Украиналиклар Донецкни миналардан тозаламоқда
Украиналик сапёрлар гуруҳи Донецк вилоятидаги ҳудудни портламаган гранаталар, танкка қарши минглаб миналардан тозалади.
“Биздаги маълумотларга кўра, бу ерда 2000 дан ортиқ мина бор”, деди Олександр исмли сапёр:
“Бундай турдаги миналар Град, Ураган каби снарядлар билан қўлланмоқда. Миналар тебраниш детектори эга. Уни жойидан қўзгъатиш мумкин эмас. Шунинг учун ҳам уларни зарарсизлантириш қийин. Биз бундай минани аниқлаганимизда, уни жойида йўқ қиламиз”.
Баъзи миналарни зарарсизлантиришнинг имкони бўлмагани боис, масофадан туриб портлатилди.
Миналар ва портламай қолган снарядлар ягона хавф эмас. Мина бўйича мутахассислар ёниб кетган ҳарбий техника ва ҳатто қолган жасадларга ҳам портловчи моддалар ўрнатилган бўлиши мумкинлигини билдирди.
Украина Экология ва табиий ресурслар вазирлигининг ҳисоб-китобларига кўра, мамлакатни мина ва портловчи моддалардан буткул тозалаш учун камида ўн йил керак бўлади.
Россия Давлат думаси Украинада содир этилган жиноятлар учун жазоламасликни таклиф қилмоқда
Давлат думаси биринчи ўқишда Украинанинг босиб олинган ҳудудларида “Россия манфаатларини ҳимоя қилиш мақсадида" содир этилган жиноятлар учун жазо берилмаслик тўғрисидаги қонун лойиҳасини маъқуллади.
Лойиҳага берилган шарҳда қайд этилишича, қонун ўзларини “ДХР”. “ЛХР” деб номлаб олган айримачи ҳудудларга, Херсон ва Запорожье вилоятларига даҳлдор бўлади. Бу ҳудудларда 2022 йилнинг 30 сентябригача “Россия манфаатларини ҳимоя қилиш мақсадида” содир этилган жиноятлар кечирилади.
Ҳужжатда айнан қандай жиноятлар “Россия манфаатлари йўлида содир этилгани” белгилаб берилмаган.
“Адвокатская улица” юридик нашри эксперти Михаил Беньяш қонунда бундай меъёрнинг белгиланиши судларга ҳар қандай жиноятчини оқлаш имкониятини яратишини ва коррупция учун омил бўлишини билдирди. “Давлат “Менинг манфаатим йўлида ҳар қандай жиноятларни содир этаверинг, мен кечираман” демоқда. Бу ғирт ёввойиликдир”, - деди Беньяш.
Украина Бош прокуратураси, Ҳаагадаги халқаро суд ва ҳуқуқ ҳимояси ташкилотлари урушда Россия ва Украина содир этган ҳарбий жиноятларни қайд этмоқда ва тергов ўтказмоқда.
Европарламент Украина халқини Сахаров мукофоти билан тақдирлади
Эркин фикрлаш ва инсоний қадр-қимматни ҳимоя қилгани учун Европарламент томонидан бериладиган Андрей Сахаров мукофоти билан Украина халқи тақдирланди. Мукофтни топшириш тадбири Страсбургда ўтказилди. Мукофотни украиналик фаоллар гуруҳи қабул қилиб олди. Президент Владимир Зеленский тадбирда видеоалоқа орқали иштирок этди.
Тадбирга йиғилганлар ўз ватанини ҳимоя қилиб ҳалок бўлганлар хотирасига бир дақиқа сукут сақлади.
Европаламент раиси Роберта Метсола мукофот барча украин халқига берилганини таъкидлар экан: “Жанг қилаётганларга; қочишга мажбур бўлганларга; яқинларини ва қариндошларини йўқотганларга. Ўзлари ишонган нарса учун курашаётган барчага. Биламанки, Украинанинг жасур халқи таслим бўлмайди. Биз ҳам”,- деб айтди.
У Украина халқи нафақат ўз ватанини, балки Европа ҳуқуқ қадриятлари ва демократияни ҳам ҳимоя қилаётганини таъкидлади.
Сахаров номидаги мукофот Европа Иттифоқининг инсон ҳуқуқлари ҳимоячиларига берадиган асосий мукофотидир. У 1988 йилда таъсис этилган.
2021 йилда Сахаров мукофоти ҳозир қамоқда сақланаётган россиялик мухолифатчи Алексей Навальнийга берилган эди.
Украинада собиқ президент Януковичнинг барча мол-мулки мусодара қилинди
Украина Олий антикоррупция суди Адлия вазирлигининг даъво аризасини қаноатлантирди ва мамлакатнинг собиқ президенти Виктор Януковичга мансуб бўлган барча кўчмас ва кўчувчи мулкларни ҳамда пулларни давлат фойдасига муосдара қилди.
Суднинг расман билдиришича, жумладан, Януковичнинг Киев яқинидаги Межигорье резиденцияси, Сухолучьедаги меҳмонхона-ресторан комплекси, Киевдаги квартираси, банк ҳисобидаги 1 миллион доллардан кўпроқ пул, ширкатлардаги улушлари, умумий нархи 18,7 миллион евро бўлган 537 та маданий қимматга эга буюмлари олиб қўйилди. Маданий қийматга эга бўлган буюмлар орасида китоблар, иконалар, картиналар, антиквар мебель, соатлар, гулдонлар, қиличлар, қуроллар ва XIX асрга мансуб замбарак ҳам бор.
Янукович 2010 - 2014 йилларда Украина президенти бўлган. 2014 йилда у мухолифат намойишлари (Майдан) ортидан мамлакатдан қочди. Бу эса Қримнинг Россия томонидан аннексия қилинишига ва Донбассдаги конфликтнинг бошланишига омил яратди.
Украинада Янукович давлатга ҳиёнатда ва бошқа жиноятларда айбланмоқда. У бир жиноят иши бўйича сиртдан 13 йилга қамалган. Янукович ҳозирда Россияда яшамоқда. У анчадан бери жамоатчиликка кўриниш бермади.