Бучадаги қатлиомни француз экспертлари текширади
Украина Россия ҳарбийларининг Бучадаги ҳарбий жиноятларини исботлаш учун француз суд-тиббий экспертларини Буча шаҳридаги оммавий қабрларга таклиф қилди.
Бош прокурор Ирина Венедиктованинг айтишича, яқин 15 кун ичида француз мутахассислари Буча Россия қўшинларидан қайтариб олинганидан кейин жасадлари топилган 250 кишининг тақдирини аниқлашда Украина ҳукуматига ёрдам беради:
"Афсуски, бизда уруш жиноятлари, инсониятга қарши жиноятлар билан боғлиқ жуда кўплаб ҳолатлар бор. Бугун бир оиланинг учта жасадини қазиб олганимизга барчангиз гувоҳ бўлдингиз. Гувоҳларнинг айтишича, бу аёл ва унинг икки боласи бўлган. Улар кимлигини ҳам билмаймиз. Биз уларни процессуал имкониятларимиздан келиб чиққан ҳолда ва француз ҳамкасбларимиз билан бирга аниқлаймиз. "Биз ёпиқ давлат эмасмиз”.
Украинадаги урушда 20 журналист ҳалок бўлди
Россия ҳужум қилган 24 февраль санасидан бери Украинада камида 20 нафар журналист ўлдирилди.
Украина журналистлар миллий уюшмаси бу рақамлар фақат Бош прокуратура ўлимини тасдиқлаган журналистларга тегишли экани, аслида рақамлар кўпроқ бўлиши мумкинлигини таъкидлади.
Европанинг тўрт президенти Киевга келди
Литва президенти Гитанас Науседа, Польша президенти Анжей Дуда, Латвия президенти Эгилс Левитс ҳамда Эстония президенти Алар Карис Украина президенти Владимир Зеленский билан учрашиш учун Киевга келишди.
Бу ҳақда Литва раҳбари ўз твиттерида маълум қиларкан хабарга вокзалда олинган суратни илова қилган.
Мариуполда 20 мингга яқин тинч аҳоли қурбон бўлган
Уч ҳафтадан буён қамалда қолаётган Мариуполда эса 21 мингга яқин тинч аҳоли ҳалок бўлган ва яраланган.
Буни Мариупол мэри Вадим Бойченко матбуотга маълум қилди:
“Ҳисоб-китобларимизга кўра, Мариуполда тинч аҳоли орасидаги қурбонлар ва ярадорлар сони 21 мингга етган. Бизга ҳаммаси маълум, жасадлар кўчалардан ғойиб бўлаётгани ҳақида далиллар мавжуд. Бизга маълум бўлишича, улар жасадларни концентрация жойлари деб аталадиган жойларга яширмоқда. Бу орқали Мариупол шаҳрида содир этилган хунрезликларнинг изларини йўқ қилиш режалаштирилган. Биз буни геноцид, уруш жинояти деб биламиз”.
БМТ инсон ҳуқуқлари олий комиссарлигига кўра, Россия босқини бошланган 24 февралдан буён Украинада тинч аҳоли орасида жами 1982 киши нобуд бўлган, 2558 киши эса оғир яраланган. Ташкилот қайдича, жанговар ҳаракатлар чоғида камида 153 нафар бола қурбон бўлган.