Львовдаги ҳужумда 6 киши ўлди
Львовда эса ўтган тунда 6 киши ўлди, 8 киши, жумладан, бир бола жароҳатланди.
Львов вилояти ҳарбий маъмурияти бошлиғи Максим Козицкий жами тўртта ракета келиб тушганини маълум қилди. Шундан учтаси – ҳарбий инфратузилма объектларига, биттаси шина ямаш устахонасига тушган.
Украина темир йўллари раҳбари “темир йўл объектларига” ҳам зарба йўлланганини билдирган, аммо қурбонлар ҳақида ҳеч нима демади.
Россия Мудофаа вазирлиги ушбу зарбалар юасидан изоҳ берганича йўқ.
“Настояшчее время”нинг Львовдаги мухбири Юлия Жукова зарбалар ҳақида қуйидагиларни маълум қилди:
“Ҳаво ҳужуми тревогаси Киев вақти билан тахминан 7:45 ларда янгради. Мен дарҳол йўлакка чиқдим. Чамаси 40 дақиқа ўтиб портлаш саслари келди. Товуш жуда қаттиқ эмасди. Аммо марказга яқинроқ жойларда яшовчи одамлар кучли портлаш бўлганини, бинолар деворлари ларзага келганини айтишди. Шаҳар марказида кўкка ўрлаётган тутун кўриниб турибди. Биздан тутаётган жойни суратга олмасликни илтимос қилишди, акс ҳолда у ерга такрор зарба берилиши мумкин экан”.
"Союзмультфильм"нинг Z ҳарфли кемаси ҳақидаги мутльтфилми Ютубдан ўчирилди
«Союзмультфильм» томонидан 1973 йилда ишланган “Чўкиб кетган кемалардаги хазиналар” мультфильми Ютуб тармоғидан ўчириб ташланди.
Мультфильмда болалар “Нептун 25” номли батискафда сувости саёҳатига чиқишганида бортига Z ҳарфи туширилган чўккан кемани топиб олишгани ҳақида ҳикоя қилинади.
“Тушунарли, бу фашистлар кемаси”, дейди пионерлардан бири. “Қаердан билдинг?” деб сўрашади ундан дўстлари. “Китобда ўқиганман! Фашистлар кемаларига Z ҳарфини белги қилиб қўйишган”, деб жавоб беради бола.
“Союзмультфильм” ушбу мультфильмнинг Ютубдан ўчирилишига уларнинг алоқаси йўқлиги, “Союзмультфильм” мультиклари” номли канал киностудияга тегишли эмаслигини таъкидлади.
Россия аскарлари ҳарбий машина ва танклар сиртига тушириб олган Z ҳарфи Украинага қарши уруш рамзига айланган. Ушбу белги уруш тарафдорлари томонидан кенг қўлланмоқда.
Мультфильмга тақиқ Россиянинг денгиздаги қудрати ва Украинага урушнинг бир рамзига айланган “Москва” крейсери чўкиб кетганидан сўнг Ютубдан ўчирилди.
"Москва" крейсерининг ёнаётган сурати ёйинланди
“Москва” крейсеридаги муҳтамал ёнғин фото ва видеотасвирлари пайдо бўлди.
Бир неча фотосуратни OSINTtechnical лойиҳаси ёйинлади. Суратлардан бирига изоҳ бераркан, лойиҳа тадқиқотчиси унинг ҳақиқийлигини текшира олмаслигини айтган.
“Аммо бу Slava тоифасидаги крейсер, улардан бошқа биронтаси бу тарзда йўқ қилинган деб ўйламайман”, деб ёзган у. Россиянинг мазкур тоифага мансуб нариги икки кемасидан бири “Маршал Устинов” (Шимолий флот), иккинчиси эса “Варяг” (Тинч океани флоти) деб аталади.
Кейинроқ россияпараст “Военный осведомитель” телеграм-каналида видео ҳам эълон қилинди. Уни АҚШнинг собиқ денгиз пиёдалари аскари, ҳозирда Ташқи сиёсий тадқиқотлар институтида катта илмий ходим бўлиб ишлаётган OSINT-тадқиқотчи Роб Ли ҳам ёйинлаган.
Украинада гуманитар йўлаклар ишламаяпти
Украинада кетма-кет иккинчи кун гуманитар йўлаклар очилмаяпти, дея маълум қилди мамлакат бош вазири ўринбосари Ирина Верешчук.
Верешчук Россия ҳарбийларини “халқаро гуманитар ҳуқуққа хилоф ўлароқ гуманитар йўналишларни очмасликда ва уларни ўққа тутишда” айблади.
Унинг сўзларига кўра, кеча ҳукумат расмийлари Мариуполь, Бердянск, Токмак ва Энергодардан яшил йўлаклар очиш бўйича узоқ ва машаққатли музокаралар олиб борганлар. Шунингдек, Херсон ва Луганск вилоятларидан гуманитар йўлак очиш хусусида ҳам музокаралар бўлган.