Киевга ҳужум: Уч киши яраланди
29 декабрь куни эрталаб Украинанинг бир қатор ҳудудлари, жумладан, пойтахт Киев яна Россиянинг ракета ҳужумларига учради.
Мамлакат бўйлаб тревога сиреналари кун давомида тинмади.
Киев вилоят маъмуриятига кўра, ҳужумлар оқибатида уч киши жароҳатланиб, касалхонага ётқизилган. Ярадорлардан бири, 14 яшар қиз экани хабар қилинди.
Киев расмийлари ҳисоб- китобича, пайшанба куни Россия Украинага 120дан зиёд раката отган.
Украина Россиянинг бир қанча ракеталари уриб туширилганини билдирди.
Киев вилояти маъмуриятининг маълум қилишича, уриб туширилган Россия ракетаси парчалари Дарницкий туманидаги хусусий бинога ва бино ёнидаги машинага зарар етказган.
Россия октябрь ойидан бери мунтазам Украина энергия инфратузилмасини нишонга олиб келмоқда. Бу эса Украинада элeктр энергиясининг танқислигига сабаб бўлмоқда.
Зеленский: Украина жаҳон етакчиларидан бирига айланди
Украина уруш исканжасида қолаётган бир пайтда президент Владимир Зеленский Олий Радада йиллик мурожаати билан чиқди.
Уруш туфайли йиғилиш ёпиқ эшиклар ортида ўтказилди. Зеленский нутқида Украинанинг Кремлга қарши матонат кўрсатиши бутун дунёда қадриятларга нисбатан ишончни жонлантирганини таъкидлади:
"Украина жаҳон етакчиларидан бирига айланди. Байроғимиздаги ранглар бутун дунёда жасорат ва матонат рамзига айланди. Энди ҳар бир мамлакат, ҳар бир қитъада - кўк ва сариқ рангларни кўришганида, бу эркинлик тимсоли эканлигини билишади. Бу таслим бўлмаган, курашган, дунёни бирлаштирган ва албатта ғалаба қозонадиган халқнинг тимсоли эканини билишади."
Зеленский парламентга мурожаатида асосан 11 ойлик урушга урғу берди. Бироқ у нутқи давомида кучли ва фаровон давлатни қуриш учун энергия тизимини марказлаштириш ва уни яшил энергияга айлантириш кераклигига ҳам тўхталиб ўтди.
Зеленский, шунингдек Россия босқини бошланганидан бери 1456 нафар украин ҳарбий асирларини озод қилишга эришилганини ҳам маълум қилди.
Зеленский Украинадаги уруш Европа Иттифоқини мустаҳкамлаш ва бирлаштиришга ёрдам берганини ҳам таъкидлади.
Херсондаги туғруқхона ракета ҳужумига учради
Чоршанба куни Херсон туғруқхонасида чақолоқларини бағрига босган оналар даҳшатдан ларзага келди.
Туғруқхона ракета ҳужумига учради. Жабрланганлар бўлмаган, беморларни хавфсиз жойга кўчиришга улгуришган.
Украина президенти маъмурияти раҳбари ўринбосари туғруқхона биноси рус қўшинлари томонидан ракета зарбасига тутилганини айтди.
Портлаш вақтида касалхонада яқиндаги кўзи ёриган беш аёл ва ходимлар бўлган. Аёллардан бири ҳужумдан ярим соат олдин кесерево жарроҳлик йўли билан туққан экан.
Украина ҳарбий расмийлари айтишича, кейинги икки кунда Россия қўшинлари Украина жанубидаги яқинда озод қилинган Херсон шаҳрига миномёт ва артиллерия ҳужумларини кучайтирган ва мамлакатнинг шарқий вилоятларида фронт чизиғи бўйлаб босимни давом эттирган.
Украина Қуролли кучлари Бош штабининг эрталабки ҳисоботига кўра, чоршанба куни тонгда Россия Херсондаги фуқаролик нишонларига ракета тизимларидан 33 та ракета отган.
Озодлик уруш шароитида томонлар бераётган маълумотларни мустақил текшириш имконига эга эмас.
Россиянинг Украинанинг "тинчлик" саммитини "аҳмоқона" деб атади
Россия Ташқи ишлар вазирлиги Украинанинг тинчлик режасини ва БМТ шафелигида февралда ўтказилиши кутилаётган саммит таклифини “аҳмоқона” ва “бўлмағур" деб атади.
“Украина расмийлари яна бир ғайриоддий нарсани ўйлаб топишди. Улар гўёки халқаро ҳуқуқни рўкач қилишмоқда. Аммо бу ерда мақсад битта, бор нарсани тан олмасдан ўзини ҳимоя қилиш. Биз бундай ғалати ғояни Киев режимини тинчликпарвар сифатида кўрсатишга бўлган Вашингтоннинг навбатдаги ҳаракати деб биламиз", деди Россия Ташқи ишлар вазирлиги матбуот котиби Мария Захарова.
Куни кеча Украина ташқи ишлар вазири Дмитрий Кулеба икки ой ичида Украинада БМТ шафелигида “тинчлик” саммити ўтказиш истаги борлигини билдирган.
Россия расмийлари ҳар қандай тинчлик келишувлари фақат аннексия қилинган ҳудудлар суверенитетини Киев тан олганидан кейин бўлишини таъкидлади.