Ўзбек блогерлари Украинадаги уруш ҳақида
Таниқли блогер Шаҳноза Соатова, "бу галги уруш даҳшатини ҳаммамиз кўзимиз билан кўрамиз", деб ёзди.
Блогер бу гал "ахборот уруши ҳам қаттиқ бўлади", деб урғулади:
"Бу галги уруш хроникаларини биз газеталардан ўқимаймиз, радиодикторнинг таъсирли овози билан эшитмаймиз – мобил гаджетлар даврида ҳаммасини ўз кўзимиз билан кўрамиз. Ва албатта, алданамиз! Ахборот уруши ҳам қаттиқ бўлади чунки. Рус сайтлари фейкларга тўлди, Кремль пропагандаси ахборот урушида ҳамма усуллардан фойдаланади".
"Мухбир Далиев" Ташқи ишлар вазирлигини йўқлади:
"Асанов формати": Украина давлатчилиги хатарда қолди
"Кўз олдимизда дунё қайтиб эврилмайдиган бўлиб ўзгаряпти: Россия раҳбарияти қўшнисига очиқчасига тажовуз қиляпти, Украина давлатчилигининг мавжудияти сўроқ остида турибди, сиёсатдонлар касрига ўзбек ва уйғур сингари эгизак икки халқ – руслар ва украинлар бир-бирига душман бўляпти; қон тўкилишига сабаб бўлган бу душманлик энди осонликча унутилмайди. Украинадай гўзал давлат вайрон бўлаётганини кўриш одамнинг юрагини оғритади".
Муҳрим Аъзамхўжаев Путин шахсиятига эътибор қаратди:
"Гитлерга ефрейторлик, Путинга эса катта одамлар имзолаётган ҳужжатларни уёқдан буёққа ташийдиган кичкина одам бўлиш — ёрдамчилик кўпроқ хос ва мос эди. Катта ҳокимиятнинг бундай кичкина, майда одамлар қўлига тушиб қолиши ҳар доим фожиали тугайди".
АҚШ президенти Жозеф Байденнинг баёноти
“Бугун бутун дунё Россия қуролли кучларининг провокация бўлмагани ҳолда, асоссиз қилган ҳужумидан жабр чекаётган Украина халқини қўллаб-қувватлайди. Президент Путин ғаразли урушни танлади, у даҳшатли инсоний талафотларга ва азоб-уқубатларга олиб келажак.
Бу ҳужум келтиражак қурбонлар ва вайроналар учун фақат Россия жавобгар. Қўшма Штатлар, унинг иттифоқчилари ва ҳамкорлари якдил ва қатъий тарзда жавоб берадилар. Дунё Россияни жавобгарликка тортади.
Мен бугун вазиятни Оқ уйда туриб кузатаман ва миллий хавфсизлик бўйича жамоам орқали янгиликлардан мунтазам хабардор бўламан. Эртага “катта еттилик” бўйича ҳамкасбларим билан учрашаман, сўнгра Қўшма Штатлар, бизнинг иттифоқчиларимиз ва ҳамкорларимиз Украинага қарши ушбу ноўрин агрессия учун Россияга қарши ҳамда глобал тинчлик ва хавфсизликни таъминлаш мақсадида қандай чоралар қўллашини эълон қилиш учун Америка халқига мурожаат қиламан.
Биз, шунингдек, Шимолий Атлантика альянсига қарши ҳар қандай агрессиянинг олдини оладиган қатъий, ягона зарбамизни таъминлаш мақсадида ўз ҳаракатларимизни НАТОдаги иттифоқчиларимиз билан келишамиз.
Бугун оқшом Жилл иккимиз довюрак ва мағрур Украина халқи учун дуо қиламиз”.
"Ертўламиз болалар билан тўляпти"
Киевда қолаётган британиялик журналист Люк Хардинг: "Ертўламиз ёш болали оилалар билан тўляпти. Айримлари ўзлари билан бўёқ китобларини олиб келишган. Юрагинг эзилади", деб хабар қилди.
Украина ҳарбийлари: Россия самолётини уриб туширдик
Reuters агентлигига кўра, Украина ҳаво кучлари мамлакат шарқида Россия самолётини уриб туширган.
Россия Мудофаа вазирлиги бу маълумотни "ҳақиқатга зид" деб рад қилмоқда.