Мариуполдаги вазият
Украинанинг урушдан энг кўп жабр кўрган шаҳарларидан бири Мариуполда шиддатли жанглар давом этмоқда. Маҳаллий мэриянинг дастлабки маълумотларига кўра, феврал ойи охиридан бери шаҳарда 20 мингдан ортиқ тинч аҳоли ҳалок бўлган, шаҳар инфратузилмасининг 95 фоизи вайрон қилинган. Мариуполь ҳозирда тўлиқ рус қўшинлари томонидан қамал қилинган, аммо ҳали ҳам ишғол қилинмаган: шаҳарнинг бир қисми, асосан, "Азовстал" заводи Украина кучлари томонидан ушлаб турилибди.
"Азов" полки командирларидан бири Максим Жорин "Настояшчее время" телеканалига Мариуполдаги сўнгги вазият ҳақида гапириб берди:
- Руслар аллақачон шаҳарга кириш ва чиқишни тўсиб қўйган. Бундан ташқари, улар маҳаллий аҳоли ўртасида тозалаш деб аталадиган ишларни аллақачон бошлашган. Уларнинг фикрича, Украина ҳарбийлари билан ҳеч қачон алоқаси бўлмаган баъзи эркаклар сафарбар қилинмоқда. Баъзи аёллар тўғридан-тўғри таъмирлаш ишлари учун шаҳарда қолдирилади. Қолганларнинг ҳаммасини шаҳардан олиб кетишади. Украиналикларнинг озиқ-овқат ва суви тугаяпти, лекин улар курашни давом эттирмоқда ва улар ёрдам етиб келишига ишонишмоқда.
Мариуполь шаҳри мэри Вадим Бойченко Украина разведкаси маълумотларига таяниб, кўчма крематориялар шаҳарга юк машиналарида етиб келганини таъкидлади. Шаҳар ҳокимига кўра, рус қўшинлари шу тариқа ўликларни ёқиб, ўз жиноятларини яширмоқчи.
Россия кучлари Киев вилоятидаги Бровари шаҳрини ўққа тутди
Бу ҳақда шаҳар мэри Игорь Сапожко хабар берди. Унинг сўзларига кўра, ракеталар зарби натижасида шаҳар инфратузилмасига шикаст етган. Талафотлар кўлами ҳозирча маълум эмас. Электр ва сув таъминотида узилишлар кутилади.
Бровари шаҳри Киевдан 20 километр жануби-шарқда жойлашган. У Украинанинг энг йирик йўлдош шаҳри ҳисобланади. Урушга қадар Броварида 150 минг аҳоли яшаган.
17 апрель куни эрта тонгда Украина пойтахтида ҳам портлаш овозлари эшитилди. Шаҳар расмийларининг тахминига кўра, ҳаво ҳужумидан мудофаа тизимлари ишлаган.
Россия Киев бомбардимонини Қора денгизда украинлар томонидан «Москва» крейсерининг чўктирилганига жавобан бошлаганини айтганди.
Верешчук: 700га яқин украин аскари ва минглаб тинч аҳоли Россия қўлида асирда қолмоқда
700 га яқин украиналик аскар ва ярмига яқини аёллар бўлган минглаб тинч аҳоли Россия асирлигида қолмоқда.
Бу ҳақда Украина бош вазири ўринбосари Ирина Верешчук миллий телемарафон эфирида журналистларга маълум қилди.
Аввалроқ Россия томони мингдан ортиқ украин аскарини асирликда ушлаб турганини даъво қилган эди.
Верешчук Россияни Женева конвенцияси доирасида тинч аҳолини озод қилишга ва ҳарбий асирларни алмашишга чақирди.
Верешчукнинг сўзларига кўра, Украинада асирликда бўлган 700 га яқин рус аскари ҳам бор, Украина уларни алмашишга тайёр.
Томонлар мунтазам равишда бир-бирларини алмашишни бузишда ва ҳарбий асирларга нисбатан ғайриинсоний муносабатда бўлишда айблашади.
Халқаро инсон ҳуқуқлари ташкилотлари томонларни тинч аҳоли ва ҳарбий асирлар ҳуқуқларини ҳурмат қилишга чақиради.
Уруш шароитида ҳар икки томоннинг асирлар ҳақидаги маълумотларини мустақил манбалардан тасдиқлаш имконсиз.
БМТ: Украинада 1900 дан ортиқ тинч аҳоли ҳалок бўлган
БМТ маълумотларига кўра, 24 февралда Россия агрессияси бошланганидан буён Украинада тинч аҳоли орасидан 1900 дан ортиқ кишининг ўлими расман қайд этилган.
Ўлганларнинг ҳақиқий сони анча юқори бўлиши мумкин, дейилади БМТнинг Инсон ҳуқуқлари бўйича Олий комиссар бошқармаси маълумотида.
24 февралдан 14 апрелгача бўлган даврда ҳалок бўлганларнинг 162 нафари ёш болалардир.
Уруш даврида тинч аҳоли орасида жароҳатланганлар сони эса 2651 нафарни ташкил этади, шулардан 256 нафари болалардир.
БМТ маълумотларига кўра, ўлим ва жароҳатларнинг аксарияти ракета ва артиллерия ҳужумлари билан боғлиқ.