҳолидан 3924 киши ҳалок бўгани ва 4444 киши яраланганини аниқлаган. Ҳисоботда қурбонлар сони бундан кўпроқ экани, ҳисоботга фақат тасдиқлашга мувофиқ бўлинган рақамлар киритилгани қайд этилади.

БМТ экспертларига кўра, Украинанинг 30 та шаҳрида берилган қурбонлар учун Россия томони масъул экани таҳмин қилинади. Жумладан, Россия ҳарбийлари томонидан қочқинлар кетаётган автомобиллар ўққа тутилган.

“Биргина Буча шаҳрида Россия уни назорат қилиб турган пайтда 50 киши ўлдирилгани тасдиқланди”,-дейилади ҳисоботда.

БМТ, шунингдек, 108 та жинсий зўравонлик ҳолатлари тасдиқланганини, улардан 78 таси бевосита жинсий зўрлаш эканини билдирди. 23 ҳолатда гуруҳ бўлиб зўрлаш, қийноққа солиш ҳолатлари содир этилган. Зўрланганлар орасида эркаклар ҳам бор.

Жинсий зўрлашларнинг 87 таси Россия ҳарбийлари томонидан амалга оширилгани тасдиқланди. Айни пайтда Украина ҳарбийлари, ҳудудий мудофаа бўлинмалари ва украин ҳуқуқ-тартибот тузилмалари томонидан ҳам жинсий зўрлаш ҳолатлари бўлган.

Ҳисоботда ҳар икки томонда ҳарбий асирларга ноинсоний муносабатда бўлингани, судсиз қатллар, қийноқлар содир этилгани ва тегишли даражада тиббий ёрдам кўрсатилмагани ҳам қайд этилган.

Ҳарбий ҳаракатлар натижасида 182 та тиббиёт ва 230 та ўқув муассасаси вайрон этилган. БМТ экспертлари Россия босиб олган ҳудудларда одамларни ўғирлаш ҳолатлари кўпайганидан ташвиш билдирган. Экспертлар Россия босиб олган ҳудудларда 248 киши ўғирлангани тасдиқланганини, улардан 6 нафари (бир аёл ва беш эркак) ўлик ҳолда топилганини маълум қилди.

Мониторинг хизмати Украина ҳуқуқ-тартибот ходимлари томонидан 12 киши ўғирланганини ҳам таъкидлаган.

БМТнинг билдиришича, июнь ойи охирига келиб Украинада тинч аҳолидан 4731 нафари ҳалок бўлган, 5900 киши яраланган. Ҳалок бўлганлар орасида 289 нафари болалардир.

Париж суди 2015 йилги террор ҳужумларига оид иш бўйича ҳукм чиқарди

2015 йил 13 ноябрида Парижда содир этилмиш террор хуружида айбланганлар

Париждаги Адлия саройида 29 июнь куни 2015 йили Франция пойтахтида содир этилган террор хуружларига оид иш бўйича ҳукм ўқилди. Йигирма айбланувчидан ўн тўққиз нафари айбловнинг барча бандлари бўйича айбдор деб топилди, уларга бир неча йилдан умрбод қамоққача бўлган жазолар тайинланди.

2015 йил 13 ноябрида орасида ҳудкушлар бўлган бир гуруҳ жиҳодчи “Стад де Франс” стадиони атрофида қатор террор хуружларини амалга оширган эди. Хусусан, ҳудкуш стадионга киришда портлатиш мосламасини ишга туширган. Шундан сўнг унинг шериклари ён-атрофдаги хўрандалар билан тўла қаҳвахона ва ресторанларга қарата ўт очганлар, кейин эса рок-концерт бўлаётган “Батаклан” мусиқа клубига бостириб кириб, томошабинларни гаровга олганлар. Портлашлар ва отишма натижасида 130 киши нобуд бўлган, 350 киши яраланган. Бу Францияда Иккинчи жаҳон урушидан сўнг юз берган энг йирик террорчилик акти саналади.

2021 йил сентябрида бошланган суд эса замонавий Франция тарихидаги энг катта маҳкама жараёни бўлди. Суд давомида бир миллион саҳифадан зиёд гувоҳликлар тақдим қилинган, 2.5 минг даъвогар гувоҳлик кўрсатмаси берган, ишда жами 300 нафар адвокат қатнашган.

Террорчилик хуружларининг тирик қолган ягона иштирокчиси Салаҳ Абдеслам муддатидан олдин озодликка чиқиш имконияти истисно қилинган ҳолда умрбод қамоқ жазосига ҳукм этилган. Бундай ҳукм Франция тарихида бор-йўғи бешинчи марта чиқарилган. Бельгияда туғилган, Франция фуқароси бўлмиш Абдеслам сўнгги сўзида ҳужумлар учун “Ислом давлати” гуруҳи жавобгар экани, ўзи эса “гуруҳ аскари эканидан фахрланиши”ни айтган.

Яна 18 нафар экстремист террор хуружларига ҳозирлик кўришда иштирок этганликда айбдор деб топилиб, турли муддатларга қамалган (олти нафари – сиртдан). Судланувчилардан бири – Фарид Хархашга қўйилган айблов тасдиқланмаган, бироқ у фирибгарлик мақсадида жиноий тил бириктирганликда айбдор деб топилган.

Путин Кременчуг воқеаси ҳақида: Россия фуқаровий объектларга зарба бермайди

Кременчугдаги савдо маркази вайроналари

Президент Владимир Путин Россия томонидан 27 июнь куни Украинанинг Кременчуг шаҳрига йўлланган ва камида 20 киши умрига зомин бўлган ракета зарбаси юзасидан изоҳ берди. Путинга кўра, Кременчугда ҳеч қанақа террорчилик хуружи бўлмаган, Россия армияси эса фуқаровий объектларга зарба бермайди.

Путин ўз сўзида Россия ҳарбийлари илгари Украинанинг фуқаровий объектларини ўққа тутишганини тан олган, аммо, унинг айтишича, бунақа объектлар – ёнида қурол-аслаҳа ва ҳарбий техника жойлаштирилгани сабабли нишонга айланган. “Бизда ҳеч ким шунчаки, “дуч келган жой”ни ўқ тутмайди”, деган президент.

Путин бу фикрларини Ашхободда, Каспий саммити якунланганидан сўнг журналистлар билан мулоқот чоғида айтган. Бу унинг Украинада уруш бошланганидан бери илк хорижий сафаридир.

Украина ҳукумати Россияни Кременчугдаги савдо марказига қасддан зарба беришда айблаб, буни террорчилик деб атамоқда. Россия ракетаси портлаганидан сўнг савдо марказининг бир қисми вайрон бўлган ва ёниб кетган. Россия Мудофаа вазирлиги Кременчугга зарба йўлланганини тан олган, бироқ бу зарба қурол-аслаҳа омборига йўналганини, савдо маркази эса снарядлар портлаши оқибатида ёниб кетганини иддао қилган. Аммо кўча камераларидан олинган видеода ракеталардан бири савдо марказининг ёнгинасига келиб тушганини кўриш мумкин.

Путин илгари Буча аҳолиси қатлиом қилинганини ҳам инкор этган, Россия ҳарбийлари эса Мариуполдаги туғруқхона ва драма театри биноларига зарбалар берилганига доир хабарларни “фейк” деб аташган.

Путин Ашхободдаги мулоқот чоғида Украинадаги “махсус ҳарбий амалиёт” режа бўйича кетаётганини, амалиёт мақсадлари эса ўзгармаганини билдирган.

АҚШ Россия Марказий банки ва олигархларининг 330 миллиард долларлик активларини музлатиб қўйди

АҚШ расмийлари томонидан ҳисбга олинган Amadea суперяхтаси (иллюстратив сурат)

АҚШ Молия вазирлиги Россия Марказий банки ва россиялик олигархларга тегишли 330 миллиард долларлик активларни музлатиб қўйган.

Вазирлик сайтида маълум қилинишича, бу иш билан АҚШ Молия вазирлиги қошида ташкил этилган Россия активларини қидириб топиш бўйича гуруҳ (REPO) шуғулланган. АҚШ молия ва адлия вазирларидан ташқари мазкур гуруҳга Еврокомиссия, Британия, Канада, Австралия, Германия, Италия, Франция ва Япония вакиллари кирган.

Баёнотда қайд этилишича, бир неча мамлакат вазирлик ва идораларининг 100 кунлик саъй-ҳаракатлари натижасида REPO вакиллари қуйидагиларга эришганлар:

Россия Марказий банкининг 300 миллиард долларлик активларини музлатиш;

Россиялик олигархларга тегишли 30 миллиард доллардан кўпроқ активларни музлатиш ёки блокировка қилиш;

Олигархларга ёки уларга алоқадор шахсларга тегишли яхталарни (Amadea, Tango, Amore Vero, Rahil ва Phi кабилар шулар жумласидан) ҳибсга олиш, блокировка қилиш ёки тўхтатиб қолиш;

Олигархларга қарашли виллалар, ҳашаматли уйлар ва бошқа кўчмас мулк объектларини ҳибсга олиш;

Россиянинг глобал молия тизимларидан фойдаланиш имкониятларини чеклаш, бу Москванинг Украинада ҳарбий ҳаракатлар олиб бориши учун зарур бўлган технологиялардан фойдаланишни сезиларли даражада қийинлаштирган.

АҚШ Молия вазирлиги REPO гуруҳи россиялик олигархлар активини қидириш бўйича фаолиятини давом эттиришини таъкидлаган. Россиялик олигархларга қарши чоралар кўрилиши ҳақида аввалроқ президент Жо Байден ҳам билдирган эди.

НАТОнинг янги концепциясида Россия “хавфсизликка тўғридан-тўғри таҳдид солувчи” мамлакат ўлароқ эътироф этилди

НАТОнинг Мадрид саммити иштирокчилари, 2022 йил 29 июни

НАТОга аъзо мамлакатлар янги стратегик концепцияни маъқуллашди – унда Россия “хавфсизликка тўғридан-тўғри таҳдид солувчи” мамлакат деб аталган.

“У [Россия] мажбурлаш, қўпорувчилик ҳаракати, тажовуз ва аннексия йўли билан таъсир ва бевосита назорат доираларини барпо этишга уринмоқда. Унинг ўз сиёсий мақсадларига эришиш учун куч ишлатишга ҳозирлиги, риторикаси ва мажбурловчи ҳарбий позицияси таомилларга асосланган халқаро тартибни емирмоқда”, дейилган ҳужжатда.

Янги стратегик концепцияда НАТО Россия билан низолашишга интилмаётгани ва унга хавф туғдирмаслиги урғуланган, айни пайтда ташкилот “Россия тажовузи ва унинг душманона хатти-ҳаракатларига жавоб беришда давом этиши” қайд этилган. Янги концепция 2030 йилгача амалда бўлади.

НАТОнинг Мадрид саммити декларациясида альянсга аъзо давлатлар Россиядан Украинадаги урушни зудлик билан бас қилишни, Беларусдан эса "бу урушда иштирок этиш"ни тўхтатишни талаб қилишган.

Саммитда НАТО давлатлари Финляндия ва Швецияга расман аъзолик таклиф қилишга қарор қилишган.

Филиппин ҳукумати Нобель лауреати Мария Рессанинг сайтини ёпди

Мария Ресса.

Филиппин ҳукуматининг қимматбаҳо қоғозлар ва биржалар бўйича комиссияси Нобель Тинчлик мукофоти лауреати Мария Рессанинг Rappler интернет нашрига берилган лицензияни бекор қилиш тўғрисидаги 2018 йилда чиқарилган қарорни тасдиқлади. Бу ҳақда ОАВга Рессанинг ўзи хабар берди.

Комиссия 2018 йилдаги қарорида Rappler нашри хориж фуқароси маҳаллий оммавий ахборот воситасига эгалик қила олмаслиги тўғрисидаги қонунни бузганини билдирган. Комиссиянинг таъкидлашича, 2015 йилда нашр eBay асосчиси Пьер Омидьярга тегишли фонддан маблағ олган. Ўшанда комиссия Омидьяр нашр устидан назоратни қўлга киритмаслиги шарти билан бунга рухсат берган. 2018 йилда эса битим бўйича муаммолар пайдо бўлган пайтда Омидьяр Rappler акцияларини нашр ходимларига қайтарган.

Ресса Rappler нашрини ёпмаслигини ва бу қарор устидан судга шикоят киритишини билдирди.

Rappler нашрини ёпиш тўғрисидаги қарор одамларни судсиз қатл қилиш ва мухолифатчиларга босим кўрсатиши билан танилган Филиппин президенти Родриго Дутерта ваколатлари якунланишига бир кун қолганида тасдиқланди.

Филиппин ҳукумати 2012 йилда асос солинган Rappler нашрини узоқ йиллардан бери ёпишга ҳаракат қилиб келади. Ҳукумат Рессани солиқларни тўлмаганликда, тухмат қилишда, қатор қонунларни бузганликда айблаб келади. Бунинг ортидан Ресса 6 йилга қамалган. Айни пайтда у гаров эвазига қамоқдан озод қилинган.

Мария Ресса 2021 йилда Россиядаги “Новая газета” бош муҳаррири Дмитрий Муратов билан биргаликда Нобель Тинчлик мукофотига сазовор бўлган эди. Россия Украинага уруш очганидан сўнг ҳукумат “Новая газета”га нисбатан босимни кучайтирган ва нашр ўз фаолиятини тўхтатишга мажбур бўлганди.

Июнь ойида Дмитрий Муратов Нобель мукофоти медалини 103, 5 миллионга ким ошди савдосида сотди ва пулни Украина болаларига кўмак кўрсатиш мақсадида ЮНИСЕФга ўтказиб берди.

Болгария Россия элчихонасининг 70 ходимини мамлакатдан бадарға қилмоқда

Болгариядаги Россия элчихонаси.

Болгария Россиянинг 70 дипломатини ва элчихонанинг техник ходимларини мамлакатдан бадарға қилмоқда. Бу ҳақда ТАССга Россиянинг Болгариядаги элчихонаси хабар берди.

Болгариядан бадарға қилинаётган дипломатлар орасида элчининг маслаҳатчиси, Варна ва Рус шаҳарларидаги Россия консуллари, маданий-ахборот маркази директори ҳам бор. Рус шаҳридаги Россия консулхонасининг барча дипломатлари ҳам Болгариядан чиқарилади. Россия элчихонаси Варнадаги консулхона деярли ходимларсиз қолганини билдирди.

Болгария Бош вазири Кирил Петковнинг айтишича, Россия димпломатлари жосусликда гумонланмоқда.

“Бизнинг хизматлар уларнинг Россия махсус хизматлари билан алоқадор шахслар эканини ва мамлакатимиз манфаатларига зид равишда фаолият юритганларини аниқлади”, - деди Петков Болгария миллий телеканалига берган суҳбатида.

ТАССнинг Россия Ташқи ишлар вазирлигидаги манбаси Москва Софиянинг бу ҳаракатига жавоб қайтаришини айтди.

22 июнда Болгария парламенти Петков раислигидаги ҳукуматга ишончсизлик билдирган эди. Шундан сўнг Петков бунинг учун бир қатор сиёсатчилар, жумладан, Россиянинг Болгариядаги элчиси Элеонора Митрофанова айбдор экани тўғрисида баёнот берган.

Европапараст Петков ярим йил олдин Бош вазир лавозимига тайинланган эди. Болгария Россия билан тарихий ва мустаҳкам алоқаларга эга бўлганига қарамай, Петков Кремль Украинага уруш очганини кескин қоралади ва бу масалада ЕИ ҳамда НАТО позициясини қўллаб-қувватламоқда.

Россиянинг Қирғизистондаги элчихонаси дарвозасига қизил бўёқ суртиб кетилди

Россиянинг Бишкекдаги элчихонаси.

Россиянинг Қирғизистондаги элчихонаси дарвозасига қизил бўёқ суртиб кетган шахс қидирилмоқда, деб билдирди 29 июнь куни Озодлик радиоси қирғиз хизматига Бишкек шаҳар Биринчи май туман ички ишлар бошқармаси.

Милициянинг билдиришича, воқеа 27 июнга ўтар кечаси содир этилган. Номаълум шахс элчихона дарвозасига қизил бўёқни сочиб юборган ва қочиб кетган.

Февраль ойининг охирларида Россия Украинага бостириб кирганидан сўнг хориж мамлакатларидаги рус элчихоналарининг айримларига қизил бўёқлар суртиб кетилган эди.

Қирғизистон Россия-Украина урушида бетараф позицияни эгалламоқда.

Россиянинг Бишкекдаги элчихонаси олдида бунга қадар бир неча марта фаоллар урушга қарши норозилик акциялари ўтказган эди. Шундан сўнг Бишкекда 1 июлга қадар Россия-Украина урушига норозилик тарзида тинч йиғилишлар ва митинглар ўтказиш тақиқланди.

Хитой -Қирғизистон-Ўзбекистон темир йўлининг Қирғизистондан ўтувчи маршрути аниқланди

Қирғизистон ҳукумати 28 июнь куни ўтган йиғилишда Хитой -Қирғизистон-Ўзбекистон темир йўлининг Қирғизистондан ўтувчи маршрути аниқлангани тўғрисида маълум қилди.

Транспорт ва коммуникациялар вазири Эркинбек Осоевнинг ҳукумат йиғилишида билдиришича, темир йўлнинг Қирғизистондан ўтувчи қисми Тўруғарт-Мақмал-Жалолобод йўналишида бўлади. Жалолобод орқали йўл Ўзбекистонга ўтади. Вазир мазкур йўналишнинг техник-иқтисодий аниқламасини ишлаб чиқиш декабрь ойигача якунланишини айтди.

Май ойининг ўрталарида ўтган ҳукумат йиғилишида Қирғизистон Министрлар кабинети раиси Ақилбек Жапаров расман Хитой-Қирғизистон-Ўзбекистон темир йўлининг қурилиши шу йил кузида бошланишини эълон қилганди. Қирғиз Бош вазири шартнома Ўзбекистон, Қирғизистон ва Хитой лидерлари томонидан жорий йилнинг сентябрида Тошкентда ўтказиладиган Шанхай ҳамкорлик ташкилотининг навбатдаги саммитида имзоланиши кутилаётганини билдирган.

27 майда Ўзбекистон президенти Шавкат Мирзиёев Евросиё иқтисодий кенгашининг онлайн тарзда ўтган йиғилишида Хитой-Қирғизистон-Ўзбекистон темир йўли қурилиши “яқин кунларда” бошланишини тасдиқлаганди.

“Яқинда биз Ўзбекистон-Қирғизистон-Хитой темир йўли қурилишини бошлашни режалаштирмоқдамиз. Лойиҳа Осиё – Тинч океани ҳудудидаги бозорларга чиқиш учун қўшимча имкониятларни пайдо қилади. Бу йўналиш Шарқ-Ғарб йўналишида мавжуд бўлган темир йўл линияларини тўлиқлайди”,- деди Мирзиёев.

Хитой, Қирғизистон ва Ўзбекистон бош вазирлари 1997 йилнинг 21 июлида Қирғизистон-Хитой чегарасидаги “Эргаштом” чегара пунктини очиш маросимида қатнашган эди. Ўшанда бу уч давлат расмийлари яқин орада Андижон-Ўш-Қошғар автомобиль йўли очилишини эълон қилган, аммо бу йўл 2018 йилга келибгина очилди. Ўшанда бери расмийлар темир йўл “яқинда” очилишини ваъда қилиб келмоқда.

Ўзбекистон-Қирғизистон-Хитой темир йўли Хитойни Марказий Осиёга боғловчи тугалланмаган икки лойиҳанинг бири. Иккинчиси Туркманистон-Хитой табиий газ қувури лойиҳасининг D линиясидир.

Бурятияда ҳарбийларнинг хотинлари эрларини Украинадан қайтаришни талаб қилишмоқда

Эрларини Украинадаги урушдан қайтаришни сўраб республика раҳбариятига мурожаат қилган бурятиялик аёллар

Бурятияда ҳарбий хизматчиларнинг хотинлари эрларини уйга қайтаришни илтимос қилиб, республика раҳбари Алексей Циденовга мурожаатнома йўллашди. Ҳарбийлар январь ойида “машқлар”га жўнаб кетишган, аммо ҳозир улар Украинада, дея маълум қилди акция иштирокчиларидан бири бўлмиш Вера Партилхаева Озодликнинг “Сибир.Реалии” лойиҳасига.

“Улар 24 февралдан бери махсус амалиётда қатнашишмоқда. Руҳий ва жисмоний жиҳатдан ҳолдан тойишган. Ҳаммалари енгил ва ўртача контузия олганлар”, дейишган камера қаршисида ҳарбийларнинг аёллари.

Уларга кўра, аскарлар тўрт ойдан бери ҳарбий-дала шароитида яшаб келишяпти, кўпчилиги шамоллаган.

“Бунақа гапларни телевидениеда айтишмайди! Қўрқишади, чунки “овозингни чиқарма!” деб буйруқ беришган. Бу адолатсиз урушдаги ҳар бир ҳарбийнинг ўлими сизларнинг виждонингизга ҳавола! Биз ўғилларимиз ва эрларимиз ватанга қайтарилишини талаб қиламиз”, деб ёзган Верта Партилхаева ижтимоий тармоқдаги саҳифаси орқали Бурятия раҳбари Алексей Циденовга мурожаат қиларкан.

Унинг айтишича, мурожаатномага Тациндаги бешинчи танк бригадасида хизмат қилувчи ҳарбийларнинг хотинлари имзо чекишган. Манбаларда ушбу бригаданинг камида 30 нафар аскари ҳалок бўлгани айтилади.

“Сибирь.Реалии” маълумотига кўра, бурятиялик 184 аскарнинг ўлими тасдиқланган. Республика қурбонлар сони бўйича Россия ҳудудлари орасида иккинчи ўринда турибди. Россия Мудофаа вазирлиги ушбу маълумотларга расман изоҳ берган эмас. Бурятиялик аёллар мурожаатига ҳам ҳукумат вакиллари томонидан ҳали муносабат билдирилганича йўқ.

Зеленский: “Россиянинг БМТ Хавфсизлик кенгашида қолишга ҳаққи йўқ”

Зеленскийнинг БМТ Хавфсизлик кенгаши аъзоларига мурожаатидан лавҳа, 2022 йил 28 июни

АҚШнинг Нью-Йорк шаҳрида 28 июнь куни БМТ Хавфсизлик кенгашининг фавқулодда йиғилиши бўлиб ўтди. У Россиянинг Кременчугдаги савдо марказига ракета зарбаси йўллаши муносабати билан Украина илтимосига кўра чақирилган эди.

Йиғилишда Украина президенти Владимир Зеленский Хавфсизлик кенгашига видеоалоқа воситасида мурожаат қилди. У ўз нутқида Россия БМТнинг тамал принципларини ва умуман халқаро ҳуқуқий тартибни мунтазам бузиб келаётгани сабабли уни БМТ Бош ассамблеясида овоз бериш ҳуқуқидан ҳамда Хавфсизлик кенгаши доимий аъзолигидан маҳрум этишга чақирди.

Зеленский Россия Украинада олиб бораётган урушни “мустамлакачилик уруши” деб атади ва Москва БМТдаги мазкур урушга доир масалалар бўйича овоз бериш жараёнида қатнашмаслиги лозимлигини таъкидлади.

Бундан ташқари, Зеленский БМТни “террорчи давлат” юридик мақомини жорий этишга чорлади. Зеленский фикрича, бундай мақомга эга барча мамлакатлар жазоланмоғи шарт: “Мен сизларни террорчи давлатни БМТ Бош ассамблеясидаги ваколатлардан маҳрум этишга чақираман. Бу жуда зарур. Ва бу адолатли қарор бўлади. БМТ Хавфсизлик кенгашида қолишга Россиянинг ҳаққи йўқ”, деди Украина президенти.

Айни пайтда БМТ бирон давлатга қарши санкциялар жорий этиб, унинг активларини музлатиши, қурол-аслаҳаси, технологиялари ёки маҳсулотларига эмбарго қўйиши мумкин.

Зеленский Россиянинг Кременчугдаги воқеалар бўйича расмий талқинига ва кремлпараст ОАВ ҳамда телеграм-каналларда ёйилаётган талқинларга ҳам муносабат билдирган: “Мен БМТга Кременчугдаги воқеа жойига бориб, бу ростдан ҳам Россия ракетаси зарбаси эканини тасдиқлаши учун Бош котибнинг махсус вакили ёки бошқа вакилни Украина юборишни таклиф этаман”, деган у.

Украина президенти илтимосига кўра, унинг нутқидан сўнг БМТ Хавфсизлик кенгаши Россиянинг Кременчугга ракета ҳужуми қурбонлари хотирасига бир дақиқа сукут сақлаган.

Йиғилиш бошланишидан олдин Хавфсизлик кенгашининг олти аъзоси – АҚШ, Албания, Буюк Британия, Ирландия, Норвегия ҳамда Франция махсус баёнот эълон қилиб, унда Россия томонидан 2022 йил 25-27 июнь кунлари Украина ҳудуди бўйлаб турар-жой мавзелари ва фуқаровий инфратузилма объектларига фаол ракета зарбалари берилганини кескин қоралаган. Баёнотда мазкур зарбалар оқибатида тинч аҳоли вакиллари нобуд бўлгани фактларига урғу берилган.

Баёнотни имзолаган мамлакатлар холис, профессионал ва мустақил тергов ўтказилиши, халқаро гуманитар ҳуқуқни поймол қилаётганлар ва ҳарбий жиноят содир этаётганлар жавобгарликка тортилиши зарурлигини таъкидлаганлар.

27 июнда Россия ҳарбийлари Полтава вилоятининг Кременчуг шаҳридаги савдо марказига ракета зарбаси йўллаган эди. Сўнгги маълумотларга кўра, 20 киши нобуд бўлган, 59 киши жабрланган, яна қарийб қирқ нафар одам бедарак йўқолган деб ҳисобланмоқда. Воқеа жойида қидирув-қутқарув ишлари ҳануз давом этмоқда.

28 июнда Россия Мудофаа вазирлиги Ҳарбий-космик кучлар 27 июнь куни Кременчугдаги “АҚШ ва Европа мамлакатларидан келтирилган қурол-аслаҳа ва ўқ-дори сақланаётган ангар”га юқори аниқликда урадиган ракеталар билан зарба берганини иддао қилган. Баёнотда ушбу ангарлар гўё Кременчуг йўл машиналари заводи ҳудудида бўлгани айтилади.

“Ўта аниқ зарба натижасида, Донбассдаги Украина қўшинларига жўнатиш учун омборда сақланаётган Ғарбда ишлаб чиқарилган қурол-аслаҳа ва ўқ-дори йўқ қилинди. Ўқ-дорилар портлаши завод ҳудудига ёнма-ён жойлашган ишламайдиган савдо марказида ёнғин чиқишига сабаб бўлди”, дейилган вазирлик хабарномасида.

БМТ Хавфсизлик кенгашининг фавқулодда йиғилиши чоғида Россия расмий вакили Мудофаа вазирлиги талқинини такрорлаган.

Туркия, Швеция ва Финляндия НАТО бўйича келишувга эришишди

Йенс Столтенберг, Ражаб Тоййиб Эрдўғон, Саули Ниинистё ва Магдалена Андерсон Мадриддаги учрашувда, 2022 йил 28 июни

Мадридда бўлиб ўтган музокаралар натижасига кўра Туркия, Швеция ва Финляндия хавфсизлик бўйича шартнома тузишди. Бу ҳужжат Швеция ва Финляндиянинг НАТОга қўшилиш жараёни учун йўл очади. Бу ҳақда НАТО бош котиби Йенс Столтенберг маълум қилди.

Финляндия билан Швециянинг НАТОга кириши бўйича конкрет қадамлар иттифоқчилар томонидан икки кун мобайнида келишилади, дея баёнот тарқатди Финляндия президентининг девонхонаси.

Саули Ниинистё девонхонаси Туркия шу ҳафтада Мадридда бўлиб ўтадиган саммитда Финляндия ва Швециянинг НАТОга аъзо бўлиши дастаклашини қўшимча қилган. Девонхона Хельсинки, Стокҳолм ва Анқара хавфсизлик таҳдидига қарши курашда бир-бирига тўлақонли қўллов кўрсатиш мажбуриятини ўз зиммасига олганини тасдиқлаган.

Туркия президенти маъмурияти Швеция ва Финляндия Анқара террорчи ташкилот деб ҳисоблаган Курдистон ишчи партияси ва бошқа гуруҳларни дастакламаслик мажбуриятини ўз зиммасига олганини қайд этган.

Учрашув натижаларига кўра Йенс Столтенберг Финляндия ва Швециянинг НАТОга кириши президент Владимир Путиннинг Россия чегаралари яқинида альянс кучларининг қисқариши истагига терс эканини билдирди.

Associated Press агентлигининг АҚШ маъмуриятида ишлайдиган юқори лавозимли амалдор сўзларига таянган ҳолда хабар қилишича, Қўшма Штатлар расмийлари Швеция ва Финляндиянинг НАТОга қўшилишига йўл очиш учун Туркияга ҳеч қанақа ваъда берган эмас.

Давомини ўқинг

XS
SM
MD
LG