Кремл Киевга зарба бериш билан таҳдид қилди
Россия Мудофаа вазирлиги Киевга зарбалар йўллаш билан таҳдид қилди.
“Украина қўшинлари томонидан Россия Федерацияси ҳудудидаги объектларга қарата зарба бериш ёки қўпорувчилик ҳаракатларини амалга ошириш уринишлар бўлаётганини кўряпмиз. Бунақа ҳолатлар давом этган тақдирда Россия Федерацияси Қуролли кучлари қарор қабул қилиш марказларига, жумладан, Киевга зарбалар беради. Россия армияси шу пайтгача бундан тийилиб келмоқда эди”, дейилади вазирлик хабарномасида.
Сумида юздан зиёд жасад топилди
Суми вилоятида Россия қўшинлари чекинганидан сўнг юздан ортиқ тинч фуқароларнинг жасадлари топилди. Бу ҳақда вилоят ҳарбий маъмурияти бошлиғи Дмитрий Живицкий маълум қилди.
Унинг айтишича, топилган жасадлар сони тобора ортиб боряпти, улар орасида “қўллари боғланган, танасида қийноқ излари бор ва бошидан отиб ўлдирилганлар” ҳам бор.
Бундан ташқари, ўққа тутилган бўм-бўш автомобиллар ҳам топилмоқда. Уларнинг йўловчиларига нима бўлгани номаълум.
Украинада жанглар давом бўлаётгани сабабли мулозимларнинг тинч аҳоли талафотларига доир маълумотларини зудликда текшириш имкони мавжуд эмас.
Жерси оролида Роман Абрамовичнинг 7 миллиард доллари музлатилди
Британияга қарашли Жерси ороли маъмурияти Роман Абрамовичнинг етти миллиард долларлик активларини музлатди.
Полиция россиялик тадбиркорга алоқадорлиги тахмин қилинган объектларда тинтув ўтказгани айтилмоқда.
Мариупол мери: Россия жасадларни йўқотиш учун 13 та мобиль крематория олиб келди
Россия қўшинлари қамалида қолаётган Украинанинг Мариупол порт шаҳри мери 13 апрель, чоршанба куни рус қўшинлари шаҳарда содир этилган ҳарбий жиноятлар изларини йўқотиш учун мобиль крематориялар тайёрлаётганини айтди.
"Улар жиноят содир этишди. Ҳозир шаҳарни ўзлари эгаллаб турган қисмларини ёпиб қўйишган. Ҳеч кимни киритишмаяпти. Нега? Жиноят далилларини яшириш учун. Душманнинг Youtubе ва бошқа платформаларга юклаган видеоаридан жасадлар қаёққадир ғойиб бўлганини кўриш мумкин. Қаерга ғойиб бўлди? Ёки жасадларнинг ўзи туриб кетиб қолдими? Уларни яширишга ҳаракат қилишяпти. Бизнинг фуқароларимиз уларни қаерга яширишаётганини сўрашмоқда. Улар жасадларни тўплашмоқда. Разведкамиз бугун шаҳарга 13 та мобиль крематория етиб келганини ва Россия шаҳарда содир этилган ҳарбий жиноятлар далилларидан халос бўлишга тайёрланаётганини тасдиқлади”, деди Мариупол мери Вадим Бойченко.
Шаҳар мери қамал давомида 21 мингга яқин тинч аҳоли вакиллари ҳалок бўлганини айтган эди.
Бойченконинг айтишича, Мариуполдан 100 мингдан ортиқ одам зудлик билан эвакуация қилиниши керак, 60 мингга яқин одам эса шаҳар чеккасида эвакуация қилинишини кутмоқда.