Украинада Россия фуқаролари учун виза тартиби жорий этилиши мумкин
Украина президенти Владимир Зеленский бош вазир Денис Шмигалга Россия фуқаролари учун виза тартибини жорий қилиш масаласи устида ишлашни топширди. Бу ҳақда Украина президенти интернет ваколатхонасида чоп қилинган электрон петицияга Зеленскийнинг жавобида айтилган.
“Россиянинг кенг кўламли тажовузи манзарасида кўтарилган масала муҳим ва долзарбдир,, шунинг учун Россия фуқароларининг Украина ҳудудига кириши устидан назорат тартиби кучайтирилиши зарурлигини қўллаб-қувватлайман. Баён қилинганидан келиб чиққан ҳолда Украина бош вазири Д. Шмигалга мазкур масала устида ишлаш илтимоси билан тегишли хат йўлланди”, дейилган хабарномада.
Россияликлар учун виза тартибини жорий этишга оид петицияни 26 мингдан зиёд киши имзолаган. Никита Мазур муаллифлик қилган петициядаги масала президент томонидан кўриб чиқилиши учун 25 минг овоз кифоя эди.
Аввалроқ Россия президенти Владимир Путин Украинанинг Запорожье ва Херсон вилоятлари турғунлари учун Россия фуқаролигини соддалаштирилган тартибда олишга оид фармонни имзолаган эди. Ҳужжат имзоланган пайтдан бошлаб кучга кирган.
Украина Ташқи ишлар вазирлиги бу қарорни қоралаган. ТИВ баёнотида фармон Россия армияси томонидан вақтинча босиб олинган Херсон ва Запорожье вилоятларидаги турғунларни Россия фуқаролигини олишга мажбурлашга йўл очиши айтилган.
“Время” дастурида Украинадаги урушга қарши плакат намойиш қилган Овсянникова Вацлав Ҳавел мукофотига сазовор бўлди
Россия “Биринчи канал”ининг собиқ ходимаси Марина Овсянникова “Время” дастури эфиридаги урушга қарши акцияси учун Вацлав Ҳавел мукофоти лауреатига айланди. Мукофотларни топшириш маросими Норвегия пойтахти Ослода бўлиб ўтган.
Ўз сўзида Овсянникова бу мукофотга лойиқ топилишини кутмаганини қайд этган. Унга кўра, ўтган 20 йил ичида Россия урушга қарши бўлган одамларни қамоққа тиқадиган тоталитар давлатга айланган.
“Ва бу мамлакатнинг президенти ҳарбий жиноятчидир. 20 йил ичида Путин Россиядаги мустақил ОАВнинг барчасини барбод қилиб, уларнинг ўрнида орсиз пропаганда машинасини барпо этди”, деган “Биринчи канал”нинг собиқ муҳаррири.
Шу йилнинг 14 март куни Овсянникова жонли эфир чоғида “Время” дастури бошловчиси Екатерина Андреева ортига туриб олиб, “Урушни тўхтатинг. Пропагандага ишонманг. Бу ерда сизни алдашмоқда” деб ёзилган плакатни намойиш қилган эди.
Бу акциядан сўнг у 30 минг рубллик жаримага тортилган. Можаро ортидан Овсянникова “Биринчи канал”дан бўшаб кетган ва Россияни тарк этган.
Наргиз Зокирова урушни қоралагани учун Россиядан ҳайдалди
Асли ўзбекистонлик таниқли қўшиқчи Наргиз Зокированинг Россияга кириши 50 йилга тақиқланди. Бунга унинг Украина урушини қоралаган постлари сабаб бўлгани айтилмоқда.
Наргиз бир неча бор Украина урушини қоралаб, пост қолдиргани маълум.
Ўзбекистонда меҳмонда бўлиб қайтган Наргиз Зокирова 25 май куни Домодедова аэропортидан Тошкентга қайтарилган.
Starhit.ru сайти хабарига кўра, Зокировага Россияга кириши тақиқланган ҳужжатни топширишган. Ҳужжатда «давлат хавфсизлигини таъминлаш учун» деб ёзилган. Ҳужжат starhit.ru сайтида эълон қилинди.
Наргиза Зокировага яқин манба Озодликка унинг Россияга киришни тақиқлангани ҳақидаги хабарни тасдиқламади, аммо рад этгани ҳам йўқ. Қўшиқчининг ўзи ҳозирча бу хабарга муносабат билдирмади.
Зокировлар сулоласининг кенжа аъзоларидан бўлган Наргиз 1995 йилда Қўшма Штатларга кўчиб кетган ва Россия 1-Канали ўтказган “Голос” қўшиқ танловида иккинчи ўринни олиши ортидан Россия ва собиқ совет давлатларида янгидан шуҳрат қозонганди.
Кейинги йилларда Наргиз Зокирова Россиядаги таниқли қўшиқчилар қаторидан ўрин олганди. Унга бугун қўйилган тақиқ 2072 йилнинг 2 майига қадар амалда бўлади. Ўша пайтда Зокирова 101 ёшга кирган бўлади.
Руслар Северодонецк шаҳрини эгаллашга ҳаракат қилмоқда
Бугун Украинанинг шарқий саноат маркази бўлган Донбасс минтақасида оғир жанглар бўлгани ҳақида хабар берилди. Москва кучлари ҳозирда бор эътиборини минтақани эгаллаб олишга қаратган.
Россия қўшинлари иссиқлик электр станцияси жойлашган саноат шаҳарчасини эгаллаб олиб, Северодонецк шаҳрини эгаллаш учун янада қаттиқ бел боғлади.
Шаҳар ичида Road tо Rеlief ёрдам ташкилоти аъзолари касалхонадан одамларни эвакуация қилишга ёрдам бермоқда.
Фамилиясини айтмаган Виталий исмли полиция махсус гуруҳи аъзоси шаҳардаги вазиятни “жаҳаннам” дея қиёслади:
"Бу дўзах. Биласизми, бу дўзахнинг ўзи. Биринчидан, ҳар куни отишма. Иккинчидан, саноқсиз ўлимлар. Учинчидан эса инсоний муаммолар".