Линклар

Шошилинч хабар
10 апрел 2020, Тошкент вақти: 17:55

Халқаро хабарлар

Путин референдум санасини номаълум муддатга кўчирди

Россия президенти Владимир Путин.

Россия президенти Владимир Путин Конституцияга тузатишлар киритишга оид овоз бериш санаси кўчирилиши ҳақида эълон қилди. Мазкур тузатишлар унга 2036 йилгача ҳокимият тепасида қолиш имконини бериши мумкин.

Кремль сайти орқали ёйинланган ўз мурожаатида Путин аҳоли, кичик ва ўрта бизнес учун имтиёзлар жорий қилиниши, бадавлат россияликлар ва йирик бизнес учун солиқлар оширилишини ваъда қилган.

Россия президенти коронавирус тарқалиши сабабли овоз бериш санасини 22 апрелдан кейинроққа суриш лозимлигини билдирди, бироқ референдумнинг янги санасини очиқлагани йўқ. Бундан ташқари, Путин келаси ҳафтани (30 мартдан 5 апрелгача) Россияда ойлик маоши сақлаб қолинадиган ҳордиқ ҳафтаси, дея эълон қилди. "Ҳозир энг хавфсизи – уйда қолиш", деди Путин.

Россияда коронавирус юқтириб олиш билан боғлиқ ҳолатлар кундан-кунга кўпайиб бормоқда. Ҳозиргача бу мамлакатда COVID-19 вирусига чалинганлар сони 650 нафардан ошган, вирус юқтириб олган уч киши вафот этган.

Кун янгиликлари

Прагада маршал Конев ҳайкали олиб ташланди. Россия Чехияни "фашизм"да айблаб, жиноят иши қўзғатди (ВИДЕО)

Маршал Коневга Прага 6 туманида ўрнатилган ҳайкал 3 апрелда олиб ташланган эди.

Россия Тергов қўмитаси Чехия пойтахти Прагада Иккинчи жаҳон урушида маршал даражасига эришган ҳарбий қўмондон Иван Конев ҳайкалининг олиб ташланиши ортидан “фашизмни реабилитация қилиш” айблови билан жиноят иши очди.

Тергов қўмитасининг билдиришича, Прага маҳаллий ҳокимияти ҳайкални олиб ташлаш орқали Россия билан имзоланган икки томонлама шартномани бузган ва бу билан “Совет халқининг фашизмга қарши курашига менсимаслик билан муносабат билдирганини” намойиш этган.

Маршал Коневга Прага 6 туманида ўрнатилган ҳайкал мазкур туман кенгашининг қарори билан 3 апрелда олиб ташланган эди.

Маршал Иван Коневга Прага 6 туманида 1980 йилда ўрнатилган ёдгорлик бир неча йиллардан бери баҳс-мунозараларга сабаб бўлиб келаётганди.

Ҳайкалнинг олиб ташланишига қарши бўлганлар Конев раҳбарлигидаги армия 1945 йилнинг 9 майида Прагани фашист босқинчиларидан озод қилганини эслатишади.

Ҳайкал олиб ташланиши тарафдорлари эса, Конев 1956 йилда Венгрияда халқ исёнини бостирганини ва 1968 йилда Прага баҳори деган атама билан тарихга ёзилган воқеларни бостиришда иштирок этган бўлиши мумкинлигини айтиб келадилар.

Маршал Конев ҳайкали Прагада ташикил этиладиган XX аср хотираси музейига ўрнатилади.

Oxfam: Коронавирус пандемияси туфайли ярим миллиард киши қашшоқликка тушиши мумкин

Oxfam халқаро ёрдам ташкилоти жаҳон етакчиларини коронавирус пандемияси туфайли юзага келаётган иқтисодий бўҳрон туфайли ярим миллиард киши қашшоқликка юз тутиши мумкинлиги ҳақида огоҳлантириб, бунинг олдини олиш учун мукаммал ёрдам режаларини ишлаб чиқишга чақирди.

Ташкилот 9 апрель куни эълон қилган ҳисоботда ривожланган давлатлар ўз иқтисодларини қувватлаш учун триллионлаб доллар сарфлай олишини кўрсатгани, бу давлатлар қашшоқ давлатларни ҳам қўллаши кераклиги айтилди.


«БМТ ривожланаётган давлатларни пандемия давомида қўллаш учун керак бўлишини айтаётган 2,5 триллион доллардан ташқари хориж давлатлари қўшимча 500 миллиард доллар ажратиши керак бўлади», дейилади Oxfam ҳисоботида.

Кейинги ҳафтада Халқаро валюта жамғармаси, Жаҳон банки, ҳамда Катта йигирматаликка аъзо давлатлар молия вазирлари учрашади.
Oxfam жорий йилда глобал қашшоқлик 1990 йилдан бери илк маротаба ошиши мумкинлигини таъкидлаб, сиёсий етакчиларни бунинг олдини олиш учун тегишли чораларни кўришга чақирди.

Хитой Қишлоқ хўжалик вазирлиги ит гўштини ейишни тақиқловчи ҳужжатни эълон қилди

Хитойда бир йилда 10 миллион ит гўшти ейилади.

Хитой Қишлоқ хўжалик вазирлиги эълон қилган янги рўйхатда итлар гўштини истеъмол қилиш мумкин бўлган уй ҳайвонлари қаторидан чиқарилганини билдирди.

“Инсоният тамаддуни ривожланиши ва жамоатчиликнинг ҳайвонлар ҳуқуқларини ҳимоя қилиш борасидаги ҳаракатлари кучайиши ортидан итлар одамларнинг дўстларига айланган”, дейилади ҳужжатда.

Тановул қилиш мумкин бўлган ҳайвонлар рўйхатига 13 турдаги “анъанавий ҳайвонлар”, яъни чўчқа, сигир, товуқ ва куркалар киритилган. Истеъмол қилиш мумкин бўлган “махсус ҳайвонлар” рўйхати 18 жонивордан иборат, улар жумласига кийиклар ҳам киритилган. Бу ҳужжат 8 майга қадар жамоатчилик муҳокамасига қўйилган.

Хабарларда айтилишича, бу ҳужжат COVID-19 ёввойи ҳайвонлардан одамларга юққани тўғрисидаги шубҳаларни кучайтирди. Февраль ойида хитой ёввойи ҳайвонлар гўштини истеъмол қилишни тақиқлаган эди.

2 апрель куни Хитой жанубидаги Шэньчжэнь шаҳрида ҳам итлар ва мушуклар гўштини ейиш тақиқланганди.

Ҳонконгдаги Animals Asia ҳайвонлар ҳуқуқини ҳимоя қилиш ташкилотининг билдиришича, ҳар йили Хитойда 10 миллион ит ва 4 миллион мушук ейилади. Бу ҳолат ҳайвонлар ҳуқуқини ҳимоя қилувчилар томонидан кескин танқид қилиб келинади.

OPEC+ гуруҳи давлатлари нефть ишлаб чиқариш кўламини озайтиришга келишиб олди

OPEC+ аъзолари музокараларни 10 апрелда ҳам давом эттиради.

Нефть экспорт қилувчи мамлакатлар ташкилотига (OPEC) аъзо давлатлар ҳмда Россия ва нефть қазиб олувчи бошқа давлатлар вакиллари нефть қазиб олиш кўламини озайтиришга келишиб олди. Бундан мақсад коронавирус пандемияси туфайли мушкул аҳволга тушиб қолган нефть бозорини барқарорлаштиришдир.

9 апрель куни OPEC+ ўлароқ маълум бўлган гуруҳ аъзолари тўққиз соатга чўзилган музокаралар ортидан май ва июнь ойларида нефть қазиб олишни кунига 10 миллион баррелга озайтиришга келишиб олди.

Ташкилот аъзолари АҚШ ва нефть қазиб олувчи бошқа давлатлар мазкур ташаббусни қўллашига умид қилишларини изҳор қилишди.

10 апрель куни OPEC+ аъзолари музокараларни давом эттиради. Нефть саноатнинг айрим расмийлари мавжуд захиралар кўлами жуда катта эканлигини, шу сабаб нефть қазиб олишни кунига 10 миллион баррелга озайтириш бозорни барқарорлаштириш учун етарли бўлмаслигини айтмоқда.

OPEC+ АҚШ ва гуруҳга аъзо бўлмаган бошқа ташкилотлар кундалик нефть қазиш кўламини 5 миллион баррелга озайтиришини кутмоқда.
Аммо АҚШ нефть ширкатлари нархларни кўтариш мақсадида ишлаб чиқаришни озайтиришга ошиқмаяпти. Америкадаги ширкатлар ишлаб чиқариш кўламини атайин озайтириш АҚШнинг монополияга қарши қонунларига зид эканлигига ишонади.

БМТ: Коронавирус пандемияси халқаро тинчлик ва барқарорликка жиддий таҳдид солади

БМТ бош котиби Антонио Гутерреш.

Коронавирус ўчоқларида инфекция тарқалиш суръати секинлай бошлагани ҳақидаги хабарлар тарқалар экан, эндиликда COVID-19 пандемияси глобал миқёсда иқтисодий бўҳрон ҳамда ижтимоий беқарорлик келтириб чиқариши ҳақида хавотирлар урчимоқда.

БМТ бош котиби Антонио Гутерреш янги коронавирус пандемияси халқаро тинчлик ва хавфсизликка жиддий таҳдид солишини айтиб, пандемия ижтимоий беқарорликка туртки бўлишини, бу эса, ўз навбатида, мамлакатларнинг касалликка қарши курашиш қобилиятига путур етказиши мумкинлиги ҳақида огоҳлантирди.

Сўнгги маълумотларга кўра, АҚШда кейинги уч ҳафтада 17 миллион киши ишсиз қолди. Мамлакатда COVID-19 туфайли ҳалок бўлганлар сони 16 мингдан ошган бўлса-да, Американинг пандемиялар бўйича етакчи мутахассиси ижтимоий масофа сақлаш ҳамда карантин чоралари самара бераётганини айтди.

Бир неча давлатда вирусга чалиниш ҳолатлари ҳамда шифохонага мурожаатлар сони озая бошлади. Лондонда бош вазир Борис Жонсон жонлантириш бўлимидан чиқарилди. Европа Иттифоқи молия вазирлари 500 миллиард долларли иқтисодий ёрдам чорасини маъқуллади.

Бир неча давлат аста-секинлик билан жорий қилинган чекловларни бекор қилиш устида бош қотира бошлади. Аммо мутахассислар чекловларни муддатидан олдин бекор қилиш касаллик тарқалиш суръати секинлай бошлаган ҳудудларда инфекция қайтадан авж олишига туртки бўлиши мумкинлигини айтмоқда.

Қирғизистонда коронавирусга чалинганлар 298 нафар, беш бемор ўлди

Вирус юқтирганларнинг 37 нафари тиббиёт ходимларидир.

Қирғизистонда 10 апрелда коронавирус юқтирганлар яна 18 кишига кўпайди беморлар сони 298 нафарга етди.

Соғлиқни сақлаш вазирлигининг билдиришича, Новқат туман касалхонасида коронавирусдан даволанаётган 87 ёшдаги бемор вафот этди. 2 апрель куни Новқат туманида COVID-19 аниқланган 61 ёшли фуқаро вафот этганди. 4 апрель куни айнан ушбу касалхонада 80 ёшли бемор ҳам вафот этган. Бу билан коронавирусдан ўлганлар сони 5 кишига етди. 39 бемор тузалди.

Вирус юқтирганларнинг 37 нафари тиббиёт ходимларидир.

Беморларнинг 42 нафари Бишкекда, 36 нафари Ўш шаҳрида, 98 нафари Ўш вилоятида, 89 нафари Жалолобод вилоятида, 15 нафари Чуй вилоятида. 10 нафари Норин вилоятида, 4 нафари Боткен вилоятида, 4 нафари Иссиқкўл вилоятида. Талас вилоятида коронавирусга чалинганлар аниқланмаган.

Халқаро амнистия: Эрон қамоқларидаги исёнларда камида 35 маҳбус ҳалок бўлди

Маҳбуслар қамоқда коронавирус юқтириб олишларидан ташвишланмоқдалар.

Халқаро амнистия ташкилоти Эрон қамоқларида коронавирус юзасидан бўлиб ўтган исёнларда камида 35 махбус ўлдирилганини, ўнлаб одамлар ярадор бўлганини 9 апрель куни хабар қилди.

Айни пайтда ҳам Эроннинг саккизта қамоқхонасида минглаб маҳбуслар исённи давом эттирмоқда. Улар қамоқда коронавирус юқтириб олишларидан ташвишланмоқдалар.

Халқаро амнистия ҳисоботида айтилишича, ишончли манбалар ва маҳбусларнинг қариндошлари қамоқдагиларга нисбатан нозирлар ўқотар қурол ва кўздан ёш оқизувчи газларни қўллаётганини билдирганлар.

Ҳозирча Эрон ҳукумати мазкур ҳисоботга муносабат билдирмади.

Ўтган ойда Эрон расмийлари COVID-19 коронавируси тарқалиши олдини олиш мақсадида 85 минг маҳбусни қамоқдан вақтинча озод қилган эди. Ҳозирги кунда Эронда яна минглаб маҳбус қамоқларда қолмоқда.

Эронда 9 апрель ҳолатига кўра, коронавирус юқтирганлар сони 66 мингдан ошди, 4000 яқин бемор вафот этди.

Нефть нархи яна тушиб кетди. Россия ва Саудия муросага кела олмаяпти

Саудия ва Россия нефть ишлаб чиқариш вазирлари 2019 йилдаги ОПЕК анжуманида.

Нефтнинг жаҳон бозоридаги нархи қисқа муддатли кўтарилишдан сўнг, 9 апрель куни яна тушиб кетди. Пайшанба куни Brent нефтининг бир баррели учун Лондон биржасида 32 доллар нарх белгиланди. Мазкур ҳолат Россия ва Саудия нефть қазишни қисқартириш юзасидан музокаралар ўтказиши кутилаётган бир паллада юз берди.

Reuters агентлигининг ёзишича, томонлар нефть қазиб олишни кунига 10 миллион баррелга қисқартирганларида ҳам, барибир жаҳон бозорида нефтга бўлган талаб таклифдан озроқ бўлиб қолаверади. Нефтга бўлган талабнинг тушиб кетишига эса коронавирус пандемияси сабаб бўлмоқда.

Нефть қазиб олувчи давлатлар ташклоти ОПЕК ва бу бу ташкилотга қўшилмаган нефть қазиб олувчи давлатлар ўртасидаги видеоконференция 9 апрель куни кун бўйи давом этди. Матбуотнинг Эрон нефт вазирига таяниб ёзишича, анжуманда нефть қазиб олишни кунига 10 миллион баррелга қисқартириш ҳақида гап бормоқда. ТАССнинг ёзишича, “бу Россия ва Саудия нефть қазиб олишни 23 фоизга қисқартириши лозимлигини англатади”.

Мазкур музокаралар сўнгги ўн йилликда нефть нархининг кескин тушиб кетиши ортидан ўтказилмоқда. Россия ва Саудия 1 апрелгача нефть қазиб олишни қисқартириш юзасидан муросага келишлари лозим эди. Аммо бу муддатда томонлар муросага кела олмагач, нефть нархи бир баррелга 20 долларгача тушиб кетди. Россия ва Саудия муросага келиши мумкинлиги тўғрисидаги хабарлар пайдо бўлгач, нефть нархи яна ўса бошлаган эди.

Коронавирус юқтирган Британия Бош вазири реанимациядан оддий палатага кўчирилди

Борис Жонсон 27 март куни коронавирусга чалинганини билдирган эди.

Коронавирусга чалиниб касалхонага ётқизилган Британия Бош вазири Борис Жонсон реанимациядан оддий палатага кўчирилди. Бу ҳақда 9 апрель куни Бош вазир матбуот хизматига таянган ҳолда Британия матбуоти хабар берди.

Ҳукумат баёнотида айтилишича, Бош вазир "ўзини жуда яхши ҳис қилмоқда", унинг "кайфияти яхши". Баёнотда Жонсон “соғайишнинг биринчи босқичида” экани таъкидланган.

Борис Жонсон 27 март куни коронавирусга чалинганини ва уйда ўзини яккалаш режимида қолаётганини билдирган эди. 6 апрель куни у касалхонага ётқизилган, 7 апрель куни эса реанимация бўлимига кўчирилган эди.

Жонсон реанимация бўлимида уч кун даволанди. Чоршанба куни унинг аҳволи яхшилана бошлагани хабар қилинган.

Британияда шу кунгача 65 минг одам коронавирус юқтирди, вирусдан 8 минг одам вафот этди. Сўнгги 24 соат ичида коронавирусдан Британияда 881 одам ўлди.

Уч ой олдин коронавирусдан бир одам ўлган эди. Бугунга келиб қурбонлар сони юз мингга яқинлашди

Коронавирусдан биринчи ўлим ҳолати 9 январь куни Хитойнинг Ухань шаҳрида бўлган.

Бундан уч ой олдин - 9 январь куни Хитойнинг Ухань шаҳрида аввал номаълум бўлган коронавирус юқтирган одам пневмониядан вафот этгани аниқланган эди.

Ўша куниёқ Жаҳон саломатлик ташкилоти Уханда пневмониянинг кўпайишига коронавирус сабаб бўлгани тўғрисида баёнот тарқатди.

Расмий маълумотга қараганда, Хитой шифокорлари 2019 йилнинг 31 декабрида пневмонияни коронавирус келтириб чиқарганини аниқлаганлар ва шунинг учун унга COVID-19 номи берилди.

Орадан уч ой ўтгач, корнавирусдан ўлганлар сони юз минг кишига яқинлашди. Ҳолбуки,февраль ойида ўлганларнинг сони 4 мингдан ошмаган эди.

Бугунги кунда коронавирусдан ўлганлар сони бўйича Италия етакчилик қилмоқда. Бу ерда 18 минг одам вафот этди. Ўтган бир сутка давомида мамлакатда коронавирусдан ўлганлар сони 610 кишини ташкил қилди.

Қўшма Штатларда сўнгги 24 соат ичида 1500 одам вафот этди. Бу билан ўлганлар сони 16 мингга етди. Бир кунда ўлганларнингг 800 нафари Нью-Йоркда яшаган.

Испанияда 15 минг, Францияда 12 мингдан кўпроқ, Британияда 8 минг одам коронавирусдан ўлди.

Россияда коронавирус юқтирганлар сони 10 мингдан ошди

Коронавирусга чалинганларнинг асосий қисми Москвада.

Росссияда 9 апрель ҳолатига қараганда, коронавирусга чалинганлар сони 10 минг 131 кишига етди. Сўнгги 24 соат ичида 13 киши ўлди, 118 киши соғайди. Бу билан жами ўлганлар сони 76 кишига, соғайганлар сони 698 киишга етди.

Расмий маълумотда айтилишича, коронавирус инфекциясига чалинганларни аниқлаш бўйича бир миллионта тест ўтказилган.

Айни пайтгача Россиянинг Чукотка, Ненец мухтор округи, Олтой ва Тива Республикаларидагина коронавирус аниқланмаган.

Коронавирусга чалинганларнинг асосий қисми Москва шаҳри, Москва вилояти, Санкт-Петербург шаҳри, Брянск вилояти ва Коми Республикаси турғунларидир.

Украина ва Россия қўллаб келаётган айирмачилар Пасха арафасида маҳбус алмашишга келишди

Шу йил январда Киевда ўтказилган акцияда Россияпараст айирмачилар ҳибсда сақлаётганларнинг суратларини яқинлари кўтариб турибди.

Украина ҳукумати ҳамда россияпараст айирмачилар православ Пасха байрами арафасида маҳбус алмашишга келишиб олди.

Бу ҳақда 8 апрель куни Уч томонлама мулоқот гуруҳи аъзолари бўлмиш Россия ва Украина эълон қилди.

Украина президенти Володимир Зеленский сайтида эълон қилинган билдирувда ўтказилган музокаралар давомида маҳбусларни 19 апрелгача алмашишга келишиб олингани айтилади.

Россиянинг Уч томонлама мулоқот гуруҳидаги вакили Борис Гризлов Киев ва айирмачилар алмашиш режалаштирилаётган маҳбуслар рўйхатини тузганини айтди.

Тарафлар нечта маҳбусни алмашиши ҳозирча номаълум.

Киев ва Россия дастаклаб келаётган айирмачилар ўртасидаги музокаралар бугунга қадар Украина шарқида тўқнашувларни тўхтата олмай келади.
БМТ маълумотларига кўра, тўқнашувлар туфайли бугунга қадар тахминан 13200 одам нобуд бўлди.

Айрим давлатлар коронавирус туфайли жорий қилинган чекловларни бекор қилиш устида бош қотирмоқда

Хитой Жаҳон соғлиқни сақлаш ташкилотини янги вирус ҳақида огоҳлантирганидан 100 кун ўтиб, бир неча давлатда коронавирус инфекцияси туфайли ҳалок бўлаётганлар, шифохонага ётқизилганлар ҳамда вирусга чалиниш ҳолатлари озайишига карантин чоралари сабаб бўлаётгани хабар қилинди.

Шу сабабдан айрим мамлакатлар жорий қилинган чекловларни аста-секин бекор қилиш ҳақида ўйлай бошлади.

8 апрель куни Жаҳон савдо ташкилоти директори Роберту Азеведу коронавирус пандемиясининг жаҳон иқтисодиётига таъсири йирик иқтисодий бўҳрон келтириб чиқариши мумкинлиги ҳақида огоҳлантирди.

Аммо мутахассислар чекловларни муддатидан олдин бекор қилиш касаллик тарқалиш суръати секинлай бошлаган ҳудудларда инфекция қайтадан авж олишига туртки бўлиши мумкинлигини айтмоқда.

Сўнгги маълумотларга кўра, жаҳон бўйлаб янги коронавирусга чалинганлар сони 1,5 миллиондан ошди. Вирус келтириб чиқарадиган COVID-19 инфекцияси туфайли вафот этганлар сони эса 89 мингдан ошди.

Мутахассислар аслида касалликка чалинганлар сони бундан ҳам юқори эканлигини айтмоқда.

Twitter асосчиси Жек Дорси коронавирусга қарши курашиш учун 1 миллиард доллар ажратди

1 миллиард доллар Дорси бойлигининг 28 фоизини ташкил қилади.

Twitter асосчиси ва компания бош директори Жек Дорси Square компаниясидаги улушидан коронавирусга қарши курашиш учун 1 миллиард доллар маблағ аэратишини билдирди. У бу ҳақда ўзиниг Twitter саҳифасида 8 апрель куни эълон қилди.

Хабарда айтилишича, 1 миллиард доллар Дорси бойлигининг 28 фоизини ташкил қилади. Пандемия бартараф этилганидан сўнг ошиб қолган маблағ эса қизларнинг соғлиғи ва таълим олишига сарфланади.

Дорси коронавирусга қаши кураш учун маблағ ажратган ягона миллиардер эмас. Февраль ойида Microsoft асосчиси Билл Гейтс Хитойда коронавирусга қарши курашиш учун 100 миллион доллар ажратган.

Apple раҳбари Тим Кук эса бутун дунё бўйлаб коронавирус оқибатида касалланганларни даволашга 15 миллион доллар ажратган.

1 апрель куни Ўзбекистон давлат телеканаллари коронавирус карантинини Тошкентда ўтказаëтган миллиардер Алишер Усмонов “Ўзбекистон Меҳр-шафқат ва саломатлик” фондига 20 миллион доллар хайрия қилганини хабар берди.

Суриядаги кимёвий ҳужум юзасидан якунланган тергов хулосаси эълон қилинди

Хама шаҳрига 2017 йилда қилинган кимёвий ҳужумда юздан ортиқ одам жабрланган.

Кимёвий қуролни тақиқлаш бўйича халқаро ташкилот (КҚТТ) Суриянинг Хама шаҳрига 2017 йилда қилинган кимёвий ҳужум юзасидан якунланган тергов хулосасини эълон қилди.

Ташкилот терговчиларининг билдиришича, 2017 йилнинг март ойи охирида Хама шаҳрига хлорли ва заринли бомбани Сурия ҳукумат кучлари учувчилари ташлаган. Терговчилар бу ҳужумга алоқадор бўлган шахсларнинг исмлари ҳам аниқлангани, аммо уларнинг исмлари ҳисоботда қайд этилмаганини ҳам айтдилар.

Кимёвий ҳужумдан юздан ортиқ одам жабрланган эди. Ҳисоботда бомбалардан бири касалхонага ташлангани маълум қилинган.

Ташкилот мазкур кимёвий ҳужум учун масъулиятни Башар Ассад ҳукумати зиммасига юклади. Сурия ҳукумати ҳозирча бу ҳисоботга муносабат билдирмади.

Кимёвий ҳужум ортидан 2017 йилнинг апрель ойида АҚШ Франция ва Британия қўллови билан Сурия ҳарбий қисмларига жавоб ҳужуми уюштирган эди.

АҚШ ва Ғарб кимёвий ҳужумда Россиянинг қўли борлигини айтиб келишган. Москва бу айбловларни инкор қилган.

Путин ҳукумат ва губернаторларга "коронавирусга қарши кураш"га тайёр туриш топшириғини берди

Владимир Путин тиббиёт ходимларига қўшимча ҳақ тўланиши тўғрисида кўрсатма берди.

Россия президенти Владимир Путин ҳукуматга ва губернаторларга коронавирусга қарши жиддий курашга тайёр туришлари шартлигини айтди. Унга кўра, кейинги 2-3 ҳафта ичида Россияда коронавирус вазияти мураккаблашиши кутилмоқда.

“Айни пайтда биз ҳар бир минтақада ҳар бир одамнинг ҳаёти учун курашишга тайёр бўлишимиз шарт”, -деди Путин 8 апрелда ўтган видеоселекторда.

Россияда бугунги кунгача коронавирусга чалингалар сони расман 8670 одамни ташкил қилди. Беморлардан 63 нафари вафот этди. Бироқ экспертлар бу рақамларнинг ростлигига шубҳа билдиришмоқда. Уларга кўра, коронавирусга чалинганлар ва ўлганлар сони расман эълон қилинаётганидан анча кўпроқдир.

Владимир Путин йиғилишда тиббиёт ходимлари ойлик маошига қўшимча ҳақ тўланиши тўғрисида кўрсатма берди. Унга кўра, уч ой мобайнида тиббиёт ходимларига 25 минг рублдан 80 минг рублгача қўшимча ҳақ тўланади.

Бундан ташқари Путин Россиянинг 80та минтақасига коронавирусга қарши кураш учун 10 миллиард рубль ( 133 миллион доллар) маблағ ажратилганини билдирди.

Лондон Олий суди Дариға Назарбоеванинг 104 миллион долларлик уйи юзасидан чиқарилган ордерни бекор қилди

Уйлардан бирида Дариға Назарбоеванинг ўғли Нурали Алиев яшайди.

Лондон Олий суди 8 апрель куни “манбаси номаълум бўлган даромадларга сотиб олинган уйлар” тўғрисидаги учта ордерни бекор қилди. Бу ордерларни пул ювишга қарши кураш кампанияси доирасида Жиноятчиликка қарши кураш бўйича миллий агентлик киритган эди.

Ордерлар, жумладан, Қозоғистон собиқ президентининг катта набираси Нурали Алиев яшаётган уйга ҳам тегишли.

Ордерда айтилишича, баҳоси 80 миллион фунт стерлинг (104 миллион долларга яқин) бўлган уй Нурали Алиев ва унинг онаси Дариға Назарбоева эгалик қиладиган офшор ширкатлари номига расмийлаштирилган. Британия ҳуқуқ-тартибот идоралари бу уйлар қайси маблағ ҳисобига сотиб олинганини исботлашни талаб қилиб келаётган эди.

Лондон Олий судининг билдиришича, ордерлар бекор қилинишига “судга тақдим этилган далилларнинг етарли эмаслиги” сабаб бўлди. Суд қарорида бу уйларни сотиб олиш манбаси “молиявий жиҳатдан мустақил бўлган Дариға Назарбоева” экани айтилади.

Жиноятчиликка қарши кураш бўйича миллий агентлик суд қарори устидан апелляция киритишини билдирди.

Москвадаги қариялар уйида чиққан ёнғинда камида тўрт киши ҳалок бўлди

Ёнғин 8 апрель куни соат 21:24 да бошланган.

Москвадаги қариялар уйида чиққан ёнғинда камида тўрт киши ҳалок бўлди, камида 10 одам жароҳатланди.

“Новости” агентлигининг ёзишича, Москвадаги 3- Мякинин кўчасидаги "Третий возраст" қариялар уйидаги ёнғин 8 апрель куни соат 21:24 да бошланган. Ёнғин соат 22:20 да ўчирилган. Ўт чиқишига электр симларидаги носозлик сабаб бўлгани айтилмоқда.

Ёнғин бошланиши билан 50 киши қариялар уйини тарк этишга муваффақ бўлган. Яна 18 кишини ўт ўчирувчилар қутқарди.

Мазкур ҳодиса юзасидан жиноят иши қўзғатилди.

Москва мэри ёнғинда жабрланганларга барча тегишли ёрдам кўрсатилаётганини билдирди.

COVID-19 вирусига чалинганлар сони бир ярим миллиондан ошди

АҚШда бир кунда 27 минг одамга коронавирус юқди.

Жаҳонда COVID-19 вирусига чалинганлар сони бир ярим миллиондан ошди. Вирус юқтирганлар сони бўйича жаҳонда АҚШ етакчилик қилмоқда. Сўнгги маълумотларга қараганда бу мамлакатда 430 минг одам коронавирусга чалинган.

Сўнгги 24 соат ичида АҚШда вирус 27 минг одамга юқди. Бир кунда 1800 одам вафот этди. Бу билан АҚШда коронавирусдан ўлганлар сони 14 минг 700 кишига етди.

COVID-19 бўйича иккинчи ўринга Испания чиқди. Бу ерда 148 мингдан кўпроқ бемор бор, 15 минг одам вафот этди.

Учинчи ўринда Италия. Мамлакатда 140 мингга яқин одамга коронавирус юқди, 17,5 мингдан кўпроқ одам ўлди. Италия жаҳонда коронавирусдан энг кўп одам ўлган мамлакат бўлиб қолмоқда.

Сенатор Берни Сандерс АҚШ президентлигига номзодини қўйишдан бош тортди

Сандерс вице-президент Жо Байден билан рақобатлашаётган эди.

АҚШ сенатори Берни Сандерс 2020 йилда ўтадиган президетлик сайловига Демократик партиядан ўз номзодини олға суриш бўйича кампанияни тўхтатди.

Сандерснинг сайловолди жараёнидан чиқиши амалдаги вице-президент Жо Байденга демократлар номидан республикачи президент Дональд Трампга қарши кучли номзод бўлиш имкониятини яратди.

Байден яқинда Иллинойс, Аризона ва Флорида штатида ўтказилган праймеризда Сандерс устидан ғалаба қилган эди.

Коронавирус эпидемияси вазиятида АҚШ сайловолди кампаниясини анъанавий тарзда ўтказа олмаяпти. Сайловчилар билан ўтказиладиган митинглар ва учрашувлар бекор қилинган.

Демократик партиядан президентликка номзод бўлиш учун июль ойида ўтадиган партия съездининг 3979 делегатидан 1991 нафарининг овозини олиш лозим. 7 апрель ҳолатига кўра, Байден 1271 овоз йиғувчининг қўллаб-қувватлашига эга бўлди. Сандер эса 914 овоз олди.

Амалдаги президент Дональд Трамп Республикачилар партиясининг Иллинойс ва Флоридада ўтган праймеризда 1301 овоз йиғувчининг қўлловига эга бўлди. Трамп Республикачилар партияси номидан президентликка номзод бўлиш учун партия съездига келадиган 2441 делегатнинг 1276 нафари овозини олиши лозим. Съезд август ойида ўтказилади.

АҚШ президентлигига сайлов 2020 йилнинг 3 ноябрида бўлиб ўтади.

Россияда бир кунда 1175 киши коронавирусга чалинди

Россияда шу кунгача 8672 кишига коронавирус юқди.

Россиянинг 56 минтақасида, 8 апрелдаги маълумотларда қайд этилишича, коронавирусга чалинганлар бўйича 1175 та янги ҳолат аниқланди. Россиянинг 81 минтақасига тарқалган коронавирусдан шу кунгача жами 8672 киши касалланди.

Бир сутка ичида, расмий маълумотларга қараганда, беш киши вафот этди. Бу билан Россияда коронавирусдантўлганлар сони 63 нафарга етди.

Россияда ҳозиргача фақат Чукотка, Ненец мухтор округи, Тива ва Олтой Республикасида коронавирус аниқланмади.

Коронавирус юқтирган Британия бош вазирининг аҳволи барқарор

Британия бош вазири Борис Жонсон даволанаётган касалхона. Лондон шаҳри.

COVID-19 инфекциясига чалинган Британия бош вазири Борис Жонсон касалхонанинг жонлантириш бўлимида иккинчи кунни ўтказди.

Шифокорлар вазирнинг аҳволи барқарор эканлигини айтмоқда.
Жонсоннинг матбуот котиби вазир жонлантириш бўлимида шифокорлар назорати остида эканлигини айтди.

Бугунга қадар Буюк Британияда коронавирусга чалинганлар сони 55 мингдан ошди, уларнинг 6200 нафари касаллик туфайли вафот этди.

Бу орада АҚШнинг Нью-Йорк шаҳрида касаллик туфайли вафот этганлар сони 4 мингдан ошди.

Аммо штат губернатори Эндрю Куомо шифохонага ётқизилаётганлар ҳамда сунъий нафас олдириш аппаратига муҳтожлар сони озая бошлаганини айтди.

Сўнгги маълумотларга кўра, АҚШда вирусга чалинганлар сони 400 мингдан, вирус келтириб чиқарадиган COVID-19 инфекцияси туфайли вафот этганлар сони 13 мингдан ошди.

Президент Руҳоний Халқаро валюта жамғармасини Эронга қарз беришга чақирди

Эрон президенти Ҳасан Руҳоний

Эрон президенти Ҳасан Руҳоний Халқаро валюта жамғармасидан (ХВЖ) коронавирус оқибатларини юмшатиш учун Теҳрон сўраган 5 миллиард доллар қарзни маъқуллашни сўради.

- Биз ХВЖ аъзосимиз. Қарз беришда дискриминация бўлмаслиги керак, — деди президент 8 апрель куни.

Ўтган ойда Эрон Марказий банки ХВЖнинг Тез молиялаштириш ташаббусидан 5 миллиард доллар қарз сўраган эди.
Эрон янги коронавирус пандемиясидан энг кўп азият чекаётган давлатлар сафидадир.

Бугунга қадар мамлакатда коронавирусга чалинганлар сони 62,500 дан ошди, уларнинг 3800 нафари касаллик туфайли вафот этди.

Аммо мутахассислар Эрон ҳукумати тарқатган бу рақамларни шубҳа остига олиб, аслида вирусга чалинганлар ва вафот этганлар сони анча юқори эканлигини тахмин қилмоқда.

COVID-9 пандемияси шусиз ҳам АҚШ санкциялари туфайли оқсоқлаб келган Эрон иқтисодини мушкул аҳволга солиб қўйди. 2018 йилда АҚШ Эрон ва дунёнинг қудратли давлатлари ўртасида Теҳрон ядровий дастури бўйича эришилган келишувдан чиқиб, мамлакатга қарши санкцияларни қайта жорий қилган.

АҚШда коронавирусдан бир суткада ўлганлар сони рекорд даражага етди

Жаҳонда коронавирусга чалинганлар 1 миллион 400 мингга етди.

АҚШда сўнгги 24 соат ичида 1800 бемор коронавирусдан вафот этди. Бу АҚШда эпидемия бошланганидан бери ўлимлар сони бўйича энг юқори кўрсаткичдир.

Коронавирус статистикасини олиб боратган Жонс Хопкинс университетининг билдиришича, шу кунгача АҚШда 398 минг одам коронавирус юқтирди. Вирусдан ўлганлар сони 13 минг кишига етди. АҚШ коронавирусга чалинганлар сони бўйича жаҳонда биринчи бўлиб турибди.

Президент Дональд Трамп Вашингтонда ўтган матбуот анжуманида мамлакат коронавирусдан ўлганлар сони энг юқори кўрсаткичга етадиган даврга кириб келаётганини айтди.

Бугунги кунга келиб жаҳонда коронавирусга чалинганлар 1 миллион 400 мингга етди.

"Маҳбус алмашиш тўхтагач" Толибон ўз музокарачиларини Кобулдан чақиртириб олди

Толибоннинг Қатардаги сиёсий офиси матбуот котиби Суҳаил Шаҳин.

Толибон жангари гуруҳи Афғонистон ҳукумати билан маҳбус алмашиш бўйича музокарачиларни тўхтатганини билдирганидан кейин кўп ўтмай ўз музокарачиларига Кобулдан ортга қайтишни буюрди.

7 апрель куни гуруҳ уч аъзодан иборат делегацияси пойтахт Кобулда Афғонистон расмийлари билан учрашганини, аммо музокараларда силжиш бўлмаганини билдирди.

Толибоннинг Қатардаги сиёсий офиси матбуот котиби Суҳаил Шаҳин Twitterда жангари гуруҳ вакиллари «зудлик билан» музокараларни тўхтатиши ҳақида ёзди. Шаҳин маҳбуслар аллақачон алмашилган бўлиши кераклигини, аммо Кобулдаги ҳукумат Толибон маҳбусларини озод этишга ошиқмаётганини таъкидлади.

Аввалроқ котиб жангари гуруҳ вакиллари «самарасиз музокараларда» қатнашмаслигини маълум қилган эди.

Афғонистон президенти Ашраф Ғани маслаҳатчиси Воҳид Умар расмий Қобул маҳбус алмашишни музокараларнинг бир бўлаги ўлароқ кўришини таъкидлади. 7 апрель куни Умар Толибон «олға қадам ташламаса», ҳукумат маҳбус алмашинишига рози бўлмаслигини айтди.

Жорий йилнинг февралида Доҳада АҚШ ва Толибон тинчлик келишувини имзолаган эди.

Мазкур келишувда Толибон Афғонистон ҳукумати билан музокара қилиш ва қатор хавфсизлик кафолатларини зиммасига олди, бунинг эвазига АҚШ ўз қўшинларини 14 ой ичида мамлакатдан олиб чиқишга рози бўлди.

Шунингдек, келишувга биноан Афғонистон ҳукумати Толибоннинг 5000 га яқин аъзосини, жангари гуруҳ эса ҳукуматнинг 1000 нафар ходимини озод этиш мажбуриятини ўз зиммасига олган эди.

Давомини ўқинг

XS
SM
MD
LG