Россия Украина ҳарбий объектларига ҳужум қилмоқда, Украина эса Россия ҳужумларини бартараф этяпти
Кремль ўтган сутка давомида Украина Қуролли Кучлари нишонларига зарар етказганини билдирди. Украина эса Россиянинг бир неча йўналишдаги ҳужумларини қайтарганини даъво қилди.
Россия Мудофаа вазирлиги матбуот котиби Игор Конашенков кундалик брифингда Россия артиллерия бўлинмалари Купянск йўналишидаги Украина нишонларига зарар етказди, дея маълум қилди.
«Красний Лиман» йўналишида Россия қўшинларининг артиллерия ҳужумлари натижасида 80 дан ортиқ украин ҳарбий хизматчиси, учта зирҳли жанговар техника ва Д-30 гаубицаси йўқ қилинди, деди Конашенков.
Конашенков шунингдек, Словянск шаҳри яқинидаги 95- украин ҳаво десант бригадаси иншоотига ҳам зарба берилганини билдирди.
Украина Бош штаби Украина ҳарбий-ҳаво кучлари рус армияси ва техникаларини ўққа тутганини маълум қилди.
Ўтган 24 соат ичида Донетск, Луганск ва Харков вилоятларида рус қўшинларининг ҳужумлари қайтарилди, дея қўшимча қилди Украина Бош штаби.
Зеленский: «Дипломатик марафонимиз давом этади»
Владимир Зеленский Украинадаги урушнинг бир йиллиги арафасида дипломатик учрашувлар давом этишини билдирди:
«Келгуси ҳафтада ҳам дипломатик марафонимиз давом этади. Эртага Рамштейн базасида яна бир учрашув бўлиб ўтади. Бунга тайёргарлик кўряпмиз. Барча музокараларимиз Рамштейндаги ҳамкорларимизнинг мудофаа қарорларида ҳам ўз аксини топишига ҳаракат қиляпдамиз. Икки томонлама музокаралар ва учрашувлар ҳам режалаштирилган. Бу каби фаол дипломатик йиғинларни Украина учун янги нормага айлантирмоқдамиз”.
Украинанинг мудофаа бўйича алоқа гуруҳи бугун НАТО қароргоҳида йиғилиш ўтказади.
Украин ҳарбийлари Полшада Леопард 2 танкларидан фойдаланишни машқ қилмоқда
Украина Қуролли Кучлари ҳарбийлари Полша, Норвегия ва канадалик мутахассислардан немис танкларини бошқариш ва сақлаш кўникмаларини ўрганмоқда.
Полша президенти Анжей Дуда Украина қўшинларининг танклардан фойдаланишни тез ўзлаштираётганини олқишлади:
"Улар бир неча кун олдин фронтда жанг қилган аскарлар. Уларнинг кўзларига қарасангиз даҳшатли воқеаларни бошидан кечирган инсонлани кўрасиз."
ОАВ: сафарбарлик бошланганидан бери мингдан ортиқ россиялик урушда ҳалок бўлган
Россияда “қисман” сафарбарлик эълон қилинганидан бери ўтган тўрт ой давомида мамлакатнинг 1082 нафар фуқароси Украинадаги урушда ҳалок бўлган, дейилади ВВС рус хизмати ҳамда “Медиазона”нинг қўшма суриштирувида.
Журналистлар очиқ манбалардан олинган маълумотларга таяниб, ўлими тасдиқланган россиялик сафарбар қилинган аскарларнинг 40 фоизи 2023 йил 1 январдан 13 февралгача бўлган даврда ҳалок бўлганини аниқлашди.
Суриштирувчилар сафарбар қилинганлар орасида реал талафот бундан анча катта бўлиши мумкинлигини таъкидлашмоқда, чунки октябрь ойидан бошлаб хабарларда Украинада ҳалок бўлган рус аскарларининг мақоми кўрсатилмаяпти.
Суриштирувга кўра, сафарбар қилинганларнинг асосий қисми Украинанинг аниқ артиллерия зарбалари оқибатида ҳалок бўлишмоқда. Хусусан, Янги йил кечаси Донецк вилоятининг Макеевка шаҳридаги билим юрти биноси ракета зарбаларига тутилгани алоҳида тилга олинган.
Журналистлар Макеевкада ўлган 109 кишининг исмларини аниқлашга муваффақ бўлишди, шундан 107 нафари – сафарбар қилинган аскарлар ҳисобланади. Самара вилоятида Макеевкада ўлган аскарларни дафн этиш ҳануз давом этаётганига кўра суриштирувчилар тасдиқланган ўлимлар сони янада ортишини кутишмоқда.
Шунингдек, журналистлар сўнгги уч ой давомида Украинада ҳалок бўлган россиялик аскарларга бағишланган таъзияномалар фуқаро кийимида олинган суратлар билан берилаётганига эътибор қаратишган. Суриштирув олиб борган журналистлар фикрича, бу сафарбар қилинган россияликлар орасида талафот тобора ортаётганига билвосита далил бўлиши мумкин.