Зеленский: Россия фронт чизиғидаги шаҳарларни қасддан ўққа тутмоқда
Владимир Зеленский Россия фронт чизиғидаги шаҳарларни «қасддан» ўққа тутаётганини таъкидлади:
«Фронтнинг ҳар бир чизиғини назорат остида ушлаб турибмиз. «Хортитса», «Таврия», «Одесса» ва шимолий ҳарбий қисмлардан кун давомида маълумотлар келяпти. Фронт чизиғи билан бир қаторда, у ерга яқин шаҳар ва қишлоқларга ҳам эътибор қаратяпмиз. Россия фронтга яқин ҳудудларни атайлаб ўққа тутмоқда».
Украина ҳарбий қўмондонлиги рус қўшинлари Бахмут йўналишида олдинга силжиётганини хабар қилган эди.
«Вагнер» компанияси асосчиси Евгений Пригожин рус қўшинлари Бахмут учун кечаётган жангларда украин армиясининг қаттиқ қаршилигига дуч келаётгани ҳақида гапирди.
Украин болаларига бағишланган фильм Оскарга номзод бўлди
Укранадаги уруш ҳақидаги ҳужжатли фильм Оскар мукофотига номзод қилиб кўрсатилди.
Даниялик режиссёр Саймон Леренг Велмонт «Парчалардан қурилган уй» фильмида уруш шароитидаги болалар бошпанасини акс эттирган:
«Мен уруш инсонлар ҳаётини қанчалик ўзгартиришини биргина кичик жамият мисолида кўрсатишга ҳаракат қилдим. Умид қиламанки, бу фильм ва Оскар платформаси одамларнинг эътиборини ушбу муаммога қаратишга ёрдам беради»
Даниялик режиссёрнинг 2017 йилда ҳам Украина шарқидаги вазият тасвирланган «Итларнинг узоқдан ҳуриши» номли картинаси бир қанча мукофотларга сазовор бўлган эди.
Оскар мукофотига номзод ҳужжатли фильмлар рўйхатида Даниел Роэрнинг «Навальний» фильми ҳам бор. Путиннинг ашаддий танқидчиларидан бири Алексей Навальний 2021 йил февралидан буён Россия қамоғида қолмоқда.
Оскар ғолиблари номи 12 март куни Лос-Анжелесдаги тақдирлаш маросимида эълон қилинади.
Запорожьега ҳужум: Камида 4 киши ўлди, 8 киши яраланди
2 март куни эрта тонгдан Запорожьедаги кўп қаватли турар-жой биносига Россия ракетаси келиб тушди. Маҳаллий полиция ҳодиса оқибатида камида тўрт киши ҳалок бўлгани ва саккиз киши яраланганини хабар қилди.
“Вайроналар остидан одамлар қичқирганини эшитдик. Буни эшитиш жуда дахшат. Қутқарувчилар келганида одамлар вайроналар остида ётган эди”, деди вайрон бўлган бинода яшовчи Юлия Харитоненко.
Бинонинг вайрон бўлган қисмидан 11 киши қутқариб олинган.
Финляндия Россия билан чегараси бўйлаб тўсиқ қуришни бошлади
Тахминан уч километр узунликдаги панжара қурилиши Финляндиянинг Иматра чегара пунктининг ҳар икки томонида релеф, ўрмонни тозалаш ишлари билан бошланди.
Бу ишлар амалга оширилгач, йўл қурилиши ва панжара ўрнатиш, сўнгра техник кузатув тизимини қуриш ишлари бошланиши мумкин. Пилот ишлари июн ойи охиригача якунланиши кутилмоқда.
Ўтган йилнинг ноябр ойида Финляндия ҳукумати Москванинг феврал ойида Украинага бостириб кириши муносабати билан берган ваъдасини бажариб, мамлакатнинг Россия билан чегараси бўйлаб тўсиқлар қуриш учун 139 миллион евро сарфлашни таклиф қилган эди.
НАТОга аъзо бўлиш учун ариза топшираётган Финляндия Россия билан урушлар тарихига эга, аммо ўрмон билан қопланган чегара ҳали ҳам 1300 км узунлигининг кўп қисми учун белгилар ва пластик чизиқлар билан белгиланган.
Мамлакатнинг чегара қўриқлаш идораси якунда умумий узунликнинг 10-20 фоизини қамраб олувчи 130-260 км узунликдаги тўсиқлар қуришни мақсад қилгани, биринчи навбатда Финляндия жануби-шарқидаги чегара ўтиш пунктлари ва унга туташ ҳудудларга эътибор қаратишини айтди.