Донбасс учун жанглар
Россия кучлари “Донецк, Луганск ва Харков вилоятларининг деярли бутун фронт чизиғи бўйлаб” Украина мудофаасини ёриб ўтишга уринмоқда.
Луганск вилоят ҳарбий маъмуриятига кўра, Рубежное ва Попасная шаҳарларида жанглар бормоқда, бироқ руслар бирор ҳудудни ололмаган.
20 апрель оқшомида Украинанинг Днепропетровск вилоятининг бир қанча ҳудуди бараварига ўт очиш тизимларидан ўққа тутилди.
Украин ҳарбийларига кўра, жанубий йўналишда энг узоқ мудофаа чизиғи бўлган Херсон вилоятида ҳам жанглар давом этмоқда. Херсон вилоятининг озод этилган қишлоқлари муттасил ўққа тутилмоқда.
Украина разведкасига кўра, Херсон вилоятида Россия қўшинлари эркакларни Украина билан урушга жўнатиш учун мажбурий сафарбарлик ўтказишга ҳозирлик кўрмоқда.
“Донецк ва Таврия йўналишларида душман алоқа чизиғи бўйлаб артиллериядан ўқ узишда давом этмоқда. Херсон вилоятида босқинчилар аҳолини Украинага қарши урушга мажбурий сафарбар этишни режалаштирмоқда. Босқинчилар минтақага Украина ҳукумати томонидан юборилаётган инсонпарварлик ёрдамини бутунлай тўхтатишни мақсад қилган”, деди Олександр Штупун Украина Қуролли кучлари Бош штаби матбуот котиби.
Россия “Азовстал”ни бомбаламайдиган бўлди
Украинанинг Мариуполдаги сўнгги мудофаа ўчоғи бўлмиш “Азовстал” заводини руслар бомбаламайдиган бўлди.
21 апрель куни Владимир Путин россиялик ҳарбийларга “Азовстал” заводига ҳужумни бекор қилишни буюрди:
"Мен саноат зонасига таклиф қилинаётган ҳужумни кераксиз деб биламан. Уни бекор қилишни буюраман. Доимо мушоҳада билан йўл тутишимиз керак, аммо бу ҳолатда етти ўлчаб бир кесган маъқул. Айниқса гап аскарларимиз, офицерларимиз ҳаёти ва соғлиғини сақлаш ҳақида кетаётганда. Заводнинг ер ости йўлакларидан судралиб ўтишга ҳожат йўқ. Шунчаки, бу саноат ҳудудини тўсиб қўйинг, шунда пашша ҳам учиб ўтмайди.”
Россия Азовстал заводига қамалиб қолган украиналик ҳимоячиларга таслим бўлиш талаби билан бир неча бор ультиматум қўйди. Аммо ултиматум қўйилганидан кейин бирор украин аскари таслим бўлгани тўғрисида маълумот йўқ.
Расмийларга кўра, ушбу заводнинг ерости иншоотларида 2 мингдан зиёд ҳарбийлар билан бирга бир неча юз нафар тинч аҳоли ҳам яширинган.
Россия ядровий қувватга эга янги баллистик ракетани синовдан ўтказди
Украинага ҳужум бошланганидан қарйиб икки ой ўтаётган бир паллада Россия ядровий қувватга эга янги қитъалараро “Сармат” баллистик ракетани синовдан ўтказди.
Синов Путинга телевидение орқали намойиш қилинган. Унда ҳарбийлар узоқ кутилган Сармат ракетаси биринчи марта Россия шимоли-ғарбидаги Плесетск шаҳридан учирилгани ва Камчатка яриморолидаги нишонларга, салкам 6000 км (3,700 миля) узоқликдаги нишонларни ургани кўрсатилган.
Кўп йиллар давомида ишлаб чиқилган “Сармат” ракетасининг синови Ғарбни ҳайратда қолдирмади, синов ўта геосиёсий кескинлик даврида амалга оширилди.
Саккиз ҳафта олдин Путин Украинага уруш бошларкан, Россиянинг ядро кучларини юқори шай ҳолатга келтиришни буюрган эди.
“Бир пайтлар тасаввур қилиб бўлмайдиган ядровий можаро истиқболи энди эҳтимолликка қайтди”, деган эди ўтган ой Бирлашган Миллатлар Ташкилоти Бош котиби Антониу Гутерриш.
Россия армияси Украинанинг Луганск вилоятидаги шаҳарларни эгаллаб олишга уринмоқда
Россиялик ҳарбийлар Луганск вилоятидаги шаҳарларга ҳужумларни давом эттиряпти, айни пайтда Рубежное ва Попасная шаҳарларида жанг бормоқда. Бу ҳақда Луганск вилоят ҳарбий маъмурияти раҳбари Сергей Гайдай маълум қилган.
“Душман Рубежноенинг ғарбий ҳамда шимоли-ғарбий қисмларида ўрнашиб олишга уринди, бироқ бунга муваффақ бўлолгани йўқ. Новотошковское йўналиши бўйлаб муваффақиятсиз ҳужум ҳаракатларини амалга оширди, Попаснаяга ҳужум эса давом этмоқда”, деб ёзган Гайдай.
Рубежное шаҳарчаси Луганск вилояти маъмурий маркази бўлмиш Северодонецк шаҳрининг ёнгинасида жойлашган.