Ғалла ортилган илк кема Туркияга йўл олди
Узоқ кутилган янгилик: Уруш бошланганидан бери дон ортилган илк кема Одесса портидан йўлга чиқди.
Украина инфратузилма вазирлигига кўра, кема хавфсизлиги БМТ ҳамда Туркия томонидан таъминланадиган йўлак орқали сузади.
Туркия Мудофаа вазири Хулуси Ақарга кўра, 26 минг тонна Украина маккажўхори ортилган кеманинг 2 август куни Истанбулга етиб келиши кутилмоқда. Кема Истанбулда текширилгач, донни Ливанга етказиб бериш режаланган.
Россия Украинага уруш бошлаганидан сўнг денгиз орқали ғалла ташилишининг тўхтаб қолиши дунёнинг аксар давлатларида очарчилик хавфини юзага келтирган.
Украина ва Россия 13 июль куни БМТ билан Туркия иштирокида ғаллани денгиз орқали экспорт қилишни тиклаш масаласида музокара ўтказган, 22 июлда эса тегишли ҳужжатлар имзоланган эди. Томонлар “географик чегаралар доирасида” ўт очишни тўхтатишга ва йўналишлар хавфсизлигини таъминлаш мақсадида денгиз акваториясини қисман миналардан тозалашга келишганлар.
Бироқ битим имзоланган куннинг эртасига – 23 июлда Россия экспортга йўлланадиган украин ғалласи захиралари сақланаётган Одесса порти ҳудудига ракета зарбалари берди. Украина Россияни Истанбул келишувларини барбод қилишга уринишда айблади. Кремль эса буни инкор қилди.
Айни пайтда президент Владимир Зеленский Украина буғдойининг ҳосили икки баробарга камайиши мумкинлигидан хавотир билдирди.
Украина статистикасининг билдиришича, 2021 йилда Украинада 107 миллион тонна ғалла ва мойли ўсимликлар етиштирилган, жорий йилда эса ҳосил 66,5 миллион тонна бўлиши прогноз қилинган.
Николаевга “энг шафқатсиз ҳужум”
Украина президенти Владимир Зеленский Россиянинг кеча Николаев порт шаҳрига берган зарбалари “кенг кўламли уруш давридаги энг шафқатсиз ҳужум” бўлганини айтди:
"Сўнгги 24 соат ичида украиналиклар, Николаев шаҳри ва бутун минтақа кенг кўламли уруш давридаги энг шафқатсиз ҳужумни бошидан кечирди. Ўнлаб ракеталар билан зарба берилди. Босқинчилар турар-жой бинолари, мактаблар, ижтимоий инфратузилма ва саноат объектларига зарба берди".
Зеленский мамлакатдаги энг йирик дон ишлаб чиқарувчи ва экспорт қилувчи компаниялардан бирининг эгаси, ушбу ҳужум натижасида ҳалок бўлган Олексий Вадатурский ўлими юзасидан таъзия билдирди.
“Нибулон” қишлоқ хўжалиги компанияси асосчиси ва эгаси Олексий Вадатурский ва унинг рафиқаси ўз уйида ўлдирилди", деди Николаев губернатори Виталий Ким.
Украина президенти маъмурияти Вадатурский мамлакатдаги энг йирик фермерлардан бири ва минтақадаги муҳим шахс бўлгани учун ҳам қасддан нишонга олинганини иддао қилди. Тадбиркор хорижга дон жўнатувчи кемалар флотини бошқарган.
"Биз Херсонни қайтариб оламиз"
Расмийлар Россиянинг Николаевга зарбалари Украинанинг Херсондаги қарши ҳужумига жавоб бўлиши мумкинлигини айтган.
Николаевда жойлашган Украина кучлари Херсонни қайтариб олиш учун қарши ҳужумга киришгани сабабли кескинлик янада ортган.
Мунтазам бомбардимонлар 500 000 киши яшаган Николаев аҳолисининг ярмини шаҳардан кетишга мажбур қилди.
Украина ўқ-дорилар таъминотида имкониятлар Россия билан тенг эмаслигини тан олади, бироқ ғалабага ишонч юқорилигича қолмоқда.
"Биз Херсонни қайтариб оламиз", дейди Олексий исмли Украина ҳарбийси.
Херсон устидан назоратни тиклаш учун қарши ҳужумга ўтаётган Украина армияси рус қўшинини Николаевга ҳужум қилган пайтда эришилган натижаларни такрорлашга умид қилмоқда.
Харьков икки ойдирки ҳар тунда бомбаланмоқда
Украина расмийларига кўра, якшанба куни Россиянинг иккита ракетаси Харковда мактаб дарсликлари чоп этиладиган босмахонани вайрон қилган.
Босмахона ходимларининг айтишича, улар бутун мамлакатдаги мактаб болалари учун дарсликлар ва бошқа ўқув материаллари етказиб беришган.
Харьков вилояти маъмуриятига кўра, бугун тунда шаҳар ўққа тутилгани оқибатида икки киши жабрланган.
Икки ойдан бери ҳар тунда Украинанинг иккинчи йирик шаҳри бўлган Харьков ракета ҳужумларига учрамоқда.
Россия қўшинлари Изюм шаҳридан шимоли-ғарб ва жануби-ғарб томонга ерусти ҳужумларини қайтадан бошлади ва эҳтимолки, Харьков вилояти ғарбига ёки Харьков шаҳрига ҳужум амалиётини бошлаш учун ҳозирлик кўрмоқда, деб ёзди Американинг Урушни ўрганиш институти (ISW) навбатдаги ҳисоботида.
Форум