Пентагон: Эрон баллистик ракетасини сусайтириш учун зарба берилди
АҚШ Марказий қўмондонлиги видеолардаги ҳужумлар амалга оширилган жойларни очиқламади, бироқ «АҚШнинг B-1 бомбардимон самолётлари Эрон ҳудуди ичига чуқур кириб бориб, Эроннинг баллистик ракета имкониятларини сусайтириш мақсадида зарба берди», дея баёнот берди.
Шунингдек, Abraham Lincoln авиаташувчи кемаси бу ҳарбий операцияларни қувватлаётгани айтилди.
Бу ҳақда хабар қилган Reuters агентлиги ҳозирча, видеолар қаерда ва қачон тасвирга олинганини мустақил равишда тасдиқлай олмаганини билдирди.
АҚШ Давлат котиби Марко Рубио ҳозирча АҚШ Эрон ҳудудига қуруқлик қўшинларини киритиш позициясида эмаслиги, бироқ бундай имконият Трамп ихтиёрига боғлиқлигини айтди.
Шунингдек, АҚШ Марказий қўмондонлиги 2 март куни олти америкалик ҳарбий ўлганини маълум қилди.
Қизил Ярим Ой: «Сўнгги 4 кунда 787 киши ҳалок бўлди»
Эрон Қизил Ярим Ой жамияти 3 март куни Исроил ва АҚШ томонидан амалга оширилган ҳужумлар оқибатида ҳалок бўлганлар сони «787 нафарга етгани»ни маълум қилди.
Ислом республикаси ҳукумати назорати остида фаолият юритувчи мазкур ташкилот шунингдек, зарбалар мамлакат бўйлаб 153 та туманда кузатилганини билдирди.
Ислом республикаси расмийларининг айтишича, ҳалок бўлганлар орасида Минаб шаҳридаги қизлар мактабида таҳсил олган «165 нафар» ўқувчи ҳам бор. 3 март куни қурбонларнинг айримлари учун жаноза маросимлари ўтказилди. Эрон давлат ОАВ ушбу мактабда ҳалок бўлганлардан «57 нафарининг исми»ни ўз ичига олган рўйхатни эълон қилди.
Шу билан бирга, Эрон расмийлари бу воқеа учун АҚШ ва Исроилни айблаб, масалани халқаро ҳуқуқий майдонда кўтаришини маълум қилди. АҚШ ва Исроил эса мазкур мактабга зарба берилганидан бехабар эканини билдирган.
"Куба кейинги навбатда"
Сенатор Линдси Грэм "Куба кейинги навбатда" турганини маълум қилди.
"Куба кейинги бўлади. Улар қулайди, кунлари битди", — деди Грэм Fox News телеканали эфирида, АҚШнинг Эрондаги операциясини шарҳлар экан.
The Atlantic нашри Оқ уйдаги номаълум манбага таяниб ёзишича, Дональд Трамп «кейинги нишон сифатида Кубага қарамоқда».
Бир неча кун аввал Трамп «Кубани дўстона тарзда эгаллаш» ғоясига қарши эмаслигини билдирган эди. Доналд Трамп АҚШда ўз ватанига қайтиш орзусида юрган кўплаб кубаликлар борлигини қўшимча қилди.
АҚШ учта ҳарбий учоғини йўқотди
Душанба 2 март куни интернет тармоқларида Қувайтнинг Ал-Жаҳра ҳудудида ҳарбий учоқ осмондан қулаётгани акс этган видеолар тарқалди. Видеода учувчи парашют билан тушаётгани кўринади.
Қувайт Мудофаа вазирлиги ўз ҳудудида бир нечта америкалик ҳарбий учоқ ҳалокатга учраганини тасдиқлади, аммо барча экипаж аъзолари тирик қолгани ва барқарор ҳолатда эканини маълум қилди.
Қувайт ҳарбий учоқлар ўз ҳаводан мудофаа тизими хатоси билан урилганини тасдиқлади.
Давлат ахборот агентлиги орқали эълон қилинган баёнотда вазирлик қутқарув операциясида АҚШ кучлари ҳам иштирок этганини билдирди.
Эрон давлат оммавий ахборот воситалари эса Ислом инқилоби посбонлари корпусига таяниб, Қувайтда ҳалокатга учраган америкалик учоқ Эрон қуролли кучлари томонидан уриб туширилганини хабар қилди.