Россия қўшинлари Донецк вилоятидаги пляжни ўққа тутди
Пляжда болалар ҳам бўлгани айтилмоқда.
Украина миллий полицияси маълумотига кўра, Россия армияси ўтган суткада вилоятнинг 18 аҳоли масканига 29 та артиллерия зарбаси йўллаган.
Хусусан, Авдеевкага саккизта зарба берилган, шунингдек Курахово, Красногоровка, Часов Яр, Славянск, Железное, Торецк, Курдюмовка, Нью-Йорк, Очеретино, Райгородок, Иванополье, Нелиповка, Новоселовка Первая, Первомайское, Пришиб, Федор, Хрестишче аҳоли масканлари ҳам ўққа тутилган.
Тинч аҳоли орасида қурбонлар ва ярадорлар бор.
Россияликлар “С-300” зенит-ракета тизимлари, “Град” ва “Ураган” ялпи ўт очиш тизимлари ҳамда артиллерия ва танклардан ўт очишмоқда.
Фуқаровий инфратузилмага мансуб 61 та объект – 40 та турар-жой биноси, иккита мактаб, кимё заводи, темир йўл, маъмурий ва хўжалик бинолари ва бошқа иншоотлар вайрон бўлган ва шикастланган.
Часов Яр шаридаги пляжга берилган зарбалар оқибатида болалар нобуд бўлгани ва яралангани маълум қилинган.
AI петербурглик рассом аёл Скочиленкони виждон тутқуни деб топди
Amnesty International халқаро инсон ҳуқуқлари ташкилоти Александра Скочиленкони виждон тутқуни деб топиб, унинг зудлик билан ва баҳоналарсиз озод этилишини талаб қилмоқда.
Ташкилот хабарномасида қайд этилишича, рассом аёлга нисбатан қўзғатилган жиноят иши ёпилиши, Жиноят кодексининг Россия армияси тўғрисидаги “фейк”ларга оид 207.3-моддаси эса бекор қилиниши лозим.
Скочиленко Санкт-Петербург дўконларида қолдирган урушга қарши нархномалар иши бўйича қўлга олинган. Мазкур айблов бўйича у 10 йилгача озодликдан маҳрум этилиши мумкин.
Финляндиянинг Tikkurila ширкати Россия бозорини тарк этмоқда
Финляндиянинг бўёқ ва лак ишлаб чиқаришга ихтисослашган Tikkurila ширкати Россиядаги бизнесини ёпади. Бу ҳақда ширкат сайтида маълумот тарқатилган.
Tikkurila шу кунда россиялик ходимлари меҳнатига ҳақ тўлаш учун зарур бўлган ҳажмдагина маҳсулот сотяпти. Бундан ортган даромаднинг барчасини ширкат хайрия ишлари учун сарфламоқчи.
Хабарномада Tikkurila Россияда нефть-газ ва аэрокосмик соҳада фаолият юритувчи корхоналар ҳамда санкция рўйхатига тушган давлат муассасалари ва ташкилотлари билан ҳамкорликни тўхтатгани айтилган. Бунга Россия қўшинларининг Украинага бостириб киргани сабаб бўлган.
Россиядаги илк заводини 1995 йилда очган Tikkurila ширкати ҳозирда бу мамлакатда учта заводга эга.
Қозон, Пермь, Уфа ва Кировда Украинага йўллаш учун батальонлар ташкил этилди
Россия таркибига кирган Татаристон ва Бошқирдистонда, шунингдек, Пермь ўлкаси ва Киров вилоятида Украинадаги жанговар ҳаракатларда иштирок этиш учун кўнгиллилар батальонлари ташкил этилган.
“Вёрстка” нашри хабарига кўра, батальонларга армияда хизмат тажрибасига эга бўлган ва судланмаган, 18 ёшдан 50 ёшгача бўлган эркаклар қабул қилинган. Бу иш маҳаллий ҳарбий комиссариатлар ҳамда шартнома асосида хизматга қабул қилувчи мобиль пунктлар воситасида амалга оширилган. Ҳар бир батальонда 400 тагача одам бор.
Батальонларга қабул қилинган кўнгиллилар яқин орада бир ойлик машқларга жўнатилиши кутилмоқда. Шундан сўнг улар, иддаога кўра, фронтга йўлланади.