Франция Украинага 12 та Цезар гаубицаси ҳам юборади
Франция Украинага қўшимча 12 та Цезар гаубицасини жўнатади, дея маълум қилди Франция мудофаа вазири Себастян Лекорну:
«Бизнинг ёрдам жамғармамиз Украинага қўшимча 12 та Цезар гаубицаларини ажратганини эълон қиламан».
Украинага қирувчи самолётлар етказиб бериш ҳақидаги саволга у «ҳеч қандай табулар йўқ», дея жавоб қилди.
Лекорну Франциянинг Украинага қурол етказиб бериш борасидаги позициясини яна бир бор таъкидлаб, ёрдам Франциянинг ўз мудофаа салоҳиятини заифлаштирмаслиги кераклиги ҳамда Украина бу қуроллардан фақат ўзини ҳимоя қилиш учун фойдаланиши лозимлигини таъкидлади.
Ўтган ҳафата Украина мудофаа вазири Олексий Резниковнинг маслаҳатчиси Украина Ғарбдан Ф-16 ёки Франциянинг Мираж 2000 тўртинчи авлод қирувчи самолётларини олмоқчилигини ҳам билдирган эди.
Украина мудофаа вазири Франция шу ойда Киевга АМХ-10 RC зирҳли енгил жанговар танкларини бериш тўғрисида қарор қилганини билдирди.
Украина мудофаа вазири Олексий Резников Парижда Франция мудофаа вазири Себастян Лекорну билан музокарадан сўнг бу ҳақда маълум қилди:
«Франция АМХ-10 RC танкларини етказиб беришини эълон қилди. Бу борада Франция ҳамкор давлатлар орасида етакчилигини кўрсатмоқда. Буни кўриш биз учун муҳим»
Франция мудофаа вазири Себастян Лекорну украиналик учувчиларни қирувчи самолётларни бошқаришга ўргатиш муҳокама қилингани, аммо ҳали якуний қарор қабул қилинмаганини билдирди.
Россия разведка бошлиғи НАТО Москвани стратегик мағлубиятга учрата олмаслигини айтди
Ғарб Украинага миллиардлаб долларлик қурол-яроғ ва ҳарбий техника жўнатганига қарамай, НАТО Москва устидан «стратегик ғалабага» эриша олмайди, дея башорат қилди Сергей Наришкин.
Россиянинг ташқи разведка хизмати раҳбари ва Владимир Путинга яқин бўлган Сергей Наришкин НАТОни Киевни илғор қуроллар билан таъминлаб, кескинликни кучайтиришда айблади.
«НАТО Россияни стратегик мағлуб қиламан деб, можарога катта дов тикмоқда. Лекин бу амалга ошмайди», деди Наришкин.
Наришкин АҚШ ва унинг иттифоқчилари «Россия билан охирги украиналик қолгунигача уруш олиб бормоқчи», дея иддао қилди.
Зеленский: Украина Россиянинг қасос олиш ҳаракатларига қарши чораларни кўрмоқда
Украина президенти Владимир Зеленский Украина барча асосий уруш ўчоқларидаги вазият устида ишлаётгани ҳамда Россиянинг қасос ҳужумларига қарши ҳозирдан жавоб чоралари кўраётганини таъкидлади.
"Одатдагидек, бугун ҳам ҳарбийлар ва разведка бошлиғи билан учрашдим. Биз барча асосий уруш зоналаридаги вазият устида ва келгуси ҳаракатлар борасида пухта ишлаяпмиз. Босқинчилар нимага тайёрланаётгани ва Россиянинг қасос ҳужумларига кўриладиган қарши чораларни ишлаб чиқяпмиз”, деди Зеленский ўзининг тунги видеомурожаатида.
Ҳар икки томонда ҳам йўқотишлар катталигига қарамай, шиддатли жанглар давом этмоқда.
Сўнгги ҳафталарда Россия кичик устунликка эришмоқда. Рус қўшинлари 2022 йил ўрталаридан бери биринчи марта уруш майдонида бир нечта ютуққа эришди.
Ҳарбий экспертларнинг таъкидлашича, Москва Киев Ғарбдан жанговар танклар ва зирҳли техникаларни қабул қилишидан олдин, қарши ҳужумга ўтишга қарор қилган.
АҚШ узоқ масофали ракеталарни ўз ичига олган 2,2 миллиард долларлик ёрдам пакетини тайёрламоқда
АҚШ расмийлари Украина учун 2,2 миллиард долларлик янги ёрдам пакетини тайёрламоқда. Бунга биринчи марта узоқ масофага учадиган ракеталар ва бошқа ўқ-дорилар киради.
Бу ҳақда Рейтерс агентлиги президент Жо Байден маъмуриятининг икки мансабдор шахсига таяниб хабар берди.
Кейинроқ Рейтерс аниқлик киритишича, гап 150 километр масофага учадиган GLSDB (Ground Launched Small Diameter Bomb) ракеталар етказиб бериш ҳақида кетмоқда.
Ҳозирда АҚШ Украинага 70 километр масофага учадиган ракеталарни етказиб бермоқда.
Хавфсизлик бўйича янги ёрдам пакети шу ҳафтанинг бошида эълон қилиниши мумкин. Манбаларнинг қўшимча қилишича, пакетга Патриот ҳаво мудофаа тизимлари учун ёрдамчи ускуналар, танкка қарши Жавелин ракеталари ҳам киритилиши кутилмоқда.