Рамзан Қодиров: Бир кун келиб мен ҳам шахсий ҳарбий компаниям бўлишини режалаштирганман
Чеченистон раҳбари, Владимир Путиннинг яқин иттифоқчиси Рамзан Қодиров Евгений Пригожиннинг «Вагнер» ёлланма гуруҳига ўхшаш ўз шахсий ҳарбий компаниясини ташкил қилишни режалаштиргани ҳақида гапирди.
Ғарб таҳлилчилари Вагнер ва шунга ўхшаш ҳарбий компаниялар Россиядаги барқарорликка таҳдид солиши мумкинлигини билдирган.
Қодиров Телеграмъдаги каналида Вагнер Украинада «сезиларли натижалар»га эришгани ва хусусий ҳарбий компаниялар зарурат экани ҳақида ёзди.
«Ишонч билан айтишимиз мумкинки, Вагнер ҳарбий жиҳатдан ўз маҳоратини кўрсатди ва бундай хусусий ҳарбий компанияларга эҳтиёж борми ёки йўқми, деган мунозараларга ўрин қолдирмади», дея ёзган Рамзан Қодиров.
У шунингдек, «Давлат олдидаги хизматим тугагач, Евгений Пригожин билан рақобатлашишни ва хусусий ҳарбий компания тузишни жиддий режалаштирганман. Ўйлайманки, ҳаммаси яхши бўлади», дея таъкидлаган.
Қодиров ва Пригожин Украинадаги кучларини асосан Россия ҳарбий қўмондонлигидан мустақил равишда бошқаради. Улар иккаласи ҳам Путиннинг содиқ иттифоқчилар бўлсада, жамоатчилик олдида ҳарбий раҳбариятни танқид қилиб туради.
Вагнер гуруҳи Россиянинг Украинадаги урушида тобора кўпроқ тилга олинмоқда. Вагнер гуруҳи Бахмут шаҳрига бир неча ойдан бери давом этаётган ҳужумга бошчилик қилмоқда.
АҚШ президенти Жо Байден Киевга келди
Қўшма Штатлар президенти Жо Байден 20 февраль куни Киевга учиб келган. Унинг Украина пойтахтига ташрифи ҳақида олдиндан эълон қилинган эмас.
Байденнинг ўзи Твиттерда Киевга ташрифини мана бундай шарҳлади:
"Россиянинг Украинага шафқатсиз босқинининг бир йиллиги яқинлашмоқда ва мен бугун Президент Зеленский билан учрашиш ҳамда демократия, Украинанинг суверенитети ва ҳудудий яхлитлигига содиқлигимизни тасдиқлаш учун Киевдаман" деб ёзди президент Байден.
“Украина сейчас” телеграм-канали Жо Байденнинг Владимир Зеленский ҳамроҳлигида Украина ҳимоячилари хотираси учун ўрнатилган ёдгорлик мажмуасига боргани акс этган видеони ёйинлади. Видеода ҳаво тревогаси товушларини эшитиш мумкин.
Бу хабар ёйинланганидан кўп ўтмай президент Зеленский Байденнинг Украинага келганини тасдиқлади. “Жозеф Байден, Киевга хуш келибсиз! Сизнинг ташрифингиз барча украиналиклар учун ўта муҳим дастакнинг намойиши бўлди”, деб ёзган Зеленский ўз телеграм-каналида.
Аввалроқ Украина Ташқи ишлар вазирлиги душанба куни Киевга ғарблик “бош” ҳамкорлардан бири келиши кутилаётгани ҳақида маълумот тарқатган эди. Журналистлар ва ижтимоий тармоқ фойдаланувчилари Украина пойтахтида эрталабдан бошлаб кўчалар ёпиб қўйилаётганига эътибор қаратишган.
Ташқи ишлар вазири ўринбосари Андрей Мельник Россия ҳужумининг бир йиллиги арафасида “сюрприз” тайёрланаётгани ҳақида билдирган. “Биз нафақат оғзаки дастак ва бирдамликни ҳис қиламиз, балки бизнинг муҳим ва бош ҳамкорларимиз Киевда бўлиши ҳамда янада каттароқ ёрдам берилишини кўрамиз”, деган Мельник.
Журналистлар ва сиёсий шарҳловчилар дохил қатор фойдаланувчилар Киевга эълон қилинмаган ташриф билан АҚШ президенти Жо Байден келиши мумкинлигини тахмин қилишган. 21 февраль куни унинг Польшага сафари бошланади. Байденнинг Украинага ташриф буюриш режаси борлиги ҳақида Оқ уй эълон қилган эмас.
Россия Украинага яна ракеталар отди: Хмельницкийда икки ярадор, ҳарбий объектга зарба берилган
18 февраль куни эрталаб Россия Украинага яна ракета зарбалари йўллади. Украина ҚК Ҳаво кучлари маълум қилишича, камида тўртта “Калибр” ракетаси учирилган:
“18 февраль куни Россия босқинчи қўшинлари Қора денгиз акваториясидан Украинага қарата тўртта “Калибр” ракетасини учирди. Икки ракета ҳаво ҳужумидан мудофаа тизимлари ёрдамида йўқ қилинди”, дейилади хабарномада. Шунингдек, украин ҳарбийларига кўра, Россия тактик авиацияни ҳам қўллаган.
Украина ҳукумати ва ОАВлари Хмельницкийда портлаш юз бергани ва Николаев вилоятида “ҲҲМ тизимлари ишга тушган”и ҳақида хабар тарқатди. Хмельницкий вилояти ҳарбий маъмурияти раҳбари Сергей Гамалий бутунукраина телемарафони ёйинида икки ракетадан бири ҳарбий объектга зарба берганини, у ерда ёнғин чиққанини ва тезда ўчирилганини тасдиқлади.
“Россияликлар иккита зарба беришди: улардан бири ҳарбий объектга тегди, иккинчиси эса унинг яқинидаги фуқаровий иншоотга”, деди мулозим. Гамалийга кўра, ҳужум натижасида икки киши ярадор бўлган.
Хмельницкий мэри Александр Симчишин шаҳарда уч ўқув юрти ва қарийб 10 та кўпқават турар-жой биноси зарарланганини билдирди.
“Бир ярим мингтача дераза ва балконлар вайрон бўлди, бир қанча техника ва битта хусусий транспорт воситасига шикаст етди. Икки тинч фуқаро жароҳат олган, уларни касалхонага ётқиздик”, деди у.
Николаев вилояти раҳбари Виталий Ким телеграмда ракета парчаси суратини эълон қилиб, бу катта эҳтимол билан, Украина ҲҲМ ракетасига оидлиги ҳақида ёзди.
АҚШ Давлат департаменти Хитойни Россияга қурол етказиб бериш оқибатларидан огоҳлантирди
Хитой Россияга ножанговар ҳарбий ёрдам бермоқда, шунингдек қурол-аслаҳа етказиб бериш имкониятларини ўрганмоқда. Бу ҳақда NBC News телеканали билан суҳбатда АҚШ давлат котиби Энтони Блинкен маълум қилди.
Дипломатга кўра, у Хитой Компартияси МҚнинг ташқи ишлар бўйича комиссияси канцеляриясининг раҳбари Ван Ини Москвага қурол-яроғи етказиб беришнинг Пекин учун жиддий оқибатларидан огоҳлантирган. УларМюнхень хавфсизлик конференциясида учрашганлар.
Блинкен билан Ван И учрашуви ҳақида олдиндан маълумот берилмаган эди.
АҚШ давлат котиби Россия армиясига Хитой қуроллари етказиб берилиши билан боғлиқ хавотирларини CBS билан интервьюсида ҳам сўзлаб берди.
Аввалроқ NBC манбалари Хитой Россияга баҳорги ҳужум учун ҳарбий уст-бош ва зирҳли нимчалар бериши мумкинлигини айтишган, аммо тафсилотларни очиқлашдан бош тортишган эди.
Bloomberg маълумотига кўра, январь ойида АҚШ Хитойнинг айрим давлат ширкатлари Украинага қарши урушда фойдаланиш учун Россияга ноҳарбий ва иқтисодий ёрдам кўрсатаётганига оид далилларни Пекинга тақдим этган.
Агентлик суҳбатдоши эса “Вашингтон назарида Пекин Россияни дастаклашни истайди ва бетараф томон ҳисобланмайди”, деб айтган.
Хитой ҳукумати ушбу маълумотлар юзасидан изоҳ берганича йўқ.