Линклар

Шошилинч хабар
20 апрел 2021, Тошкент вақти: 19:14

Халқаро хабарлар

Жаҳонда коронавирусга чалинганлар сони 10 миллиондан ошди

Жаҳонда 5 миллиондан кўпроқ бемор соғайгани айтилмоқда.

Жаҳонда COVID-19дан вафот этганлар сони 500 минг кишидан, вирус юққанлар сони эса 10 миллион кишидан ошди.

Жаҳон саломатликни сақлаш ташкилоти – ЖССТнинг билдиришича, сўнгги бир сутка давомида дунёда 189 минг киши коронавирусга чалинган.

COVID-19га чалинганлар сони бўйича АҚШ олдинда бормоқда. Бу ерда икки ярим миллиондан кўпроқ бемор бор. Улардан 125 мингги вафот этди.

Иккинчи ўринда Бразилия. Беморлар сони 1 миллион 300 мингдан кўпроқ.

Учинчи ўринда Россия. Беморлар сони 634 мингдан кўпроқ, улардан 9073 нафари вафот этди.

Россиядан кейинги ўринни ярим миллиондан кўпроқ беморга эга Ҳиндистон эгаллаб турибди.

Британия бешинчи ўринда. Бу ерда 311 минг кишига коронавирус юққан.

Жаҳонда 5 миллиондан кўпроқ бемор соғайгани айтилмоқда.

Кун янгиликлари

ЕКПА Навальнийни озод этиш талаб қилинган резолюцияни овозга қўяди

Европа Кенгашининг Парламент ассамблеяси (ЕКПА) депутати россиялик мухолифатчи Алексей Навальнийни қамоқдан озод этишга чақирилган резолюция лойиҳасини ишлаб чиқди. Ҳужжат 22 апрель куни Ассамблеяда овозга қўйилиши кутилмоқда.

"Немис тўлқини" хабарига кўра, ўша куни Страсбургда Навальнийнинг ҳибс қилиниши ва қамоққа жўнатилиши мавзусида шошилинч дебатлар ўтказилиши режалаштирилган. Сиёсатчини озод қилиш талаби ифодаланган резолюцияни дебатларда асосий маърузачи сифатида иштирок этиши кутилаётган француз депутати, “Либерал ва демократларнинг Европа учун бирлиги” партияси вакили Жак Мэр тайёрлаган.

Ҳужжатда депутат Россияни Европа Кенгаши Вазирлар қўмитасининг инсон ҳуқуқлари риоясига бағишланган навбатдаги йиғилиши ўтказилгунга қадар “нима бўлса ҳам” озод этишга чақиради. Мазкур йиғилиш 7 июнь санасига белгиланган.

Депутат ўз чақириғида Инсон ҳуқуқлари бўйича Европа судининг сиёсатчини дарҳол озод этиш талабини асос қилиб келтирган.

ЕКПА депутатлари 27 январда бўлиб ўтган қишки сессия чоғида ҳам Москвани мухолифатчини озод қилишга чақиришганди. Ўшанда Россиядан пайсалга солмай, Ассамблеяга мазкур иш бўйича маърузачи жўнатиш талаб қилинган эди. Аммо Россия бу талабга қулоқ солмаган.

Россия адлия вазирлиги мухолифатчини Инсон ҳуқуқлари бўйича Европа суди талабига кўра озод этиш мумкин эмаслигини билдирганди. Вазир Константин Чуйченко суд баёнотини “ижро этилмаслиги кундай равшан ҳужжат” деб атаган.

Февраль ойи бошларида Европа Кенгашининг Вазирлар қўмитаси суд қарорлари Москва томонидан бажарилмаётгани хусусидаги Навальнийнинг шикоятини кўриб чиқишга қабул қилди. Қўмита шикоятни асосли деб топган тақдирда, Россиянинг Европа Кенгашидаги ҳуқуқлари тўхтатиб турилади, Европа суди эса Россияга қарши яна битта — унинг қарорларини ижро этмаганлик бўйича даъво ишини кўриб чиқишни бошлайди.

Прага маъмурияти Россия элчихонаси майдонини қисқартиришни таклиф қилди

Россиянинг Чехиядаги элчихонаси биноси, Прага, 2018 йил 26 марти

Прага магистрати Чехия ҳукуматини Россия элчихонаси майдонини ўзгартириш масаласини Россия томони билан муҳокама қилишга чақирди.

Чехия пойтахти маъмурияти Стромовка боғи ҳудудининг 1968 йили Варшава шартномаси қўшинлари Прагага бостириб кирганидан сўнг СССР элчихонаси ихтиёрига ўтиб қолган ва ҳозирда Россия элчихонаси тасарруфида бўлган қисмини рус дипмиссиясидан қайтариб олишни таклиф қилмоқда.

“Орадан 53 йил ўтиб, Стромовканинг бир бўлаги ниҳоят ишғолдан озод қилинмоғи керак”, деб ёзган Twitter'да Прага-7 тумани оқсоқоли Ян Чижински.

Lidovky.cz нашри хабарига кўра, магистрат Россия элчихонаси ходимларининг автоуловлари учун мўлжалланган тураргоҳдаги парковка ўринлари сонини ҳам қисқартирмоқчи.

Прага маъмуриятининг таклифи ўтган ҳафта Чехия ҳукумати 2014 йил октябрида Врбетице қишлоғидаги ўқ-дори омборида юз берган портлашда Россия махсус хизматларининг қўли бўлиши мумкинлиги ҳақида баёнот бергани ортидан билдирилмоқда.

Шанба куни Чехия бош вазири Андрей Бабиш ҳамда ташқи ишлар вазири вазифасини бажарувчи Ян Гамачек Прагадаги Россия элчихонасининг 18 нафар ходими мамлакатдан бадарға қилинишини маълум қилган — ушбу ходимлар аслида рус разведка идоралари учун хизмат қилиши айтилмоқда.

Эртасига расмий Москва Чехия элчихонасининг 20 нафар хизматчисини Россиядан чиқариб юбориш ҳақида кўрсатма берган.

Россия ҳукумати Чехиянинг хатти-ҳаракатини қуруқ ва тўқима важлар таъсирида қабул қилинмиш мисли кўрилмаган қарор, деб атаган.

Россия Пальмира яқинидаги террорчилар базасига ҳаводан зарба берди

Россия учоғидан Дайр аз-Зорга ташланган бомбалар (архив сурати)

Россия Мудофаа вазирлиги 19 апрель куни Пальмира шаҳридан шимоли-шарқда жойлашган “террорчилар қароргоҳи”га ҳаводан зарбалар бергани ҳақида эълон қилди.

Arabnews агентлиги хабарига кўра, террорчи кучларнинг кўчиб юриши хусусида турли манбалардан олинган маълумот тасдиқлангач, Россия Ҳарбий-космик кучлари (ҲКК) ҳаводан ҳамла қилиб, иккита панагоҳни ва 200 нафарга яқин жангарини йўқ қилган.

Ўзаро урушаётган томонларни яраштириш ва Сурия Араб Республикасида қочқинларнинг кўчишини назорат қилиш маркази маълумотига мувофиқ, Пальмирадан шимоли-шарқда жангарилар гизланган база ташкил қилиб, у ерда мамлакатнинг турли минтақаларида террорчилик хуружларини амалга ошириш учун жангари гуруҳларни тузиш билан шуғулланишган.

Россия ҲККга тегишли учоқларидан берилган зарбалар натижасида иккита панагоҳ, 200 нафарга яқин жангари, йирик калибрли пулемёт ўрнатилган 24 пикап ҳамда қарийб 500 кг ўқ-дори ва қўлбола портлатиш мосламаси ясаш учун зарур компонентлар йўқ қилинган.

Инсон ҳуқуқлари бўйича Европа суди Навальнийнинг шикоятини қабул қилди

Инсон ҳуқуқлари бўйича Европа судининг Страсбургдаги биноси, Франция

Инсон ҳуқуқлари бўйича Европа суди (ИҲБЕС) рус мухолифатчиси Алексей Навальнийнинг, у жазо муддатини ўтаётган 2-сонли ахлоқ тузатиш колониясидаги шарт-шароитдан норози бўлиб йўллаган шикоятини жавобгар томонга — Россияга йўллади. Бу ҳақда суд вакили ўз твиттер-аккаунти орқали маълум қилган.

Россия тарафи эса, қоидага биноан, шикоят билан танишиб чиқиб, ўз мулоҳазаларини ёзма тарзда ИҲБЕСга тақдим этиши керак.

Навальнийнинг адвокатлари ёзган шикоят Страсбургга апрель ойи бошларида келган эди. 16 апрель куни шикоят бўйича қарор қабул қилинди, Россия ҳукуматига саволларни 19 апрель куни жўнатишди.

Znak.com нашри қайдича, ИҲБЕСда шикоятни кўриб чиқиш 2 йилдан ортиқ вақтга чўзилиши мумкин.

ИҲБЕС хабарномасида айтилишича, судьяларни Россия ҳукуматининг қуйидаги саволларга берадиган жавоблари қизиқтирмоқда:

  • Навальнийнинг маҳбусликда сақлаш шароити Инсон ҳуқуқлари бўйича Европа конвенцияси 2-моддаси билан кафолатланган яшаш ҳуқуқига мувофиқми?
  • 2020 йилда заҳарланиши ортидан “ариза берувчининг соғлиғи қарийб ҳалокатли даражада ёмонлашгани”ни ҳисобга олганда, ҳозирда унинг муолажа шароитлари Конвенциянинг 2 ва 3-моддалари талабларига мос келадими?
  • Навальний қамоқхонада қийноққа солинганми, унга нисбатан шафқатсиз муносабатда бўлинганми?

Россия ҳукумати ушбу саволларга жорий йил 12 июлига қадар жавоб бериши лозим.

Россияда 9 май куни "Ўлмас полк" юриши бўлмайди

“Ўлмас полк” маршидан лавҳа, Москва, 2018 йил

Россия 9 май - Ғалаба кунини қаторасига иккинчи йил “Ўлмас полк” маршисиз нишонлайди. Ташкилотчилар буни коронавирус тарқалишининг олдини олиш чора-тадбирлари билан изоҳлашмоқда.

Мамлакатда кўплаб чекловлар аллақачон бекор қилинган бўлса-да, аксари минтақалар, жумладан Москвада ҳам митинг, юриш каби оммавий кўча тадбирлари тақиқланган.

“Россия Ўлмас полки” ҳаракати марказий штаби раисдоши Елена Цунаевага кўра, 9 май куни акция онлайн шаклда ўтказилади. Айни пайтда Цунаева, агар пандемия билан боғлиқ вазият яхшиланса, масъул идоралар 24 июнь куни “Ўлмас полк” юришини кўчада, рисоладагидек ўтказишга рухсат беришидан умидворлигини билдирди.

Ўтган йили 9 май куни Москвада на “Ўлмас полк” марши, на анъанавий парад ўтказилган. Карантин чекловлари юмшатилганидан кейин - 24 июнда Ғалаба паради ўтказилган, аммо “Ўлмас полк” юриши барибир бўлмаган. Аниқроғи, онлайн тартибда ўтказилган. Яъни иштирокчилар фронтчи қариндошларининг фотосуратларини махсус сайтда эълон қилишган.

“Ўлмас полк” 2000-йилларда фуқаролар ташаббуси билан вужудга келган. Йиллар ўтиб, акция давлат ташкилотчилигида ўтказиладиган бўлди, унда бир неча марта Путин ҳам иштирок этган.

9 май парадига ҳозирлик одатдаги тартибда давом этмоқда, унинг бекор қилиниш эҳтимоли тўғрисида ҳеч қанақа маълумот йўқ.

Ingenuity вертолёти Марсда илк парвозини амалга оширди

Ingenuity вертолёти

Perseverance ровери ёрдамида Марсга етказилган Ingenuity вертолёти бошқа сайёрада бошқариладиган парвозни амалга оширган биринчи двигателли учиш аппарати сифатида тарихда қоладиган бўлди.

Дроннинг учирилиш жараёни Америка аэрокосмик агентлиги (NASA)нинг Youtube’даги расмий каналида трансляция қилинди.

Парвоз видеотасвири кейинроқ эълон қилинади. Ҳозирча NASA вертолётнинг қуйи қисмида жойлашган камераси ёрдамида олган фотосуратни эълон қилди. Суратда Марс юзаси узра кўтарилаётган Ingenuity сояси кўриниб турибди.

Дрон парвози 30 сонияга яқин давом этди. У уч метрдан зиёдроқ баландликка кўтарилди. Ingenuity яна тўрт марта синов тариқасида учирилади. Вертолёт зичлиги Ер атмосферасиникидан 100 карра паст бўлган Марс атмосферасида учиш технологиясини ўзлаштирмоқда. Дрон синови 30 Марс кунига яқин вақт давом этади.

Вазни қарийб икки килога тенг бўлган аппарат бунга қадар Perseverance марсюрари ичида эди. Худди шу ровер воситачилигида Ingenuity билан Ердаги бошқарув маркази ўртасида алоқа таъминланди.

Perseverance ровери жорий йилнинг 19 февраль куни Марсдаги Езеро кратерига қўнган эди. Мазкур кратер бир замонлар сувга тўла бўлгани тахмин қилинади. Марсюрар сайёрада қадимда ҳаёт мавжуд бўлгани белгиларини топишга уриниб кўради ҳамда тупроқдан намуналар олади.

Perseverance ўтган йилнинг июлида Марсга жўнатилган. Қурилма "Марс-2020" миссияси доирасида 700 ер суткасига яқин вақт давомида “Қизил сайёра”да иш олиб боради.

Алексей Навальний қамоқхонадан маҳбуслар касалхонасига кўчирилди

Алексей Навальний

Покров шаҳридаги 2-сонли колонияда 31 мартдан бери очлик сақлаб турган мухолифатчи Алексей Навальний касалхонага ўтказилди. Бу ҳақда Россия Федерал жазони ижро этиш хизмати (ФЖИЭХ) Владимир вилояти бошқармаси маълум қилган.

Навальний ётқизилган касалхона Владимирдаги 3-сонли ахлоқ тузатиш муассасаси ҳудудида жойлашган. ФЖИЭХ сиёсатчининг аҳволини қониқарли деб баҳоламоқда. Хабарномада айтилишича, беморга, ўзининг розилигига кўра, витаминлар билан даволаш курси тайинланган.

ОАВ Навальний кўчирилган 3-сонли қамоқхонани “қийноқлар муассасаси” деб атамоқда. Ушбу колония маҳбуслар “қайта тарбиялаш” ва жиноят содир этганлик ҳақида иқрорнома олиш учун олиб келиниши таъкидланади. Собиқ маҳбусларга кўра, касалхонада уларга психотроп дорилар берилиб, қийноққа солинган ва ҳатто зўрланган ҳам.

Аввалроқ Навальнийнинг даволовчи врачлари унинг қон таҳлили натижаларини эълон қилишган эди. Улар ўзларида мавжуд ҳужжатлар билан мухолифатчининг соғлиғи хавф остида қолганини таъкидлашмоқда.

Чунончи, врач Анастасия Васильевага кўра, Навальнийнинг юраги тўсатдан тўхтаб қолиши эҳтимоли мавжуд.

“Ив Роше” иши бўйича судланган мухолифатчи февраль ойидан бери 2-сонли қамоқхонада сақланмоқда. Қамоқхонада Алексей Навальнийнинг соғлиғи бирдан ёмонлашган. У март ойи охирларида, зарур тиббий ёдам олмаётганига норозилик сифатида очлик эълон қилган.

Кеча Навальний штаби 21 апрель куни Россиянинг барча йирик шаҳарлари, жумладан, Москва ҳамда Санкт-Петербургда мухолифатчининг озод этилиши учун норозилик намойишлари ўтказилишини эълон қилган эди.

Британия ва Европа Иттифоқи Алексей Навальнийни қўллаб чиқишди

Навальнийни қўллаш учун Лондонда ўтказилган акциялардан бири, 2021 йил апрели

Буюк Британия Россияни маҳкум Алексей Навальнийга зудлик билан тиббий ёрдам олиш имкониятини тақдим этишга чақирди. Бу ҳақда Reuters агентлиги хабар қилди.

Ҳозирда колонияда бўлган Алексей Навальный ўзига қонунда кўзда тутилганидек тиббий ёрдам кўрсатилишини талаб қилиб, икки ҳафтадан бери очлик қилмоқда.

Британия ТИВ вакили баёнотида Алексей Навальнийга нисбатан ножоиз муносабат ва унинг соғлиғи ёмонлашаётганига оид хабарлардан “чуқур ташвиш” билдирилган ва Россия расмийлари мухолифатчини зудлик билан қамоқдан озод қилишга чақирилган.

Бу орада Европа Иттифоқи ҳам сиёсатчи А. Навальнийнинг саломатчилиги ёмонлашаётганига оид хабарлар юзасидан чуқур ташвиш изҳор қилди.

“Биз Россия расмийларидан унга зудлик билан ўзи ишонган врачлар билан учрашиш имкониятини беришга чақирамиз. Биз жаноб Навальний колонияда бўлган пайтда унинг хавфсизлиги ҳамда соғлиғи учун Россия расмийлари масъул бўлади, деб ҳисоблаймиз”, дейилган ЕИ баёнотида.

Германияда пандемиянинг 80 минг қурбонини хотирлаш куни ўтказилди

Германия канцлери Ангела Меркель пандемия қурбонларини хотирлаш маросимида, Берлин, 2021 йил 18 апрели

Германияда 18 апрель куни пандемиянинг 80 минг қурбонини хотирлаш куни бўлиб ўтди. Якшанба куни Германия канцлери Ангела Меркель ва президент Франк-Вальтер Штайнмайер Берлин черковидаги тонгги ибодатда иштирок этишган.

Берлиндаги Концертхаусда эса хотира концерти ўтказилиб, у жамоатчилик телевидениеси орқали намойиш қилинди. Германия президенти Штайнмайер юртдошларига статистика маълумотлари ортида инсон фожиаси тургани, бу фожиа ҳалигача давом этаётганини эслатди. У касалхона, интернет ва хасписларда пандемия чекловлари туфайли яқинлари билан хайрлашиш имкониятига эга бўлолмай, ёлғизликда вафот этганларни ёдга олди.

Штайнмайер Миллий хотирлаш куни юртдошларга улар қайғу-ҳасрат ва изтироб қучоғига ёлғиз ташлаб қўйилмаганини эслатиш учун ўтказилаётганини қайд этди.

Туркманистонда мамлакат президентининг отаси вафот этди

Давлат телевидениеси Туркманистон президентининг отаси вафот этгани ҳақида 18 апрель оқшомида “Ватан” ахборот дастури орқали хабар қилди

Туркманистонда 18 апрель куни президент Гурбангули Бердимуҳамедовнинг отаси Маликгули Бердимуҳамедов 88 ёшида вафот этди. Бу ҳақда хабар қилган Туркманистон давлат оммавий ахборот воситаларида ҳали ўлим ва дафн тафсилотларига оид маълумотлар тарқатилгани йўқ.

Давлат телевидениеси президентнинг отаси вафот этгани ҳақида маҳаллий вақт билан соат 21:00 да эфирга чиққан “Ватан” ахборот дастурида хабар қилди.

Маликгули Бердимуҳамедовнинг вафотига оид норасмий манбалардан маълумотлар Озодликнинг туркман хизматига 18 апрель тонгидаёқ кела бошлаган.

Туркман нашрларида чоп қилинган таъзияномалардан маълум бўлишича, М. Бердимуҳамедов 1932 йилнинг 12 августида Геоктепа этрапининг Бирлешик-1 қишлоғида туғилган. Турли йилларда кутубхоначи, бошланғич синфлар ўқитувчиси, туркман тили ва адабиёти муаллими бўлиб ишлаган, армия хизматидан кейин ҳарбий билим юртини тугатиб, Ички ишлар вазирлигида турли лавозимларда ишлаган ва подполковник унвони билан пенсияга чиққан.

Туркманистон оммавий ахборот воситаларида чиққан расмий хабарларда Маликгули Бердимуҳамедов қаҳрамон ва ёшларга ўрнак ўлароқ кўрсатилади. Унинг қишлоқ аҳлига ёрдам бергани, “Биз енгамиз”, “Қўй, уруш бўлмасин”, “Кўпроқ дон экайлик” каби шеърлар ёзгани қайд этилади.

Президентнинг отаси номи Ашхободдаги 1001-ҳарбий қисмга ҳамда Чўғанлидаги ИИВ ходимлари учун қурилган турар-жой мажмуасига берилган, мамлакатда Маликгули Бердимуҳамедов номидаги медаль ҳам таъсис этилган.

Ўтган йиллар мобайнида Туркманистондаги нашрлар президентнинг отаси Маликгули Бердимуҳамедов, онаси Ўгулабат ва унинг бобоси Бердимуҳамед Аннаевни шарафлаб келган, бу эса, кузатувчилар фикрича, давлат раҳбари шахсига сиғинишга асос бўлган.

Навальний тарафдорлари 21 апрель куни митингга чиқишмоқчи

Россиялик мухолифатчи Алексей Навальний

Қамоқдаги мухолифатчи Алексей Навальнийнинг тарафдорлари 21 апрель куни Россиянинг Москва ва Санкт-Петербург дохил йирик шаҳарларида уни дастаклаш учун митинглар ўтказиш ниятидалар. Бу ҳақда сиёсатчининг сайтидаги хабарномада айтилган. Митинг ўтказиш нияти борлигини мухолифатчининг сафдошлари бўлган Леонид Волков ва Иван Жданов тасдиқлаганлар.

Навальний колонияда очлик акциясини ўтказмоқда. Аввалроқ Навальнийнинг шифокорлари унинг ташхислари натижаларига таянган ҳолда мухолифатчининг аҳволи шиддат билан ёмонлашаётганини билдирганлар. Навальний бели оғриётгани ва бошқа хасталик асоратлари туфайли ўз олдига врач киритилишини талаб қилган ҳолда 31 мартдан эътиборан очлик акциясини бошлаган.

“Шунақа ҳолатлар бўладики, бунда тезлик билан ҳаракат қилиш лозим, акс ҳолда тузатиб бўлмас ҳодиса содир бўлиши мумкин. Бунақа пайтларда жуда тезлик билан қарор қабул қилиш зарур”, деб ёзишган Навальнийнинг сафдошлари.

Улар “Навальнийга озодлик” сайтида сиёсатчининг озод этилиши учун уюштирилажак митингларда иштирок этиши мумкин бўлган 500 минг киши рўйхатдан ўтишини кутиб ўтирмаганлар. Аввалроқ Навальнийнинг сафдошлари сайтда ярим миллион рўйхатдан ўтганидан кейин митинг санасини эълон қилишларини билдиришганди. 18 апрель тушдан кейин митингларнинг муҳтамал иштирокчилари сони 459 мингдан ошган. Бир неча кун аввал рўйхатдан ўтганларнинг электрон манзиллари базаси ўғирлангани ҳақида хабар тарқалганди.

“Воқеалар ўта шиддат билан ва жуда ёмон ривожланмоқда. Бундан буён кутиш ва ортга суриш мумкин эмас”, дея изоҳ берадилар муаллифлар митинг зарурати тўғрисидаги хабарномада. Навальнийнинг саломатчилигидан ташқари улар мухолифатчи томонидан асос солинган Коррупцияга қарши кураш фонди (Россияда хорижий агентлар рўйхатига киритилган) ва Навальний штабларини расмийлар экстремистик ташкилотлар рўйхатига қўшмоқчи эканларини ҳам қайд этадилар.

Митинглар ўтказиш учун ариза бериш ҳақида хабарномада ҳеч нарса дейилмаган – афтидан, расмийлар бу тадбирларни рухсат этилмаган акциялар ўлароқ қабул қилишади.

Навальний ҳимояси учун сўнгги йирик акциялар шу йил январь ойи охирлари ва февраль ойи бошларида – сиёсатчи Германиядаги муолажадан сўнг Россияга қайтиб, аэропортда ҳибсга олинган, кейин эса колонияга йўллангани ортидан ўтказилганди. Мазкур акциялар учун расмийлардан рухсат олинган эмас. Ўша пайтда Россиядаги ўнлаб шаҳар кўчаларига, турли маълумотларга кўра, 100 мингдан 300 минг нафаргача одам чиққан. Ўша пайтда минглаб норози тутиб кетилган, айримлар полициячиларга қарши зўравонликка оид жиноят ишлари бўйича судланганлар.

Февраль ойи бошларида Навальнийнинг сафдошлари оммавий норозилик намойишларидан вақтинча воз кечиб туришларини маълум қилганлар, бироқ бу чиқишлар баҳордан қайта бошланишини билдирганлар.

АҚШ жорий йилда Европа ва Марказий Осиёдан 1,5 минг нафар қочқин қабул қилади

АҚШ президенти Жо Байден 2021 молия йилида, яъни 2020 йил 1 октябридан 2021 йил 30 сентябригача Қўшма Штатлар қабул қилишга тайёр бўлган қочқинлар сонини белгиловчи фармонни имзолади.

“Америка овози” хабарига кўра, Африка давлатларидан бўлган қочқинлар учун 7 минг виза, Шарқий Осиёдан бўлганлар учун 1000 виза, Европа ва Марказий Осиёдан бўлганлар учун 1,5 минг виза, Лотин Америкаси ва Кариб денгизи ҳавзасига кирадиган давлатлардан бўлганлар учун 3 минг виза, Яқин Шарқ ва Жанубий Осиёдан бўлганлар учун эса 1,5 минг виза ажратилган. Яна мингта виза захира учун қолган.

Кейинроқ Оқ уй матбуот котиби Жен Псаки яқин келажакда квота миқдори ўзгариши мумкинлигини қайд этган.

Жо Байден аввалроқ АҚШ қабул қиладиган қочқинлар сонини 62,5 мингга етказишга ваъда берганди.

Чехия россиялик 18 нафар дипломатни бадарға қилади

Чехия бош вазири А. Бабиш

Чехия рус разведкасининг 2014 йили содир бўлган ўқ-дори омборидаги портлашга алоқадорлиги гумони билан Россия элчихонасининг 18 нафар ходимини бадарға қилади. Бу ҳақда 17 апрель куни Чехия бош вазири Андрей Бабиш билан ташқи ишлар вазири Ян Гамачек билдиришди.

Бабишга кўра, Чехия махсус хизматлари унга россиялик ҳарбийларнинг Врбетице қишлоғида содир бўлган ва икки киши умрига зомин бўлган портлашга алоқадор эканига оид рад этиб бўлмайдиган далилларни тақдим этганлар.

“Чехия Республикаси суверен давлатдир ва у бу каби фактлар аниқланишига муносабат билдириши лозим”, деган Чехия бош вазири.

“Немис тўлқини” хабарига кўра, Чехия ташқи ишлар вазири бўлиш билан бирга ички ишлар вазири вазифасини ҳам бажарувчи Ян Гамачек тасарруфида мамлакатни 48 соат ичида тарк этиши лозим бўлган россиялик 18 нафар дипломатнинг Бош разведка бошқармаси (ГРУ) ва Ташқи разведка хизмати (СВР) ходимлари эканига оид далиллар борлигини билдирган.

Аввалроқ Ян Гамачек коронавирусга қарши “Спутник V” вакцинасини сотиб олиш учун музокаралар ўтказиш учун кетаётган Москвага сафарини қолдиргани маълум бўлганди. Бу режа важидан у мухолифат томонидан ҳам, коалициядаги ҳамкорлари томонидан ҳам танқидга учраётганди.

Праганинг 18 дипломатни бадарға қилиш қарори Россия билан икки томонлама муносабатларга путур етказади, дея билдирди Давлат думасининг халқаро ишлар қўмитаси раиси Леонид Слуцкий.

Депутат бунақа ҳолатларда, одатдагидай Россия томонидан жавоб чоралари кўрилишини қайд этди.

Бу орада Чехия полицияси ёнида Александр Петров ва Руслан Боширов номига берилган ҳужжатлар дохил бир неча паспорт бўлган икки россияликни қидираётганини маълум қилди. Полиция ва Уюшган жиноятчиликка қарши кураш миллий маркази маълумотига кўра, бу одамлар 2014 йил 11 октябридан 16 октябригача Чехияда юрганлар. Британияда россиялик Александр Петров ва Руслан Боширов Сергей ва Юлия Скрипални “Новичок” моддаси билан заҳарланишига алоқадор бўлган ГРУ ходимлари, деб билишади. Bellingcat ва The Insider хабарларига кўра, Петров ва Бошировнинг ҳақиқий исмлари Анатолий Чепига ва Александр Мишкиндир.

Москвада “Лукашенконинг душманлари” қўлга олиниб, Минскка топширилди

Россия бош вазири Михаил Мишустиннинг Беларусь президенти Александр Лукашенко билан учрашуви, Минск, 2021 йил 16 апрели

Россия пойтахти Москвада Федерал хавфсизлик хизмати (ФСБ) ходимлари Беларусда президент Александр Лукашенкони йўқ қилиш ва ҳарбий тўнтаришга ҳозирлик кўргани айтилаётган икки гумонланувчини қўлга олишган.

ТАСС агентлигининг ФСБ жамоатчилик билан алоқалар марказидан олинган маълумотга таянган ҳолда хабар қилишича, Россия ва Беларусь хавфсизлик хизматлари Беларусь ва АҚШ фуқаролигига эга бўлган Юрий Зянкович ҳамда Беларусь фуқароси Александр Федутанинг ноқонуний фаолиятига чек қўйишган. Махсус хизматлар иддаосича, улар гўё ҳарбий тўнтариш тайёрлаш ва Лукашенкони йўқ қилиш тараддудида бўлишган.

Қайд этилишича, россиялик чекистлар беларуслик ҳамкасбларидан Зянкович ва Федутанинг мухолиф кайфиятдаги беларуслик генераллар билан шахсий учрашувига оид маълумот олишган. Учрашув Москвадаги ресторанлардан бирида бўлиб ўтган. ФСБ агентлари мазкур учрашувни тасвирга олишга муваффақ бўлган.

Федерал хавфсизлик хизмати сайтида фитначилар режаси баён қилинган бўлиб, унда ўз мурожаатини халққа ёйинлаш учун радио ва телемарказларни эгаллаб олишга ҳозирлик кўрилгани айтилган.

ТАСС агентлиги хабарида ресторанда учрашганлар ўртасида роллар тақсимланиши дохил тўнтариш режаси тафсилотлари келтирилган. Тўнтаришнинг якуний мақсади Беларусда конституциявий тузумни ўзгартириш бўлган.

Россия хавфсизлик идоралари учрашув иштирокчиларини қўлга олишиб, уларни беларуслик ҳамкорларга топширишди, дейилган Россия ФСБси сайтида. Федута билан Зянкович билан биргаликда ФСБ хабарномасида “беларуслик генераллар” деб аталган шахслар ҳам Минскка топширилганми-йўқми – бу ҳолат очиқланган эмас.

Россияда Украина консули ҳибсга олинди

Россия Федерал хавфсизлик хизмати ФСБ Украинанинг Санкт Петербург шаҳридаги консули Александр Сосонюк рус фуқароси билан учрашиб, махфий маълумотни олиш пайтида ҳибсга олинганини маълум қилди.

"Россия Федерациясининг Федерал хавфсизлик хизмати 2021 йил 16 апрелда Санкт-Петербург шаҳрида Россия фуқароси билан учрашув пайтида ҳуқуқни муҳофаза қилиш идоралари ва Россия ФСБ маълумотлар базаларида мавжуд бўлган махфий маълумотни олганида, украиналик дипломат жиноят устида ҳибсга олинди", - дейилади Россия ФСБ хабарида.

Баёнотда, шунингдек, ҳибсга олинган шахснинг фаолияти Россияга душманоналиги ва дипломатик ходим мақомига мос келмаслиги айтилган.

"Чет эллик дипломатга нисбатан халқаро ҳуқуқ нормаларига мувофиқ чоралар кўрилади", деб қўшимча қилинган ФСБ баёнотида.

Украина ўз дипломатининг ҳибсга олинишини қоралади.

"Санкт-Петербургдаги консулининг ҳибсга олинишини Киев Россия томонининг душманлик ҳаракати деб билади ва Россия дипломатларига қарши жавоб чораларини тайёрламоқда", деди Украина ташқи ишлар вазирининг ўринбосари Eвгений Eнин.

Украина Ташқи ишлар вазирлиги матбуот котиби Олег Николенко украин дипломатининг ҳибсга олинишини "провокация" деб атади.

"Россиянинг беқарорлаштирувчи ҳаракатлари фонида навбатдаги провокация бу. " - деди вазирлик матбуот котиби Олег Николенко.

Халқаро меъёрларга кўра, дипломатлар ўзлари ишлайдиган мамлакатда дахлсизлик ҳуқуқига эга, аммо қонун бузилган ёки душманона ҳаракатлар содир бўлган тақдирда улар мамлакатдан бадарға этилиши мумкин.

Александр Сосонюк Украинанинг консули ўлароқ Россияда 2012 йилдан буён ишлаб келмоқда.

Эрон ядровий иншоотига қилинган ҳужум Теҳрон ядровий дастури бўйича музокараларни издан чиқариши мумкин

14 апрель куни Эрон президенти Ҳасан Руҳоний уранни бойитиш даражасини кескин ошириш қарори ушбу ҳужумга жавоб эканини айтди.

Эроннинг муҳим ядровий иншоотига қилинган ҳужум 2015 йилда Теҳрон ядровий дастури бўйича эришилган битимни қайта тиклашга қаратилган уринишларни мураккаблаштирди.

Эрон мамлакат марказида жойлашган махфий ерости иншоотига қилинган ҳужумда Исроилни айбламоқда.

Ҳужумдан икки кун ўтиб Теҳрон уранни 60 фоизгача бойитишни бошлашини эълон қилди.

14 апрель куни Эрон президенти Ҳасан Руҳоний уранни бойитиш даражасини кескин ошириш қарори ушбу ҳужумга жавоб эканини айтди.

Президент ҳукумат йиғилишида Исроилни назарда тутган ҳолда:

«Бугун Натанзда IR-6 [центрифугалари] ишга туширилади ёки бойитиш 60 фоизга кўтарилади. Бу сизларнинг ёвузлигингизга жавоб», - деди.

Эрон расмийлари Натанзга қилинган ҳужумни «ядровий терроризм» ҳаракати деб атамоқдалар.

Бу эса Теҳрон ядровий дастури бўйича имзоланган битимга Вашингтонни қайтаришга қаратилган музокараларни издан чиқариши айтилмоқда.

Собиқ АҚШ президенти Дональд Трамп 2018 йилда Вашингтонни келишувдан бир томонлама чиқариб, Эронга қарши санкция жорий қилган эди.

«Музокаралар чоғида қўлимизни бўш қолдирмоқчи эдингиз, аммо қўлимиз тўла», - деди Руҳоний.

Бундан Теҳрон жорий ҳафта охирида Венада бўлиб ўтадиган музокаралар олдидан ўз позициясини мустаҳкамлашга уринаётганини хулоса қилиш мумкин.

14 апрель куни Эроннинг Халқаро атом энергияси агентлигидаги (IAEA) вакили Казем Ғарибободий уранни 60 фоизга бойитиш келаси ҳафтада бошланишини айтди.

Олти қудратли давлат ва Эрон ўртасида эришилган ядровий келишувга биноан, Теҳронга уранни 3,67 фоизгача бойитишга рухсат берилган эди. Ядро бомбасини ишлаб чиқариш учун уранни 90 фоизгача бойитиш керак.

Теҳрон январь ойида парламент янги қонунни қабул қилганидан кейин, уранни 20 фоизгача бойитишни бошлаган эди. Ушбу қонун лойиҳаси 2020 йил ноябрь ойида Эроннинг юқори даражадаги ядро олими Моҳсен Фахризода ўлдирилиши ортидан ишлаб чиқилди. Қотиллик ортида Исроил тургани тахмин қилинди.

Хабарларга кўра, Натанзга қилинган ҳужумда иншоотдаги электр таъминоти узиб қўйилган. Лекин ер ости ядровий иншоотига етказилган зарар кўлами номаълум бўлиб қолмоқда. The New York Times газетасининг АҚШ разведкасидаги манбаларга таянган ҳолда хабар беришича, ҳужум туфайли Натанздаги фаолиятни қайта тиклаш учун камида тўққиз ой вақт керак бўлиши мумкин.

Эрон парламентининг тадқиқот маркази раҳбари депутат Алиризо Заканий «бир неча минг центрифуга зарар кўргани ва барбод бўлганини» айтган.

Эрон ташқи ишлар вазири Муҳаммад Жавод Зариф Натанзга қилинган ҳужум ядровий музокараларда Теҳроннинг позициясини кучайтиришини айтди. Унинг сўзларига кўра, Теҳрон ҳужум ортида Исроил турганини аниқласа, қасос олади.

«Сионистлар шафқатсиз санкцияларни бекор қилиш йўлидаги ютуқларимиз учун ўч олмоқчи», - деди Зариф. «Биз уларнинг тузоғига тушмаймиз», дея қўшимча қилди вазир.

Исроил ҳодисага алоқадор эканини рад этганиям, тасдиқлаганиям йўқ. Исми ошкор қилинмаган разведка манбалари Исроил матбуотига ҳужум ортида Исроил разведкаси – «Моссад» турганини айтган.

Макрон, Меркель ва Зеленский Россиядан ўз қўшинларини Украина чегарасидан олишни талаб қилди

Украина ва Франция президентлари Владимир Зеленский ва Эммануэль Макрон ҳамда Германия канцлери Ангела Меркель Россиядан ўз қўшинини Украина чегарасидан ортга тортишни талаб қилди.

16 апрель куни Владимир Зеленский Парижда франциялик ҳамкасби Эммануэль Макрон билан учрашди.

Ангела Меркель уларга видеоконференция форматида қўшилди.

Учрашувнинг асосий мавзуларидан бири Украина шарқидаги Донбас минтақасида вазиятнинг кескинлашиши бўлди.

Улар Украина билан чегарада Россия қўшинлари сонининг кўпайиши ҳамда аннексия қилинган Қрим юзасидан хавотир билдиришди.

"Донбассдаги вазиятга келсак, Украина ва Германия билан биз сиёсий ечимга эришиш йўлида доимий сафарбар ва қатъиятли бўлиб қоламиз — бу натижага эришиш мумкин бўлган ягона йўл", — деди Макрон.

Аввалроқ Байден ва Меркель Россияни Украина билан чегарадаги қўшинларини олиб кетишга чақирганди. Бундан олдин Россия Украина чегарасига ва Қримга 40 минг нафардан аскар жўнатгани ҳақида хабар қилинган.

АҚШ элчиси: Байден ва Путин Навальнийнинг заҳарланишини муҳокама қилди

Жо Байден  ва Владимир Путин.

АҚШ президенти Жо Байден Владимир Путин билан телефон мулоқотида россиялик мухолифатчи Алексей Навальнийга қилинган суиқасдни тилга олган. Бу ҳақда АҚШнинг Россиядаги элчиси Жон Салливан 16 апрелдаги баёнотида маълум қилди.

Давлат раҳбарларининг суҳбати бир неча кун олдин бўлиб ўтган эди. Оқ уй ва Кремлнинг расмий хабарларида мулоқотда Навальний муҳокама қилингани ҳақида лом-мим дейилмаган.

Вашингтон мухолифатчини заҳарлашдаги эҳтимолий иштироки учун Россияга қарши санкцияларни кучайтириши кутилмоқда.

Элчи ўз баёнотида Навальний ҳақидаги суҳбат тафсилотларига тўхталмаган. Фақат президент Байден Россиянинг ёмон ният кўзланган хатти-ҳаракатлари, жумладан Навальнийни кимёвий қурол билан заҳарлашидан жиддий ташвишда эканини билдирган.

Шунингдек, баёнотда Вашингтон томонидан яқинда Россияга қарши янги санкциялар жорий этилишига сабаб бўлган бошқа муаммоли масалалар ҳам тилга олинган.

Байден Россия президенти Путин билан 13 апрель куни суҳбатлашди. Кремль хабарига кўра, суҳбат Америка тарафи ташаббуси билан бўлган.

Байден эса кейинроқ махсус мурожаатномасида Путин билан “очиқча гаплашгани” ва, Россия Америка демократиясига дахл қилишда давом этса, янада қатъий чоралар кўришга тайёрлиги ҳақида уни огоҳлантирганини айтганди.

АҚШ кеча Россияга қарши жорий қилган санкциялар сирасига Навальнийга суиқасд қилганлик учун жазо чоралари киритилмаган. Аммо жанговар кимёвий моддаларни қўллаганлик учун жазо чоралари аввал эълон қилинган санкциялар тўпламида қайд этилган.

Америка қонунчилигига кўра, президент ёз фасли бошларида Москвага қарши санкцияларни кенгайтиришга мажбур. Агарда Москва мухолифатчига нисбатан кимёвий қурол қўлланилгани фактини тан олмаса ва вазиятни назорат қилиш учун халқаро инспекторларнинг келишига изн бермаса, чекловлар муқаррар кучайтирилади.

Аммо Россия ҳукумати “Новичок” моддаси қўлланилгани тугул, ушбу заҳарнинг мавжудлигини ҳам инкор этиб келади.

АҚШ: Индианаполисда юз берган отишмада 8 киши ҳалок бўлди

АҚШнинг Индианаполис шаҳрида содир бўлган отишмада саккиз киши ўлган, камида тўрт киши жароҳатланган. Жароҳат олганлардан бирининг аҳволи оғирлиги айтилади.

Отишма шаҳарнинг ғарбий қисмида, FedEx курьерлик ширкати омборхонасида юз берган. Полиция маълумотига кўра, ўқ узган одам ўз жонига қасд қилган. Воқеа сабаблари ўрганилмоқда.

Отишма юз берган FedEx биноси аэропортга яқин жойда жойлашган. Воқеадан сўнг автомагистрал бир оз вақтга ёпиб қўйилган эди. Ҳозирда аэропортга элтувчи барча йўллар очиқ.

Статистикага кўра, жорий йилда АҚШда 12 минг нафардан ортиқ киши ўқотар қуролли ҳужумга йўлиқиб, шулардан қарийб 150 нафари ҳалок бўлган.

Ўтган йили 43 мингдан зиёд киши вафот этган бўлса, шундан 610 нафари қуролли ҳужумлар натижасида оламдан кўз юмган.

Президент Жо Байден ўқотар қуроллар савдосини чеклаш юзасидан чоралар кўрилишини айтган.

Украина Россия тажовузига қарши Ғарбдан қўшимча амалий ёрдам сўради

Украина ташқи ишлар вазири Дмитрий Кулеба 15 апрель куни Киевда ўтказилган матбуот анжуманида

Украина ташқи ишлар вазири Дмитрий Кулеба 15 апрель куни Ғарб мамлакатларини Киевга дастакни кучайтиришга чақирди. Мулозимга кўра, Украина чегаралари яқинида Россия қўшинлари тўпланаётгани ортидан юзага келган таранглик қабатида Ғарб томонидан “сўз билан қўллов етарли эмас”дир.

Болтиқбўйилик ҳамкасблари билан музокаралардан кейин чиқиш қилган Кулеба Эстония, Латвия ва Литва расмийларини Европа Иттифоқи ва НАТОга аъзо бўлган бошқа мамлакатларга ҳам Киевга “амалий ёрдам бериш” таклифи билан мурожаат қилишга чақирди. Кулеба Москвани “Украинага уруш ҳамда давлатчилигини йўқ қилиш билан очиқдан-очиқ таҳдид қилаётганлик”да айблади ҳамда Россияга унинг Украина шарқидаги хатти-ҳаракатлари “жуда оғриқли” оқибатларга олиб келиши мумкинлигини кўрсатиб қўйиш лозимлигини билдирди.

Болтиқбўйи мамлакатлари ташқи ишлар вазирлари Украина билан бирдам эканларини билдиришиб, Москвани вазиятни таранглик даражасини пасайтиришга чақиришди.

Украина президенти Владимир Зеленский 16 апрель куни Франция президенти Эммануэль Макрон билан маслаҳатлашув ўтказиши кутилмоқда. Видеоалоқа орқали ўтказилажак суҳбатда Германия канцлери Ангела Меркель ҳам иштирок этиши мумкинлиги айтилмоқда.

Интернетда гувоҳлар томонидан яқинда ёйинланган фото ва видеолар Россия аскарларининг Қримга ҳамда Украина чегарасига кетаётганидан далолат беради.

Туркманистон президенти Халқ Маслаҳати жиловини ҳам ўз қўлига олди

Бердимуҳаммедов бунга қадар президентликдан ташқари Туркманистон бош вазири лавозимини ҳам эгаллаган эди.

Туркманистон президенти Гурбангули Бердимуҳаммедов яқиндагина ташкил этилган парламент юқори палатаси - Халқ Маслаҳати раиси лавозимига бир овоздан сайланди.

Бунга қадар у президентликдан ташқари Туркманистон бош вазири лавозимини ҳам эгаллаган эди.

14 апрель куни Туркманистон матбуоти Бердумуҳаммедов “яширин овоз бериш йўли билан мазкур лавозимга сайлангани” ҳақида ёзди.

Халқ Маслаҳатининг биринчи йиғилишида Бердимуҳаммедов шахсан ўзи яна саккизта сенаторни тайинлади. Бу билан сенаторлар сони 56 кишига етди. Қолган 48 сенатор март ойининг охирларида “сайланган” эди.

28 март куни Туркманистонда янги ташкил этилган сенатга биринчи сайловлар бўлиб ўтди. Сайловчилар мамлакат бўйлаб олтита сайлов участкасида овоз беришлари учун бор-йўғи икки соат вақт берилди.

Туркманистон ҳукумати овоз бериш тугаганидан кейин бир неча соат ўтиб, аҳолиси 5,8 миллион мамлакатда сайлов ҳуқуқига эга бўлган сайловчиларнинг 98,7 фоизи овоз берганини иддао қилди.

Чет эллик кузатувчиларга сайлов участкаларини кузатишга изн берилмаган.

Байден 11 сентябргача АҚШ қўшинлари Афғонистондан чиқарилишини билдирди

Афғонистондаги НАТО ҳарбийлари.

Президент Жо Байден жорий йилнинг 11 сентябригача АҚШ ҳарбийлари Афғонистондан тўлиқ олиб чиқиб кетилишини билдирди. 2021 йилнинг 11 сентябрида 2001 йил 11 сентябрда АҚШга қилинган йирик террор ҳужумига 20 йил бўлади.

“Америка олиб бораётган энг узоқ урушга нуқта қўйиш пайти етиб келди. Америка қўшинлари уйларига қайтиши лозим”,-деди 14 апрель куни Оқ уйда қилган чиқишида Байден.

Унга кўра, Афғонистонда қолган 2500 АҚШ ҳарбийсини олиб чиқиш жараёни 1 майдан бошланади.

“Биз қўшинларимизни олиб чиқиб кетишга шошилмаймиз. Бу ишни масъулият ва хавфсизликни ҳис қилган ҳолда иттифоқчиларимиз билан тўлақонли равишда келишган ва мувофиқлаштирилган ҳолда амалга оширамиз”,-деди Байден.

АҚШ президенти Покистон, Ҳиндистон, Хитой, Россия ва Туркияни Афғонистондаги жараёнларда иштирок этишга чақирди.

Байден Афғонистон ҳукуматини ҳарбий соҳадан ташқари барча йўналишларда қўллаб-қувватлашда давом этишини айтди.

Сўнгги бир сутка ичида COVID-19 дан жаҳонда 10 мингдан кўп бемор вафот этди

АҚШда коронавирусга чалинганлар сони 31 миллионга яқинлашди.

Жаҳон соғлиқни сақлаш ташкилоти, 14 апрель ҳолатига кўра, жаҳонда коронавирус юққанлар сони 136 миллион 996 минг кишидан ошиб кетганини билдирди. Беморлардан 2 миллион 951 мингги вафот этган.

Сўнгги бир сутка ичида дунёдаги 679 003 кишида коронавирус аниқланди, улардан 10 367 нафари ўлди.

Жаҳондаги коронавирус статистикасини олиб бораётга АҚШдаги Жонс Хопкинс университети эса, ўтган йили пандемия бошланганидан то шу йилнинг 15 апрелигача 138 миллион 259 минг киши коронавирусга чалингани, улардан 2 миллион 972 мингдан кўпроғи вафот этгани ҳақида билдирди.

Коронавирус беморлари сони бўйича АҚШ жаҳонда биринчи ўринда турибди. АҚШда коронавирусга чалинганлар сони 31 миллионга яқинлашди.

Иккинчи ўринда Ҳиндистон (13,873 миллиондан ортиқ), учинчи ўринда Бразилия (13,517 миллиондан ортиқ), тўртинчи ўринда Франция (5,026 миллиондан ортиқ), бешинчи ўринда эса Россия (4,666 миллиондан ортиқ) бормоқда.

ЖССТ маълумотларига кўра, 13 апрель ҳолатига кўра дунё бўйича коронавирусга қарши 733 миллион 287 мингдан ортиқ доза вакцина қўлланилган.

Япония расмийлари 2021 йил ёзида Токиодаги олимпиада бекор қилиниши мумкинлигини истисно қилмаяпти

Япония расмийлари 2021 йил ёзида Токиодаги Олимпия ўйинлари бекор қилиниши эҳтимолдан ҳоли эмас, деган фикрдалар. Бу ҳақда, Reuters хабарига кўра, ҳукмрон Либерал-демократик партия бош котиби Тосихиро Никаи маълум қилган.

Никаи, агар коронавирус билан боғлиқ вазият ёмонлашиб, COVID-19 га чалинганлар сони ўсишда давом этса ҳамда Олимпия ўйинларини ўтказиш жуда қийинлашиб кетса, мусобақаларни бекор қилиш мумкин.

Аҳолининг эмланиши учун масъул бўлган вазир Таро Коно “Асахи” телеканали эфири орқали ёзги Олимпия ўйинлари Токиода ҳеч бир томошабинсиз ўтиши мумкинлигини билдирган. Аввалроқ ташкилотчилар мусобақаларни хорижлик ишқибозларсиз ўтказишга оид қарор қабул қилгандилар.

Токиодаги ёзги Олимпиада ўтган йили бўлиб ўтиши керак эди, бироқ коронавирус пандемияси туфайли ўйинлар 2021 йил июлига кўчирилган.

Апрель ойида Kyodo агентлиги томонидан ўтказилган сўров натижалари сўралган японияликларнинг 72 фоизи Токиодаги Олимпия ўйинлари пандемия туфайли бекор қилиниши ёки бошқа вақтга қолдирилишини истаётганини кўрсатган.

АҚШ нашрлари Байден Россияга қарши санкция киритишга оид фармон ҳозирлаганини ёзмоқда

АҚШ президент Жо Байден

Қўшма Штатлар президенти Жо Байден маъмурияти 15 апрель куни Россияга нисбатан янги санкциялар жорий этиш ниятида. Бу ҳақда АҚШ нашрлари Оқ уйдаги ўз манбаларидан олинган маълумотларга таянган ҳолда хабар тарқатишди.

Президент Жо Байден ҳозирлаган фармонга мувофиқ, АҚШ банкларига Россия банки, Молия вазирлиги ҳамда Миллий фаровонлик жамғармасидан давлат облигацияларини сотиб олиш тақиқлаб қўйилади. Бундан ташқари, АҚШдан 10 нафар россиялик дипломат бадарға қилиниши кутиляпти, улардан айримлари Афғонистондаги америкалик ҳарбийларнинг ўлдирилиши учун мукофот пули тўлашга алоқадорлиги айтилмоқда.

Санкциялар Россиянинг АҚШ сайловларига аралашгани, киберҳужумлар уюштиргани ва Қримни аннексия қилиб олганига жавобан жорий этилади.

Россия Ташқи разведка хизмати АҚШ давлат муассасалари ва мудофаа корпорациялари компьютер тизимларига ноқонуний кирилган ҳамда Solar Winds деб номланган амалиёт учун айбдор экани қайд этилган.

Март ойи ўртасида АҚШ махсус хизматлари Россиянинг АҚШда 2020 йили бўлиб ўтган президент сайловига аралашганига оид ҳисобот ёйинлаганлар. Ўша пайтда ABC News’га берган Байден президент сайловига аралашгани учун Путин “бадал тўлаши”ни билдирганди.

Россия расмийлари бошқа мамлакатлардаги сайловларга аралашувга алоқадорликларини доим инкор қилиб келганлар.

Давомини ўқинг

XS
SM
MD
LG