Угледарга ҳужум уринишлари пайти Россия кучлари катта йўқотишга учраган
Россияпараст манбалар Донецк вилоятидаги Угледар яқинида муваффақиятсиз ҳужумга уринишлари пайти рус армияси катта йўқотишларга учраганини тан олди.
Россия ўнлаб танклар ва бронетранспортёрлар йўқотган, ҳалок бўлган ва яраланган аскарлар сони эса ўнлаб, ҳатто юзлаб бўлиши мумкинлиги ҳақида хабар берилган.
Муваффақиятсиз ҳужумлардан бири 6 февраль куни содир бўлди ва рус бўлинмасининг мағлубияти билан якунланди. Бошқа бирида Россия 30 дан ортиқ жиҳозлар, шу жумладан 15 га яқин танкларини йўқотган.
Россия устунларининг мағлубияти билан якунланган шунга ўхшаш ҳужумлар январ ойининг охиридан бери давом этмоқда.
Россиянинг ҳарбийлар тарафдори бўлган телеграм каналларида Угледар остидаги видеолар ҳарбий раҳбариятни фаол танқид қилиш учун сабаб бўлди. Тайёргарликсиз ҳужумда, электрон бостиришда, йўқотишларга бефарқликда айбланмоқда.
Угледарга ҳужум Тинч океан флотига бириктирилган 155 ва 40-алоҳида денгиз бригадалари, шунингдек, махсус кучлар кўмагида Донецк сепаратистларининг собиқ бўлинмалари томонидан амалга оширилмоқда. Бу ҳудудда уларга Украина армиясининг 72-алоҳида механизациялашган бригадаси қаршилик кўрсатди, дея хабар беради украиналик журналистлар.
Россия ракеталари Руминия ва Молдова устидан учиб ўтган
10 февраль куни эрталаб россиялик ҳарбийлар томонидан Украинага қарата учирилган иккита рус ракетаси нейтрал Молдова ва НАТОга аъзо давлат Руминия ҳудуди узра учиб ўтган.
Бу ҳақда Украина Қуролли кучлари қўмондони Валерий Залужний маълум қилди.
Залужнининг Facebook саҳифасида ёзишича, ракеталар Қора денгиздан учирилиб, Молдова, кейин эса Руминия ҳаво ҳудудига кирган, шундан сўнг улар яна уч давлат чегаралари кесиб ўтган нуқтада Украина ҳаво ҳудудига кириб келган.
Украина Ҳарбий-ҳаво кучлари матбуот котиби Юрий Игнат “Украинска правда” газетасига берган изоҳида Украина ҳаво мудофааси ушбу ракеталарни уриб тушириши мумкинлигини, аммо “хорижий давлат аҳолиси учун хавф ва таҳдидларни” англаган холда буни қилмаганини айтди.
Руминия расмийлари ҳозирча маълумотларга муносабат билдирмали. Молдова Мудофаа вазирлиги ракеталар парвозини тасдиқлади. Молдова Ташқи ишлар вазирлиги Россия элчиси чақирилишини эълон қилди.
Россиянинг Украинага олдинги зарбалари пайти ҳам Россия ракеталари Молдова ҳаво ҳудудида бир неча бор қайд этилган.
ХОҚ: Киевнинг Париж ўйинларини бойкот қилиш чақириқлари Олимпиада “принциплари”га зид
Халқаро олимпия қўмитаси (ХОҚ) президенти Томас Бах россиялик спортчиларнинг эҳтимолий иштироки туфайли 2024 йилги Париж ўйинларини бойкот қилиш ҳақидаги украин расмийларининг чақириқлари Олимпиада “принциплари”га зид эканини айтди.
9 февраль куни Украина Миллий Олимпия қўмитасига йўллаган мактубида жаноб Бах Украинанинг 2024 йилги Ёзги Олимпияда ўйинларни бойкот қилиш учун бошқа давлатларга “босим кўрсатаётгани” “ўта афсусланарли” эканини таъкидлаган.
Ўтган ой ХОҚ Россия ва Беларус спортчиларга нейтрал байроқ остида Париж Олимпиадасида қатнашиш учун "йўл очиш" масаласини ўрганаётганини айтди. Украина бунга ғазаб билан жавоб қилди, агар россиялик ва белорсулик спортчиларга ҳатто нейтрал байроқ остида Олимпиада ўйинларида иштирок этишларига рухса берилса ундан чиқиш билан таҳдид қилди. Польша ва Болтиқбўйи давлатлари ҳам Киев расмийлари чақириқларига қўшилди.
Украина шаҳарлари ракета ҳужумлари остида
Украинанинг барча ҳудудларида ҳаво ҳужумидан огоҳлантирув сиреналари янграмоқда, Николаев вилояти ҳарбий раҳбари Виталий Кимнинг айтишича, Россиянинг 20га яқин ракета зарбалари кутилмоқда.
Кечаси Украинанинг Запорожье ва Херсон вилоятлари аллақачон ҳужумга тутилди.
Харьков вилоятида муҳим инфратузилмаларга камида 10 та зарба берилди, деди вилоят ҳарбий бошқармаси раҳбари Олег Синегубов. Вилоятда сув, электр ва иссиқлик таъминотида узилишлар кузатилди.
Бундан ташқари, шаҳар кенгаши котиби Анатолий Куртев Запорожьега 17 та ҳужум уюштирилганини эълон қилди. Унинг таъкидлашича, энергетика инфратузилмаси объектлари оммавий ўққа тутилган.
“Укрэнерго” компанияси мамлакат шарқи, ғарби ва жанубидаги бир қанча энергетика инфратузилмаси объектлари ҳужумга тутилганини эълон қилди.
Россия сўнгги бир неча ой ичида тахминан 10-14 кун оралиғида Украина ҳудудига йирик ракета зарбаларини бериб келмоқда. Бундан энергетика инфратузилмаси объектлари зарар кўради, натижада бутун мамлакат бўйлаб электр таъминоти узилади. Украина энергетика тизимига етказилган зарарга қарамай, зарбалар уни тўлиқ ўчириб қўя олмади.
Россия расмийлари тинч аҳолини нишонга олмаганликларини айтишса-да, турар-жой биноларига ракета ёки ракета қолдиқлари тушиши оқибатида тинч аҳоли орасидан ўлим ҳолатлари кузатилмоқда.