Линклар

Шошилинч хабар
13 июл 2020, Тошкент вақти: 23:39

Халқаро хабарлар

Россияликларнинг президент Путинга ишончи энг паст кўрсаткични ташкил қилди

2019 йилнинг майида Путинга бўлган ишонч даражаси 30,5 фоизни ташкил қилганди.

Россияликларнинг президент Владимир Путинга ишончи март ойида сўнгги 14 йилда биринчи марта энг паст кўрсаткични ташкил қилди.

Ижтимоий фикрни ўрганиш маркази ўтказган сўровда иштирок этган россияликларнинг 28,3 фоизигина Путинга ишонишларини билдирганлар. Марказнинг билдиришича, бу энг паст кўрсаткичдир.

Авваллари Ижтимоий фикрни ўрганиш маркази сўровномага “Сиёсатчилар ҳақида гап кетганида, уларнинг қайси бирига ишонасиз?” деган очиқ саволни киритар эди. Одамлар ўзлари ишонган сиёсатчининг номини сўровномага ёзишган. Марказ 13 йил давомида Путинга бўлган ишончни мана шу тарзда аниқлаб борган.

Бироқ 2019 йилнинг майида Путинга бўлган ишонч даражаси 30,5 фоизни ташкил қилганидан сўнг, марказ бу саволни “Путинга ишонасизми: Ҳа ёки йўқ” тарзида ўзгартирган эди.

Кун янгиликлари

Лондон 5G тармоғи учун Huawei’га муқобил изламоқда

Буюк Британия 5G тармоғи учун жиҳозлар етказиб бериш бўйича Huawei ўрнига бошқа ширкат топишда ёрдам сўраб “Беш кўз” (Австралия, Канада, Янги Зеландия, АҚШ) разведка альянсидаги ҳамкорларига мурожаат қилмоқчи. Бу ҳақда The Financial Times хабар қилди.

Нашр маълумотларига кўра, муқобил жиҳоз етказиб берувчини қидириш ишига Ҳиндистон, Жанубий Корея ва Япония ҳам жалб қилиниши мумкин. Газета манбалари мамлакатлар Huawei’га рақиб бўлган қўшма корхона ташкил этишлари мумкинлиги ҳақида маълум қилганлар. Бироқ илк муҳокамалар ҳали конкрет ҳаракатларга олиб келганича йўқ.

Лондон Хитойнинг Huawei корпорацияси хизматларидан воз кечмоқчи экани ҳақида июль ойи бошида маълум бўлганди. Оммавий ахборот воситалари хабарларига кўра, Британия махсус хизматлари АҚШнинг бу ширкатга қарши санкциялари 5G тармоқлари учун етказиб бериладиган жиҳозлар сифатида салбий акс этиши мумкин, деган фикрдалар. Жумладан, Huawei АҚШдаги ишлаб чиқарувчилар томонидан етказиб бериладиган бутловчи қисмлардан маҳрум бўлади ва ички бозорда бошқа муқобил вариантларни излашга мажбур қолади.

The Financial Times нашрининг ёзишича, Британия бош вазири Huawei хизматлариан воз кечилгани ҳақида яқин кунларда эълон қилади. Манбаларга кўра, Лондон бозорга янги етказиб берувчиларни олиб чиқиш ва очиқ бошланғич кодли технологияларга инвестиция киритиш ниятида.

Бу ғоя танқидчилари Huawei’никига муқобил бўлган саноат жиҳозларини яратиш жуда қийин бўлишини айтмоқдалар.

Ўтган йил майида Вашингтон Пекинни Huawei ширкати ишлаб чиқарган 5G мобил алоқа тармоғи жиҳозлари орқали жосуслик қилишда айблаб, корпорацияга қарши санкциялар жорий қилган.

АҚШ ширкатларига мазкур компанияга жиҳоз ва технологиялар (шу жумладан, Android операцион тизими) сотиш тақиқлаб қўйилган. Жиҳоз ва хизмат етказиб берувчи АҚШ ширкатлари бу чекловлар ортидан миллиардлар доллар йўқотишлари мумкинлигини билдирганлар. Пировардида Вашингтон Huawei’га дастур таъминотини янгилаш ва тармоқларни қўллаб туришга вақтинча рухсатнома берган.

Тожикистон қамоқхоналарида 11 нафар маҳкум пневмониядан вафот этди

Тожикистондаги жазони ўташ муассасаларида пандемия бошидан бери 98 нафар маҳкум пневмонияга чалинган, улардан 11 нафари вафот этган. Бу ҳақда 13 июль куни Тожикистон адлия вазири Музаффар Ашуриён Душанбеда ўтказилган матбуот анжуманида билдирди, дея хабар қилди Озодликнинг тожик хизмати.

Ашуриён ўзи раҳбар бўлган вазирликка бўйсунувчи жазони ўташ муассасаларида коронавирус инфекцияси мавжудлигини яна бир бор рад этган. Бироқ айрим маҳкумларнинг яқинлари аввалроқ мамлакат қамоқхоналари ва тергов ҳибсхоналарида коронавирус йўқлигига оид расмий баёнотни шубҳа остига олганди. Хусусан, Душанбедаги 1-сонли қамоқхонада жазо муддатини ўтаётган 47 ёшли маҳкум Абдулфайз Ражабовнинг яқинлари унинг COVID-19 туфайли вафот этганини иддао қилмоқдалар. Колония раҳбарияти маҳкумнинг пневмониядан ўлганини билдирган.

Пандемия шароитида Тожикистон қамоқхоналаридаги вазият ҳақида Адлия вазирлигига қарашли Жазони ўташ бош бошқармаси раҳбарияти билан маҳкумларнинг яқинларидан бир-бирига зид бўлган маълумотлар келмоқда. Тикансим ортида аслида нима бўлаётгани эса маълум эмас.

Эрон “Боинг” ҳалокатини радиолокацион станциянинг нотўғри созлангани билан изоҳлади

Эрон расмийлари Теҳрон аэропортидан парвоз қилганидан кўп ўтмай икки ракета билан уриб туширилган Украина йўловчи учоғи билан боғлиқ суриштирув натижаларига оид ҳисоботларини эълон қилдилар. Фожиа 2020 йил 8 январида содир бўлганди. “Украина ҳаво йўллари” авиаширкатига тегишли Боинг бортида 176 киши бўлиб, ҳодиса ортидан уларнинг барчаси ҳалок бўлган.

Эронлик терговчиларга кўра, авиаҳалокатга радиолокацион станциянинг (РЛС) нотўғри созлангани сабаб бўлган. РЛС ҳавога қарши мудофаа операторларига нотўғри сигнал етказган. Ҳисоботга мувофиқ, операторлар ҳам ракета учириш учун ҳавога қарши мудофаа қўмондошлигидан рухсат сўраб ўтирмаганлар.

Британиянинг The Guardian нашри учоқ қулаганида Теҳрон дастлаб авиаҳалокатга учоқ бортидаги “техник носозликлар” сабаб бўлганини иддао қилганини қайд этади. Бироқ, орадан бир неча кун ўтгач, Эрон расмийлари учоқни ўз жанговар ракеталари янглишлик туфайли уриб туширганини тан олганлар.

Эрон фуқаро авиацияси бошқармаси томонидан ёйинланган ҳисоботда Теҳрон четидаги Ҳавога қарши мудофаа тизими операторлари аппаратурани ўз вақтида қайта созлашга улгурмагани айтилади. Ўша тонгда қўшинлар “кучли тревога” ҳолатида бўлган – “тревога ҳолати” АҚШ қўшни Ироқдаги ўз базалари нишонга олингани учун жавоб зарбалари бериш билан таҳдид қилгани ортидан бир неча соат аввал эълон қилинганди.

Эрон расмий ҳисоботини баён қилган The Guardian мақоласида ҳодисанинг техник тафсилотлари билан бир қаторда учоқ экипажи уриб туширилган пайтда Теҳрон аэропортидан парвоз қилиш протоколига бўйсунгани ҳамда тасдиқланган маршрутга риоя қилгани қайд этилади.

Украина учоғининг “қора қути”лари ҳали ҳам эронлик мутахассислар қўлида қолмоқда. Ҳодиса жойидан топилган “қора қути”лар расшифровка учун 20 июль куни Францияга берилиши кутилмоқда, дея хабар қилди Эроннинг IRNA агентлиги.

Жорий йил 8 январида содир бўлган авиаҳалокатда Эрон, Канада, Украина, Буюк Британия, Афғонистон ва Германия ватандошлари нобуд бўлганди.

Польша сайлови: Экзитпол натижалари Дуданинг олдинда бораётганини кўрсатди

Анжей Дуда.

Польшадаги президент сайловининг иккинчи босқичида, экзитпол натижаларига асосланган дастлабки маълумотларга кўра, амалдаги президент Анжей Дуда озгина фарқ билан олдинда боряпти. У сайловчилардан 50,4 овоз йиғолган. Дуданинг рақиби Рафал Тшасковский 49,6 фоиз овоз жамғаролгани айтилмоқда.

Польшада давлатнинг энг юқори лавозимига амалдаги консерватив президент Анжей Дуда ҳамда Варшаванинг либерал мэри Рафал Тшасковский даъвогарлик қилаётган эди. Сўров натижаларига кўра, иккала номзоднинг ҳам дастакловчилари сони қарийб бир хил бўлган.

Дуданинг мухолифлари кампания ҳалол ўтмаганини иддао қилмоқдалар. Масалан, Польша жамоатчилик телевидениеси Тшасковскийни очиқдан-очиқ қоралаб, Дуда ҳақида фақат ижобий маълумотларни тақдим этган, ваҳоланки ўз мақомига кўра у қатъий сиёсий нейтралитет позициясида туриши лозим эди.

Анжей Дуда беш йилдан бери Польша президенти лавозимини эгаллаб, ўз ҳукумати томонидан киритилган ижтимоий имтиёзларга кафил бўлиб келмоқда. Консерватор бўлган Дуда анъанавий оила моделини ҳимоя қилиб, бир жинсли никоҳларни рад этиб келади.

Амалдаги президентнинг асосий оппоненти бўлган Рафал Тшасковский жинсий озчиликларни дастаклаш учун “ЛГБТ+ хартияси”ни имзолаган. Аммо сайловолди кампанияси чоғида консерватив кайфиятдаги сайловчилар ундан юз ўгирмасликлари учун Тшасковский бу мавзуга урғу бермасликка ҳаракат қилган.

“Немис тўлқини”нинг қайд этишича, Тшасковский ғалаба қозонган тақдирда амалдаги ҳукумат томонидан олиб борилган ҳамда Варшава билан Европа Иттифоқи ўртасида зиддиятни юзага келтирган Адлия тизими ислоҳотини бекор қилишга ваъда берган.

Озарбайжон билан Арманистон чегарасида қуролли тўқнашув юз берди

Озарбайжон ва Арманистон ташқи ишлар вазирларининг 2019 йил 20 июнида Вашингтонда бўлиб ўтган учрашувидан лавҳа (архив сурати).

Озарбайжон-Арманистон чегарасида 12 июль куни қуролли тўқнашув рўй берган. Ҳодиса учун масъулиятни Боку билан Ереван бир-бирига юклади.

Бокудан маълум қилишларича, ҳодиса чоғида озарбайжонлик ҳарбийлардан икки нафари нобуд бўлган, беш нафари яраланган. Ереван эса Арманистон томонидан талафот йўқлигини билдирган.

Тўқнашув Озарбайжон-Арманистон чегарасининг Товуз (Арманистон томонидан Тавуш вилояти ҳудуди) тумани ҳудудида содир бўлган.

Озарбайжон ва Арманистон армиялари ўртасида сўнгги йирик қуролли тўқнашув 2016 йил апрелида Тоғли Қорабоғда рўй берганди. Ўшанда ҳар икки тарафдан ўнлаб ҳарбий ҳалок бўлган ёки яраланган. Арманистон билан Озарбайжон 1992 йилдан бери уруш ҳолатида яшаб келмоқда.

Илон Маск совет олими Королёв оиласини SpaceX ширкатига экскурсияга таклиф қилди

Таниқли совет олими Сергей Королёв

SpaceX ширкати асосчиси тадбиркор Илон Маск таниқли совет олими Сергей Королёв оила аъзоларини ширкат фаолияти билан танишиш учун АҚШга таклиф қилди.

10 июль куни Маск Twitterда Королёв оила аъзолари билан суҳбатлашгани ҳақида ёзди:

Маск Королёвни "ракеташунослик соҳасидаги энг кучли олимлардан бири", деб атади.

Россия матбуоти хабарларига кўра, олимнинг невараси Андрей Королёв май ойида, SpaceX ширкати Crew Dragon кемасини Халқаро фазо станциясига (ХФС) муваффақиятли учириши ортидан, Королёвлар оиласи Маскка мактуб ёзганини билдирган.

Андрей Королёв Маск улар билан 20 дақиқа видео орқали суҳбатлашганини айтганди. Суҳбат давомида Маск Королёвлар оиласини коронавирус пандемияси туфайли жорий қилинган чекловлар бекор қилинганидан кейин SpaceX ширкатига экскурсияга таклиф қилган.

SpaceX хусусий ширкатининг мазкур ютуғи Россиянинг ХФСга фазогир олиб чиқиш борасида қарийб ўн йил давом этган монополиясига нуқта қўйди.

Россиянинг кўплаб расмийларидан фарқли ўлароқ, Андрей Королёв SpaceX ширкати ютуғини олқишлаб келади.

АҚШда коронавирус тез суратда тарқаларкан, Трамп илк марта омма олдига ниқоб билан чиқди

Президент Дональд Трамп 11 июль куни илк бор, ниқоб билан омма олдига чиқди, 11 июль, 2020, Мэриленд, АҚШ

АҚШ президенти Дональд Трамп 11 июль куни ҳарбий шифохонага қилган сафари давомида омма олдига илк марта ниқоб тақиб, чиқди.

Уолтер Рид номидаги ҳарбий тиббиёт марказига қилган сафари давомида президент жароҳатланган аскарлар ҳамда COVID-19 инфекциясига чалинган беморларни даволаётган шифокорлар билан учрашди.

Трамп Оқ уйда расмийлар билан ўтказган учрашувлари ҳамда оммавий чиқишлари давомида ниқоб тақишдан бош тортгани учун танқидга учраб келади.

Аммо шифохонага жўнаб кетишидан олдин Трамп ниқоб тақишга ҳеч қачон қарши бўлмаганини айтиб, айрим ҳолатларда ниқоб керак эканини айтди.

Ҳарбий шифохонага қилган ташрифи давомида Трамп президент муҳри билан безатилган ниқобни тақди.

Май ойида Трамп сунъий нафас олдириш аппаратларини ишлаб чиқарувчи ширкатга иш соатларидан ташқари вақтда қилган ташрифи давомида ҳам ниқоб таққан эди.

АҚШда коронавирусга чалиниш ҳолатлари тез суратда ошиб бормоқда. Жонс Хопкинс университети маълумотига кўра, бугунга қадар мамлакатда коронавирус юқтирганлар сони 3,2 миллиондан, COVID-19 инфекцияси туфайли нобуд бўлганлар сони эса 134 мингдан ошиб кетди.

Зеленскийни қўллаётган миллиардер Украинада маҳаллий матбуот холдингини сотиб олмоқчи

Володимир Зеленский президентликка сайланганидан бир йил ўтиб, очиқ анжуман ўтказмоқда, 20 май, 2020, Киев

Украиналик миллиардер Игор Коломойскийга тегишли ширкат маҳаллий матбуот холдинги акцияларини харид қилишга даъвогарлик қилмоқда.

Бу эса бир неча матбуот нашрига эгалик қилувчи ҳамда жорий президент Володимир Зеленскийни қўллаб келаётган Коломойскийга Украина матбуотига янада кўпроқ таъсир ўтказиш имконини беради.

Kyiv Post газетасининг хабар қилишича, Коломойскийнинг «1+1 Media Group» ширкати UHM холдингини харид қилишга даъвогар олти ширкатнинг биридир.

Холдинг савдосини собиқ президент Виктор Янукович ҳукмронлиги давомида йўқотилган мулкларни тиклаш ва бошқариш зиммаси юкланган давлат агентлиги назорат қилмоқда. Янукович 2014 йилда ҳокимиятдан ағдарилган эди.

2013 йил олигарх Сергий Курченко UHM холдингини 400 миллион долларга харид қилган. Аммо 2017 йил украин суди холдинг акцияларини мусодара қилди.

UHM холдинги 72 юридик шахс, хусусан, газета, радиостанция, журнал ва веб-сайтларни ўз ичига олади.

Коломойскийга қарашли матбуот нашрларининг президент Зеленскийга собиқ президент Петро Порошенко устидан ғалаба қозонишга кўмаклашгани иддао қилиб келинади.

Косово ва Сербия музокараларни давом эттиришга келишиб олди

Косово ва Сербия расмийлари Европа Иттифоқи воситачилигида ўтказилиб келинаётган музокараларни давом эттиришга келишиб олди.

Бундай келишувга Франция президенти Эммануэль Макрон ҳамда Германия канцлери Ангела Меркель иштирокида ўтказилган видеоконференция давомида эришилди.

Икки давлат ўртасидаги муносабатларни нормаллаштириш бўйича музокаралар 12 июль куни қайта бошланади.

Сербиянинг собиқ вилояти бўлмиш Косово 2008 йилда мустақиллик эълон қилган. Расмий Белград эса буни тан олмай келади.

Ғарб давлатлари Европа Иттифоқига аъзо бўлиш истагидаги Косово ва Сербияни музокара ўтказишга чорлаб келади.

Аммо видеоконференция ортидан икки давлат расмийлари эълон қилган билдирувлардан улар ўртасидаги тафовут ҳануз йириклиги аён бўлди.

Сербия президенти Александр Вучичнинг сўзларига кўра, музокаралар давомида у Меркель ва Макронга Белград Косово мустақиллигини муҳокама қилишни истамаслигини айтган.

Қўлга олинган Хабаровск губернатори тарафдорлари намойишга чиқди

Россиянинг Хабаровск ўлкасида губернатор Сергей Фургал ҳибсга олинишидан норози ўн минглаб одам намойишга чиқди.

11 июль куни Фургал тарафдорлари Хабаровск шаҳрининг Ленин майдонида тўпланиб, Комсомол майдонига қараб юриб борди.

Намойишчилар президент Владимир Путинни назарда тутган ҳолда «Путин ўғри!» ва «Царь йўқолсин!» дея ҳайқиришди.

Ўлканинг Комсомольск-Амур, Эльбан, Солнечний ҳамда бошқа шаҳарларида ҳам норозилик акциялари бўлиб ўтди.

10 июль куни Москва шаҳрининг Басманний туман суди 50 ёшдаги Фургални 9 сентябргача тергов изоляторида ушлаб туриш ҳақида қарор чиқарган эди.

Унга қотилликка уриниш ва икки маҳаллий тадбиркорни ўлдиришни буюриш айбловлари қўйилган.

2018 йилда Владимир Жириновскийнинг миллатчи «Россия либерал демократик партияси»га (ЛДПР) аъзо Фургал Кремль хушлаган номзод Вячеслав Шпорт устидан кутилмаганда ғалаба қозонган эди.

Жириновский Россия давлат думасида қилган чиқишида Фургалнинг қўлга олиниши ортида сиёсий мотив борлигини таъкидлади.

Украинанинг собиқ президенти Порошенкога нисбатан қўшимча жиноят ишлари очилди

Украина Бош прокуратураси собиқ президент Петро Порошенкога қарши яна тўрт жиноят ишини очди. Бу ҳақда 10 июль куни Порошенконинг адвокати Игор Голован маълум қилди.

Адвокатнинг сўзларига кўра, терговлар тадбиркор Игор Коломойский илтимоси билан очилган. Коломойский Порошенкони «ПриватБанк» фаолиятига аралашишда айблаб келади.

Ҳолован Порошенкога қўйилган айбловлар ортида сиёсий мотив борлигини таъкидлади.

Порошенконинг узоқ йиллик рақиби Коломойский 2016 йилда марказий банк «ПриватБанк»ни ўз назоратига олиши ортидан банк бошқарувини қўлдан бой берган. Ўша пайтда Порошенко Украина президенти эди.

Коломойский қарийб икки йил давомида хорижда яшаб, 2019 йилнинг апрелида Володимир Зеленский президент этиб сайланганидан кейин мамлакатга қайтди.

Жорий президент Зеленскийнинг Коломойский билан яқин муносабатга эканлиги айтилади. Бунга қарамасдан, Зеленский ўзини олигархлардан узоқ, «халқ номзоди» ўлароқ кўрсатиб келади.

1 июль куни Порошенко унга қарши 24 тергов иши очилганини айтиб, уларнинг барчаси ортида Зеленский турганини иддао қилди.

Аё София музейи яна масжидга айлантириладиган бўлди

Аё София ибодатхонасининг ич қисми, 2020 йил 2 июли.

Туркия Олий маъмурий суди ҳукуматнинг Аё София ибодатхонасини музейга айлантириш тўғрисида 1934 йили қабул қилган қарорини бекор қилди. Бу ҳақда “Онадўли” агентлиги хабар қилган.

Мазкур бинодан 1934 йилгача жомеъ масжиди сифатида фойдаланилган. Уни замонавий Туркия жумҳурияти асосчиси бўлган Мустафо Камол Отатурк ёпган.

Аё София ибодатхонаси 537 йилда қуриб битказилган. У қарийб минг йил давомида Христиан оламининг энг катта черкови бўлган.

1453 йили Истанбул Усмоний империяси томонидан фатҳ этилганидан кейин ибодатхона масжидга айлантирилган. Ўша йил 1 июнида Аё Софияда ўқилган илк жума намозида Фотиҳ Султон Меҳмет иштирок этган.

1935 йили дунёвий давлат қураётган Отатурк масжидни музейга айлантирган. Ҳозирда ибодатхона ЮНЕСКО жаҳон мероси рўйхатида туради.

Туркиядаги исломий мухолифат доим бинога жомеъ мақоми қайтарилишини талаб қилиб келган. Бунга Россия, Греция ва Украина православ черковлари вакиллари қарши чиқиб келган.

Туркия президенти Ражаб Тоййиб Эрдўғон аввалроқ ибодатхонанинг мақоми ўзгартирилиши бўйича Олий маъмурий суд қарорини кутаётганини ва ўша қарорга қараб иш қилишини билдирган. Онадўли агентлиги хабарига кўра, Эрдўғон суд қарори чиқиши билан Аё Софиянинг ибодатга очилишига оид қарорни имзолаган.

Олмаота вилоятининг ҳоким ўринбосари пневмониядан вафот этди

Олмаота вилоят ҳокимлигига қарашли маъмурий бино.

Қозоғистоннинг Олмаота вилояти ҳокимининг ўринбосари Серикжан Бескемпиров икки томонлама пневмониядан вафот этди. Бу ҳақда ҳокимлик матбуот котиби Ғалимурат Жукел маълум қилди.

Аввалроқ Олмаота вилоятининг бош санитар врачи Қайрат Баймухамбетов 10 июль куни пневмониядан ўлгани очиқланган.

Ўтган ой коронавирусга чалингани тасдиқланган вилоят ҳокими Амандиқ Баталов, ҳокимликдан маълум қилишларича, “нафас сиқилиши ва юрак қон-томир етишмовчилиги” туфайли пойтахтдаги кардиология марказига кўчирилган.

Коронавирус эпидемияси билан бир қаторда Қозоғистонда пневмонияга чалиниш ҳолатлари кескин кўпайгани кузатилмоқда. Пневмония яқиндан бери мамлакатда “коронавирус инфекциясининг эҳтимолий кўриниши” ўлароқ таснифланмоқда, айни пайтда расмийлар COVID-19 инфекциясига чалинганлар статистикасига фақат хасталиги ПЦР-тест билан тасдиқланган беморларнигина киритмоқдалар.

Соғлиқни сақлаш вазирлиги маълумотларига кўра, Қозоғистон касалхоналарида пневмонияга чалинган 40 мингга яқин бемор даволанмоқда, улардан 10 минг нафарида коронавирус инфекцияси борлиги лаборатория таҳлили билан тасдиқланган.

Вазирлик 9 июль куни ўтган ҳафтада (29 июндан 5 июлгача) Қозоғистонда пневмониядан 415 киши ўлганини маълум қилди. 3 июль куни Қозоғистон бош санитар врачи Есмагамбетова жорий йилнинг илк ярмида мамлакатда пневмониядан 1 772 киши вафот этгани, улардан 628 нафари июнь ойида қазо қилганини билдирган.

Белграддаги намойишлардан сўнг расмийлар комендантлик соати жорий қилиш фикридан воз кечишди

Белграддаги парламент биноси олдида уюштирилган намойиш, 2020 йил 9 июли.

Сербия ҳукумати коронавирус туфайли ҳордиқ кунлари Белградда комендантлик соати киритиш режасидан воз кечди. Расмийлар ўз қарорларини мамлакат пойтахтида юз берган оммавий намойишлар қабатида ўзгартирганлар.

Белградда ҳордиқ кунлари учун киритилажак чекловлар ичида одамларнинг 10 нафардан кўп бўлиб йиғилишига нисбатан қўйилган тақиқ амалда бўлади. Ресторанлар, дўконлар ва бошқа жамоат жойлари соат 21:00 да, парклар ва бошқа очиқ жойлар соат 23:00 да ёпилади. Бош вазир Ана Брнабич айни пайтда комендантлик соати энг самарали чора бўлиши мумкинлиги, бироқ расмийлар бундан воз кечганларини билдирди.

Сербияда 21 июнь куни бўлиб ўтган ва президент Александр Вучич партияси ғалабаси билан тугаган парламент сайловларидан кўп ўтмай расмийлар эпидемиологик вазият ёмонлашгани қабатида май ойида бекор қилинган карантин чораларини қайта кирита бошлаганлар.

Жорий йилнинг 7 июлида коронавирус инфекцияси юқиши билан боғлиқ 13 та ўлим ҳолати қайд этилган, бу эса мамлакатда пандемия бошидан бери кузатилган мутлақ рекорд бўлиб ҳисобланади. Ўша куннинг ўзида президент Вучич Белградда комендантлик соати киритилиши ҳамда беш нафардан кўп одам тўпланишига тақиқ қўйилишини эълон қилган. Бу қарор оммавий намойишларни келтириб чиқарган.

8 июлдан 9 июлга ўтар кечаси Белград ва бошқа шаҳарларда юзлаб одам карантин чоралари кучайтирилишига қарши норозилик акцияларига чиққанлар. Митинглар тартибсизликларга айланиб кетган. Полиция 150 дан зиёд одамни қўлга олган. 10 июлга ўтар кечаси норозилик намойишлар яна бошланган, бироқ тинч ўтган.

Сўнгги маълумотларга кўра, коронавирус пандемияси бошланганидан бери Сербияда коронавирусга чалиниш билан боғлиқ 17 мингдан зиёд ҳолат аниқланган, 352 бемор вафот этган, 13,5 мингдан кўпроқ бемор соғайиб кетган.

Тожикистонда хизматдан бўйин товлаган аскар икки йилга қамалди

Тожикистонлик аскарлар (иллюстратив сурат).

Душанбе гарнизони ҳарбий трибунали Турсунзода шаҳридан бўлган оддий аскар Отабек Ибрагимовни хизматдан бўйин товлаганликда айбдор деб топиб, икки йилга озодликдан маҳрум қилиш ҳақида ҳукм чиқарди.

Озодликнинг тожик хизмати хабарига кўра, Ибрагимов армияга 2019 йилнинг 12 ноябрида чақирилган бўлиб, хизматни 42660-сонли ҳарбий қисмда ўтаб келган. Бироқ 2019 йилнинг декабрь ойи охирида у касалхонага тушиш ва хизматдан озод бўлиш мақсадида 17 та тошни ютиб юборган.

Тожикистон Жиноят кодексининг 376-моддасида ўз аъзосига шикаст етказиш орқали ҳарбий хизматдан бўйин товлаганлик учун 5 йилга озодликдан маҳрум этилиш жазоси кўзда тутилган. Уруш пайтида бу муддат 8 йилдан 20 йилгача узайиши мумкин.

Суд хабарномасида Ибрагимов “ҳарбий хизмат шароитини кўтара олмагани” ҳам қайд этилади.

Тожикистонлик ҳуқуқ фаоллари ёшларнинг аксарияти ҳарбий хизматдан ўнлаб йўл билан (меҳнат муҳожирлигидан тортиб олий ўқув юртига киришга қадар) қутилиб қолишларини айтишади. Шу важдан ҳам ҳарбий комиссариатлар чақириқ бўйича режани бажаришга ҳаракат қилиб, мунтазам равишда ёшларга нисбатан “облава”лар уюштириб турадилар.

Тожикистонда ҳарбий хизматдан оммавий бўйин товлашнинг сабабларидан бири мамлакат армиясида доимий равишда содир бўлиб турадиган калтаклашлар ва ўлим ҳолатлари бўлиши мумкин. Қийноқларга қарши коалиция маълумотларига кўра, 2014 йилдан 2016 йилгача ташкилотга Тожикистон армиясида хизмат қилган ҳарбийларнинг яқинларидан 60 та шикоят келиб тушган. Бу шикоятларнинг ўн биттаси аскарлар ўлимига оид бўлган.

"Ростов" футбол клуби ўзбекистонлик Элдор Шомуродовни Бельгия жамоасига сотишдан бош тортди

Элдор Шомуродов Россия Премьер-Лигасининг энг яхши ўйинчиси.

Россиянинг “Ростов” футбол жамоаси ўзбекистонлик футболчи Элдор Шомуродовни Бельгиянинг “Гент” жамоасига сотишдан бош тортди.

Sport24 нашрининг билдиришича, “Гент” “Ростов”га Элдор Шомуродов учун 5 миллион евро таклиф қилган. Шомуродов учун дастлаб 2 миллион евро ва икки йил давомида ҳар йили яна 1,5 миллион евродан пул тўланиши режалаштирилган эди. Бироқ “Ростов” жамоаси бу таклифни рад этди.

Тошкентнинг “Бунёдкор” командаси ўйинчиси бўлган Элдор Шомуродов “Ростов” жамоасига 2017 йилда 300 минг евро эвазига ўтган эди. Унинг мазкур жамоа билан шартномаси 2024 йилда якунланади.

Жарқўрғонлик 25 яшар Элдор Шомуродов футболчилар оиласида улғайган. 6 ёшидан футбол ўйнаб келаётган бу спортчи Муборакнинг “Машъал”, Тошкентнинг “Бунёдкор” жамоаларида тўп сурган.

2015 йилда “Осиёнинг энг яхши футболчиси” унвонига сазовор бўлган. 2019 йилнинг августида Элдор Шомуродов Россия Премьер-Лигасининг энг яхши ўйинчиси деб тан олинди.

ЖССТ: Коронавируснинг ҳаво орқали одамга юқиши "эҳтимолдан соқит қилинмайди"

COVID-19 шу кунгача жаҳон бўйича 12 миллион 100 минг одамга юқди.

Жаҳон соғлиқни сақлаш ташкилоти – ЖССТ 9 июль куни эълон қилинган сўнгги маълумотномасида муайян шароитларда коронавирус одамдан одамга ҳаво орқали юқишини “эҳтимолдан соқит қилиб бўлмайди", деб билдирди.

ЖССТ маълумотномасида айтилишича, айни пайтда коронавирус аэрозоллар орқали, айниқса, “вентиляцияси ёмон бўлган биноларда” қандай тарқалиши мумкинлиги ўрганилмоқда.

Ташкилот касаллик ресторан ва фитнес марказлари каби жойларда ҳаво орқали юқиши мумкинлиги тўғрисида таҳминлар мавжудлигини таъкидлади.

Аввалроқ тиббиёт соҳаси мутахассислари ЖССТга респираторли касаллиликларнинг, жумладан аэрозолларнинг тарқалиши тўғрисидаги қўлланмасини янгилашни таклиф қилиб очиқ хат йўллаган эди.

Ҳозиргача коронавируснинг аэрозоллар орқали тарқалиши ёки тарқалмаслиги ноаниқ бўлиб турибди.

COVID-19 шу кунгача жаҳон бўйича 12 миллион 100 минг одамга юқди. Вирусдан 551 минг киши вафот этди.

АҚШ Эрон генерали асоссиз ўлдирилгани ҳақида хулоса берган БМТ экспертини танқид қилди

Эронда генерал Қосим Сулаймонийга қўйилган ёдгорлик.

Қўшма Штатлар Ироқда АҚШ томонидан Эрон генералининг ўлдирилиши ноқонуний бўлгани тўғрисида хулоса берган БМТ экспертини “террорчиларга йўл очиб берганлик”да айблади.

БМТнинг махсус ҳисоботчиси Агнес Калламар ўз хулосасини 9 июлда Женевада ўтган Инсон ҳуқуқлари Кенгашининг навбатдаги йиғилишида эълон қилди.

Хулосада қайд этилишича, Вашингтон ўлдирилган Эрон генерали Қосим Сулаймоний Ироқдан туриб АҚШ хавфсизлигига таҳдид солгани тўғрисида бирорта далил-исботни тақдим эта олмаган.

АҚШ Давлат департаменти матбуот котиби Морган Ортагус Вашингтоннинг хулосага муносабатини эълон қилар экан: “АҚШни ўзини мудофаа қилиш мақсадида амалга оширган ҳаракатини қоралаш ва жаҳондаги энг қонхўр террорчилардан бири бўлган генерал Сулаймонийнинг қора ўтмишини оқлаш интеллектуал ноҳалолликдир”, -деб баёнот берди.

Ҳисоботни “зерикарли ва узундан-узоқ” деб таърифлаган Ортагус, АҚШ 2018 йилда БМТнинг Инсон ҳуқуқлари Кенгашини тарк этгани тўғри қарор бўлганини билдирди.

Июнь ойининг охирларида Теҳрон 2020 йил бошида эронлик генерал Қосим Сулаймоний ўлдирилгани муносабати билан АҚШ президенти Дональд Трампни ҳибсга олишга ордер бергани хабар қилинган эди.

Эрондаги Ислом инқилоби посбонлари корпуси “Ал-Қудс” махсус бўлинмаси раҳбари Қосим Сулаймоний жорий йил 3 январида Бағдод шаҳрида АҚШ кучлари томонидан берилган ҳаво зарбаси оқибатида ҳалок бўлганди. Теҳрон бунга АҚШнинг Ироқдаги базаларига ракета отиш билан жавоб берган. Ўшанда америкалик ўнлаб ҳарбий яраланганди.

АҚШ мусулмонлар ҳуқуқини бузаётган Хитой ҳукумати амалдорларига санкция жорий қилди

Шинжон-Уйғур мухторияти. Қашқар шаҳри манзараси.

Қўшма Штатлар Хитой ҳукуматининг тўрт нафар юқори лавозимли мансабдорига Шинжон-Уйғур мухториятида уйғурлар ҳуқуқларини “қўпол тарзда бузаётгани” учун санкциялар жорий этди. Бу борадаги маълумот 9 июль куни АҚШ Молия вазирлиги томонидан эълон қилинди.

Санкцияга мувофиқ Хитой Коммунистик партиясининг Шинжон-Уйғур мухторияти қўмитаси раиси Чэн Цюаньго, сиёсий ва адлия масалалари қзмитасининг собиқ бошлиғи Зу Хайлун, хавфсизлик хизмати раҳбари Ван Мингшэн ва хавфсизлик хизматининг собиқ раҳбари Хуо Лучюнга АҚШга киришга виза берилмайди. Уларнинг АҚШдаги барча мол-мулки ва банк ҳисоблари ҳибс қилинади.

“Қўшма Штатлар бефарқ қараб турмайди, чунки Хитой Коммунистик партияси Шинжонда уйғурлар, этник қозоқлар ва бошқа этник озчиликлар ҳуқуқларини бузмоқда. Жумладан, улар мажбурий меҳнатга жалб қилинмоқда, ўзбошимча равишда оммавий равишда қамоқларга олинмоқда. Шунингдек, уларнинг маданияти ва ислом динини йўқ қилишга ҳаракат қилинмоқда”,- деди 9 июль куни АҚШ Давлат котиби Майк Помпео.

АҚШ президенти Дональд Трамп 17 июнда Шинжон-Уйғур мухториятида уйғурларни ва бошқа мусулмон миллатларни таъқиб этишда иштирок этган ва этаётган Хитой амалдорларига санкциялар жорий этиш имкониятини берувчи қонунни имзолаган эди.

Халқаро ҳамжамият 2017 йилдан бери Хитойни Шинжондаги мусулмон миллатларни “террорчилик ва экстремистликка қарши кураш” баҳонаси билан сиёсий лагерларда сақлаб келаётганини танқид қилади.

Хитойда сув тошқинлари. Президент Мирзиёев Хитойга ҳамдардлик билдирди

Сув тошқинидан 9 миллион одам жабрланган.

Ўзбекистон президенти Шавкат Мирзиёев Хитойнинг жанубий ва шарқий музофотларида рўй берган кучли сув тошқинлари оқибатида кўплаб инсонлар ҳалок бўлгани ва вайронагарчиликлар юзага келгани муносабати билан Хитой Халқ Республикаси Раиси Си Цзиньпинга ҳамдардлик мактуби йўллади.

“Давлатимиз раҳбари ҳалок бўлганларнинг оила аъзоларига чуқур ҳамдардлик билдириб, жароҳат олганларга саломатлик тилади”, -дейилади президент матбуот хизмати хабарида.

Ахборот агентликларининг хабар беришича, Хитойда кучли ёмғир оқибатида 28 июнда бошланган сув тошқинлари ҳалигача давом этмоқда.

Сўнгги кунларда биргина Хунань вилоятида 1 миллионга яқин одам сув тошқинидан жабрланди.

Билдирилишича, Хитойнинг 44 музофотида юз берган сув тошқинларида жами 9 миллион одам жабрланган, Шу кунгача расман 14 кишининг ўлгани ва 5 кишининг бедарак кетгани хабар қилинди.

Тожикистон: Бош врач вафоти ортидан Сўғд вилоят туғруқхонаси карантинга олинди

Шоира Бузурукова.

Тожикистоннинг Хўжанд шаҳрида жойлашган Сўғд вилояти туғруқхонаси бош врач вафотидан кейин карантинга ёпилди. Туғруқхона бош врачи Шоира Бузурукова 5 июль куни коронавирусга чалинмиш беморлар даволанаётган вилоят юқумли касалликлар шифохонасида оламдан ўтган.

Вилоят туғруқхонаси 8 июль куни беморларни қабул қилмаган, аммо касал кўриш тақиқланган эмас.

Туғруқхона ходимлари Озодликнинг тожик хизмати билан суҳбатда карантин камида икки ҳафта давом этиши, бу вақт ичида муассасада дезинфекциялаш ишлари ўтказилишини билдирганлар. Айни пайтда, санитария-эпидемиология назорати маркази кўрсатмасига мувофиқ, врачлар ва бошқа тиббиёт ходимларининг барчаси коронавирусга тест топширишлари лозим.

Вилоят туғруқхонаси карантинга олинганига қарамай, шу пайтгача мазкур муассаса бош врачининг ўлими сабаби очиқлангани йўқ.

Шоира Бузурукова таниқли тожик ёзувчиси Муҳиддин Хўжазоданинг келини бўлган. Апрель ойида Хўжазода ва унинг ўғли Хўжанддаги 2-шифохонага “ўпка пневмонияси” ташхиси билан ётқизилгани хабар қилинганди.

Вилоят туғруқхонаси ёпилиши ортидан Хўжанд шаҳар туғруқхонаси олдида одам кўпайган. Бироқ бу туғруқхонага бемор ва ҳомиладор аёллардан бошқа ҳеч ким қўйилмаяпти.

Роспотребнадзор 13 та мамлакатга парвозларни тиклашни таклиф қилди, рўйхатда Ўзбекистон йўқ

Роспотребнадзор Россия Транспорт вазирлиги ва Росавиацияга 13 та мамлакат билан ҳаво алоқасини тиклашни таклиф қилди. Бу ҳақда The Bell ва РБК нашрлари хабар қилди. Тасарруфида Роспотребнадзор хати нусхаси мавжудлигини билдирган нашрлар ҳужжат 8 июль куни ташкилот раҳбари Михаил Орлов томонидан имзоланганини қайд этишган.

Хатда илк босқичда Британия, Венгрия, Германия, Дания, Италия, Ҳолландия, Норвегия, Польша ва Финляндия билан авиаалоқани тиклаш, шунингдек, Вьетнам, Мўғулистон, Хитой ва Шри-Ланкага парвозларга рухсат бериш таклиф қилинади.

РБК қайдича, рўйхат саволлар туғдиради: унда одамлар кўп қатнайдиган мамлакатлар – Арманистон, Озарбайжон, Беларус, Ўзбекистон ва Тожикистон, шунингдек, россияликларни қабул қилиш истагини билдирган Туркия ва Миср йўқ. Транспорт вазирлиги ва Росавиация муассасалараро хизмат ёзишмаси юзасидан изоҳ берган. “Халқаро ҳаво алоқасини тиклашга оид қарор қабул қилинган тақдирда, манфаатдор ташкилот ва ширкатлар тегишли тартибда огоҳлантирилади”, дея маълум қилган Росавиация.

Аввалроқ РБК ва ТАСС июль ойи бошида ўз манбалари сўзларига таянган ҳолда Росавиация 15 июлдан 15 мамлакат билан мунтазам авиаалоқани тиклашга ҳозирлик кўраётгани ҳақида хабар қилганлар. Кейинроқ ТАСС парвозларни икки босқичда тиклашни коронавирус ёйилишига қарши кураш бўйича федерал тезкор штаб 6 июлдаги мажлисда таклиф қилганини ёзиб чиққан. Биринчи босқичда ўзаро парвозларни бошлаш мумкин бўлган мамлакатлар рўйхатини Роспотребнадзор, ТИВ ва Росавиация 8 июлгача мувофиқлаштириши лозим эди.

Ҳозирда Россиядан рўйхатдаги мамлакатларнинг бир қисми дохил ўлкаларга фақат хусусий учоқлар ёки чартер рейслари билан парвоз қилиш мумкин – мазкур рейслар хорижга россиялик туристларни олиб келиш учун йўлланмоқда ва у ёққа бўш учиб кетмаслик учун йўловчиларни олиб кетмоқда. Бу каби рейсларга чипталар очиқ сотилмоқда, масалан, чипталарни бу каби рейсларнинг катта қисмини амалга ошираётган “Аэрофлот” авиаширкати сайти орқали сотиб олиш мумкин.

АҚШ Молия вазирлиги Қримга мол етказиб берган Amazon ширкатини жаримага тортди

АҚШ Молия вазирлиги Россия томонидан аннексия қилинган Қрим, Эрон ва Сурия билан боғлиқ санкцияларни бузгани учун Amazon ширкатини жаримага тортди.

Вазирлик сайтида билдирилишича, ширкатга Хорижий активлар устидан назорат бошқармаси (OFAC) қарорида кўзда тутилган турли санкциялар талабларини бузгани учун 134,5 минг доллар жарима солинган. Бу ерда гап санкция рўйхатидаги шахсларга ҳамда хизмат кўрсатилган пайтда Қрим, Сурия ва Эронда бўлган кишиларга товар етказиб берилгани ҳақида кетмоқда.

АҚШ Молия вазирлиги 2011 йил ноябридан 2018 йил октябригача Қрим, Сурия ва Эронда бўлган фойдаланувчилар Amazon сайтлари орқали буюртма берган ёки бу минтақалардаги шахсларга хизмат кўрсатиш ёки товар етказиб бериш бўйича бизнес юритган.

OFAC маълумотларига кўра, Amazon ширкати санкциялар билан боғлиқ ҳолда мижозлар манзили ва исмларини синчиклаб текширмаган. Эронга келсак, бу Amazon ширкатининг хатоси бу мамлакатнинг бошқа давлатлардаги дипломатик ваколатхоналарига юк жўнатган.

Amazon ўз айбини тан олиб, солинган жаримани тўлашга розилик берган.

2014 йил декабрида АҚШ Молия вазирлигига Россия томонидан аннексия қилинган Қримда ишлайдиган шахслар ва ширкатларга нисбатан чекловлар жорий қилишга имкон берган санкциялар кучга кирганди. Бундан ташқари, яриморолга товар, хизмат ёки технология сотиш, реэкспорт қилиш, етказиб бериш ёки олиб чиқиш тақиқланган.

Россия Қримни 2014 йили аннексия қилган. Киев ва Ғарб мамлакатлари буни халқаро ҳуқуқ меъёрларининг бузилиши, деб ҳисоблаб, Россияга нисбатан санкциялар жорий қилганлар ва бу жазо чоралари муддати ўшандан бери бир неча марта узайтирилган. Москва яриморолнинг ўз ҳудудига қўшиб олинишини “тарихий адолатнинг тикланиши”, деб атайди.

Ашхободда туркиялик дипломат пневмониядан вафот этди

Кемал Учқун.

Туркманистон пойтахти Ашхобод шаҳридаги кардиология касалхонасида 8 июлга ўтар кечаси Туркиянинг Туркманистондаги элчихонаси дин ишлари бўйича бўйича маслаҳатчиси Кемал Учқун оламдан ўтди. Бу ҳақда Turkmen.news сайти хабар қилди. Нашр мазкур маълумот Туркия элчихонаси томонидан тасдиқланганини қайд этади.

Кемал Учқун касалхонага 27 июнь куни ётқизилган. Унда ҳароратнинг кўтарилиши, нафас сиқилиши ва йўтал каби ҳолатлар кузатилган. Унга “пневмония” ташхиси қўйилган. Дипломатдан коронавирусдан тест олинганми, олинган бўлса, натижаси қандай бўлган – буни аниқлашнинг имкони бўлмади, деб ёзади Turkmen.news.

Туркиянинг Туркманистондаги элчихонаси маслаҳатчиси вафот этгани ҳақида турк матбуоти ҳам хабар қилган.

TRT Avaz сайти хабарига кўра, Кемал Учқун элчихонада дин ишлари бўйича маслаҳатчи лавозимида 2018 йил январидан бери ишлаб келарди. Пневмония ташхиси билан касалхонада даволанган турк дипломати нафас етишмовчилиги туфайли бир муддат реанимацияда ҳам тутиб турилган. Нашрга кўра, К. Учқуннинг икки фарзанди бор.

Айни пайтда Туркманистонда коронавирус белгиларига эга бўлган пневмония ёйилиши давом этмоқда. Касаллик тез тарқалаётгани важидан касалхоналар тўлиб кетган, тиббиёт ходимлари орасида ҳам ўлим ҳолатлари кузатилмоқда. Мамлакатда карантин ҳудудлари барпо этиляпти, корхоналар ёпиляпти. Шунга қарамай, туркман расмийлари мамлакат ҳудудида COVID-19 мавжудлигини тан олаётганлари йўқ.

Қирғизистонда соғлиқни сақлаш вазири ва унинг ўринбосари пневмонияга чалинди

Қирғизистон соғлиқни сақлаш вазири Сабиржан Абдикаримов.

Қирғизистон соғлиқни сақлаш вазири Сабиржан Абдикаримов пневмонияга чалинди. Коронавирус инфекциясига хос бўлган белгилар унинг ўринбосари Нурбўлўт Усенбаевда ҳам кузатилмоқда. Бу ҳақда Қирғизистон маҳаллий нашрлари вазирликдаги манбалари сўзларига таянган ҳолда хабар қилишди.

С. Абдикаримов ва Н. Усенбаев шу кунларда вазирлик биносига келаётганлари йўқ. Вазирнинг бошқа бир ўринбосари Мадамин Қаратаевда, манбаларга кўра, нафас сиқилиши пайдо бўлган.

Аввалроқ коронавирус инфекцияси парламент ходимлари ва бир неча депутатда аниқланган. Икки томонлама пневмониядан парламентнинг собиқ спикери Чинибай Турсунбеков вафот этган. 29 июнь куни Қирғизистоннинг собиқ президенти Алмазбек Атамбаев икки томонлама пневмония ташхиси билан МХДҚ тергов ҳибсхонасидан касалхонага кўчирилган. Бироқ 9 июль куни у яна ҳибсхонага қайтарилган, собиқ президентнинг аҳволи қониқарли экани айтилмоқда.

Қирғизистонда сўнгги кеча-кундузда коронавирус инфекциясини юқтириб олган беморлар орасида 13 та, пневмонияга чалинганлар орасида эса 44 та ўлим ҳолати қайд этилган. Мамлакатда COVID-19 инфекциясига чалинганлар сони 8486 нафарга етган. 8 июль куни Қирғизистонда коронавирус билан пневмония статистикаси бирлаштирилиши мумкинлиги ҳақида хабар тарқаган эди.

Давомини ўқинг

Кўрмай қолган бўлсангиз

XS
SM
MD
LG