Australia Open мусобоқасида Россия ва Беларус байроқлари тақиқланди
Теннис бўйича Австралия очиқ чемпионатида Украина томонининг шикояти ортидан Россия ва Беларус байроқлари олиб ташланди.
Украинанинг Австралия ва Янги Зеландиядаги элчиси Василий Мирошниченко 16 январь куни ватандоши Катерина Бейндл ўзининг биринчи даврадаги ўйинини ўтказаётган корт ёнида Россия байроғи осилгани акс этган суратни эълон қилган эди.
"Бугун украиналик теннисчи Катерина Бейдлнинг Австралия очиқ чемпионатидаги ўйини чоғида Россия байроғининг омма олдида намойиш этилишини кескин қоралайман”, — деб ёзди у Твиттерда.
17 январь куни Австралия теннис федерацияси бунга жавобан Россия ва Беларус байроқлари олиб ташланганини билдирди.
“Австралия очиқ чемпионатида Россия ва Беларус байроқлари тақиқланади”, — дейилади федерация баёнотида.
Россия ва Беларус теннисчилари ўтган йили Уимблдондан четлаштирилди, аммо Австралия очиқ чемпионатида миллий мансублигисиз индивидуал спортчилар сифатида иштирок этишлари мумкинлиги айтилганди.
"Вагнер"нинг собиқ қўмондонларидан бири Норвегиядан бошпана сўрамоқда
Украинада жанг қилган Россиянинг "Вагнер" ёлланма гуруҳининг собиқ қўмондони, фронтга олиб келинган россиялик маҳбусларнинг ўлдирилиши ва ёмон муомаласига гувоҳ бўлганидан сўнг Норвегияга қочиб кетгани ва ўзига нисбатан ўлим таъдиди сабаб бошпана сўраганини айтмоқда.
Андрей Медведев "Вагнер" гуруҳига ўтган йили июль ойида тўрт ойлик шартнома асосида қўшилган.
"Гулагу. нет" инсон ҳуқуқлари гуруҳи эълон қилган видеода у Норвегия чегарасини кесиб ўтганини айтди.
"Вагнер"га қўшилишдан олдин у қамоқда ўтирган.
"Мен азобда ўлишдан қўрқаман", дейди Медведев "Гулагу. нет" гуруҳи асосчиси Владимир Осечкинга.
Норвегия полициясининг маълум қилишича, пайшанбадан жумага ўтар кечаси Арктикада Россия-Норвегия чегарасини ноқонуний кесиб ўтган ва бошпана сўраган чет эл фуқароси ҳибсга олинган.
Унинг норвегиялик адвокати Медведев ҳозир “Осло ҳудуди”да эканини айтди, бироқ тафсилотларни ошкор қилмади.
“Унинг учун муҳими, иммиграция идоралари унинг мақомини имкон қадар тезроқ аниқлаб беришидир”, деди адвокат Брайнжулф Риснес Рейтер агентлигига.
Медведев Украинада қаерда жанг қилганини айтишдан бош тортган.
"Гулагу.нет" билан суҳбатда Медведев "Вагнер" унинг розилигисиз шартномасини қайта-қайта узайтирган ва у бундан норози бўлганини айтди.
У "Вагнер" томонидан фронтга олиб келинган россиялик маҳбусларнинг ўлдирилиши ва ёмон муомаласига гувоҳ бўлганини ҳам кўшимча қилади.
Медведевнинг айтишича, "Вагнер" 2022 йилнинг иккинчи ярмида кўп сонли маҳбусларни фронтга жўната бошлаганидан кейин йўқотишлар жуда катта бўлган.
Унинг сўзларига кўра, ноябр ойида қувалда билан қатл этилгани кўрсатилган одам унинг бўлинмаси таркибида бўлган.
Арестович истеъфо берди
Украина президенти девонининг штатсиз маслаҳатчиси Алексей Арестович Днепрдаги турар-жой биносига урилган ракета Украина ҳаво ҳужумидан мудофаа кучлари томонидан уриб туширилгани ҳақидаги баёноти хато бўлгани, шу сабаб ўз лавозимидан истеъфога чиқиш тўғрисида ариза ёзганини билдирди.
У ўзининг телеграм-каналида истеъфога чиқиш ҳақидаги аризаси суратини жойлаштирди.
Арестович истеъфога чиқиш хатини ёзишдан олдин Днепрдаги кўп қаватли бино Украина ҳаво ҳужумидан мудофаа тизими томонидан уриб туширилган ракета туфайли қулагани ҳақидаги сўзларини жиддий хато деб атади ва улар учун узр сўради.
“Мен эфирда жиддий хатога йўл қўйдим. Жабрланганлар ва уларнинг яқинлари, аҳолидан чин дилдан узр сўрайман”, — деб ёзди у.
Арестовичнинг Днепрдаги турар-жой биносига келиб тушган ракета Украина ҳаво ҳужумидан мудофаа кучлари томонидан уриб туширилгани ҳақидаги шарҳи Россия пропагандачиларига ҳужумда Украинани айблаш учун қўл келди. Кремль Россиянинг Днепрдаги ракета ҳужумига алоқадорлигини изоҳлар экан, Арестовичнинг сўзларига ишора қилди.
Арестовичнинг шарҳи эълон қилинганидан сўнг, Олий Рада депутатлари Украина Президенти девонидан мустақил маслаҳатчини ишдан бўшатишни талаб қилиб, имзо тўплаш ташаббуси билан чиқдилар.
Улар Арестовичнинг сўзлари расмий позицияси эмасли ва Украина Хавфсизлик хизматидан ушбу воқеани текширишни талаб қилишган.
Днепрдаги ракета ташланган уй вайронасидан 39 киши омон чиқди
Россия қўшинларининг 14 январ оқшом Днепр шаҳридаги 9 қаватли уйга ташлаган ракета зарбасидан ўлганлар сони 35 кишига етди, ўлганлардан иккиси болалар.
Расмийлар, вайроналар остида омон қолган 39 киши қутқарилгани, 75 киши жароҳатлангани, булар орасида ҳам 14 нафари ёш бола эканини маълум қилди.
Днепропетровск вилояти маъмурияти раҳбари Валентин Резниченкога кўра, 14 январь куни вайрон бўлган кўпқаватли тураржойда қутқарув ишлари ҳануз давом этмоқда. “Тунда қутқарувчилар Россия ракетаси яксон қилган кўп қаватли уй вайроналари остидан яна бир неча кишининг мурдасини олиб чиқишди”, деб ёзган Резниченко.
Украина Ҳаво кучлари маълумотига кўра, Днепрдаги уйга қарата Х-22 ракетаси отилган.
Аммо, 16 январь куни Кремль матбуот котиби Дмитрий Песков, бу уй нишонга олингани ҳақида Киев айбловини инкор қилди:
"Россия қуролли кучлари на турар-жой биноларини, на фуқаролик инфратузилма обектларини нишонга олаётгани йўқ. Биз кўздан яширилган ҳарбий нишонларга зарба беряпмиз. Украина расмийлари бу ҳодисага ҳаво ҳужумидан мудофаа тизимининг хатолиги сабаб бўлганини айтди. Буни ўзингиз ҳам эшитдингиз".
Украина президенти Владимир Зеленский Днепрга ҳужумдан кейин россияликларга рус тилида мурожаат қилди:
“Мен террорни кўриб билиб турса-да, лекин бунга қарши лом-лим демаётган, қаршилик билдирмаётган россияликларга мурожаат қилмоқчиман. Сизнинг қўрқоқларча сукунатингиз, бўлаётган воқеаларнинг ўтишини пойлаб туришга уринишингиз оқибатида бу террорчилар куни келиб сизнинг ҳам изингиздан тушади. Ёвузлик қўрқоқликни жуда яхши сезади ва ўзидан қўрқиб, савдолашишга уринаётганларни доим эслаб қолади. У сизнинг изингиздан келганида эса, сизни ҳимоя қиладиган ҳеч ким бўлмайди”.