Линклар

Шошилинч хабар
22 июн 2021, Тошкент вақти: 13:22

Халқаро хабарлар

Беларус полицияси норозиларга қарши ўқотар қурол қўллаши мумкин

26 октябрдан Беларусдаги қатор йирик саноат корхоналарида иш ташлаш бошланди.

Беларус ички ишлар вазири Юрий Караев 28 октябрда президент Александр Лукашенкога қарши намойишларга чиқаётган “саботажчи ва террорчилар”га нисбатан ўқотар қурол ишлатишилиши мумкинлигини билдирди.

Аввалроқ Лукашенко мухолифат намойишларини ва 26 декабрдан бошланиб кетган умуммиллий иш ташлашни “уюшган жиноий гуруҳлар ҳаракати” сифатида баҳолаган эди.

Ўз чиқишида Лукашенко намойишлар ва иш ташлашларни назарда тутган ҳолда “мамлакат террор таҳдидига дучор бўлаётгани”ни таъкидлади.

Европа Иттифоқи Беларус ички ишлар вазири Юрий Караевни намойишларни зўравонлик билан бостиришдаги иштироки учун санкциялар жорий этилган амалдорлар рўйхатига киритган эди.

Караев 28 октябрдаги билдирувида “ўқ отар қурол тинч намойишчиларга” нисбатан ишлатилмаслигини, лекин “саботаж ва террор қилмоқчи бўлганларни полиция ҳар қандай йўллар билан тўхтатиб қолиши зарурлиги”ни айтди.

Лукашенко мухолифатнинг 25 октябргача истеъфо бериш талабини бажармагани ортидан 26 октябрдан Беларусдаги қатор йирик саноат корхоналарида иш ташлаш бошланди.

Беларусни 1994 йилдан бери бошқариб келаётган Александр Лукашенкога қарши намойишлар 9 августда ўтган президентлик сайлови ортидан бошланиб кетган. Мазкур сайловда Лукашенко ғолиб бўлгани эълон қилинган эди.

Кун янгиликлари

Россия Аргентинага “Спутник V”нинг иккинчи дозасини вақтида етказиб бера олмаяпти

Аргентина ҳукумати “Спутник V” вакцинасининг янги партияси етказиб берилишига эришиш мақсадида Россия билан қизғин музокаралар олиб бормоқда. Аммо вакцина қачон, қанча миқдорда етказиб берилиши номаълум, деб ёзди Аргентинанинг La Nacion газетаси.

Кўплаб аргентиналиклар “Спутник V”нинг биринчи компоненти билан жорий йилнинг март-апрель ойларидаёқ эмланган, бироқ улар ҳанузгача такрор эмланган эмас. Россия тўғридан-тўғри инвестициялар фонди бу масалада изоҳ беришдан бош тортган.

Июнь ойи ўрталарида мамлакатга вакцинанинг биринчи компонентидан қарийб 7,9 миллион доза, иккинчисидан эса 1,5 миллион дозадан ортиқ, яъни тахминан беш баравар кам келтирилган эди. Аргентина ҳукумати биринчи ва иккинчи компонентлар билан эмлаш оралиқ даврини 12 ҳафтагача узайтириб бўлди.

“Биз Россиядан иккинчи дозани юборишни илтимос қиламиз, чунки кўплаб фуқароларимизнинг биринчи дозани олганига 12 ҳафта бўлай деб қолди”, деган La Nacion нашрининг соғлиқни сақлаш тизимидаги манбаси.

Унинг қўшимча қилишича, ҳозирча хавотирланишга ҳеч бир сабаб йўқ, чунки “Спутник V” биринчи компонентидаёқ 78,6 фоиз самарадорлик қайд этиб, касалликнинг оғир кечиши ва ўлим ҳолатларининг олдини олишга ёрдам бермоқда.

Аргентина сотиб олаётган вакциналардан фақатгина “Спутник V” икки компонентли препарат саналади. Россия вакцинасининг илк партияси 2020 йил декабрида Аргентинага келтирилган.

La Nacion манбасига кўра, июнь ойи охирида 70 минг киши иккинчи дозани олиши керак. Аргентина президенти маъмурияти Россия вакцина ишлаб чиқаришни кўпайтиришда қийинчиликларга дуч келаётганини, шу боис ҳукумат “Спутник V”нинг янги партиялари кечикишидан ташвишда эканини айтган.

Аргентина, шунингдек, Мексика ҳукуматлари май ойида ҳам “Спутник V” вакцинасининг иккинчи дозаси етишмаётганини билдирган эди. Bloomberg агентлиги “Россия сайёрамиз аҳолисининг ўндан бир қисмига вакцина етказиб беришга ваъда берган бўлишига қарамай, ташқи бозорлар сурункали танқисликни бошидан кечирмоқда”, дея қайд этган.

Тожикистонда яна коронавирусга чалиниш ҳолатлари қайдга олинаётгани расман тасдиқланди

Душанбедаги тиббиёт марказларидан бири

Тожикистон расмийлари мамлакатда яна коронавирус инфекцияси тарқай бошлаганини тасдиқладилар, дея хабар қилди Озодликнинг тожик хизмати.

21 май куни COVID-19 тарқалишини олдини олиш бўйича эпидемиологик чораларни кучайтириш Республика штаби мамлакат касалхоналарида коронавирусга чалиниш бўйича янги ҳолатлар қайд этилганини маълум қилган.

Вирус яна тарқай бошлаганини Республика штаби хориждан қайтганлар томонидан карантин муддатига риоя қилинмагани ва ниқоблар тақилмай қўйгани билан боғлаган.

Тожикистон расмийлари йил бошидан бери мамлакатда COVID-19 га чалиниш ҳолатлари бўлмаётганини билдириб келганлар. Соғлиқни сақлаш вазирлиги маълумотига кўра, пандемия бошидан бери Тожикистонда 13 минг 308 нафар киши коронавирус юқтириб олган, хасталик важидан 90 нафар бемор қурбон бўлган. Бироқ мустақил манбалар хасталикка чалинган ва у туфайли қурбон бўлганлар сони расмий статистикада кўрсатилганидан анча юқори эканини иддао қилмоқдалар.

12 июнь куни Озодликнинг тожик хизмати маҳаллий врачлар, хусусий лабораториялар ходимлари ва беморларнинг яқинлари сўзларига таянган ҳолда мамлакатда яна коронавирусга чалиниш ҳолатлари кузатилаётгани ҳақида хабар қилган. Тожикистон Соғлиқни сақлаш вазирлиги бу маълумот асоссизлигини айтиб, мамлакатда хасталаниш билан боғлиқ янги ҳолатлар кузатилаётганини рад этганди.

Бишкек кўчалари бўйлаб Ўзбекистонда ишлаб чиқарилган автобуслар қатнай бошлади

Бишкекка етиб келган ISUZU автобуслари

Қирғизистон пойтахти Бишкек шаҳрида 22 июндан Ўзбекистонда ишлаб чиқарилган 50 та янги ISUZU автобуси йўловчиларга хизмат кўрсата бошлади. Яқин кунларда автобусларнинг янги партияси келиши кутилмоқда. Қирғизистонликлар тадбиркорлар Ўзбекистонга жами 350 дона автобус учун буюртма берилганини айтмоқдалар.

Мазкур автобусларнинг узунлиги 6,9 метр, ўриндиқлар сони 16 та бўлса-да, унда 38 нафар йўловчи ташиш мумкинлиги айтилмоқда. Дастлабки партия билан келган автобуслар шаҳардаги 5 та йўналиш бўйлаб хизмат кўрсатмоқда.

Автобуслар қирғизистонлик хусусий тадбиркорлар (“Эко Пассажирские перевозки” МЧЖ) томонидан сотиб олинмоқда – янги транспорт учун пойтахт бюджетидан пул ажратилган эмас. Бишкек мэрияси ходимлари Озодликнинг қирғиз хизматига автобуслар нархидан бехабар эканларини айтганлар, “Эко Пассажирские перевозки” ширкати вакиллари эса автобусни етказиб бераётган ширкат талабига кўра бу маълумотни тақдим этолмасликларини билдирганлар.

ISUZUнинг Ўзбекистондаги расмий дилери сайтида мазкур автобуслар нархи 358 миллион сўм (33 минг АҚШ долларидан кўпроқ) ўлароқ кўрсатилган.

“Грозний” телерадиоширкати раҳбари Рамзан Қодировни танқид қилувчиларга ўлим билан таҳдид қилди

"Грозний" Чеченистон давлат телерадиоширкати директори Чингиз Аҳмадов

Давлатга қарашли “Грозний” телерадиоширкати директори Чингиз Аҳмадов Чеченистон раҳбари Рамзан Қодировнинг танқидчилари ва душманларини ўлдиришга ваъда берди.

Аҳмадов “Инстаграм”да чечен тилидаги ёйинлаган мазкур видеобаёнотини Кавказ.Реалии нашри рус тилига ўгириб, эълон қилган.

“Грозний” ЧДТРШ директори фикрича, Қодировнинг ҳар қандай душмани чечен халқининг ва шахсан унинг душманидир. “Кимнидир ўлдириш керак бўлса, ўлимга муносиб одам бўлса, ўлдирамиз. Кимнидир уриш лозим бўлса, урамиз”, деган Аҳмадов ўз видеосида.

“Грозний” телерадиоширкати ўз эфири орқали Рамзан Қодировнинг танқидчилари камера қаршисида Чеченистон раҳбаридан кечирим сўрагани акс этган лавҳаларни мунтазам намойиш этиб келади.

Май ойи охирларида TikTok ижтимоий тармоғида Қодировни “шайтон” деб атаган тулалик “Андрей Бушмелёв” тахаллусли блогернинг узр сўраб чиққани ТВ орқали кўрсатилган. Блогер ўша видеосида барча ёшларни Чеченистон раҳбари шаънига ҳақоратли сўзларни айтишдан эҳтиёт бўлишга чақирган эди.

Бу воқеадан сал аввалроқ пермлик бир ўсмир ва Москва вилоятининг Чехов шаҳрида яшовчи асли доғистонлик 15 яшар йигитчанинг қариндошлари омма олдида Рамзан Қодировдан кечирим сўраган — улар иккиси ҳам ижтимоий тармоқларда Қодировни “шайтон” деб атаганди.

Кавказ.Реалии маълумотига кўра, Чеченистон раҳбарига қарши чиқувчи россияликларга чора кўриш вазифаси республикадан ташқарида яшовчи чечен диаспораси зиммасига юклатилган. Улар Рамзан Қодиров ва унинг оила аъзолари ҳақидаги оммавий фикр-муносабатларни мониторинг қилиб, уларнинг муаллифларини қидириб топиш билан ҳам шуғулланади. Чеченистоннинг ўзида эса бунақа ишлар “тизимли йўлга қўйилган”, деб ёзади нашр.

Қозоғистон Қирғизистондан келишилган сув ҳажмининг ярминигина олмоқда

Қирғизистондаги Тўқтўғул сув омбори

Қозоғистоннинг Жамбил вилояти Қирғизистондан келадиган сувга қарам бўлгани учун бу йил сув тақчиллигига рўбарў бўлган. Бу ҳақда вилоят раҳбари Бердибек Сапарбаев Озодликнинг қозоқ хизматига билдирган.

“Биз сувни Ўртатўқай ва Киров сув омборларидан оламиз. Бугунги кунда икки давлат ўртасидаги келишувда кўрсатилган ҳажмдан фақат 50 фоизинигина оляпмиз. Ҳозир бу борада Қирғизистон вакиллари билан ишлаяпмиз. Яқинда делегация келиб кетди. Шу кунда сувни бизга бироз кўпроқ бера бошладилар, бироқ, афсуски, бу сув биз учун ҳозирча етарли эмас”, деган Сапарбаев.

Мулозимга кўра, бу ҳолат Қирғизистоннинг ўзида ҳам сув танқислиги кузатилаётгани, ҳаво ҳароратининг тоғлардаги музликларни эритиш учун етарли даража исимаётгани билан боғлиқ бўлиши мумкин.

“Шунинг учун ҳам биз ўз сув захираларимиздан (ерости ва ерусти сувларидан) самарали фойдаланишимиз, қўшимча ҳавзалар барпо қилишимиз керак. Даставвал улардан учта қурамиз, кейин эса улар сонини оширамиз. Шунингдек, биз қудуқларимиздаги носозликларни бартараф қилишимиз, кузгача кўлларни тўлдириб, булоқ сувларидан истеъфода этишимиз лозим. Ҳозир биз Қирғизистон сувларига 80 фоизга қараммиз. Шу кунда Чу ва Талас дарёлари ҳисобидан сувга бўлган эҳтиёжимизнининг 50 фоизинигина қондиряпмиз, холос”, дея қўшимча қилган Бердибек Сапарбаев.

Унга кўра, Жамбил вилоятидаги суғориладиган ерлар (тақрибан 200 минг гектар) учун сув эҳтиёжи 1,1 миллиард куб метрни ташкил қилади. Қозоғистон жануби ва жанубий-ғарбида бу йил кузатилаётган қурғоқчиликни эътиборга олган ҳолда Жамбил вилоятида деҳқон хўжаликларига сув навбат билан берилмоқда. Бу ҳолат айниқса Қирғизистон сувларига қарам бўлган уч туманга кўпроқ дахлдор.

Қирғизистонда бу йил сув захиралари танқислиги юзага келган. Тўқтўғул сув омборидаги сув ҳажми 10,8 миллиард куб метргача пасайган. Бу эса ўтган йилдаги сув ҳажми билан солиштирганда икки-уч миллиард кубга камдир.

Қирғизистон Энергетика ва саноат вазирлиги маълумотига кўра, сўнгги бир неча йил ичида кузатилаётган сув тақчиллиги сув омборини тўлдиришда муаммоларни юзага келтирган, бунинг натижасида 2020/2021 йил қишидан резервуар минимал даражадаги (8,6 миллиард куб метр) сув ҳажми билан чиққан.

Путинни оламшумул шахс сифатида кўрувчи россияликлар сони озайди

Сталин, Путин ва Ленин суратлари туширилган сувенир кружкалар.

Сўнгги тўрт йилда Россия президенти Владимир Путинни оламшумул шахс сифатида кўрувчи россияликлар сони кескин озайди.

Ижтимоий фикрни ўрганувчи Москвадаги “Левада” марказининг сўнгги сўров натижаларига таянган ҳолда хабар беришича, респондентларнинг 15 фоизигина Путинни оламшумул шахс сифатида эътироф этган. Бундан тўрт йил аввал бу кўрсаткич 34 фоиз эди.

Айни пайтда россияликларнинг 39 фоизи репрессиялар ва қатлиомлар ташкилотчиси сифатида шуҳрат қозонган СССРнинг собиқ раҳбари Иосиф Сталинни тарихдаги энг буюк сиёсатчи сифатида тан олади.

Сталиндан кейинги иккинчи ўринни 1917 йилги давлат тўнтариши оқибатида ҳокимиятга келган коммунистлар доҳийси Владимир Ленин эгаллаган. Уни сўралганларнинг 32 фоизи буюк шахс сифатида билади.

Европа Иттифоқи Беларусга қарши янги санкцияларни қабул қилди

Испанияда Лукашенкога қарши ўтган норозилик акцияси. 2021 йил 29 май.

Европа Иттифоқи ташқи ишлар вазирлари Беларусь президенти Александр Лукашенко, унинг яқин одамлари ва юқори даражали мансабдорларига нисбатан санкцияларни жорий этди. Санкция жорий этилганлар рўйхатига киритилганлар орасида Лукашенконинг оила аъзолари ҳам бор.

Янги санкциялар рўйхатига Беларусь мансабдорларидан 78 киши ва саккизта давлат идораси киритилди. Бу рўйхат Европа Иттифоқи махсус журналида эълон қилинади. Рўйхат асосан қонун чиқарувчилар, прокурорлар, судлар ва бошқа давлат амалдорларидан иборат.

Санкиця рўйхатига киритлган шахсларнинг хориждаги банк ҳисоб рақамлари музлатилади ва уларга виза бериш тўхтатилади.

Германияда университет илмий ходими Россия фойдасига жосуслик қилганликда гумонланиб қўлга олинди

Германия Олий суди биноси.

Германия федерал прокуратураси 21 июнь куни мамлакатдаги университетларда ишловчи илмий ходимлардан бири Россия фойдасига жосуслик қилганликда гумонланиб қўлга олинганини маълум қилди.

Расман билдирилишича, Илнур Н., 2020 йилнинг октябридан бошлаб Москва махсус хизматларига муайян миқдордаги пул эвазига немис университетидаги махфий маълумотларни етказиб турган. Уни қўлга олиш амалиёти 18 июнь куни ўтказилган.

Қўлга олинган шахснинг тўлиқ исми ва у ишлаган университет номи ошкор этилмаяпти. Прокуратура баёнотида таъкидланишича, у илмий-техника сохасига алоқадор бўлган кафедрада илмий ходим бўлган.

Федерал суд жосусликда гумонланиб ушланган шахсга тергов тугагунига қадар қамоқ эҳтиёт чорасини белгилади.

Янги Зеландия оғир атлетикачиси олимпиадада иштирок этадиган илк трансгендер бўлади

43 ёшли Хаббард жаҳонда ўз вазн тоифасидаги энг кучли спортичлардан бири ҳисобланади.

Янги зеландиялик оғир атлетикачи Лорел Хаббард олимпиадада иштирок этиш ҳуқуқини қўлга киритган илк трансгендер бўлди.

Хаббард 23 июндан 8 июлгача ўтадиган Токио олимпиадасида Янги Зеландия терма жамоаси сафида аёллар ўртасида ўтадиган оғир атлетика бўйича мусобақаларнинг 87 кило вазн тоифасида иштирок этади.

Танқидчилар Хаббард аёллар ўртасидаги мусобақада адолатсиз равишда куч имтиёзига эга бўлади, деган нуқтаи назарни билдирмоқда.

43 ёшли Хаббард жаҳонда ўз вазн тоифасидаги энг кучли спортичлардан бири ҳисобланади. У ўз жинсини алиштиргунига қадар, яъни 2013 йилгача эркаклар ўртасидаги мусобақаларда иштирок этган.

2015 йилда Халқаро олимпия қўмитаси трансгендер спортчиларга аёллар тоифасида иштирок этишга рухсат берган эди. Мазкур қарор ортидан Лорел Хаббард олимпиадада иштирок этиш имкониятига эга бўлди.

Қатар футбол бўйича 2022 йил жаҳон чемпионатига коронавирусга қарши эмланмаганларни киритмайди

Қатарда ўтказиладиган футбол бўйича навбатдаги жаҳон чемпионати 2022 йилнинг 21 ноябрида бошланади.

Қатар ҳукумати мамлакатда 2022 йилда ўтказиладиган футбол бўйича жаҳон чемпионатига коронавирусга қарши тўлиқ эмланган хориж фуқаролари киритилишини маълум қилди.

Бош вазир шайх Ҳолид бин Халифа бин Абдулазиз ал Тани 20 июнь куни матбуотга берган интервьюсида жаҳон чемпионатини томоша қилиш иштиёқида бўлган ўз фуқароларини эмлаш учун бир миллион доза вакцина сотиб олишини айтди.

“Қатарда 2022 йилда ўтадиган жаҳон чемпионати бошлангунига қадар кўп мамлакатлар ўз фуқароларини коронавирусга қарши тўлиқ эмлаб бўлади. Бироқ айрим давлатлар бу ишни амалга ошира олмай қолиши эҳтимол. Шунинг учун чемпионатга коронавирусга қарши тўлиқ эмаланмаган шахсларни киритмайди”,-деди Бош вазир.

Қатарда ўтказиладиган футбол бўйича навбатдаги жаҳон чемпионати 2022 йилнинг 21 ноябрида бошланади.

Эронда АЭС фаолияти авария ҳолатида тўхтатилди

Эрондаги Бушеҳир АЭС.

Эрондаги Бушеҳир атом электр станцияси авария ҳолатида тўхтатилгани тўғрисида мамлакат атом энергияси агентлиги маълум қилди. Расман билдирилишича, АЭС иши “техник носозликлар ортидан вақтинча тўхтатилган”.

Агентлик яқин кунларда техник носозлик бартараф этилиши ва АЭС яна қайтадан миллий электр тармоғига уланишини таъкидлади.

Давалт энергетика ширкати расмийси Тованир Ғуломали Раҳшанимар АЭС фаолиятини қайта тиклаш учун камида 3-4 кун керак бўлишини, бу давр ичида мамлакатда энергия таъминотида узилишлар кузатилиши мумкинлигини айтди.

Бушеҳир АЭС 2011 йилда ишга туширилган эди. Ўшандан бери илк маротаба мазкур АЭСда авария бўлгани расман билдирилди.

АҚШ Навальнийнинг заҳарланиши билан боғлиқ равишда Россияга қарши янги санкцияларни ҳозирламоқда

Жо Байден маъмурияти мухолифатчи Алексей Навальнийнинг заҳарланиши важидан Россияга қарши янги санкциялар туркумини тайёрламоқда. Бу ҳақда CNN телеканалига АҚШ президентининг миллий хавфсизлик бўйича маслаҳатчиси Жейк Салливан маълум қилган.

“Янги санкциялар туркуми тайёрланмоқда. Россиянинг зарарли фаолиятига жавоб бериш ҳақида гап бораркан, биз SolarWinds [АҚШ ширкатига ҳакерлик ҳужуми], сайловларга аралашув, Навальний масалаларида ўз муносабатимизни юмшатмоқчи эмаслигимизни кўрсатиб келяпмиз”, деган у.

Салливанга кўра, янги санкциялар АҚШ ҳукумати улар тўғри одамларга қарши йўналтирилганига ишонч ҳосил қилганидан сўнг жорий қилинади.

Президент маслаҳатчининг айтишича, ушбу санкциялардан кейин АҚШ кимёвий ҳужум қуроли қўлланишига доир яна бир санкциялар туркумини ишлаб чиқмоқчи.

Алексей Навальний ўтган йилнинг 20 августида августида беҳуш ҳолда, заҳарланиш аломатлари билан Омск касалхонасига ётқизилган ва кўп ўтмай даволаниш учун Германияга жўнатилган эди.

Немис ҳарбий лабораторияси экспертлари мухолифатчи организмида “Новичок” гуруҳига мансуб жанговар заҳарловчи модда асоратини топганлар. Россия ҳукумати нафақат Навальнийнинг заҳарланишига алоқаси борлигини, ҳатто унинг заҳарланганини ҳам инкор этган.

The Insider, Bellingcat, CNN ва Der Spiegel томонидан ўтказилган тадқиқотда Навальнийнинг заҳарланишини ортида ФХХнинг Криминалистика институтига алоқадор 8 нафар тезкор ходим турган бўлиши мумкин, деган хулосага келинган.

Шу йилнинг 17 январида Навальний Германиядан Россияга қайтгани заҳоти Шереметево аэропортида қўлга олинган. 2 февраль куни суд уни “Ив Роше” иши бўйича синов муддатини бир неча марта бузган, деган айб билан, шартли қамоқ муддатини ҳақиқийси билан алмаштиришган.

Март ойи бошларида АҚШ Навальний иши юзасидан Россия, Германия ва Швейцариядаги 14 та ташкилотга қарши санкциялар жорий қилган эди. Ундан олдинроқ АҚШ Молия вазирлиги Россиянинг етти нафар мансабдорига нисбатан санкциялар қўллаган.

Хитой Тожикистонга 300 минг доза вакцина совға қилди

Хитой Тожикистонга коронавирусга қарши Sinovac Research & Development Co. Ltd ширкати томонидан ишлаб чиқарилган вакцинадан 300 минг доза совға қилди.

Озодликнинг тожик хизмати хабарига кўра, Пекиндан келган махсус чартер рейсини Душанбе аэропортида 20 июнь оқшомида тожикистонлик юқори лавозимли амалдорлар ва Хитой элчиси кутиб олган. Икки мамлакат ўртасида мунтазам рейслар ҳали тикланган эмас.

Тожикистон Соғлиқни сақлаш вазирлиги қайдича, Хитой томонидан текинга берилган CoronaVac препаратлари махсус омборларда сақланиб, ундан аввал тасдиқланган режа асосида фойдаланилади.

Шу йил март ойида ЖССТнинг COVAX дастури доирасида Тожикистонга AstraZeneca вакцинасидан 192 минг доза келтирилганди. 23 мартдан мамлакатда коронавирусга қарши оммавий эмлов жараёни бошланган бўлиб, шу кунгача 80 мингдан зиёд киши эмланган.

ССВ маълумотига кўра, пандемия бошидан бери Тожикистонда коронавирус инфекцияси 13 минг 308 кишида қайд этилган, улардан 90 киши қурбон бўлган.

АҚШ ва Россия ўз элчиларини Москва ва Вашингтонга қайтармоқда

Россиянинг АҚШдаги элчиси Анатолий Антонов

Россиянинг АҚШдаги элчиси Анатолий Антонов 20 июнь куни Москвадан Нью-Йоркка учиб кетди. У Қўшма Штатларга уч ойлик танаффусдан сўнг қайтмоқда.

Антонов АҚШ президенти Жо Байден март ойида ABC телеканали мухбирига берган интервьюсида Россия президенти Владимир Путинни “қотил” деб ҳисоблашини айтгани ортидан Москвага чақириб олинганди.

Апрель ойида Россия расмийларининг қатъий тавсияларидан сўнг АҚШ элчиси Жон Салливан Москвани тарк этганди. Вашингтон расмийлари ўшанда элчи Россияга бир неча ҳафтадан сўнг қайтишини билдирганлар.

Элчиларни ортга қайтаришга оид келишувга Байден ва Путин 16 июнь куни Женевада ўтган саммит чоғида эришганлар.

Антонов Вашингтондаги Россия элчихонасида душанбадан иш бошлаши керак. АҚШ элчиси эса Москвага кейинги ҳафта қайтади.

Қурғоқчилик таҳдиди: Қозоғистон экинларни суғориш учун Тожикистондан қўшимча сув олмоқда

Қайроққум сув омбори

Қозоғистон жанубий минтақаларида ўткир сув танқислиги кузатилаётган бир пайтда Тожикистондаги Қайроққум сув омборидан қўшимча 315 миллион куб метр сув олишни режаламоқда. Мамлакат жанубидаги фермерлар Сирдарё ҳавзасида сув етишмаслиги туфайли шолини суғоришни камайтиришга мажбур бўлишган.

Қозоғистон экология, геология ва табиий бойликлар вазири ўринбосари Серик Хўжаниёзов “Баҳри Точик” резервуари (Қайроққум сув омбори)дан жорий йилнинг июнь — август даврида Қозоғистонга қўшимча сув ташланишини маълум қилган. Унга кўра, 315 миллион куб метр миқдордаги бу сув шоликор майдонларни суғоришга сарфланади.

Хўжаниёзовнинг айтишича, Қозоғистон сув эвазига Тожикистонга техника ва ёнилғи-мойлаш материаллари етказиб беради.

Тожикистон Энергетика ва сув захиралари вазирлиги “Озодлик”нинг тожик хизматига вазир Далер Жума ҳамда Қозоғистон экология, геология ва табиий ресурслар вазири Магзум Мирзагалиев бу масалада 31 май куни келишувга эришганини тасдиқлаган.

Қайроққум сув омборидан Ўзбекистонга ҳам қўшимча сув берилиши бўйича келишув бор-йўқлиги ҳозирча маълум эмас.

Ўзбекистон президенти Шавкат Мирзиёев Тожикистонга сўнгги расмий ташрифи чоғида Қайроққум ГЭСида бўлган эди. Аввалроқ у мамлакат аҳолисини 2021 йилда Ўзбекистон экин майдонларини суғоришда жиддий сув танқислигига дуч келишидан огоҳлантирган. “Суғориш учун сув ҳажми 60 фоизгача камаяди”, деган Мирзиёев.

Тожикистон ҳукумати жорий йилда Сирдарё ҳавзасида сув камлиги билан боғлиқ мураккаб вазият юзага келганини билдирган. Тожикистон Фанлар академияси Музликларни ўрганиш маркази директори Абдулҳамид Қаюмов тоғларда қор жуда кам ёққанлиги сабабли дарёларда сув янада камайиб кетишидан огоҳлантирмоқда.

“Ҳозирда Варзоб дарёси юқорисида сув сатҳи 30 сантиметргача пасайган — бу ҳалокатли даражада паст кўрсаткич”, деган у.

Қайроққум ГЭСи сув омбори Тожикистон ҳудудидаги энг йирик сув омборларидан бири саналади. Унинг узунлиги 65 километр ва эни 8 дан 20 километргача, сув сиғими эса 3 миллиард 413 миллион куб метрни ташкил қилади.

Арманистон: Пашинян муддатидан олдинги парламент сайловида ғалаба қозонганини эълон қилди

Никол Пашинян

Арманистон бош вазири вазифасини бажарувчи Никол Пашинян ўз етакчилигидаги “Фуқаролик шартномаси” партияси 20 июнь куни ўтказилган муддатидан олдинги парламент сайловида ғалаба қозонганини эълон қилди.

Мамлакат сайлов комиссияси барча бюллетенлар санаб чиқилганидан кейин парламент сайловида “Фуқаролик шартномаси” партияси 53,92 фоиз овоз олганини эълон қилди. Бу партиянинг бир ўзи ҳукуматни шакллантиришига 0,08 фоиз овоз етмай қолгани айтилмоқда.

Иқтидордаги партиянинг асосий рақиби — собиқ президент Роберт Кочаряннинг “Айастан” (“Арманистон”) блоки, МСК маълумотларига кўра, 21,04 фоиз овоз билан иккинчи ўринда бормоқда.

Учинчи ўринни собиқ президент Серж Саргсяннинг “Шарафим бор” мухолифат блоки (етакчиси Артур Ванецян) 5,23 фоиз овоз билан эгаллаб турибди.

Арманистон қонунчилигига кўра, Миллий йиғилиш (парламент)да ўз вакилларига эга бўлиш учун партиялар камида 7 фоиз овоз олиши керак.

МСК қайдича, мухолифатдаги партиялардан яна бири — “Гуллаётган Арманистон” 3,96 фоиз овоз олган.

Никол Пашинян “биз Арманистон халқи “Фуқаролик шартномаси”га ва менга мамлакатни бошқариш ваколатини берди, деб хулоса қила оламиз”, дея баёнот берган.

Пашинян ўз ғалабасини унга бошқарувнинг бирмунча қатъий усулларига ўтиш ва мамлакатда “қонун диктатураси”ни ўрнатиш имконини берувчи “пўлат инқилоби” деб атаган.

“Айастан” блоки мағлубиятини тан олишдан бош тортиб, сайловнинг илк натижалари “ишончли эмас”лигини иддао қилмоқда.

Блок иддаосича, 20 июнь кунги овоз бериш чоғида юзлаб қоидабузарликлар ҳақида хабарлар олинган бўлиб, бу “сайлов натижалари олдиндан тузилган режа асосида, келишилган тарзда сохталаштирилганидан далолат беради”.

“Айастан” блоки “барча баҳсли масалаларга ойдинлик киритилиб, шубҳалар тарқамагунча” сайлов натижаларини тан олмоқчи эмас.

Вашингтон АҚШ Украинага бериладиган тезкор ҳарбий ёрдам тўхтатилганини инкор қилди

Қўшма Штатлар Украинага бериладиган тезкор ҳарбий ёрдамни тўхтатиб қўйди. Мазкур қарор АҚШ президенти Жо Байденнинг Россия президенти Владимир Путин билан 16 июнь куни Женевада ўтган учрашуви арафасида қабул қилигани ҳақида Politico журнали хабар берди.

Нашрнинг ёзишича, Пентагон 275 миллион долларлик ҳарбий ёрдамга қўшимча тарзда яна 100 миллион долларлик ҳарбий техника ва қуролни Украинага жўнатишни режалаштирган эди. Пентагон кейинроқ бу қарорни ўзгартирган. Оқ Уй маъмурияти Politico журнали эълон қилган маълумотни “ҳақиқатга зид” деб баҳолади.

Украина мудофаа вазири Андрей Таран “Вашингтон Украинага ҳарбий ёрдамни музлатиб қўйгани тўғрисида”ги хабарларни “Россия ҳукумати томонидан уюштирилган провокация” деб атади. АҚШ президенти матбуот котиби Жен Псаки ҳам бу хабарлар асоссиз эканини таъкидлади.

Австралияда Covid-19га қарши янги типдаги вакцина синовлари бошланди

Австралиянинг Мельбурн шаҳрида автомобилларга коронавирусга қарши тест топшириш маркази манзилини кўрсатувчи мана шундай белгилар ўрнатилган.

Австралияда Covid-19га қарши Nucleus Network ширкати томонидан ишлаб чиқарилган янги типдаги вакцинанинг клиник синовлари бошланди. Мутахассислар мазкур вакцина AstraZeneca ва Pfizer вакциналарига нисбатан самаралироқ бўлишини маълум қилди.

Nucleus Network ширкатининг тиббиёт бўйича директори Пол Гриффинга кўра, янги вакцина коронавирусга юқишини бир неча баробарга қисқартиради. Вакцина икки йилдан сўнг фойдаланишга чиқарилиши билдирилмоқда.

Айни пайтда Австралияда COVID-19га қарши AstraZeneca ва Pfizer вакциналаридан фойдаланишга рухсат берилган.

Австралия ҳукумати ўзининг 25 миллион фуқароси 2021 йилнинг охиригача тўлиқ эмланиб бўлишини билдирмоқда. Айни пайтда Австралияда 30 минг киши коронавирусга чалинган, улардан 900 нафари вафот этган.

Эроннинг янги президентини биринчи бўлиб Путин ва Эрдўғон табриклади

Эронда 18 июнда ўтган президентлик сайловида 4 номзод орасидан Иброҳим Раисий ғалаба қозонди.

Эроннинг янги сайланган президенти Иброҳим Раисийни биринчилардан бўлиб Россия президенти Владимир Путин ва Туркия президенти Режаб Тоййип Эрдўғон табриклади.

Эрдўғон Анқара ва Теҳрон муносабатларини олий даражада ривожлантириш мақсадида Эронга мамнуният билан сафар қилишга тайёр эканини билдирди.

Путин эса ўз табригида Мосвка ва Теҳрон ўртасидаги муносабатларни ривожлантириш масаласига эътибор қаратди.

Эронда 18 июнда ўтган президентлик сайловида 4 номзод иштирок этди. Унда Иброҳим Раисий ғалаба қозонди.

60 ёшли Раисий ўта консерватив позициядаги шахс ҳисобланади. У 1988 йилда минглаган сиёсий маҳбусларни ўлим жазосига ҳукм қилган суд жараёнларига раислик қилган. Ҳуқуқ фаоллари Раисийни инсониятга қарши жиноятларда айблаб келади.

Туркманистонда газдан қарзи борларга давлат нархида озиқ-овқат олиш имкони берилмаяпти  

Лебапда газдан қарзи бор минглаб одамга ун, сарёғ ва шакарни имтиёзли нархларда сотиб олиш имконияти берилмаяпти.

Туркманистон шарқидаги Лебап вилояти аҳолиси газ бўйича қарзи учун давлат нархида озиқ-овқат олиш ҳуқуқидан маҳрум қилинди.

Озодлик радиоси туркман хизмати хабарига кўра, Лебапда газдан қарзи бор минглаб одамга ун, сарёғ ва шакарни имтиёзли нархларда сотиб олиш имконияти берилмаяпти.

Ҳозирда Туркманистоннинг бир қанча вилоят ва туманларида газ учун қарзларни тўлаш бўйича ҳисоб-китоблар олиб борилмоқда.

Газ учун тўловлар нақд пул билан тўланиши керак. Сўнгги йилларда чуқур иқтисодий инқирозга учраган мамлакатда нақд пул етишмовчилиги юзага келган.

Озодлик радиоси Тукрманистонда нон қимматлагани ва озиқ-овқат маҳсулотлари тақчиллашгани ортидан одамлар ярим кечадан бошлаб магазинлар олдида навбатга тураётгани ҳақида ёзган эди.

Аммо полициянинг қатъий назорати остида сотилаётган озиқ-овқат маҳсулотлари навбатда турганларнинг барчасига етмай қолмоқда.

Ун етишмовчилиги оқибатида, давлат дўконларида аввал 2 манатдан сотилган нон икки ярим баробарга қимматлади ва 5 манатдан сотилмоқда (1 доллар 3,5 манат). Маҳаллий уннинг нархи эса 7 манатдан 9 манатга қимматлади.

Москвада коронавирус сабабли чекловлар кучайтирилди

Россияда коронавирус билан боғлиқ кунлик холатлар 9 мингдан ошар экан, Москва шаҳар маъмурияти янги чекловлар жорий этган.

Москвада эпидемиологик вазиятнинг ёмонлашгани сабабли ресторан, фудкорт ва барларнинг ишлаш соати қисқартирилган.

Шаҳарнинг катта боғлари ва табиат ҳудудларида аттракционлар, болалар ва спорт майдончалари, бошқа объектлар ёпилди.

Минг кишидан ортиқ концерт томошалари ҳам бекор қилинди.

Россияда 18 июнь куни коронавирус билан боғлиқ 9056 та холат қайд этилди.

Аввалги максимал кўрсаткич 24 декабрда бўлган - 8 203 та ҳолат.

Москва ҳокими Сергей Собяниннинг таъкидлашича, пойтахтдаги янги ҳолатларнинг деярли 90 фоизида аниқланган коронавируснинг янги ҳинд штамми туфайли шаҳарда вазият кескин ёмонлашган.

Россияда бортида парашютчилар бўлган учоқ қулаб тушди, ўлганлар бор

Россиянинг Кемерово вилоятида L-410 русумли учоқ қулаб тушган. Ўлганлар ва яраланганлар бор, дея хабар берди Сибирь авиация қидирув-қутқариш маркази.

Икки двигателли учоқ бортида 17 нафар парашютчи ва икки нафар учувчи бўлган. Учоқ осмонга кўтарилганида мотори ишламай қолган.

Фавқулодда қўниш пайти ўрмонда дарахтлар билан тўқнашган.

Воқеа жойида қутқарувчилар иш олиб бормоқда.

Россия ТИВ АҚШ билан маҳбус алмашиш масаласи кўриб чиқилаётганини билдирди

Россия ТИВ вакиласи Мария Захарова

Россия Ташқи ишлар вазирлигининг расмий вакиласи Мария Захарова RTVI телеканалига берган суҳбатида Москва ва Вашингтон ўртасида маҳбус алмашиш имкониятига оид масала устида иш бошланганини маълум қилди.

Россия президенти Владимир Путин АҚШ президенти Жо Байден билан учрашувдан кейин 16 июнь куни ўтказилган матбуот анжуманида икки давлат АҚШда қамалган россияликлар ҳамда Россияда қамоқ жазосини ўтаётган америкаликлар бўйича муайян муроса йўлини топиши мумкинлигини билдирганди.

Мария Захарова RTVI телеканалига берган интервьюсида маҳбус алмашиш эҳтимолига оид масаланинг кўриб чиқилиши оммавий майдонда муҳокама қилинмаслиги кераклигини қайд этган.

“Биз очиқликни ташвиқ қилувчи муассасамиз, бироқ жимлик сақланиши лозим бўлган пайтлар ҳам бор”, дея таъкидлаган Россия ТИВ вакиласи.

Олмаота расмийлари июль охиригача аҳолининг учдан бири жамоавий иммунитетга эга бўлишига умид қилмоқда

Коронавирусга қарши эмлов учун навбат кутаётган кишилар, Олмаота, 2021 йил апрели

Олмаота бош санитар врачи Жандарбек Бекшин июль ойи охирларида Қозоғистоннинг энг йирик шаҳрида ковидга қарши жамоавий иммунитет 30 фоизга етишини башорат қилди.

“Иммунитет ҳосил қилган қатлам кун сайин ўсиб бормоқда. Бугунги кунда, расмий қайдларга кўра, жамоавий иммунитет 23 фоизга етган”, дея маълум қилган Бекшин 17 июнь куни ўтказилган брифинг чоғида.

Мулозим касаллик симптомсиз кечган ва тиббиёт муассасаларига мурожаат қилмаган кишиларни ҳам ҳисобга олганда бу рақам янада каттароқ бўлиши мумкинлигини қўшимча қилган.

“Ўйлайманки, июль ойи охирларига бориб жамоавий иммунитет 30 фоизни ташкил этади”, деган Бекшин.

16 июнь ҳолатига Олмаотада 357 минг 299 киши эмланган. Ой бошида бош санитар врач шаҳарда жамоавий иммунитет 21 фоиз бўлганини айтганди. Май ойида эса Бекшин бу кўрсаткични 20-25 фоиз деб баҳолаган. 2020 йилнинг декабрь ойи охирларида у шаҳар аҳолисининг 55-56 фоизида коронавирус инфекциясига қарши жамоавий иммунитет шаклланганини маълум қилган. Ўшанда беш минг киши кўрикдан ўтказилган.

Брифингда Бекшин йил охиригача Олмаотада 1 миллион 90 минг нафар кишини эмлаш режаланаётганини айтган. Унга кўра, коронавирус билан оғриб тузалган фуқаролар, ҳомиладор ва бола эмизадиган аёллар, эмланишига тиббиёт рухсат бермайдиган ва сурункали хасталиги бор кишилар бу ҳисобга кирмайди.

Бош санитар врачнинг билдиришича, айни пайтда шаҳарда кунига етти минг нафаргача одам эмланмоқда.

Олмаота 19 июндан бошлаб коронавирус тарқалиши суръати бўйича “яшил” ҳудудга киритилади. Шу муносабат билан шаҳарда карантин чекловлари юмшатилмоқда. Хусусан, 21 июндан ҳар икки темир йўл вокзалида (Олмаота-1, Олмаота-2) Ashyq тизими жорий этилади. Бундан ташқари, супермаркетлар, барча турдаги дўконлар ва бозорлар чекловсиз ишлаши мумкин бўлади.

Россияда Давлат Думасига сайлов жорий йилнинг 19 сентябрига белгиланди

Россия президенти Владимир Путин

Россия президенти Владимир Путин Давлат Думасига сайловни тайинлаш тўғрисидаги фармонни имзолади. Ҳужжатга мувофиқ, сайлов 2021 йилнинг 19 сентябрида ўтказилади.

Сайловларни белгилашга оид қарор у қабул қилинганидан сўнг беш кун ичида ҳуқуқий маълумотлар порталида ёки “Российская газета” нашрида эълон қилиниши керак.

Энди Россия Марказий сайлов комиссияси овоз бериш тартибини қабул қилиши, сиёсий партиялар эса қурултойлар ўтказиб, ўз номзодлари ва дастурларини тасдиқлаши лозим. Россияда сайловларда иштирок этиш ҳуқуқига эга 30 дан зиёд сиёсий партия мавжуд. Улардан 14 таси парламент имтиёзига эга, яъни парламент сайловида сайловчилар имзосини йиғмасдан иштирок эта олади.

Давлат Думасига сайлов билан бир вақтда Россия Федерациясининг тўққиз субъекти раҳбарлари лавозимларига ва 39 та минтақавий парламентга тўғридан-тўғри сайловлар бўлиб ўтади.

Май ойи охирида Давлат Думаси экстремистик ташкилотлар фаолиятига алоқадор кишиларнинг сайловларда қатнашишини тақиқловчи қонунни қабул қилган эди. 9 июнь куни эса Москва шаҳри суди Алексей Навальний асос солган Коррупцияга қарши кураш фонди, Навальний штаблари ҳамда Фуқаролар ҳуқуқларини ҳимоя қилиш фондини экстремистик ташкилотлар деб топиб, Россияда уларнинг фаолиятини тақиқлади.

Эндиликда Навальний тарафдорлари ва ҳатто ФБК ёки штабларда ишламаган кишилар ҳам, уларнинг хатти-ҳаракатлари “экстремистик ташкилотни дастаклаш” деб баҳоланган тақдирда, ҳар қандай даражадаги сайловларда ўз номзодларини қўя олишмайди.

Ушбу қонунлар қабул қилиниши ортидан Навальнийнинг сафдоши, Давлат Думасига сайловларда қатнашишга ҳозирланаётган Любовь Соболь ўз сайловолди кампаниясини тўхтатди. У мазкур қарорини айни вазиятда ўз волонтёрлари, ходимлари ва пул эҳсон қилувчилар хавфсизлигини таъминлай олмаслиги, давлат уларни таъқиб остига олиши мумкинлиги билан изоҳлаган.

Давомини ўқинг

XS
SM
MD
LG