Линклар

Шошилинч хабар
29 сентябр 2022, Тошкент вақти: 07:19
Россия-Грузия чегарасида навбатда турганлар.

Ҳабиб Нурмагомедов Доғистондаги норозиликларга муносабат билдирмади. Уруш хроникаси

Урушнинг 218-куни

Бирлашган Миллатлар Ташкилоти Хавфсизлик Кенгаши аъзолари Россияни Украинанинг босиб олган ҳудудларида ўтказган сохта референдумларини қоралади.

Владимир Зеленский Кремл бошчилигидаги референдумларни “майнавозчилик” деб атади.

Қўшма Штатлар Украина шарқида ўтказилган референдумларни қораловчи резолюция қабул қилади.

АҚШнинг Москвадаги элчихонаси ўз фуқароларини зудлик билан Россияни тарк этишга чақирди.

Кремл 28 сентябр куни Украинадаги “махсус ҳарбий операция” Россия Украина шарқидаги Донецк вилоятини тўлиқ назоратга олмагунча давом этиши кераклигини билдирди.

Денгиз остидан ўтувчи “Шимолий оқим 1” ва “Шимолий оқим 2” қувурларидаги авария руслар диверсияси деб тахмин қилинмоқда.

Оқ Уй: Украинадаги урушда қатнашишни истамаган вмобилизациядан яшириниб юрган Россия фуқаролари АҚШдан бошпана олиши мумкин.

Ҳабиб Нурмагомедов Доғистонда сафарбарликка қарши бўлаётган акциялар тўғрисида фикр билдириш сўралганидан кейин комментларни ёпиб қўйди.

Мобилизация эълон қилинган бир ҳафта ичида 98 мингга яқин россиялик Қозоғистон чегарасини кесиб ўтган.

28 сентябрдан бошлаб Россияда эълон қилинган мобилизация муносабати билан Латвия чегарадош ҳудудларда фавқулодда ҳолат жорий қилди.

06:55

Москвада 30 сентябрь куни аннекцияни қўллаб-қувватловчи митинг ўтказилади

Москва марказида 30 сентябрь куни қатор кўчалар ва Кремль атрофидаги ҳудудлар ҳаракат учун вақтинча ёпилади. Бу ҳақда хабар берган Москва транспорт департаменти кўчаларнинг ёпилиши сабабларини айтмаган.

РБК Давлат думаси ва Москва мэриясидаги манбаларига таянган ҳолда, 30 сентябрда пойтахт марказида ҳокимият Украинанинг босиб олинган ҳудудларини Россияга қўшиб олиш борасида халқаро ҳамжамият тан олмаган “референдум”лар натижаларини қўллаб-қувватлашга бағишланган митинг ўтказишини хабар қилди. ТАСС митинг Қизил майдонда ўтишини ва унда президент Владимир Путин иштирок этишини ёзди.

Аввалроқ РИА Новости ўз манбаларига таянган ҳолда 30 сентябрда Путин Давлат думасида Украинанинг тўрт вилоятини аннекция қилинганини эълон этиши кутилаётганини хабар қилганди. Кремль ҳозирча бу хабарларга муносабат билдирмади.

06:32

Россия 3 октябрда Украинанинг босиб олинган ҳудудларини аннекция қилиши мумкин

Россия Давлат думаси 3 октябрда навбатдан ташқари пленар йиғилиш ўтказади. Озодлик радиоси рус хизматининг билдиришича, мазкур йиғилишда Украинанинг босиб олинган ҳудудларини Россия таркибига қўшиб олиш, яъни аннекция қилиш масаласи кўриб чиқилиши кутилмоқда. Украина, АҚШ, Европа Иттифоқи ва қатор давлатлар аннекцияни тан олмасликларини эълон қилди.

23-27 сентябрь кунлари ўзини ЛХР, ДХР деб номлаб олган айирмачи ҳудудларда ва Херсон ҳамда Запорожье вилоятларининг Россия босиб олган ҳудудларида халқаро ҳамжамият “сохта” деб эътироф этган “референдум”лар ўтказилган эди. Босиб олинган ҳудудларга Москва томонидан тайинланган маъмурлар “овоз берганларнинг асосий қисми Россияга қўшилишга розилик бергани”ни иддао қилган.

22:18 28.9.2022

Латвия Россия билан чегарада фавқулодда ҳолат жорий қилди

28 сентябрдан бошлаб Россияда эълон қилинган мобилизация муносабати билан Латвия ҳукумати Псков вилояти билан чегарадош ҳудудларда, шунингдек, аэропортлар, денгиз портлари, чегара ўтказиш пунктлари ва темир йўлда фавқулодда ҳолат жорий қилди.

Латвия-Россия чегарасидаги фавқулодда ҳолат уч ой давомида амал қилади.

"Ҳозирда Латвия ва Россия чегарасида вазият барқарор, осойишта ва қаттиқ назорат остида. Бироқ Россияда эълон қилинган сафарбарлик билан ўз мамлакатини тарк этишни хоҳловчи Россия фуқаролари сони сезиларли даражада ошди. Шу тариқа Латвия-Россия чегарасида ноқонуний муҳожирлар сонининг тез ўсиши хавфи мавжуд. Фавқулодда чораларнинг мақсади - бунга фаол тайёргарлик кўриш", дейлади Латвия ҳукумати расмий баёнотида.

Шунингдек, Латвия ҳукумати Россиядан фуқаролар оқимини камайтириш мақсадида Педедзе чегара ўтиш пунктини ёпишга қарор қилди ва чегара назоратини кучайтириш бўйича кўрсатма берди.

19 сентябр куни Латвиядан ташқари Литва, Полша ва Эстония Европа Иттифоқининг исталган давлатида берилган Шенген визаси билан Россия фуқароларининг киришига тақиқ жорий қилди. 21 сентябр куни Владимир Путин томонидан эълон қилинган “қисман” ҳарбий сафарбарликдан сўнг, мамлакат ташқи ишлар вазири Эдгар Ринкевич Латвия ҳарбий хизматдан қочишни хоҳловчи Россия фуқароларига гуманитар визалар бермаслигини ёки агар уларда Шенген виза бўлса, чегарани кесиб ўтишга рухсат бермаслигини айтди. У буни "хавфсизлик сабаблари" билан изоҳлади.

Бундан ташқари, Латвия Сейми иммиграция қонунчилигига Россия Федерацияси фуқаролари учун яшаш рухсатномаларини узайтириш шартларини қаттиқлаштирувчи, шунингдек, узоқ муддатли меҳнат визаларини олишга амалда тақиқ жорий қилувчи ўзгартиришларни маъқуллади.

22:13 28.9.2022

Ҳабиб Нурмагомедов Доғистондаги намойишлар масаласида изоҳ бермади

Khabib Nurmagomedov
Khabib Nurmagomedov

Машҳур аралаш жанг санъати устаси, UFC талқини бўйича енгил вазнда собиқ чемпион Ҳабиб Нурмагомедов “Инстаграм”даги обуначилари Доғистонда сафарбарликка қарши бўлаётган норозилик чиқишлари ва ҳуқуқ-тартибот идоралари ходимларининг намойишчиларга куч ишлатишига ўз муносабатини билдиришга чақириши ортидан саҳифасида изоҳ ёзиш функциясини ўчириб қўйди. Бу ҳақда Кавказ.Реалии хабар бермоқда.

Нурмагомедовнинг изоҳ ёзиш мумкин бўлган сўнгги пости 16 сентябрь санасида қолдирилган. Унинг остида бир неча мингта изоҳ бўлиб, аксарида обуначилар спортчидан республикада бўлаётган воқеаларга ўз фикрини билдиришни сўраганлар.

“Биродарларингни тўп еми қилиб урушга жўнатишяпти, сен эса миқ этмайсан, “қаҳрамон”, – дейилади энг кўп “лайк” тўплаган изоҳлардан бирида.

16 сентябрдан кейин эълон қилинган тўртта постда изоҳ қолдириш имконияти ўчирилган. Айни чоғда Нурмагомедов саҳифасида реклама беришда давом этмоқда.

Сафарбарлик бошланганидан сўнг Доғистонда Россия бўйича энг йирик норозилик чиқишлари бўлиб ўтди. Махачқалъада одамлар иккита катта намойиш ташкил қилишди, республиканинг бошқа жойларида эса фуқаролар икки марта йўлларни тўсиб қўйишди. Намойишчиларда юзлаб киши ушланди, улар устидан бир қанча жиноят ишлари очилди.

Доғистон ғарбида туғилган 34 ёшли Ҳабиб Нурмагомедов аралаш жанг санъати бўйича дунёнинг энг машҳур спортчиларидан биридир. У 29 та жанг ўтказиб, барчасида ғалаба қозонган. Нурмагомедовнинг “Инстаграм”даги саҳифасига 33,5 миллион киши обуна бўлган. Спортчи ўз карьераси бошида украин клуби номидан иштирок этган ва ушбу мамлакат фуқаролигини олишга ҳаракат қилган. У Россиянинг Украинага босқинига ўз муносабатини билдирган эмас.

Давомини ўқинг

XS
SM
MD
LG