Украина Омбудсмени: Рус аскарлари Бучада 14 - 24 ёшли 25 қизни зўрлаган
Россия аскарлари Киев яқинидаги Буча шаҳарчасида 25 га яқин қизни ертўлада сақлаган ва мунтазам равишда уларни зўрлаган. Бу ҳақда BBCга Украина омбудсмени Людмила Денисова маълум қилди. Омбудсменга кўра, зўрланган қизлар 14-24 ёшлар атрофида бўлганлар, улардан 8 нафари ҳозирда ҳомиладор.
“Қизларга “сизларни шундай зўрлаймизки, бошқа эркаклар билан жинсий алоқа қила олмай қоласизлар, умрбод украин бола туғмайсизлар”, деб айтишган”,- деди Денисова.
BBC Киев вилоятида яшовчи 50 ёшли аёлдан ҳам интервью олган. У Чеченистондан келган аскар зўравонлик қилганини, уни ҳимоя қилмоқчи бўлган эрини отиб ташлаганини айтди.
Россия аскарлари томонидан қизларнинг ва ўғил болаларнинг зўрланиши фактлари Украина ҳукумати, ҳуқуқ фаоллари ва халқаро ташкилотлар, жумладан, Human Rights Watch томонидан қайдга олинди.
“Настояшчее время” телеканалининг билдиришича, Украина Омбудсмени ижтимоий тармоқдаги саҳифасига: “Рус армиясидаги террорчи ва жаллодларнинг ёвузлиги чегара билмайди. Масалан, Бучада 14 ёшли қизалоқ 5 нафар рус аскари томонидан зўрланган. Ҳозир у ҳомиладор. Бучада рус аскарлари 11 ёшли ўғил болани онасининг кўз олдида зўрлашган. Зўрланишни кўриб турсин, деб онасини стулга боғлаб қўйишган. Ирпенда 20 ёшли қизни уч аскар бирданига зўрлаган”,- деб ёзган.
БМТ жинсий зўравонлик ҳолатлари бўйича тергов ўтказишга чақирди. Россиянинг БМТдаги вакили Украинада болалар ва аёллар зўрлангани тўғрисидаги хабарларни инкор қилди.
Киев мулозимаси: Москва билан тўққизта гуманитар йўлак бўйича келишувга эришилди
Украина бош вазири ўринбосари Ирина Верешчук 12 апрель ҳолатига Москва билан 9 та гуманитар йўлак бўйича келишувга эришилгани ҳақида маълум қилди. Мазкур йўлаклар орасида Мариуполь, Бердянск, Энергодар, Лисичанск, Попасний ва Рубежний йўлаклари бор.
Душанба, 11 апрель куни гуманитар йўлаклар орқали Украина шаҳарларидан 4354 киши олиб чиқилган. Улар орасида, Верешчукка кўра, 556 нафар мариуполлик ҳам бор.
Украинанинг шарқий ҳудудлари расмийлари аҳолини шаҳарлардан кўчишга чақирмоқда. Украиналик ҳарбийлар ва ғарб разведкаси маълумотига кўра, Россия яқин орада бу йўналиш бўйлаб шафқатсиз ҳужумларни бошлаши кутилмоқда.
Германия ТИВ раҳбари Украинани оғир қуроллар билан таъминлашга чақирди
Германиянинг Rheinmetall қуролсозлик ширкати Украинага ўзи ишлаб чиқарган оғир қуроллар, жумладан, танкларни етказиб беришга ҳозирлигини билдирди. Бу ҳақда Handelsblatt нашри хабар қилди.
Германия ташқи ишлар вазири Анналена Бербок 11 апрель куни Украинага оғир қуроллар етказиб бериш зарурлиги ҳақида баёнот берган.
Handelsblatt нашрининг ёзишича, гап Бундесвер фойдаланмаётган ўнлаб “Леопард-1” танклари ҳақида бормоқда. Rheinmetall раҳбари Армин Паппергер илк “Леопард” Украинага олти ҳафтадан сўнг етказилиши мумкинлигини айтган, аммо бунинг учун Германия ҳукумати розилиги керак. Бербокнинг кечаги баёноти ҳукумат бунга қарши эмаслигини билдириши мумкин. ТИВ раҳбари ўз баёнотида Украинани қурол билан таъминлашда “креативлик” зарурлигини таъкидлаган эди.
Россия босқинига қадар Германия, НАТОдаги қатор мамлакатлардан фарқли ўлароқ, Украинага қурол-аслаҳа етказиб беришдан бош тортиб келган. Аммо кейинроқ бу тақиқ бекор қилиниб, Киевга танкка қарши ва ҳаво ҳужумига қарши қуроллар тақдим этилган. Украина ҳукумати эндиликда оғир қуроллар, хусусан зирҳли техника ва учоқларга муҳтожлигини таъкидламоқда.
Варшавада Россия элчихонаси тасарруфида бўлиб келган турар-жой мажмуаси Украинага ижарага берилади
Варшава мэри Рафал Тшасковский 11 апрель куни, Польша расмийлари иддаосича, Россия элчихонаси тасарруфида ноқонуний бўлиб келган турар-жой мажмуаси национализация қилинганини очиқлади. Тшасковскийга кўра, эндиликда бу мажмуа қочқинларни жойлаштириш учун Украинага ижарага берилади, бу ерда мактаб ва маданий марказ ҳам фаолият кўрсатади.
Варшаваликлар томонидан кинояли тарзда Szpiegowo – “Шпионово” деб атаб келинган бу мажмуа ўтган асрнинг 70-йилларида совет элчихонаси томонидан ижарага олинган.
Польшада коммунистик режим қулаганидан кейин бинолар бўшаб қолган, бироқ СССРнинг вориси эканини даъво қилган Россия уларни Польшага топширишдан бош тортиб келган. Польша томон иддаосига кўра, бинолар ва ер участкаси ижарасига оид шартнома муддати аллақачон тугаган.