Зеленский: "Россиядан янги терактлар кутиш мумкин"
Украина президенти Владимир Зеленский Россия ҳужумлари натижасида вайрон бўлган энергетика тизимларини тиклаш бўйича саъй-ҳаракатларни олқишлар экан, буни энергетика соҳасида ғалаба сифатида эътироф этишга ҳали эрта эканлигини таъкидлади.
«Ўтган ҳафтада содир бўлган йирик ракета ҳужумларидан сўнг, дам олиш кунларини узилишларсиз ўтказаётганимизнинг ўзи энергетикларимизнинг профессионаллигини кўрсатади», деди Зеленский ўзининг тунги видеомурожаатида:
«Бир нарсани тушунишимиз керак: бу энергетика соҳасида ҳали ҳал қилувчи ғалаба дегани эмас. Россиядан янги терактлар кутиш мумкин. Агар яна ҳужум амалга оширилса ёки истеъмолда ўсиш кузатилса, янги чекловлар бўлиши мумкин».
Зеленский янги ҳафтада ҳам режалаштирилган узилишлар бўлишини маълум қилди.
Россия сўнгги ойларда Украина энергетика тизимини муттасил бомбардимон қилиб келмоқда. Натижада миллионлаб украиналиклар электр, иситиш ва сув таъминотисиз қолди.
Душанба куни эрталаб Россия Купянскни ўққа тутди
“Шаҳарда турар-жой бинолари шикастланди, ёнғинлар юз берди. Хайриятки, ҳеч ким жабр кўрмади”, деб ёзди Харьков вилояти ҳарбий маъмурияти раҳбари Олег Синегубов ўз телеграм-каналида.
У, шунингдек, ўтган суткада Чугуев ва Купянск туманларининг чегара яқинида жойлашган камида 10 қишлоғи ўққа тутилганини билдирган. Энг кўп Купянск, Волчанск ва Двуречнаяга зарар етган, шикастланган биноларнинг аксари хусусий уйлар экани айтилмоқда. Волчанскда хусусий уйга снаряд тегиши натижасида 47 ёшли эркак яраланган.
Украина Қуролли кучлари Бош штабининг кунлик ҳисоботида якшанба куни Россия кучлари Украина ҳудудига иккита ракета зарбаси йўллагани ва 23 марта артиллериядан ўққа тутгани ҳақида сўз боради.
Бош штабга кўра, Россия Купянск, Лиман, Бахмут, Авдеевка шаҳарлари ҳамда Новопавловка қишлоғи атрофида – жами беш йўналишда ҳужум ҳаракатларини давом эттирмоқда.
Хусусан, Бахмут ва Авдеевка яқинида душман қўшимча куч йиғаётгани қайд этилган.
Угледар - тўқнашувлар маркази
Сунъий йўлдош тасвирларида Угледар шаҳри артиллериядан ўққа тутилганини кўриш мумкин.
Шаҳар Украина ва Россия кучлари ўртасида шиддатли тўқнашувлар марказига айланган.
Россия Угледарда кичик ютуқлар учун катта йўқотишлар қилмоқда. Рус қўшинларининг биргина муваффақиятсиз ҳужумида камида 30 та зирҳли техникасидан айрилгани айтилмоқда.
Украина Бош штаби қўмондони украин қўшинлари қамалдаги Бахмут шаҳрини мудофаа қилаётганини, Угледар ва Маринка шаҳарлари учун шиддатли жанглар давом этаётганини билдирди.
Британия разведкаси рус қўшинлари Бахмут шимолида олға силжиётгани бироқ Угледар йўналишида қийинчиликка дуч келаётганини билдирди.
“Колоннани тўзғитиб юбордик, ҳеч ким Угледарга ета олмади”. Украин аскари Россия армияси 30 дан зиёд танкидан айрилгани акс этган видеога изоҳ берди
Нидерландиянинг Oryx тадқиқот лойиҳаси маълумотига кўра, Угледар ва Авдеевкага ҳужумлар чоғида, атига уч кун ичида, яъни 8–10 февраль кунлари Россия армияси 103 та ҳарбий техника, жумладан 36 та танк йўқотган.
Украинанинг шу уч кунда кўрган талафоти эса беш баравар кам бўлиб, иккита танк дохил 20 та техникани ташкил қилади.
Politico нашри украин ҳарбийларига ҳавола берган ҳолда, Угледар учун бўлган жангларда Россия сара бўлинмаларидан бири – 155-денгиз пиёдалари бригадасини бой берган бўлиши мумкинлиги ҳақида ёзди.
Россия Мудофаа вазирлиги Угледарга ҳужум ва кўрилган муҳтамал талафотларга изоҳ берган эмас.
Украина ҚКнинг 68-махсус егерлар бригадаси пресс-офицери Евгений Назаренко “Настояшчее время” ёйинида Россия армиясининг Угледарга ҳужуми ва шаҳарга йўналган Россия ҳарбий техникалари колоннасига нима бўлгани ҳақида сўзлаб берди.
“Видеодаги колоннани абжағини чиқарганлар – Угледарни ҳимоя қилиб турган бизнинг 72-бригада бўлади. Ҳа, Россия армияси 30 дан ортиқ танк билан улар устига юрган эди. Лекин бу фақат битта ҳужум, ўша кунлари Угледарга бўлган ҳужумларнинг биттаси холос. Шунчаки, ҳужум дрондан видеога олингани учун машҳур бўлиб кетди. Улар ростдан ҳам дала бўйлаб ҳужумга ўтишганди. Ҳолбуки, Угледар тевараги бийдек текислик, далаларнинг ўрмон қисмида дарахтлар жуда сийрак. Боз устига, бизнинг марраларимиз юқорида жойлашган, улар эса пастда. Атроф кафтдек кўриниб туради. Хуллас, улар мана шу шароитда куппа-кундузи техникаларда турнақатор бўлиб йўлга чиқишган. Табиийки, аскарларимиз уларни дарров пайқаганлар ва Угледарнинг энг баланд бинолари тепасидан танкка қарши қуроллар билан уриб, бутун колоннани дабдала қилганлар. Ҳеч бири шаҳарга кира олгани йўқ. Ҳатто биров орқага қочиб кетганини ҳам кўрмадик”.