Жонли Исроил ва Ливан 10 кунлик сулҳга рози бўлди

Бирлашган Миллатлар Ташкилотининг Хавфсизлик Кенгаши Ҳурмуз бўғозида Эрон ҳужумларидан кемаларни ҳимоя қилиш учун “мудофаа кучларидан фойдаланиш”га рухсат берадиган резолюция лойиҳаси бўйича овоз беришни кечиктирди. 3 апрель куни ўтказилиши керак бўлган йиғилиш Қутлуғ Жума байрами муносабати билан кейинга қолдирилди. Янгиланган сана ҳали белгиланмаган.

Якуний лойиҳага кўра, аъзо давлатлар ёки кўпмиллатли денгиз шерикликлари “зарур мудофаа чораларини” қўллаши мумкин бўлади. Чора камида олти ой амал қилади ва унинг фақат мудофаа характерига эга экани таъкидланади.

Резолюцияни Баҳрайн тақдим этган. Унинг БМТдаги элчиси Жамол Алроваиеи минтақадаги вазиятни “иқтисодий терроризм” деб атади. Қўлтиқ ҳамкорлик кенгаши (GCC) ҳам Эрон ҳужумларига қарши денгиз йўлларини ҳимоя қилиш ташаббусини қўллаган.

Резолюцияни АҚШ қўллаб-қувватламоқда, аммо Россия ва Хитой қарши чиқмоқда. Хитой куч ишлатиш вазиятни кескинлаштиришини айтган, Россия эса ҳужжатни “Эронга қарши бир томонлама чора” деб атаган. Бир кун аввал Франция президенти Ҳурмуз бўғозини куч билан очиш амалиёти реал эмаслигини билдириб, Эрон билан ҳамкорликка чақирган.

Айни дамда, Bloomberg нашри манбаларига таяниб хабар беришича, АҚШнинг иттифоқчилари Ҳурмуз бўғозида кема қатновини Вашингтон иштирокисиз тиклаш сценарийларини муҳокама қила бошлаган.

Ироннинг шимолидаги B1 кўпригига АҚШ ва Исроил кучлари ҳаводан зарба берди. Бу ҳақда Ислом инқилоби қўриқчилари корпусига яқин Fars агентлиги маълум қилди.

Ижтимоий тармоқларда тарқалган суратларда Теҳронни Алборз вилоятидаги Караж ҳудуди билан боғлайдиган кўприкнинг жиддий зарарлангани кўринади.

Маълумотларга кўра, зарба икки марта берилган, иккинчи ҳужум биринчисидан тахминан бир соат ўтгач амалга оширилган.

Fars агентлиги дастлабки зарбада Алборз вилоятида икки киши ҳалок бўлиб, бир нечта одам яраланганини маълум қилган. Кейинчалик қурбонлар сони саккиз нафарга етгани, 95 киши яралангани ҳақида ахборот тарқатилди. Аммо бу рақамларни мустақил равишда тасдиқлашнинг иложи йўқ. Эрон ахборот воситаларида иқтибос келтирилган расмийлар кўприк ҳали қурилиш жараёнида бўлганини ва унинг ҳарбий таъминот йўли сифатида ишлатилмаганини айтган.

АҚШ президенти Доналд Трамп ҳам TruthSocial ижтимоий тармоғида кўприк қулагани ҳақида ёзди. Аввалроқ у Теҳронни “кеч бўлиб қолмасидан олдин келишувга келиши” зарурлигини айтган. Шунингдек Эроннинг электр станциялари ва кўприкларига яна зарбалар берилишини таъкидлаган.

АҚШ ва Исроилнинг Иронга қарши ҳужуми 28 февралда бошланган.

Украина ҳукумати сўнгги бир сутка ичида фронтда 146та тўқнашув қайд этилганини билдирди. Россия кучаларининг энг кўп ҳужумлари Покровск йўналишида бўлгани ҳақида 2 апрелда Украина Қуролли Кучлари Бош штаби маълум қилди.

Шунингдек, Россия ҳарбийлари Украинага 172 та зарба берувчи дрон билан ҳужум уюштирган, уларнинг тахминан 120 таси “Шахед” дронлари эканини Украина Ҳаво кучлари билдирди.

Айни дамда Россия Мудофаа вазирлиги эса 2 апрелга ўтар кечаси 147 та украин дрони уриб туширилгани хақида хабар берди.

Украина ҳукумати ва халқаро ташкилотлар Россиянинг зарбаларини ҳарбий жиноят деб баҳолаб, атайин амалга оширилаётганини таъкидлайди.

Аҳолининг электр, иссиқлик, сув, алоқа ва тиббий ёрдамдан маҳрум этилишига қаратилган ҳужумлар геноцид аломатлари сифатида кўрилади.

Россия раҳбарияти Украинада фуқаролик инфратузилмага қасддан зарба берилаётганини, беморхона, мактаб, боғча, энергетика ва сув иншоотлари вайрон қилинаётганини инкор этиб, ҳарбий нуқталар нишонга олинишини таъкидлаб келади.

Украина томони эса Россия ҳудудига учирилган дронлар ўзини ҳимоя қилиш ва жавоб зарбалари эканини айтади.

АҚШ ҳукумати Ироқдаги ўз фуқароларига огоҳлантириш берди. Баёнотга кўра, “Эронга мойил бўлган ироқлик террорчи гуруҳлар келаси 24–48 соат ичида Боғдод марказида ҳужумлар уюштириши мумкин”.

2 апрель куни X ижтимоий тармоғида эълон қилинган хавфсизлик огоҳлантирувида шундай дейилади: "Улар АҚШ фуқаролари, бизнеслари, университетлари, дипломатик муассасалари, энергетика инфратузилмаси, меҳмонхоналар, аэропортлар ва Америка билан боғлиқ деб ҳисобланган бошқа жойларни, шунингдек ироқлик муассасалар ва фуқаролик объектларини нишонга олиши мумкин”.

Огоҳлантирувда Иордания, Қувайт, Саудия Арабистони ва Туркияга чиқиш йўллари очиқ экани, аммо “узоқ навбатлар ва кечикишларга” тайёр бўлиш кераклиги айтилди.