Трамп: Эрондан уран оламиз
АҚШ президенти Дональд Трамп Теҳрон билан келишув доирасида Эрон ер ости объектларини ишлатмасликка ваъда бериши мумкинлигини айтди, шу билан бирга Эрон «узоқ муддат яхши ният билан ҳаракат қилади», деб қўшимча қилди.
PBS News хабарига кўра, эҳтимолий келишув Эроннинг юқори даражада бойитилган уранини АҚШга экспорт қилишини ҳам ўз ичига олиши мумкин.
Трамп АҚШ Эрондан бойитилган уранни олишини таъкидлаб, “Биз уни оламиз», — деди Оқ уйдаги тадбирдан чиқар экан мухбир саволига жавоб бериб.
Трампнинг Эронга қарши ҳарбий зарбалар бошлашдаги асосий мақсадларидан бири Теҳроннинг ядро қуроли яратишига йўл қўймаслик экани айтилади.
Айни пайтда Эрон АҚШ билан кескинлик давом этаётган бир пайтда Ҳормуз бўғози орқали кемаларнинг хавфсиз ва барқарор ўтиши учун янги чоралар жорий этилганини маълум қилди.
6 май куни Эрон ОАВлари хабар беришича, Эрон Ислом инқилоби гвардияси Денгиз кучлари «таҳдидлар бартараф этилгани» ва янги тартиблар жорий этилгани шароитида бўғоз орқали хавфсиз ва барқарор транзит таъминланиши мумкинлигини маълум қилган.
2025 йил 28 феврал куни АҚШ ва Исроил Теҳрон ва Эроннинг бошқа шаҳарларига қўшма зарбалар бериб, олий даражадаги эронлик расмийлар ва фуқароларни, жумладан ўша пайтдаги Олий раҳбар Али Хоманаийни ўлдирган. Эрон жавобан Исроил ва АҚШ манфаатларига қарши минтақада ракета ва дрон зарбалари берди ҳамда Ҳормуз бўғози устидан назоратни кучайтирди.
8 апрел куни оташкесим кучга кирди. 11–12 апрел кунлари Исломободда ўтган Эрон ва АҚШ делегациялари музокаралари келишувсиз якунланди. Музокаралар барбод бўлгач, АҚШ Ҳормуз бўғозига блокада жорий қилди.
Россия Киевдан дипломатларни эвакуация қилишга чақирди
Россия Ташқи ишлар вазирлиги 6 май агар Украина Россиянинг 9 май — Ғалаба куни муносабати билан ўтказиладиган тадбирларини издан чиқаришга уринса, Москва томонидан оммавий зарба берилиши эҳтимоли туфайли дипломатик миссияларга Киевдан ходимларни зудлик билан эвакуация қилишни тавсия этган.
«Қуйидаги мазмундаги нота Ташқи ишлар вазирлигида аккредитациядан ўтган барча дипломатик ваколатхоналар ва халқаро ташкилотлар намояндахоналарига юборилди. Иқтибос келтираман: “2026 йил 4 май куни Россия Мудофаа вазирлиги Киев ҳокимиятининг барча россияликлар учун муқаддас сана — Улуғ Ватан урушидаги Ғалаба кунида Москвага зарба бериш таҳдидлари муносабати билан расмий баёнот берди. Россия Ташқи ишлар вазирлиги сизнинг мамлакатингиз ҳокимиятини, ташкилотингиз раҳбариятини ушбу баёнотга ўта жиддий муносабатда бўлишга ва Киев режими жиноий террористик режаларини амалга оширишга уринган тақдирда Россия Қуролли кучларининг Киевга, жумладан қарор қабул қилиш марказларига қарши жавоб зарбаси муқаррарлиги сабабли, Киев шаҳридан дипломатик ва бошқа ваколатхоналар ходимлари ҳамда фуқароларни олдиндан эвакуация қилишни таъминлашга қатъий чақириб қолади”», - деди Россия Ташқи ишлар вазирлиги расмий вакили Мария Захарова.
Москва ҳар йили ўтказиладиган ҳарбий параднинг қисқартирилган варианти олдидан шаҳарда хавфсизлик чораларини кучайтирди. Бунга Украина ҳужумлари таҳдиди ортиши сабаб қилиб кўрсатилди.
Зеленский Украина разведкаси маълумотларига таяниб, Россия Москва атрофида ҳаво ҳужумидан мудофаа тизимларини жамлаётганини айтди. Унинг фикрича, бу ҳолат Украина учун бошқа ҳудудларда узоқ масофали ҳужумлар уюштириш бўйича «қўшимча имкониятлар» яратади.
4 май куни Россия Мудофаа вазирлиги Украина Ғалаба куни тадбирлари вақтида ҳужум қилса, Киевга қарши «оммавий ракета зарбаси» билан жавоб қайтарилишини огоҳлантирган эди.
ЕИ Россияга яна санкциялар жорий этди
Европа Иттифоқи Россиядаги 16 нафар шахс ва 7 та ташкилотга Украина болаларини тизимли равишда ноқонуний депортация қилгани учун санкциялар жорий этди.
Бу ҳақда Европа Иттифоқи Кенгаши маълум қилди.
ЕИ Кенгаши маълумотига кўра, уруш бошланганидан бери Россия тахминан 20 500 нафар украиналик болани депортация қилган ва мажбурий кўчирган.
Баёнотда таъкидланишича, бундай ҳаракатлар халқаро ҳуқуқни қўпол бузиш ҳисобланади, болаларнинг асосий ҳуқуқларига зиён етказади ҳамда Украина миллий ўзлигини йўқ қилиш ва келажак авлодларни заифлаштиришга қаратилган.
Санкция рўйхатига Россия Таълим вазирлиги билан боғлиқ федерал муассасалар ҳам киритилган.
Шунингдек, рўйхатга Россия назорати остидаги ҳудудлардаги расмийлар ва сиёсатчилар, ёшлар лагерлари раҳбарлари ва ҳарбий-ватанпарварлик ташкилот раҳбарлари ҳам киритилган.
Рўйхатга киритилган шахсларнинг активларини музлатиш чоралари ҳам кўрилади. ЕИ фуқаролари ва компанияларига уларга маблағ ёки иқтисодий ресурслар тақдим этиш тақиқланади, шунингдек, уларга Европа Иттифоқи ҳудудига кириш тақиқланади.
Зеленский: Россия урушни тўхтатиш ниятида эмас
Украина президенти Владимир Зеленский Россия урушни тўхтатиш ниятида эмаслигини айтди ва Киев янги ҳужумларга тайёрланаётганини билдирди.
- Бугун фронт чизиғида тинчлик бўлмади. Жанг ҳаракатлари давом этди. Биз буларнинг барчасини ҳужжатлаштирдик. Шунингдек, Россия бу урушни якунлаш ниятида эмаслигини кўряпмиз. Афсуски, биз янги ҳужумларга тайёргарлик кўряпмиз. Аммо тинчлик бўлиши шарт. Биз айнан шу мақсад йўлида ишлаяпмиз. Украина мудофааси, унинг мустақиллиги ва халқимизнинг хавфсизлиги — энг муҳим масалалар. Бугун Миллий хавфсизлик ва мудофаа кенгаши котиби Рустам Умеров АҚШдаги учрашувлар натижалари ҳақида ахборот берди. Америка компаниялари билан сиёсий ва технологик даражада учрашувлар бўлиб ўтди. АҚШ дипломатик жараёнда қолмоқда. Албатта, ҳозир Эрондаги уруш АҚШ ва Америка президенти эътиборини кўпроқ жалб қилмоқда. Лекин Америка халқи томонидан Европа минтақасидаги бу урушни тугатиш учун ҳам устуворлик ва қўллаб-қувватлаш мавжуд, деди Украина президенти Зеленский.
Зеленский, шунингдек, Германия мудофаа вазири Борис Писториус билан қурол-яроқларни биргаликда ишлаб чиқариш имкониятларини муҳокама қилганини айтди.
Кремль матбуот котиби Дмитрий Песковнинг маълум қилишича, тинчлик жараёнидаги сўнгги ўзгаришлар Украинадаги уруш якунланиш арафасида эканини кўрсатмоқда. Бу баёнот президент Владимир Путиннинг можаро “охирига етмоқда” деган фикрига изоҳ сифатида айтилди.
- Президент Россия алоқалар учун очиқлигини сақлаб қолишини айтди. У уч томонлама форматда муайян ишлар амалга оширилганини ва АҚШнинг воситачилик саъй-ҳаракатлари давом этишини қўллаб-қувватлашимизни таъкидлади. Албатта, тинчлик жараёнида қўйилган асослар ҳақиқатан ҳам якун яқинлашаётганини айтиш имконини беради. Аммо шу билан бирга, ҳозирча аниқ тафсилотлар ҳақида гапириш қийин. Биласиз, гуманитар сулҳ якунланди. Махсус ҳарбий операция давом этмоқда ва Киев режими, Зеленский масъулиятни ўз зиммасига олиб, зарур қарорларни қабул қилган заҳотиёқ у исталган пайтда тўхтатилиши мумкин. Қайси қарорлар қабул қилиниши кераклиги Киевда яхши маълум, деди Дмитрий Песков.
Кремль матбуот котиби Дмитрий Песков Россия АҚШнинг воситачилик саъй-ҳаракатларини олқишлашини билдирди ва Москва позициясини яна бир бор такрорлади: агар Украина ва президент Владимир Зеленский зарур қарорни қабул қилса, можарони исталган пайтда тўхтатиш мумкин.