Россиялик тарихчи: Россиянинг қулаши ягона бенефициари Украина эмас, Хитой бўлади
Россиялик тарихчи, Европа фалсафаси тарихи, дин тарихи ва Россиянинг қиёсий тарихи бўйича мутахассис Андрей Зубов, дунё ҳамжамиятини Россия парчаланишини кутмасликка чақирди.
“Россиянинг қулаши бутун дунёга ташвиш келтиради: бунинг ягона бенефициари Украина эмас, Хитой бўлади”, дейди у.
Путиннинг мунаққиди ўлароқ танилган Зубов ҳозирда Чехиянинг Брно шаҳрида яшайди ва Масарик номидаги университетда дарс беради.
“Энг яхши вариант бу – урушни ҳозироқ тугатиш. Агарда Ҳитлер урушни, дейлик, 1943 йил бошларида тугатганида иқтидорда қолиш имкони бўларди. Лекин у 1945 йилда пешонасидан ўқ еб, урушни тугатди. Қайсарлик оқибати. Путиннинг қайсарлиги ҳам наинки ўзига, бутун дунёга жуда қимматга тушади.
Биринчи вариант - мен бунга урушнинг илк кунларидан бошлаб умид қилгандим - Путин Украинада мағлубиятга учраши билан Россия элитаси унинг омадсизлиги ва Россияни оғир аҳволга солганига ишонч ҳосил қилиб, ундан қутулиш пайига тушади, деб ўйловдим. Бироқ бунақа бўлиб чиқмади.
Иккинчи вариант. Ташқи дунёдаги ҳаётга ўрганган Россия элитаси узил-кесил ҳокимиятдан четлатилади – у ҳозирдаёқ анчагина чеккага чиқиб қолган, – ва КГБнинг ўрта бўғини иқтидорга келади. Бу одамларнинг чет элда катта бойликлари йўқ, бунга кўп қизиқишмайди ҳам. КГБнинг бу элитаси Путиннинг йўқ бўлишини истайди ва Ғарбга келишув таклиф қилади, аммо бошқа шартларда.
Иккала вариант ҳам назарий жиҳатдан бўлиши мумкин. Аммо иккинчи вариант жуда даҳшатли. Чунки ушбу тоифа ядровий қуролни ва ички вазият устидан назоратни қолиб, аҳолининг энг фаол қисмини хорижга қувиб юборгач жуда тажовузкор бўлади. Ва ўзини бир оз тиклаб олганидан сўнг Шимолий Корея каби ён-атрофидаги мамлакатларга даҳшат солишга киришади”, дейди Андрей Зубов.
Байден: Украина ҳаводан мудофаа тизимини кучайтириш АҚШнинг биринчи галдаги вазифаси
Украина ҳаводан мудофаа тизимини кучайтириш Киевга ҳарбий ёрдам кўрсатиш жараёнида АҚШ учун биринчи галдаги вазифадир. Бу ҳақда АҚШ президенти Жо Байден Украина президенти Владимир Зеленский билан телефон орқали қилган мулоқоти чоғида билдирди.
Оқ Уйнинг билдиришича, АҚШ президенти Украина энергетика инфратузилмасини қўллаб-қувватлаш учун 53 миллион доллар ажратганини таъкидлади ва келгусида ҳам иқтисодий, гуманитар ёрдам беришда давом этишини ҳамда “агрессия учун барча ҳаражатларни Россия зиммасига юклашга ҳаракат қилиши”ни айтди.
Зеленский телеграм каналида мулоқот чоғида Байденга “Украинага ҳарбий ва молиявий кўмак кўрсатаётгани учун” миннатдорчилик билдирганини айтди.
Зеленский, шунингдек, Киев “Катта еттилик” саммити арафасида Вашингтон билан “ўз позициясини мувофиқлаштириб олгани”ни билдирди. “Катта еттилик” саммити 12 декабрда онлайн форматда ўтади. Зеленскийга кўра, саммит якунлари бўйича “янгиликлар”ни кутиш мумкин.
2022 йилнинг октябридан Россия армияси систематик равишда Украина энерготизимини ракеталар ва дронлар билан бомбардимон қилмоқда. Бунинг оқибатида миллионлаб украин иссиқликсиз ва электрсиз қолмоқда. Украинага ҳаводан мудофаа тизимини етказиб беришни Германия, Британия, АҚШ ва бошқа давлатлар ваъда қилган.
Европа қаҳратон қиш билан юзлашмоқда
12 декабрь тонгидан Европанинг қатор давлатларида яна қалин қор ёғди. Ҳаво ҳарорати 0 даражадан пастда, аксар давлатларда -2 атрофида.
Россиянинг Украинага ҳужуми ортидан энергетик ресурслар нархи фавқулодда ортгани боис, бу йилги совуқ минтақани таҳликага солиб турибди.
Лондондаги Кичик Венеция каналини муз қоплади. Энергик ресурслар нархи ошаётган бир пайтда, Буюк Британия ва умуман Европанинг қатор давлатларида аҳоли қаҳратон қиш билан юзлашмоқда.
“Ҳаво жуда совуқ. Дарёнинг устки қатлами музлаган. Шунинг учун ҳам ҳозир бу ерда яхталар йўқ. Бироқ яхта ичкарисида ҳаммаси яхши. Энг асосийси электр чойнак ишлаб турибди. Лекин кўриб турганингиздек ҳаво совуқ. Бугун бу ерда одамлар ҳам яхталар ҳам йўқ , чунки бугун сайр қилиш бироз хавфли"дейди лондонлик Иван Кардосо.
Буюк Британияда якшанба кун бўйи ҳаво ҳарорати 0 даражадан кўтарилмади. Лондонда совуқ об-ҳаво яна бир неча кун сақланиб қолиши кутилмоқда.
Украинада ҳам ҳаво ҳарорати бирдан совуди. 12 декабрь куни -2 даражага тушди.
Россия армияси шанба куни Одессадаги иккита энeргетика станциясига Эрон дронлари билан зарба берди. Натижада 1,5 миллионга яқин одам элeктр энергиясиз қолди.
Ҳозирда пойтахт Киев ва Киев вилояти, Украина ғарбидаги тўртта вилоят ва мамлакат марказидаги Днепропетровск элeктр таъминоти билан боғлиқ вазият "жуда оғир".
Разведка: Россиянинг ҳозир Донбассда илгарилаши маҳол
Британия разведкасига кўра, Россия ҳамон Донбасс вилоятига чуқур кириб олишга интилмоқда, бироқ буни уддалаши маҳол.
8 декабрь куни Россия президентининг матбуот котиби Дмитрий Песков Россия Украина ҳудудига бостириб киришидан мақсад Донбасс ва Украина жануби-шарқи аҳолисини “ҳимоя қилиш” эканини яна бир бор айтди.
Британия разведкасининг янги ҳисоботида урғуланишича, мазкур изоҳ Россиянинг ушбу урушдаги сиёсий ҳадафлари ўзгармаганини кўрсатади.
“Россия ҳамон Донецк, Луганск, Запорожье ва Херсон вилоятларининг бутун ҳудудини ўз назоратига олишга интилаётгани тайин”, дейилади ҳисоботда.
Бироқ, разведкачилар фикрича, Россия қуруқлик қўшинлари яқин бир неча ойда Донецк вилояти ичкарисига чуқур кириб олишга муваффақ бўла олмайди.