Пригожин: «Бахмутдаги жанглар Украина армиясини фалаж қилиш учун ҳам керак»
«Вагнер» хусусий ҳарбий компанияси асосчиси Евгений Пригожин Бахмут учун жанглар Украина армиясини фалаж аҳволга солиш учун ҳам зарурлигини таъкидлади.
«Бахмут нимага керак? Бахмут Украина армиясини бутунлай фалаж қилиш учун керак. Аслида у шундоғам фалаж. Улар Бахмутга ёпишиб олишди. Разведка маълумотларига кўра, у ерда Украинанинг 90 га яқин батальонларида 40-50 минглик қўшини бор. Душман ҳар куни янги аскарларни жўнатяпти », дея билдирди Пригожин.
Пригожин бу ҳақида РИА Новостига берган интервьюсида айтиб ўтди.
Россия қўшинлари ва «Вагнер» ёлланма аскарлари ўтган йилнинг август ойидан бери Бахмутни қўлга олишга ҳаракат қилмоқда.
Бир қатор халқаро оммавий ахборот воситалари ҳамда таҳлилчилар рус ҳарбийлари Бахмутни 24 февралгача, яъни Москва Украинага бостириб кирганининг бир йиллик санасига қадар тўлиқ эгаллашга уринаётганини таъкидламоқда.
Ллойд Остин Украинага урушда «ҳал қилувчи» ёрдам берилишига умид қилмоқда
АҚШ мудофаа вазири Ллойд Остин иттифоқчилар Украинага ҳар қандай ҳужумда «ҳал қилувчи» қўшимча жанговар имкониятларни тақдим этишни мақсад қилганини маълум қилди.
"Мақсадимиз Украинага қўшимча имкониятларни бериш. Бу Украинага нафақат катта муваффақиятга эришишда, балки бўлажак ҳужумларида ҳал қилувчи роль ўйнаши мумкин. Биз Бредли жанговар машиналарини тақдим этиш учун ҳаракат қиляпмиз. Қирувчи самолётлар, Леопард танклари ва бошқа бир қатор техникаларни тақдим этиш учун ҳаракат қилаётганимизни ҳам яхши биласиз. Биз бунга қўшимча тарзда бошқа ҳарбий техникаларни ҳам етказишни муҳокама қиляпмиз. Баҳорда Украина қарши ҳужумларида сезиларли ўзгаришлар бўлади, деб ўйлайман ”, деди у журналистларга.
Остин шунингдек, НАТО тақдим этадиган ҳар бир техника бўйича украин ҳарбийлари ўқитилишини ҳам маълум қилди.
Зеленский: Украина баҳорда ғалаба сари юради
НАТО ҳарбий ёрдамни кучайтиришни ваъда қилганидан сўнг, Владимир Зеленский Украина шу баҳорда ғалабага эришиши кераклигини таъкидлади.
НАТО Бош котиби Йенс Столтенберг альянс аъзо давлатлар артиллерия ўқ дориларини ишлаб чиқаришда давом этаётганини билдирди.
Брюсселдаги НАТО мудофаа вазирлари йиғилишидан сўнг сўзлаган Столтенберг, артиллерия ўқ дориларини ишлаб чиқариш ҳажмини «янада ошириш» га чақирди.
«Биз шу баҳорда Украина ғалаба сари ҳаракатга ўтишини таъминлашимиз керак», деди Зеленский ўзининг тунги видеомурожаатида:
«Душман шу қадар кўп куч йўқотяптики, тез орада бутун Россия бўйлаб биргина денгиз пиёда аскарини топиш ҳам амри маҳол бўлади. Мақсадимиз токи Россияда ҳеч ким Украина ҳудудларини ишғол қилишга ошиқмасин. Ўз еримизни озод қилиш бизнинг олий мақсадимиз».
Россия сўнгги ҳафталарда Украина жануби ва шарқида ҳужумларни кучайтирди. Шунингдек рус қўшинлари янги йирик ҳужумга ўтиши ҳам кутилмоқда.
“Ҳар тарафдан босиб келишяпти”. Оғир жанглар бўлаётган Бахмут шаҳридан репортаж
“Душман жуда қаттиқ ҳужум қиляпти. Ҳар тарафдан босиб келяпти. Йигитлар, сизлар бебаҳосиз, бу ерда сарфлаётган куч-ғайратингизнинг баҳоси йўқ”.
Бу Бахмутда жанг қилаётган украин аскарининг янги мурожаати эди. Шаҳар остонасида жанглар кун сайин авжига чиқмоқда. Россия ҳарбийлари сўнгги кунларда шаҳарга туташ бир неча кичик аҳоли масканларини ишғол этишганини иддао қилишади.
Россиянинг айрим бўлинмалари хусусий уй-жойлар орқали шаҳарга кириб, ўрнашиб олишга уриняпти. Чунончи, мана бу видео Бахмутнинг шимоли-шарқий қисмида олинган.
Украина зирҳли техникаси Россия ҳарбийлари ўт очиш нуқтасига айлантирмоқчи бўлгани айтилаётган уйни ўққа тутмоқда. Икки тараф бир-бирига яқин масофада жанг қилаётгани акс этган видеолар ҳам бор.
Россиянинг Z-параст телеграм-каналлари ва турфа кремлчи ОАВлар февраль ойи бошидаёқ Бахмутни шартли оператив қуршовга олишган эди.
Ростдан ҳам, сўнгги ойларда шаҳар теварагида вазият ўзгарди. Бу харитада ҳам аниқ-тиниқ кўринади.
2023 йилнинг 1 январидан кейинги воқеалар. Соледар, Подгородное, Клешчёвка, Красная гора... бирин-кетин Россия ҳарбийлари назоратига ўтди. Ҳозирда Бахмут атрофида фронт чизиғи ярим халқани эслатади.
Энг муҳим нарсалардан яна бири – Бахмутга элтувчи йўллар. Булар Украина армиясининг таъминот йўлларидир. Улар босиб олинмаган, лекин ўққа тутилмоқда.
Аввалроқ Украина президенти офиси вакили Бахмут ҳимоячиларининг асосий вазифаларидан бири – бу Россия ҳарбийларини ҳолдан тойдириш, уларнинг шахсий таркибига ва техникасига иложи борича кўпроқ талафот етказиш эканини айтган эди.
“Биз маҳкам турибмиз. Кутганингиз бўлмайди, пид****лар... Биз ҳали тирикмиз”, дейди украиналик ҳарбий.
Буюк Британия мудофаа вазирлигининг Украинадаги вазиятга доир янги ҳисоботида айтилишича, Кремль ўтган йили кузда Херсон шаҳрини, Харьков вилоятини ва Донбассдаги бир неча муҳим аҳоли масканларини озод этган Украина армиясининг ютуқларини қадрсизлантиришга интилмоқда.
Россия қўшинлари ҳозирдаёқ аксар йўналишларда ҳужумга ўтишга буйруқ олаётганига Британиялик таҳлилчиларнинг ишончи комил.
Россия мудофаа вазирлигининг янги хабарномасига қараганда, улар бугунги кунда Харьков вилоятининг бир қисмини – Купянск шаҳрига элтувчи йўналишни, шунингдек Запорожье, Херсон, Луганск ва Донецк вилоятларини энг муҳим деб ҳисоблашмоқда.
Янги кенг кўламли ҳужум Россияга муваффақият келтирадими?
Оқ уйнинг Миллий хавфсизлик кенгаши координатори Жон Кирби брифинг чоғида “Путин генералларини пайпоқ алмаштиргандек алмаштирмоқда, лекин бу Россия армияси муаммоларини ҳал эта олмайди”, деб айтди.
Мулозим логистика, зарба нуқталарини келишиш, бўлинмалар уйғун ҳаракатини таъминлаш билан боғлиқ қийинчиликлар ҳануз давом этаётганига қараганда, Россия армияси уруш бошларидаёқ юзага чиққан эски муаммоларини бартараф эта олмаганлигини урғулади.
“Учди. Ҳозир “фурррр” деган овоз чиқади, кейин гумбурлайди... Бум... Яшанглар! Буни тачдаун дейдилар. Менга ёқади!”, дейди видеода рус танкини ёндирган ҳарбий.