ЕИ Украинага яна 5 млрд евро беради
ЕИ молия вазирлари Украинага 5 млрд евро миқдорда янги макромолиявий ёрдам ажратишга розилик беришди, дея хабар қилмоқда Reuters.
Ушбу маблағлар ижтимоий соҳага (мактаблар ва касалхоналар) ҳамда муҳим инфратузилма объектларини сақлашга йўналтирилади.
Евроиттифоқ мамлакатлари кафолати билан таъминланган мазкур кредит ЕИнинг июндаги саммитида келишилган 9 млрд евролик молиявий ёрдамнинг бир қисмидир. Украина бош вазири Денис Шмигал 2022 йил охирига қадар мамлакатга яна 3 млрд евро иқтисодий ёрдам ажратишини айтди.
У, шунингдек, 2023 йилга мўлжалланган янги молиявий ёрдам дастури юзасидан Олаф Шольц ҳамда ЕИнинг бошқа лидерлари билан сиёсий маслаҳатлашувлар бошланганини билдирди. Украина ҳукумати раисига кўра, бу ерда 12 млрд евро ажратиш ҳақида гап бормоқда. Ушбу маблағлар “Украинага режадаги давлатбюджети дефицитини қоплаш ва мамлакат иқтисодиёти барқарорлигини таъминлашга ёрдам беради”.
Украина макромолиявий ёрдамнинг 1 млрд евролик биринчи қисмини август ойи бошларида олган эди. Унга қадар Евроиттифоқ Украинага 1,2 млрд евро тезкор кредит ажратган.
Запорожье АЭСи ишини тўхтатди
11 сентябр, якшанба куни станцияга масъул “Энергоатом” давлат агентлигининг маълум қилишича, Украинадаги Россия тасарруфида қолаётган Запорожье атом электр станциясининг ишлаши бутунлай тўхтатилган.
Агентлик станциянинг олтинчи блокини электр тармоғидан узиб қўйганини айтди.
Киев чоршанба куни Европадаги энг йирик завод атрофидаги Россия томонидан босиб олинган ҳудудлар аҳолисини ўз хавфсизлиги учун эвакуация қилишга чақирди.
Россия ва Украина бир-бирини ядровий фалокатга олиб келган АЭСни ўққа тутишда айбламоқда.
Олдинроқ Украина президенти Владимир Зеленский атрофдаги ҳудудларни демилитаризация қилишга чақирган эди.
Муниципал депутатлар Путин истеъфосини талаб қилишмоқда
Санкт-Петербургнинг “Смольнинское” округи муниципал депутатлари Украинадаги уруш важидан Владимир Путинни давлатга хиёнатда айблаш таклифи билан Давлат Думасига мурожаат қилишга қарор қилишди. Депутатлар мурожаатни 15 сентябрга қадар йўллашмоқчи.
Мурожаат мазмунига кўра, президентнинг Украинага ҳужум қилиш қарори “Россия ва унинг фуқаролари хавфсизлигига зарар етказмоқда”, чунки Россия армияси жанг қилишга лаёқатли бўлинмаларини бой бермоқда, фуқаролар эса ногирон бўлиб қолишаётир. Иқтисодиёт ҳам зиён кўряпти: чет эл ширкатларининг Россия бозоридан чиқиб кетиши ва ўқимишли аҳолининг мамлакатни тарк этиши “Россия фуқароларининг иқтисодий фаровонлигига таъсир этмаслиги мумкин эмас”. Депутатлар НАТО блоки барибир шарққа томон кенгаяётганига, Украина эса замонавий ҳарбий техникага эга бўлаётганига ҳам эътибор қаратишган.
Мурожаат муаллифларига кўра, Путиннинг хатти-ҳаракатларига Конституциянинг 93-моддасига мувофиқ чора кўрилиши лозим: мазкур моддада президент Давлат Думаси уни давлатга хиёнатда ёки бошқа оғир жиноятларда айблаган тақдирда лавозимидан четлаштирилиши мумкинлиги белгиланган.
Петербургнинг Смольний кенгаши ортидан Москванинг Ломоносов округи муниципал кенгаши ҳам Путинни ўз ваколатларини топширишга чақирди.
Украина Ташқи ишлар вазири: Биз Россия армиясини мағлуб эта олишимизни кўрсатдик
Украина ташқи ишлар вазири Дмитрий Кулеба Украинанинг шанба куни Германия Ташқи ишлар вазири Анналена Бербок ташрифи муносабати билан махсус матбуот анжумани ўтказди. Сўнгги қарши ҳужумидан олинган ҳудудий ютуқларга ишора қилиб, у Украина Россия армиясини мағлуб эта олишини кўрсатганини айтди.
Матбуот анжуманида Кулеба, хориждан қанча кўп қурол келса, Украина урушни шунча тезроқ тугатишини билдирди.
“Биз Россия армиясини мағлуб эта олишимизни кўрсатдик. Буни ҳамкорларимиз тақдим этган қуроллар билан қиляпмиз. Яна бир бор такрорлайман: қанча кўп қурол олсак, қанчалик тез ғалаба қозонсак, бу уруш тезроқ тугайди. Ва биз бошқа мақсадларга эътибор қаратишимиз мумкин бўлади... Ҳар куни кимдир Берлинда танклар бериш ёки бермаслик, IRIS ҳаво мудофаа тизимларини қачон бериш кераклиги ҳақида ўйлаб ва маслаҳатлашиб ўтирган бир пайтда, Украинада кимдир вафот этяпти", деди Кулеба.
Олдинроқ Украина президенти Владимир Зеленкий Украина қуролли кучлари шу ой бошида Россияга қарши қарши ҳужум бошлаганидан бери қарийб 2000 квадрат километр ҳудудни ва 30 зиёд аҳоли пунктини озод қилганини айтган эди.
Форум