Линклар

Шошилинч хабар
16 сентябр 2019, Тошкент вақти: 11:36

Ўзбекистон

Жазирама иссиқ чекинмоқда, эртадан бошлаб ҳаво салқинлайди

Тоғли ҳудудларда қисқа муддатли ёмғир ёғиши ва момақалдироқ бўлиши мумкин.

13 августдан Ўзбекистоннинг шимолий ҳудудларига, сўнгра бутун мамлакат ҳудудига Волгабўйи минтақасидан салқин ҳаво оқимлари кириб келади. Бу ҳақда Ўзгидрометга таяниб gazeta.uz хабар қилди.

Антициклон таъсирида Ўзбекистон бўйлаб ёғингарчиликларсиз об-ҳаво ҳукмрон бўлади. Фақатгина республиканинг тоғли ҳудудларига қисқа муддатли ёмғир ёғиши ва момақалдироқ бўлиши мумкин.

Ҳаво ҳарорати кечаси +15…+18, кундузи эса +25…+28 даражагача тушади. Ушбу ҳарорат кўп йиллик ўртача кўрсаткичлардан 5−8 даража пастроқдир, деган синоптиклар.

13−15 август кунлари айрим жойларда шамол тезлиги секундига 15−20 гача кучаяди. Бундай салқин об-ҳаво 16 августга қадар сақланиб қолади.

Антициклон чекинганидан сўнг ҳаво ҳарорати ошишни бошлайди ва кечаси +18…+20, кундузи — +32…+35 даражага қадар кўтарилади.

Кун янгиликлари

Петербургдаги ошхонада ўзбекистонлик муҳожирнинг жасади топилди

Иллюстратив сурат.

Россиянинг Санкт -Петербург шаҳридаги "Бургер кинг" фаст-фуд ошхоналаридан бирида ўзбекистонлик муҳожирнинг жасади топилди. Бу ҳақда ҳуқуқ- тартибот тузилмаларига таянган ҳолда “Комсомольская правда” хабар берди.

Хабарда айтилишича, 14 сентябрь куни эрталаб ишга келган ошхона директори иш хоналаридан бирини оча олмаган. Бу хонанинг эшиги ичкаридан қулф бўлган. Эшикни очишга бир соат урингач, ошхона раҳбари уни бузишга қарор қилган.

Эшик бузилганидан сўнг ичкарида ошхонада ошпаз бўлиб ишловчи 26 ёшли ўзбекистонликнинг жасади топилган. Унинг томоғига пичоқ урилгани аниқланган.

Полиция видеокамералардаги ёзувларни, ошпазнинг буюмларини ва ошхонадаги пичоқларни текширганлар. Бироқ эшикни ичкаридан ошпаздан бошқа ҳеч ким қулфламагани аниқланган. Ошхонада зўрлик билан одам ўлдириш аломатлари топилмаган. Шундан келиб чиққан ҳолда, терговчилар ўзбекистонликнинг ўлимида жиноий мотивлар йўқ бўлиши мумкин, деб тахмин қилмоқдалар.

Янги йилдан бошлаб тўй қиладиган одам беш кун олдин бошқарув органларини бу ҳақда хабардор қилиши лозим

Ўзбек аëллари янги келин қўлидан чой ичишмоқда.

Олий Мажлис 14 сентябрь куни қабул қилган “Тўй-ҳашамлар, оилавий тантаналар, маърака ва маросимлар, марҳумларнинг хотирасига бағишланган тадбирлар ўтказилишини тартибга солиш тизимини такомиллаштириш тўғрисида”ги қарор 2020 йилнинг 1 январидан кучга киритилади.

Олий Мажлис Сенатининг расмий сайтида билдирилишча, қарорга асосан оилавий тадбирларни фақат бир кун - соат эрталабки олтидан кечки 11гача ўтказишга рухсат берилади. Дафн этиш маросимларига бу қоида таалуқли эмас. Бундан ташқари, халқ депутатлари туманлар ва шаҳарлар Кенгашлари томонидан ош бериш маросимининг вақти алоҳида белгиланиши мумкин.

Ҳужжатда қайд этилишича, оилавий тадбирларда 200 нафаргача, ош бериш маросимида 250 нафаргача киши қатнашиши мумкин. Қўшалоқ тўй-ҳашамларда 250 нафаргача, у билан боғлиқ ош бериш маросимида 300 нафаргача киши қатнашишига рухсат берилади.

Тўй-ҳашамларни ўтказувчи шахслар бу ҳақда бир ҳафта олдин фуқароларнинг ўзини ўзи бошқариш органларини хабардор қилиши шарт. Тўйларда келин-куёв ва уларнинг дўстларига учтадан кўп машина хизмат кўрсатишига йўл қўйилмайди.

Шунингдек, қарор билан миллий анъаналарга ёт, одоб-ахлоқ қоидаларига зид бўлган шоуларни, "келин навкари", "чорлар", "ота кўрди", "сеп ёйди", "қуда чақирди", "куёв чақирди", "келин чақирди", "тоғора юбориш" каби ортиқча тадбирларни ўтказишга йўл қўйилмайди.

Мотам билан боғлиқ "етти", "пайшанбалик", "якшанбалик", "йигирма", "қирқ", "ҳайит", "йил оши", "пул тарқатиш", "мато улашиш" каби тадбирларни ўтказиш ҳам тақиқланади.

Қўқондаги фестивалга борган президент Мирзиёев аҳоли билан мулоқот қилди

Мирзиёев Қўқонда, халқ орасида (Telegram:Qo'qonliklar)

Ўзбекистон президенти Шавкат Мирзиёевнинг Қўқонда оддий одамлар билан мулоқот қилаётгани акс этган видео тармоқларда тарқалди.

14 сентябрь куни олингани айтилган видеода Мирзиёев Қўқонда маҳаллий ҳокимият амалга ошираётган ишларни олқишлайди ва халқни дуо қилади. Ўз навбатида унга яқинлашишга интилаётган оломон ҳам президентни дуо қилади. Оддий одамлар билан мулоқот қилаётган Мирзиёевнинг атрофини қўриқчилар ўраб олгани кузатилади.

Президент Қўқонга Ўзбекистон тарихида илк марта ўтказилган Халқаро ҳунармандчилик фестивали очилиш маросимида қатнашиш учун борди.

Расмий хабарга кўра, фестивалда 80 га яқин мамлакатдан ҳунарманд усталар қатнашган. Ўзбекистондан эса минг нафар маҳаллий ҳунарманд қатнашган.

13 сентябрь куни Бутунжаҳон ҳунармандларининг Осиё-Тинч океани минтақаси бўйича кенгаши Қўқоннинг Бутунжаҳон ҳунармандлар шаҳарлари рўйхатига киритилганини эълон қилган эди.

Қўқонда ўтказилган Халқаро ҳунармандчилик фестивалига тайëргарлик ишларига бюджет ташкилотлари ходимларидан тортиб то ўқувчи қизларгача мажбуран жалб этилгани ҳақида Озодлик хабар берган.

Жумладан, 1000 нафарга яқин талаба ва ўқувчи қиз президент ва хорижлик меҳмонларга тақдим этиладиган концерт-томошасида фон бўлиш учун жазирамада таътилга чиқарилмасдан массовкага жалб этилгани айтилган.

ДХХ чегарадан дронда киритилаётган "трамадол" мусодара қилинганини билдирди

Давлат хавфсизлик хизмати "Daryo.uz" нашрига берган сурат

Тошкент туманининг Оқтош аҳоли пунктида "Трамадол" психотроп дори воситасини дронда олиб ўтишга уринганлар ушланган.

Давлат хавфсизлик хизматига (ДХХ) таяниб, "Daryo.uz" нашрининг хабар қилишича, тўхтатиб қолинган дори воситаси 600 дона пластинкадан (ҳар пластинкада 10тадан таблетка бор) иборат бўлган.

Бунча психотроп моддани "Фантом-4" русумидаги дрон ёрдамида Ўзбекистонга олиб киришга уринишган.

Айни пайтда, бу ҳодиса қачон бўлган ва қўлга олинганлар кимлар - бу ҳақда бошқа тафсилотлар очиқланмаган.

Бошқа давлат органлари орасида ДХХ, одатда матбуотга энг кам маълумот берувчи ташкилот бўлиб қолмоқда.

Бундан ташқари, мамлакат хавфсизлиги ва чегараларига масъул бу ташкилотнинг расмий веб-саҳифаси жамоатчиликка маълум эмас.

Қўқонда халқаро ҳунармандчилик фестивали очилди

Қўқон шаҳрида халқаро ҳунармандчилик фестивали очилмоқда. Ўзбекистон президенти Шавкат Мирзиёевнинг фестивал очилишида нутқ сўзлади.

Ўзбекистон тарихида илк марта ўтказилаётган Халқаро ҳунармандчилик фестивалида 80 га яқин мамлакатнинг ҳунарманд усталари қатнашиши хабар қилинди.

Ўзбекистондан эса минг нафар маҳаллий ҳунарманд ушбу тадбирда қатнашиши кўзда тутилган.

13 сентябрь куни Бутунжаҳон ҳунармандларининг Осиё-Тинч океани минтақаси бўйича кенгаши Қўқоннинг Бутунжаҳон ҳунармандлар шаҳарлари рўйхатига киритилганини эълон қилган эди.

Қўқонда ўтказиладиган Халқаро ҳунармандчилик фестивалига тайëргарлик ишларига бюджет ташкилотлари ходимларидан тортиб то ўқувчи қизларгача мажбуран жалб этилгани ҳақда Озодлик хабар берган.

Жумладан, 1000 нафарга яқин талаба ва ўқувчи қиз эса¸ президент ва хорижлик меҳмонларга тақдим этиладиган концерт-томошасида фон бўлиш учун жазирамада таътилга чиқарилмасдан массовкага жалб этилган.

Ўзбекистонда пахта терими учун тўланадиган ҳақ миқдори эълон қилинди

Бу йил Ўзбекистонда машинада терилган бир тонна пахта учун 600 минг сўм, қўлда терилган бир килограмм пахта учун эса 800 сўмдан 1200 сўмгача ҳақ тўланади.

Бу йил Ўзбекистонда машинада терилган бир тонна пахта учун 600 минг сўм, қўлда терилган бир килограмм пахта учун эса 800 сўмдан 1200 сўмгача ҳақ тўланади.

Бу аввалги йилдагидан қарийб 30 фоизга кўпдир.

Шунингдек, пахта тўқимачилик ишлаб чиқариш ташкилотларига ва кластерларга пахтани териб олиш учун банклар томонидан йиллик 16 фоиз ставкада кредит ажратилади.

Бундан ташқари, Вазирлар Маҳкамаси қарорига кўра 2019 йил ҳосилини қисқа муддатда йиғиб олиш, теримчилар билан ўз муддатида ҳисоб-китоб қилиш учун Қишлоқ хўжалигини давлат томонидан қўллаб-қувватлаш жамғармасига 2020 йилда қайтариш шарти билан фоизсиз ссуда ажратилади.

Қарорда, шунингдек, пахта терими бозор муносабатлари асосида амалга оширилиши айтиб ўтилган.

Пахта терими вақтида мажбурий меҳнатга қатъий тартибда йўл қўйилмаслиги таъкидланган.

Самарқанднинг Улуғбек мадрасасида базми жамшид ўтказилгани танқидларга сабаб бўлмоқда

Ижтимоий тармоқларда 8 сентябрь куни Самарқанднинг Регистон майдонидаги Улуғбек мадрасасида базми жамшид ўтказилгани танқидларга сабаб бўлмоқда.

Самарқанд вилояти ҳокимлигига кўра, 8 сентябрь куни Регистон майдонидаги Улуғбек мадрасасида "Ор Авнер" синагоги, Самарқанд яҳудийлар бирлашмаси томонидан АҚШ ва Канада бухоро яҳудийлари делегацияcи аъзолари учун қабул ўтказилган.

Самарқандлик мустақил блогер Мирзо Субҳонов ўз блогида Самарқанд вилоят ҳокими ушбу тадбирни ўтказишга ўзи рухсат бергани ҳақда ёзиб чиққан эди.

Ҳокимлик эса Ташқи ишлар вазирлиги бунга йўл қўйганини айтмоқда.

Ижтимоий тармоқларда тарихий обида хорижлик меҳмонлар учун уюштирилаётган зиёфатларда оёқости бўлаётгани ҳақида хавотирлар айтиляпти.

Ўзбекистон "Миллий тикланиш" демократик партияси раҳбари Алишер Қодиров Регистон майдонидаги Мирзо Улуғбек мадрасасида ўтказилган тадбирни "миллий, маданий меросга ҳурматсизлик" деб атаган.

Бундан олдин Хоразмда шундай воқеа бўлган.

Хоразмга сафар қилган Европа тикланиш ва тараққиёт банки (ЕТТБ) президенти Сума Чакрабарти бошчилигидаги делегация учун вилоят ҳокимлиги Хиванинг Нуриллабой саройида 8 июнь куни базми жамшид уюштиргани ҳақда Озодлик хабар берган эди.

Европа тикланиш ва тараққиёт банки матбуот хизматининг раҳбари Сума Чакрабортининг Ўзбекистонга ташрифи хусусий бўлгани ва ташриф пайти барча хорижлик меҳмонларга кўрсатилувчи "чуқур анъаналарга таянилган" мулозамат кўрсатилганини айтган эди.

"Тошкент-Андижон" поезди электр қуввати узилгани учун 50 дақиқага тўхтаб қолди

Иллюстратив сурат

13 сентябрь куни эрталаб "ташқи электр тармоғида юзага келган носозлик" туфайли "Тошкент-Андижон" йўналишида ҳаракатланаётган 60-сонли йўловчи поезди Ангрен вокзалида 50 дақиқа тўхтаб қолди, деб хабар қилди "Ўзтемирйўлйўловчи" компанияси.

"Кўрилган чора-тадбирлар туфайли, юзага келган носозлик бартараф қилиниб, темир йўлга етказиб берилаётган энергия таъминоти тикланди. Айни дақиқада электропоездларнинг мунтазам ҳаракати йўлга қўйилган. "Ўзтемирйўлйўловчи" маъмурияти юзага келган ноқулайлик туфайли йўловчилардан узр сўради", дейилган компания баёнотида.

Ўзбекистонда йиллардан буён электр энергиясининг сурункали тақчиллиги кузатилади.

Ўзбекистон Туркий тилли давлатлар ҳамкорлик кенгашига кириш учун ариза топширди

Шавкат Мирзиёев Туркий тилли давлатлар ҳамкорлиги кенгаши саммитида. Чўлпонота шаҳри, 2018, 3 сентябрь

Туркия ташқи ишлар вазири Мавлут Човушўғлининг "Ўзбекистон Туркий тилли давлатлар ҳамкорлик кенгашига аъзо бўлишга қарор қилди. Ўзбекистон томонининг расмий мурожаати Турк кенгаши котибиятига келиб тушди", деб баёнот бергани тўғрисида Туркиянинг dailysabah.com нашри хабар қилди.

Вазирга кўра, аъзо бўлиш учун расмийлаштириладиган ҳужжатлари Тошкентга юборилган. Аъзоликка қабул қилиш жараёни тез орада якунига етади.

Туркий кенгашга Туркия, Озарбайжон, Қозоғистон ва Қирғизистон аъзодир. Кенгашнинг навбатдаги саммити 16 октябрда ўтказилиши режалаштирилган.

2018 йилнинг 30 апрель куни Туркия президенти Ражаб Тоййиб Эрдўғон билан Тошкентда ўтган учрашувдан сўнг президент Шавкат Мирзиёев Ўзбекистон Туркий тилли давлатлар ҳамкорлиги кенгашига қўшилишини эълон қилган эди.

Ташкилотнинг 2018 йил, 3 сентябрда Қирғизистоннинг Чўлпонота шаҳрида бўлиб ўтган саммитида Ўзбекистон Республикаси Президенти Шавкат Мирзиёев фахрий меҳмон сифатида қатнашган эди.

“Туркий кенгаш доирасида ўзаро самарали ҳамкорликни янада ривожлантиришдан манфаатдормиз. Ҳозирги босқичда унинг фаолиятида мамлакатимиз учун амалий жиҳатдан қизиқиш уйғотадиган йўналишлар бўйича иштирок этишга тайёрмиз”, деган эди Шавкат Мирзиёев Туркий тилли давлатлар ҳамкорлик кенгаши саммитида сўзлаган нутқи давомида.

Дунёдаги туркий тилли 6 давлатдан бири бўлган Ўзбекистон раҳбарияти Туркий тилли давлатлар ҳамкорлиги кенгаши саммитларидан бирортасида иштирок этган эмас.

Давлат ва жамоат ташкилотларида раҳбарлик лавозимларида қанча аёл ишлаши маълум бўлди

Ўзбекистон Хотин-қизлар қўмитаси раиси Элмира Боситхонова

Олий Мажлис Сенатининг 17 аъзоси, Қонунчилик палатасининг 21 депутати аёллардир.

Маҳаллий кенгашларда эса, халқ вакилларининг 23 фоиздан зиёдини хотин-қизлар ташкил этмоқда.

Шу кунда давлат ва жамоат ташкилотлари тизимида 1 минг 400 га яқин аёл раҳбарлик лавозимларида ишлайди.

Бу маълумотлар 11 сентябрь куни Олий Мажлис Қонунчилик палатасидаги “Адолат” СДП фракцияси ва Оила ва аёллар масалалари бўйича комиссияси томонидан “Аёллар ҳуқуқини ҳимоя қилишга қаратилган норматив-ҳуқуқий ҳужжатларда белгиланган вазифаларнинг ижросини таъминлашда парламент назоратини ўрнатиш масалалари” мавзусида давра суҳбатида айтилгани тўғрисида Олий Мажлис Қонунчилик палатаси матбуот хизмати хабар қилди.

Давлат ва жамоат ташкилотлари тизимида раҳбарлик лавозимларида ишлаётган 1 минг 400 га яқин аёл бундай лавозимларда ишлаётганлар умумий сонининг неча фоизини тузиши хабарда айтилмаган.

Жиноят содир этаётганида ҳаракатларининг аҳамиятини тўлиқ англамаган ақли расо шахс жавобгарликка тортиладиган бўлди

Ўзбекистон президенти “Психиатрия ёрдами кўрсатиш тизими такомиллаштирилиши муносабати билан Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида”ги қонунни имзолади.

Бу ҳақда хабар қилган Адлия вазирлигига кўра, 10 сентябрда имзоланган қонун билан 10 дан ортиқ қонунларга ўзгартириш ва қўшимчалар киритилди.

Хусусан, Жиноят кодексига киритилган ўзгартиришга кўра жиноят содир этиш вақтида руҳий ҳолати бузилганлиги туфайли ўз ҳаракатларининг (ҳаракатсизлигининг) аҳамиятини тўлиқ даражада англай олмаган ёки уларни бошқара олмаган ақли расо шахс жавобгарликка тортилади.

Ақли расоликни истисно этмайдиган тарзда руҳий ҳолати бузилган шахсга нисбатан суд томонидан жазо билан бирга тиббий йўсиндаги мажбурлов чоралари тайинланиши мумкин.

Қўшилган қиймат солиғи миқдорини камайтириш режалаштирилмоқда

Давлат солиқ қўмитаси.

Қўшилган қиймат солиғини 5 фоизга камайтириш режалаштирилмоқда. Бу ҳақда Молия вазирлиги 12 сентябрь куни хабар берди.

11 сентябрь куни президент Мирзиёев тадбиркорликни ривожлантиришга оид йиғилиш ўтказган ва ўшанда солиқ ставкасини камайтириш ҳақида кўрсатма берган эди. Лекин солиқ айнан қанча фоизга туширилиши хабар қилинмаганди.

Молия вазирлигининг билдиришича, қўшилган қиймат солиғи ставкасини амалдаги 20 фоиздан 15 фоизгача тушириш назарда тутилмоқда.

“Дастлабки ҳисоб-китобларга кўра, ҚҚС ставкасини 5 фоизга камайтириш Давлат буджетига тушумларни тахминан йилига 10 трлн сўмга ёки Ялпи ички маҳсулотга нисбатан 2 фоизга камайишига олиб келади”, дейилади вазирлик расмий маълумотида.

Бир йилда икки марта пичоқланган "Осиё айиғи" спортга қайтди

Иллюстратив сурат.

Бир йил давомида икки марта пичоқланган “Осиё айиғи” Мурод Хонтўраев катта спортга қайтди.

Sputnik нашрининг билдиришича, Хонтўраев 22 сентябрь куни Тошкентда россиялик 33 ёшли ММА жангчиси Евгений Мякинкинга қарши рингга чиқади.

К-1 йўналишида ўтказиладиган ушбу мусобақада Ўзбекистондан ташқари Қирғизистон, Қозоғистон, Афғонистон, Эрон, Тожикистон спортчилари иштирок этиши ва 11та жанг ўтказилиши кутилмоқда.

Мурод Хонтўраев ўз спорт карьерасида 13 та жанг ўтказган ва улардан 11тасида ғалаба қилган, 2тасида ютилган. Евгений Мякинкин эса 2009 йилдан бери жами 23та жанг ўтказиб, 14тасида ғалаба қозонган.

Жорий йилнинг 27 март куни аралаш жанглар устаси Мурод Хонтўраевга ўз яқинларидан бири пичоқ билан ҳужум қилгани билдирилган эди.

2018 йилнинг 26 ноябрь куни ҳам Хонтўраев "Тошкент" савдо маркази яқинида пичоқлангани ва шифохонага ётқизилгани хабар қилинганди.

Ўшанда расмий маълумотда Мурод Хонтўраев бош мия ёпиқ жароҳати, бош мия чайқалиши, бош ўнг тепа соҳаси эзилиб ёрилган жароҳати, ўнг сон, думба соҳаси кўплаб санчилиб кесилган жароҳатлари (9та), иккала кўкрак соҳаси сидирилган жароҳати ташхиси билан шифохонага ётқизилгани айтилганди.

1¸5 миллиардга етиб қолган хитойликлар учун Ўзбекистонга визасиз кириш режими қабул қилинди

12 сентябрь куни Ўзбекистон президенти “Хитой Халқ Республикаси, шу жумладан Хитой Халқ Республикаси Гонконг махсус маъмурий ҳудуди фуқаролари учун Ўзбекистон Республикасига киришда визасиз режимни белгилаш тўғрисида Фармон чиқарди.

Бу ҳақда Адлия вазирлиги Telegram каналидаги Huquqiy axborot саҳифаси орқали хабар тарқатди.

5819-сонли фармонга кўра, 2020 йил 1 январдан бошлаб Хитой Халқ Республикаси, шу жумладан Хитой Халқ Республикаси Гонконг махсус маъмурий ҳудуди фуқаролари учун белгиланган тартибда Ўзбекистон халқаро аэропортлари орқали 7 кундан кўп бўлмаган муддатга визасиз кириш тартиби белгиланди.

Ўзбекистон¸ аҳолиси қарийб 1¸5 миллиардга етиб қолган Хитой учун кириш визасини бекор қилган биринчи Марказий Осиë давлати бўлди.

Жорий йил Қозоғистон ўз миллий авиакомпанияси орқали Нурсултон ва Олмаота шаҳарлари орқали учинчи давлатга учувчи хитойликлар учун 72 соатлик визасиз киришга рухсат берган эди.

Ўзбекистон ва Қирғизистон 407 гектар ерини ўзаро айирбошлади

Икки қўшни давлат ўртасидаги чегаранинг делимитация қилинмаган ҳудудлари бу ҳудудлар аҳолиси ўртасида жанжаллар чиқишига сабаб бўлиб келаëтган эди.

Ўш вилояти Аравон тумани Туямўйин қишлоғидаги Каркидон сув омбори атрофидаги 407 гектар ер Гулбаҳор қишлоғи яқинидаги ер ўрнига Ўзбекистон ихтиëрига берилди.

Бу ҳақда Қирғизистон ҳукуматининг Ўш вилоятидаги махсус вакили Озодликнинг қирғиз хизматига маълум қилди.

Қирғиз расмийлари алмашилган ҳудудлар сатҳининг бир хил эканини билдирди.

Гулбаҳор қишлоғи Ўшдан чиқиш йўлининг Аравон районига кираверишида жойлашган ва бу йўлнинг ўнг томони ҳозирга қадар Ўзбекистонга қарашли бўлган. Қирғизистон ҳукуматига кўра¸ Ўзбекистон айнан ана шу йўл бўйидаги ҳудудни берган ва бу айирбошлаш эндиликда чегарани силжитишга имкон беради.

Айтилишича¸ ер айирбошлаш таклифи Бишкек томонидан ўртага қўйилган ва икки ҳукумат расмийларининг сўнгги музокараларида чегарани делимитация қилиш бўйича келишувга эришилган.

Ўзбекистон чегарачиларининг ер айирбошлаш келишуви расман эълон қилинмай туриб¸ Каркидон сув омбори атрофидаги ҳудудни тўсиб олиш ҳаракати 10 сентябрь куни қирғиз қишлоғи аҳолиси норозилигига сабаб бўлган эди.

Шайх Абдулазиз Мансур Ислом цивилизацияси маркази директори ўринбосари бўлди

Шайх Абдулазиз Мансур Ўзбекистон мусулмонлари орасида катта нуфузга эга уламолардан биридир.

12 сентябрь куни Ўзбекистон мусулмонлари идораси раисининг ўринбосари Шайх Абдулазиз Мансур Ўзбекистон Ислом цивилизацияси маркази директори ўринбосари лавозимига тайинланди.

Бу ҳақда Ўзбекистон мусулмонлари идораси Матбуот хизмати хабар қилди.

Расмий изоҳда Абдулазиз Мансурнинг “Ислом дини илмлари ривожига беқиёс ҳисса қўшган буюк алломаларимизнинг бой меросини чуқур ўрганиш, улар томонидан асос солинган илмий фаолиятни қайта тиклаш ва ривожлантириш борасидаги ишларни жадаллаштириш мақсадида” Ислом цивилизацияси маркази директорига ўринбосар этиб тайинлангани айтилади.

Қуръон маъноларини ўзбек тилига биринчи бўлиб таржима қилган Шайх Абдулазиз Мансур Ўзбекистон мусулмонлари идорасининг энг нуфузли етакчиларидан бири ҳисобланади.

Шайх Абдулазиз Мансур матбуот¸ хусусан¸ Озодлик каби хориж оммавий ахборот воситалари саволларига мунтазам равишда жавоб бериб келаëтган кам сонли диний мутасаддилардан бири ҳамдир.

Олий Мажлис Сергели туман ҳокимини Бандлик вазири лавозимига маъқуллади

Сергели тумани ҳокими Нозим Ҳусанов Бандлик ва меҳнат муносабатлари вазири бўлди.

Олий Мажлис Қонунчилик палатасининг 12 сентябрь кунги мажлисида Тошкент шаҳар Сергели тумани ҳокими Нозим Ҳусанов номзоди Бандлик ва меҳнат муносабатлари вазири лавозимига тасдиқланди.

Қонунчилик палатаси Матбуот хизмати эълон қилган хабарда бу лавозимга бошқа номзодлар кўрсатилгани¸ муқобил номзодларнинг депутатлар муҳокамасига қўйилгани ҳақида маълумот йўқ.

Хабардан тушунилишича¸ вазир лавозимига ягона номзод бўлган Нозим Ҳусанов билан депутатлар ўртасида савол-жавоб ўтказилган.

Бу савол-жавобда мамлакатда кенг кўламда давом этаëтган мажбурий меҳнат муаммосининг тилга олинган-олинмагани ҳақида ҳам маълумот берилмади.

43 яшар Ҳусанов 2018 йили Сергели туман ҳокими этиб тайинланган. Унгача Тошкент шаҳар ҳокимининг иқтисодий ва ижтимоий ривожлантириш, хизматлар соҳаси ва тадбиркорлик масалалари бўйича ўринбосари бўлиб ишлаган.

Тошкент ҳокимлигига келгунга қадар Ҳусанов 2014—2016 йилларда «Микрокредитбанк» банки бошқаруви раиси, 2013—2014 йилларда Ташқи иқтисодий фаолият Миллий банки бошқаруви раисининг биринчи ўринбосари¸2011—2013 йилларда Марказий банк раиси ўринбосари¸ 2010—2011 йилларда эса Марказий банк Тошкент вилояти бош бошқармаси бошлиғи бўлиб ишлаган.

Петербургда полициячини урган ўзбекистонлик ўн йилгача қамалиши мумкин

Россия полициячилари.

Санкт-Петербургда полициячини дўппослаган ўзбекистонлик меҳнат муҳожирига нисбатан жиноят иши қўзғатилди ва у қўлга олинди. Бу ҳақда Тергов қўмитаси маълум қилди.

Хабарда айтилишича, 9 сентябрь куни йўл-патруль хизмати ҳужжатларни текшириш учун бир автомашинани тўхтатган. Унда икки нафар ўзбекистонлик бўлган. Полициячилар ҳужжатлари йўқлигини айтган муҳожирларни полиция бўлимига олиб кетмоқчи бўлганларида, ўзбекистонликлардан бири полициячини дўппослаган.

Айни пайтда полиция ходими касалхонада экани билдирилди. Муҳожир ҳокимият вакилига нисбатан зўравонлик қилганликда айбланмоқда. Бу айблов асосида Ўзбекистон фуқароси 10 йилгача қамалиши мумкин.

Расмий маълумотларга қараганда, 2018 йилда Петербургга 366 мингдан кўпроқ меҳнат муҳожири келган, улардан 147 минг нафари ўзбекистонликдир.

Петербургдан 2019 йил бошидан бери Россияда бўлиш тартибини бузгани учун 426 нафар муҳожир бадарға қилинди. Уларнинг 57 фоизи ўзбекистонликдир.

Муфтийнинг "ишдан олингани" ҳақидаги хабар ортидан бош муҳаррир ишдан бўшатилди

Azon.uz туркча сериалларга қарши чиқиб, уларни "ҳаром" деб атагани билан ҳам танилган. Azon.uz сайтидан олинган мақола скриншоти.

Ўзбекистон мусулмонлари идораси раиси, муфтий Усмонхон Алимов лавозимидан озод этилгани тўғрисида янглиш ахборот берган Azon.uz нашри бош муҳаррири ишдан олинди.

“2019 йил 10 сентябрь куни “Azon New Media”да шошилинч мажлис чақирилди ҳамда хабар тайёрлашда эътиборсизликка йўл қўйгани учун Azon.uz Бош муҳаррири ишдан олинди”, дейилади бу борадаги расмий ахборотда.

10 сентябрда айрим маҳаллий сайтлар ижтимоий тармоқларда Усмонхон Алимов Ўзбекистон мусулмонлари идораси раиси, муфтий лавозимидан озод этилди, деган хабарлар пайдо бўлган эди. Шундан сўнг Мусулмонлар идораси Усмонхон Алимовнинг муфтий лавозимидан озод этилмаганини билдирган эди.

Ўзбек аскарлари "Марказ-2019" ҳарбий машғулотларидаги иштирокини ош дамлаш билан бошлади

Ўзбекистон ҳарбийларининг Донгуз полигонида кутиб олиниши. Мудофаа вазирлиги фотоси.

“Марказ-2019” ҳарбий ўқув машғулотларининг Россияда ўтаётган босқичида иштирок этаётган Ўзбекистонлик ҳарбийлар Донгуз полигонидаги барча бўлинмаларга ош дамлаб берди. Бу ҳақда Россия мудофаа вазирлигига таянган ҳолда Новости агентлиги 11 сентябрда хабар берди.

Маълумотда айтилишича, ўзбек ҳарбийлари гурунчни, зираворларни ва қозонни ўзлари билан Ўзбекистондан олиб келишган.

Вазирлик расмийси Ўзбекистон ҳарбийлари яқин кунларда машғулотларга тайёргарликнинг фаол фазасида иштирок эта бошлашини билдирган.

16 сентябрдан 21 сентябргача машғулотлар Оренбург, Доғистон, Астрахан, Челябинск, Кемерово ва Олтойда ўтказилади. Унда 128 минг ҳарбий, 20 минг техника, 600га яқин самолёт ҳамда вертолёт, 15тагача ҳарбий кема иштирок этишини маълум қилди.

“Марказ-2019” ўқув машғулотларида 8 мамлакат - Россия, Қозоғистон, Хитой, Покистон, Ҳиндистон, Тожикистон, Қирғизистон ва Ўзбекистоннинг ҳарбий контингенти иштирок этади.

Ўзбекистоннинг юз кишидан иборат аскарлари гуруҳи Оренбургнинг Донгуз полигонига 7 сентябрь куни етиб келган эди.

Аввалроқ “Марказ-2019”нинг биринчи босқичи Намангандаги Ғурумсарой полигонида Ўзбекистон ва Тожикистон ҳарбийлари иштирокида ўтказилиши хабар қилинган эди. машғулотда Ҳар иккала томондан 200дан ортиқ аскар, ҳарбий самолётлар ва вертолётлар иштирок этади. Ғурумсарой полигонида шартли террорчи гуруҳларини йўқ қилиш бўйича вазифалар амалда бажарилади.

АҚШ расмийси билан Афғонистонни ҳамкорликка жалб қилиш масаласи муҳокама этилди

Ташқи ишлар вазирлиги Facebook саҳифаси.

Ташқи ишлар вазири Абдулазиз Комилов 11 сентябрь куни АҚШ Мудофаа вазири ёрдамчисининг ўринбосари Рэндал Шрайверни қабул қилди. АҚШ мулозими ишчи ташриф билан Тошкентга келган эди.

Ташқи ишлар вазирлигининг билдиришича, учрашувда минтақавий хавфсизликни таъминлаш бўйича ҳамкорлик, жумладан, Афғонистон муаммосига алоҳида эътибор қаратилган. Бундан ташқари Афғонистонни Марказий Осиёдаги иқтисодий ҳамкорликка жалб қилиш масаласи муҳокама қилинган.

Томонлар икки томонлама ҳамкорлик, долзарб халқаро ва минтақавий муаммолар бўйича фикр алмашганлар.

Учрашувда АҚШнинг Ўзбекистондаги элчиси Дэниэл Розенблюм ҳам иштирок этди.

Президент ўрта бизнесни шакллантириш тўғрисида кўрсатма берди

Президент Шавкат Мирзиёев.

Президент Шавкат Мирзиёев Ўзбекистонда ўрта бизнес мавжуд эмаслигидан афсус билдирди ва бу тоифани шакллантириш тўғрисида кўрсатма берди.

Президент матбуот хизматининг 11 сентябрда билдиришича, Шавкат Мирзиёев бу ҳақда кичик бизнес ва хусусий тадбиркорликни янада ривожлантириш ҳамда давлат бюджетига кафолатланган тушумларни таъминлаш масалаларига бағишланган видеоселектор йиғилиши пайтида гапирган.

“Кўплаб чет мамлакатларда бизнес субъектлари 3 тоифага (кичик, ўрта ва йирик) бўлинган ва давлат томонидан ҳар бир тоифага нисбатан алоҳида қўллаб-қувватлаш сиёсати олиб борилади. Лекин Ўзбекистонда иқтисодиёт ривожида алоҳида роль ўйнайдиган “ўрта бизнес” тушунчаси, афсуски, умуман йўқ”, дейилади расмий хабарда.

Шуни ҳисобга олган ҳолда президент Вазирлар Маҳкамаси ва тегишли вазирликларга ўрта бизнес тоифасини жорий этиш, кичик, ўрта, йирик бизнес мезонларини қайта кўриб чиқиш, уларни алоҳида механизмлар асосида давлат томонидан қўллаб-қувватлаш ва рағбатлантириш бўйича уч ой муддатда аниқ таклифларни ишлаб чиқиш тўғрисида кўрсатма берди.

Бундан ташқари Молия вазирлигига қўшилган қиймат солиғи ставкасини камайтириш бўйича аниқ асосланган таклиф киритиш топширилди.

Йиғилишда таъкидланишича, "Ўзбекистондаги тизимли ўзгаришлар натижасида" жорий йилнинг ўтган 8 ойида 70 мингта янги тадбиркорлик субъекти ташкил этилди. Бу ўтган йилнинг шу даврига нисбатан 2 баробарга кўпдир.

ММА жангчиси Муслим Омонов пичоқ еб ҳалок бўлди

23 яшар таниқли спортчи Муслим Омонов 11 сентябрь, тонгда вафот этди.

Бу ҳақда хабар қилган Тошкент шаҳар ички ишлар бош бошқармасига кўра, 11 сентябрга ўтар тунда, тахминан соат 00.50 да, Юнусобод туманида жойлашган кафелардан бирида икки гуруҳ ёш йигитлар ўртасида келишмовчилик келиб чиққан.

Ташқарига чиққан ёшлар Шайхонтоҳур туманига бориб, муштлашган.

Натижада муштлашувда иштирок этган уч йигит тан жароҳати билан шифохонага ётқизилган.

Улардан бири – 23 ёшли Муслимбек Омонов шифокорларнинг уринишларига қарамасдан, ҳаётдан кўз юмган.

Ушбу факт бўйича Ўзбекистон Республикаси Жиноят кодексининг 104-моддаси 3-қисми “д” банди (“Қасддан баданга оғир шикаст етказиш”) бўйича жиноят иши қўзғатилгани, безориликда қатнашган барча ёшларнинг шахси аниқлангани тергов олиб борилаётгани хабар қилинди.

Муслим Омонов Москвада бўлиб ўтган аралаш жанг санъатлари бўйича FFC-2 мусобақасида ғолиб бўлган эди.

2018 йилнинг 8 августидан 9 августига ўтар кечаси MMA чемпиони Жамшид Кенжаев Тошкентдаги "Aurum-898" тунги клубида пичоқлаб кетилган эди.

Мусулмонлар идораси: Усмонхон Алимов лавозимидан озод қилинган эмас

Усмонхон Алимов

Ўзбекистон мусулмонлари идораси раиси, муфтий Усмонхон Алимов 11 сентябрда Тошкент вилоят, Зангиота туманида қуриладиган "Салмон Форсий" жоме масжидига ғишт қўйиш маросимида иштирок этди, деб хабар қилди ЎзА ахборот агентлиги.

Мусулмонлар идораси расмий сайтида 10 сентябрь, кечқурун Усмонхон Алимовнинг муфтий лавозимидан озод этилмагани тўғрисидаги хабар эълон қилинди.

10 сентябрда айрим маҳаллий сайтлар ижтимоий тармоқларда Усмонхон Алимов Ўзбекистон мусулмонлари идораси раиси, муфтий лавозимидан озод этилди, деган хабарлар пайдо бўлган эди.

"Таъкидлаш лозимки, Усмонхон Алимов ҳазратлари Ўзбекистон мусулмонлари идораси раиси, муфтий лавозимида ишламоқдалар – фаолиятларини давом эттирмоқдалар. Муфтий ҳазратларига узоқ йиллар мўмин-мусулмонларимиз хизматида бардавом бўлишларини Аллоҳ таборака ва таолодан сўраймиз" дейилган Мусулмонлар идораси матбуот хизмати хабарида.

Президент атом энергиясидан фойдаланиш тўғрисидаги қонунни имзолади

Иллюстратив сурат.

9 сентябрда Ўзбекистон президенти атом энергиясидан тинчлик мақсадларида фойдаланиш тўғрисидаги қонунни имзолади.

Бу ҳақда хабар қилган Адлия вазирлигига кўра, ушбу қонунга биноан, атом энергиясидан фойдаланиш объектлари давлат мулки ёки президент томонидан белгиланадиган юридик шахслар мулки ҳисобланади.

Бундай объектлар рўйхати президент томонидан тасдиқланади.

Энергетика вазирлиги ушбу соҳадаги ваколатли орган ҳисобланади ва атом энергетикасини ривожлантириш соҳасида ягона давлат сиёсатини амалга оширади.

Саноат хавфсизлиги давлат қўмитаси эса атом энергиясидан фойдаланиш хавфсизлигини давлат томонидан тартибга солувчи махсус ваколатли орган ҳисобланади.

Қонунга мувофиқ, фуқаролар ядровий қурилмалар хавфсизлиги тўғрисида тегишли давлат органларидан ахборот сўраш ва олиш, танишиш, ядровий қурилмалар пунктларига белгиланган тартибда ташриф буюриш ҳуқуқига эга.

Шунингдек, қонунга кўра, ядровий қурилма зоналарида рухсат этилмаган йиғилишлар ва бошқа оммавий тадбирлар ўтказиш тақиқланади.

Қонун билан радиоактив чиқиндиларни Ўзбекистон ҳудудига олиб кириш ва олиб чиқиш масаласи ҳам тартибга солинган бўлиб, унга кўра республика ҳудудига фақат илгари олиб чиқиб кетилган радиоактив чиқиндилар ва қайта ишлаш маҳсулотлари олиб кирилишига йўл қўйилади.

Давомини ўқинг

Кўрмай қолган бўлсангиз

XS
SM
MD
LG