Урсула фон дер Ляен Канада парламентидаги чиқишида украин аёлларини олқишлади
Европа Иттифоқи комиссияси президенти Урсула фон дер Ляен Канада парламентида қилган нутқида Россиянинг Украинага тажовузи инсон ва аёллар ҳуқуқларига ҳам қарши уруш эканлигини айтди:
«БМТга кўра, Россия Украинада зўравонлик ва жинсий тажовуздан ўз ҳарбий стратегиясининг бир қисми сифатида фойдаланмоқда. Бу нафақат Украинага қарши уруш, балки инсон ҳуқуқлари ва аёллар ҳуқуқларига қарши уруш ҳамдир».
Россия босқинидан кейин Украина армиясида хизмат қилаётган аёллар сони икки баравар ошди, дея қўшимча қилди у Фон дер Ляен.
Канада бош вазири Урсула фон дер Ляен уруш бошида дунёнинг Россия энергетикасига қарамлиги масаласига ҳам тўхталди.
«Биз ишончли етказиб берувчилардан кўпроқ импорт қилиш билан Россия газидан воз кечдик. Бунда Канаданинг суюлтирилган газ экспортини кўпайтиргани муҳим роль ўйнади», деди у.
Бахмут олов ичида
Украина ҳарбийлари эълон қилган дрон тасвирларида Бахмутда ёнаётган уйлар, вайронаргарчилик кўламини кўриш мумкин.
Рейтерс видеотасвирдаги жойлашув сунъий йўлдош суратлари билан мос эканини тасдиқлади.
Россия қўшинлари сўнгги ҳафталарда Бахмут шаҳрини эгаллаш учун ҳужумларни янада кучайтирди.
Украина кучлари шаҳардан чекинадигандек кўринаётганди.
Бироқ, Владимир Зеленский кеча украин қўшинлари Бахмутдан чекинмаслигини, жанг қилишда давом этишини эълон қилди.
«Мен бош қўмондонга Бахмутдаги йигитларимизга ёрдам беришга топшириқ бердим», деди Зеленский.
Украина бош вазири ўринбосари Ирина Верешчук Бахмутда урушдан олдинги 70 000 аҳолидан ҳозирда 4000 га яқин тинч аҳоли қолгани, улардан 38 нафари болалар эканини маълум қилди.
Россия ва Украина ҳарбий асирларни алмашди
Украина президенти девони раҳбари Андрей Ермак кеча ўзаро ҳарбий асирлар алмашинуви доирасида 130 нафар украиналик ҳарбий озод этилгани ҳақида ёзди.
Унинг қайд этишича, ҳарбий асирлар Мариупол, Соледар ва Бахмут шаҳри учун жангларда асирга тушган аскарлардан иборат.
Андрей Ермакнинг айтишича, озод қлинган ҳарбийлардан 87 нафари Мариупол шаҳри мудофаасида қатнашган.
Ўз навбатида Россия Мудофаа вазирлиги ҳам асирлар алмашинувида 90 нафар рус ҳарбий асирлари озод қилинганини билдирди.
«Мен биринчи навбатда оиламни кўришни хоҳлайман. Ўғилларим ва хотинимни кўришим керак. Улар мендан қанчалик хавотирланганини яхши биламан», деди рус ҳарбий асирларидан бири.
Украина шарқида яшаётган украиналиклар тинчлик қайтишини орзу қилмоқда
Жануби-шарқий фронтдан икки километр узоқликдаги ташландиқ мактаб ертўласида жон сақлаб келаётган одамларнинг фақат биргина орзуси бор: у ҳам бўлса тинчлик.
Донецкнинг Украина назоратидаги Велика Новосилка шаҳри доимий бомбардимонлар остида қолмоқда. Юзга яқин маҳаллий аҳоли иккита ертўлада яшаб келмоқда.
Мактаб ертўласида яшаб келаётган 73 ёшли нафақахўр Мария ҳаммасидан чарчагани, урушдан олдинги ҳаёти қайтиши, яна яқинлари қуршовида бўлишни хоҳлаётганини айтади.
«Мен эркакларимиз, ўғилларимиз ўлишини хоҳламайман... Болалар ва неваралар билан бир дастурхон атрофида тўпланиб, бирга овқатланишни хоҳлайман. Фақат тинчлик бўлишини истайман», дейди қария.
Мактаб ертўласида на сув, на электр бор. Велика Новосилка инфратузилмасининг катта қисми деярли 13 ойлик уруш давомида буткул вайрон бўлган.
«Уруш бошланганидан бери деярли барча бинолар вайрон бўлди. Кўп одамлар шаҳардан кетди, лекин ҳали ҳам бу ерда қолганлар бор», дея таъкидлади 46 ёшли Ирина Бабкина.
Бабкина ертўлада яшашдан чарчаганини айтди. У қолган ҳаётини қўрқувларсиз ўтказишни хоҳлайди.
"Мен тинчлик бўлишини ва уруш тугашини хоҳлайман. Тинч осмон остида яшашни истайман. Кўчага чиқиш жуда қўрқинчли. Тез орада вазият яхшиланишига, албатта Украина учун яхшиланишига умид қиламиз”, деди Ирина.