Украина Қуролли кучлари ҳужумини давом эттирмоқда

Россия Мудофаа вазирлиги шанба куни Украинанинг Харков вилоятига ҳужуми бошланганидан бери биринчи марта, бунинг натижасида фронт бузиб ташланди ва ўнлаб аҳоли пунктлари озод қилингани, биринчи марта рус қўшинларининг чекинишини тасдиқлади.

Вазирлик баёнотида айтилишича, “уч кун ичида “Изюм-Балаклия” қўшинлари гуруҳини қисқартириш ва “ДХР” деб аталган ҳудудга (Донецк вилояти) ўтказиш бўйича операция ўтказилган.

Аввалроқ Украина расмийлари Балаклия шаҳри озод қилинганини расман эълон қилган, шанба куни эса можаронинг ҳар икки томони рус қўшинлари Изюм шаҳрини ҳам тарк этгани ҳақида хабарлар келган эди.

Шанба куни Украина қўшинлари Изюм шимолидаги Купянск шаҳрининг катта қисмини ҳам эгаллаб олди. Бу шаҳар Украинанинг яқиндаги ҳужумига қадар Харков вилоятининг Россия назорати остидаги ишғол маъмурияти қароргоҳи бўлган.

Шанба куни тушдан кейин россиялик ҳарбийлар Купянск шимолидаги Волчанск шаҳрини ҳам Россия билан чегарага яқин жойда тарк этаётгани ҳақида тасдиқланмаган хабарлар пайдо бўлди.

Бу шаҳарларнинг барчаси урушнинг бошида, феврал ва март ойларида Россия томонидан назоратга олинган. Украина ҳужуми 6 сентябрда бошланган. 5 кун давомида украиналик ҳарбийлар ўнлаб километр олдинга силжиб, ўнлаб аҳоли пунктларини эгаллаб олди. Расмий равишда Украина Қуролли кучлари Бош штаби шаҳарларнинг босиб олиниши ҳақидаги барча хабарларни ҳали тасдиқламади.

Россия қўшинлари Харков остонасидан қайтарилди

Украина Қуролли кучлари (ЗСУ) Харков ва Херсон йўналишларида русларга қарши қайта ҳужум амалиётларини авж олдирмоқда. Украина қўмондонлиги сентябр бошидан буён 2 минг км квадрат украин ҳудуди озод этилганини айтмоқда. Киев расмий доиралари охирги куни ЗСУ Купянск шаҳрини озод қилганини иддао қилди.

АҚШнинг Урушни ўрганиш институтига кўра, агарда Купянск бой берилса, Россия ҳарбий қисмлари Харков йўналишидаги энг йирик боғловчи тармоқни йўқотишини таъкидламоқда.

Россия Мудофаа вазирлиги эса 10 сентябр куни Украина қарши ҳужуми бошланганидан ва фронт чизиғини ёриб ўтганидан буён илк маротаба рус қўшинлари чекинаётганини тан олди. Бироқ, одатга кўра, буни “қайта йиғилиш ва қайта дислокация” деб атамоқда.

Украинада жанг қилган икки ўзбекистонлик асирга олинди

Украинада Россия тарафида жанг қилган ўзбекистонликларнинг асирга олингани ва сўроқ қилиниши акс этган видео 10 сентябрь куни тармоқларда тарқалди.

Видео остига жойланган хабарда воқеа Украинанинг 25инчи ҳаво-десант бригадаси ҳарбийлари Харьков вилоятининг Балаклия шаҳри остонасида рус қўшинларини ёриб ўтиш пайти рўй бергани айтилади.

Қўлга олинган асирлар Ўзбекистондан эканликлари, ҳусусий ҳарбий бўлим таркибида минамётчи сифатида жанг қилганликларини айтишади.

Сўроқ қилинаётганлардан бири Ўзбекистоннинг Самарқанд вилоятидан эканини қўшимча қилади.

Ўзбекистоннинг Россиядаги элчихонаси ўз фуқароларини бу мамлакатдаги ҳарбий ҳаракатларда иштирок этишдан тийилишга чақирган.

Элчихона ўзбекистонликларни бу каби ҳаракат учун ватанларида жиноий жавобгарлик кутиши ҳақида огоҳлантирган.

Купянск озод этилди, Россия қўшини Изюмдан ҳам чекнмоқда

Украина қуролли кучлари сўнгги бир ҳафтада қарши ҳужумларни кучайтириб, мамлакат шарқидаги ўттиздан ортиқ аҳоли пунктини Россия қўшинларидан қайтариб олишга муваффақ бўлган.

Жумладан , украин ҳарбийлари шанба куни Харьков вилоятининг учинчи йирик шаҳри Купянск озод этилганини эълон қилди.

Айни пайтда Россия қўшини Изюмдан ҳам чекинаётгани ҳақида хабарлар олинмоқда.

Ижтимоий тармоқларда тарқалган видеоларда озод этилган ҳудудларда украиналик аскарларни маҳаллий аҳоли ҳурсандчилик билан кутиб олиши, маъмурий бинолар устида Украина байроғи кўтарилгани акс этган.

Ҳарбий экспертларга кўра, Украинанинг қарши ҳужумлари Россияни заифлашган позицияларини мустаҳкамлашга мажбур қилмоқда ва бу холат минтақадаги кучлар мувозанатини ўзгартириши мумкин.

Украина Қуролли Кучлари полковниги Владислав Селезнев фронтдаги вазият ҳақида “Current time” мухбирига сўзлаб берди.

“Рус тарғиботчилари шок ҳолатида. Бунга Украина мудофаа кучларининг муваффақиятли ҳаракатлари сабаб бўлмоқда. Бунгача руслар кунига катта уринишлар билан Россия-Украина фронтининг энг фаол бўлимларида юз, эҳтимол минг метр олдинга силжишган. Ва кейин рус жангчилари шунчалик тез, тумтарақай қочишдики, қисқа вақт ичида Украина мудофаа кучлари 50 километр кенгликдаги фронтда камида 50 километр олдинга силжишди. Украиналикларнинг аниқ ва истилочилар учун жуда оғриқли зарбаларидан қочиб ортга чекинмоқда”. .

Урушни ўрганиш бўйича Америка институти маълумотларига кўра, сўнгги кунларда Украина қуролли кучлари Харьков вилоятидаги 400 квадрат километр ҳудудни назоратга олган. Бош штаб ишғол қилинган ҳудуднинг умумий ҳажмини 700 квадрат километрга баҳолади.

Украина президенти Владимир Зеленский ўз мамлакати қўшинлари Россияга қарши ҳужум доирасида Харьков вилоятидаги 30дан ортиқ аҳоли пунктини озод қилганини айтди.

Видеомурожаатида у, шунингдек, украин кучлари бир қанча ҳудудларда фаол операцияларни муваффақиятли давом эттираётганини ҳам таъкидлади.

"Ҳозирда Украина Қуролли Кучлари Харьков вилоятидаги 30 дан ортиқ аҳоли пунктларини озод қилиб, назоратига олди. Вилоятнинг айрим қишлоқларида ҳудудни текшириш ва хавфсизликни таъминлаш чоралари кўрилмоқда, биз босқичма-босқич янги аҳоли пунктларини назоратга олмоқдамиз - Ҳамма жойда биз Украина байроғини қайта тикамиз".

Украина хавфсизлик хизмати Украина қўшинлари Харьов вилоятининг учинчи йирик шаҳри Купянскга кирганини тасдиқлади.

Купянск Россия кучларининг Изюм вилоятидаги гуруҳланишини таъминлашда муҳим нуқта ҳисобланади.

Бу шаҳарнинг йўқолиши, кўпчилик таъкидлаганидек, бу кучларнинг таъминотини мураккаблаштиради.

Рус қўшинлари Изюмни ҳам тарк этган. Бу ҳақда россияпараст телеграм каналлари ўз манбаларига таяниб хабар бермоқда. Баъзи каналлар шаҳар таслим бўлганини ёзмоқда.

Бу каналларнинг хабарларига кўра, Украина қуролли кучлари шаҳарга кириб бормоқда. Айримлар Украина қўшинлари аллақачон Изюм марказида бўлганини хабар қилмоқда.

Украина Давлат Тергов Бюроси Россия озод қилинган Балаклияда “филтрлаш” амалиёти бошланганини эълон қилди.

Тадбирлардан мақсад россияликлар ва уларнинг шерикларининг қўпорувчилик фаолиятини олдини олиш, экани айтилмоқда.

Бюро ходимлари бошқа ҳуқуқ-тартибот идоралари билан биргаликда вақтинча босиб олиш пайтида рус босқинчилари билан ҳамкорлик қилган шахслар ҳақидаги маълумотларни ўрганмоқда, — дейилади Украина Давлат Тергов Бюроси хабарида.