Reckitt Benckiser Россиядаги бизнесини бутунлай тўхтатди
Британиянинг маиший кимё маҳсулотлари ва дори-дармон ишлаб чиқарувчи Reckitt Benckiser ширкати (Nurofen, Calgon, Clearasil, Durex, Lysol брендлари) Россиядаги бизнесини бутунлай тўхтатади.
Активлар сотилиши ёки россиялик ходимларга топширилиши мумкин.
Иш ҳақи тўлаш йил охиригача давом этади.
ЕХҲТ "Рус ҳарбийларининг ғайриинсоний жиноятлари каталоги"ни ҳужжатлаштиради
Европада Хавфсизлик ва Ҳамкорлик Ташкилоти (ЕХҲТ) экспертлари Украинада Россия кучлари томонидан халқаро гуманитар қонунчилик бузилишининг “аниқ намуналари”ни топганини хабар қилди.
Ташкилот 13 апрель куни эълон қилган ҳисоботининг дастлабки хулосалари "Россия ҳарбийларининг Украинада амалга оширган ғайриинсоний жиноятлари каталоги"ни ҳужжатлаштиради, деди АҚШнинг ЕХҲТдаги элчиси Майкл Карпентер.
“Бу ерда тинч аҳолини тўғридан-тўғри нишонга олиш, тиббиёт муассасаларига ҳужум қилиш, зўрлаш, қатл қилиш, талон-тарож қилиш ва тинч аҳолини Россияга мажбуран депортация қилиш ҳолатлари бор”, - деди у.
Ҳисобот ЕХҲТ томонидан вазиятни ўрганиш учун танланган Австрия, Швейцария ва Чехиялик уч нафар ҳуқуқшунос томонидан ёзилган.
Австралия 14 россияликка санкция жорий қилди
Австралия ҳукумати Украинада уруш бошлагани ортидан Россиянинг қатор ширкатларига қарши жорий этилган санкцияларни кенгайтирди.
Ҳукумат сайтида эълон қилинган ҳужжатга кўра, рўйхатга россиялик яна 14 нафар жисмоний шахс киритилган.
Киев: Украина ва Россия асирлар билан алмашди
Украина бош вазири ўринбосари Ирина Верешчук Россия билан асирлар алмашингани тўғрисида 14 апрель куни баёнот берди.
Унга кўра, Россия Киевга 30 кишини қайтарган. Улардан 5 нафари офицер, 17 нафари аскар ва 8 нафари тинч фуқаро вакилидир.
Ирина Верешчук Россияга қанча асир қайтарилгани тўғрисида гапирмади.