Жонли Эрон: Музокаралар ҳуқуқ ва манфаатлар тан олинишига боғлиқ

Украинанинг Донецк вилоятидаги Краматорск шаҳрига Россия авиацияси томонидан 3 апрелда берилган зарбалар натижасида олти киши ҳалок бўлди.

Кундуз куни ташланган бомба икки кишини ўлдирган. Кечқурунги ҳужумда яна тўрт киши ҳалок бўлган. Уларнинг бири 16 яшар ўсмир эканини Донецк вилояти ҳарбий маъмурияти раҳбари Вадим Филашкин маълум қилди. Унинг айтишича, шаҳарга тўртта бошқариладиган авиабомба ташланган.

Краматорск - Донецк вилоятида Украина назоратида қолган энг йирик аҳоли пункти ҳисобланади. Фронт чизиғидан тахминан 10–15 километр узоқликда жойлашган бу шаҳар мунтазам равишда ўққа тутилади ва авиаҳужумларга учрайди.

Россия томони бу айбловларга ҳозирча муносабат билдирмади. Одатда Москва Украинада фуқаролик инфратузилмасига қасддан зарба берилаётганини инкор этиб, ҳарбий объектлар нишонга олинишини таъкидлаб келади.

Уруш шароитида хабарларни мустақил текшириш имконияти мавжуд эмас.

Татаристондаги “Нижнекамскнефтехим” заводидаги портлашда ўлганлар сони жума кунги маълумотларга кўра, етти кишига етди. Яна беш киши бедарак йўқолган.

“Сибур Нижнекамск – Нижнекамскнефтехим” компанияси кимё заводи ҳудудида 31 мартда куни юз берган портлашдан кейин 24 киши касалхонага тушганини билдирди. Улар Нижнекамск, Қозон ва Москва шифохоналарига ётқизилган.

Аввалроқ 3 киши ҳалок бўлгани ва 70 дан ортиқ одам жароҳат олгани ҳақида хабар берилган эди. 1 апрель куни Нижнекамскда уч кунлик мотам эълон қилинган.

Расмий маълумотларга кўра, ҳодисага “жихозлардаги носозлик” сабаб бўлган.

“Нижнекамскнефтехим” ПАО СИБУР компаниясига тегишли. Ишхона сайтидаги маълумотга қараганда, у дунёдаги энг йирик синтетик каучук ишлаб чиқарувчилардан бири ҳисобланади. Шунингдек, у Россия саноат вазирлиги ҳарбий-саноат корхоналари рўйхатига киритилган.

Дунёнинг кўплаб мамлакатларида, жумладан Украинада ҳам Пасха диний байрами нишонланаётган айни дамда рус армиясининг ҳужумлари тўхтамади.

3 апрел куни Херсон вилоятида микроавтобусга қилинган ҳужумда етти киши яраланган. Вилоят прокуратураси маълумотига кўра, дрон Днепровский туманидаги микроавтобусга портловчи модда ташлаган.

Шунингдек, Пасха арафасидаги Қутлуғ жума кечаси Россия қўшинлари Харков, Киев вилояти ва бошқа ҳудудларни ҳам ҳужумга тутди. Натижада уйларга, боғларга ва савдо марказларига зарар етгани хабар қилинмоқда. Суми вилоятидаги Шостка шаҳрига ташланган тўртта авиабомба оқибатида 59 ёшли аёл ҳалок бўлгани, унинг қариндошлари яралангани айтилмоқда.

Россия томони бу айбловларга ҳозирча муносабат билдирмади. Одатда Москва Украинада фуқаролик инфратузилмасига қасддан зарба берилаётганини инкор этиб, ҳарбий объектлар нишонга олинишини таъкидлаб келади.

3 апрель куни эрталаб Қувайтдаги йирик нефть қайта ишлаш заводига дрон ҳужуми амалга оширилди. Бу ҳақда давлатга қарашли Kuwait Petroleum Company (KPC) хабар берди.

Баёнотга кўра, Мина ал-Аҳмадий нефть заводи “қасддан қилинган дрон ҳужуми”га учраган ва натижада бир нечта ишлаб чиқариш бўлимларида ёнғин чиққан.

Компания маълумотича, фавқулодда хизматлар ёнғинларни назоратга олиш устида ишламоқда ва ҳозирча жабрланганлар ҳақида маълумот йўқ.

Мина ал-Аҳмадий Кувайт ва бутун Қўлтиқ минтақасидаги энг муҳим нефть заводларидан бири ҳисобланади.

АҚШ ва Исроилнинг 28 февралдан бери Эронга бериб келаётган зарбаларидан сўнг, бир ойдан ортиқ вақтдирки, Эрон қўшни Қўлтиқ давлатларига дрон ва ракета ҳужумлари уюштириб, уларнинг энергетика объектларини нишонга олмоқда.