Fransiyada aktyor Alen Delon 88 yoshida vafot etdi. Bu haqda AFPga tayangan holda Le Monde nashri xabar bermoqda. Agentlik Delonning uch farzandi bayonotini e’lon qilgan. Bayonotda ular otalarining o‘limi sababini ochiqlamaganlar.
“Alen-Fabyen, Anushka, Entoni, shuningdek [uning kuchugi] Lubo o‘z otalarining o‘limi haqidagi xabardan cheksiz qayg‘uga cho‘mdilar. U Dushidagi o‘z uyida, uch farzandi va oilasi qurshovida tinchgina jon berdi. […] Delonlar oilasi ushbu alamli motam onlarida ularning xususiy hayotini hurmat qilishni so‘raydi”, deyiladi press-relizda.
Delon so‘nggi paytlarda jiddiy xasta bo‘lib, yakka-yolg‘iz yashar va oilasi bilan aloqalari uzilganidan iztirob chekardi. Uning boshqa-boshqa nikohdan tug‘ilgan bolalari bir-birlarini otalarining sog‘lig‘iga doir bo‘hton va g‘iybat gaplarni tarqatishda ayblashar edi.
Aktyor 2019-yilda insult bo‘lgan, qolaversa u saraton va Alsgeymer xastaliklariga ham chalingan edi.
Alen Delon 1935-yilda Parij yaqinida tug‘ilgan. Ota-onasi ajrashganidan so‘ng o‘gay ota qo‘lida voyaga yetgan.
Bo‘lajak aktyor maktabda yolchitib o‘qimagan, keyinchalik armiyaga xizmatga kirgan. U Hindixitoy urushida desantchi sifatida ishtirok etib, ko‘p vaqtini gauptvaxtada (harbiy qamoqda) o‘tkazgan va keyinroq jip o‘g‘irlagani uchun tribunalga tortilgan.
Fransiyaga qaytganidan so‘ng Delon ofitsiant bo‘lib ishlagan va mayda jinoyatchilarga qo‘shilgan.
Delon kinoga 50-yillarning ikkinchi yarmida tasodifan kirib keladi. Unga yaqinda vafot etgan Jeyms Din o‘rnini egallashga urinib ko‘rish uchun Hollivudga borishni tavsiya qiladilar, ammo rejissyor Iv Allegre uni Fransiyada qolishga ko‘ndiradi.
Delon 1957-yilda uning “Ayol aralashganda” nomli filmida ilk rolini o‘ynaydi.
Shu bilan Delonning ishlari yurishib ketadi, 1962-yilda u Mikelanjelo Antonioni va Lukino Viskonti kabi mashhur rejissyorlarning filmlarida suratga tushadi, yana 3 yildan keyin esa Hollivudda debyut qiladi. Rasmiy aktyorlik ma’lumoti bo‘lmasa-da, u murakkab dramatik rollarni mahorat bilan ijro etardi.
Delon teatrda ham o‘ynagan, ammo san’atning bu turida omad unga kulib boqmagan. 1961-yilda u qatnashgan “Viskonti” spektakli muvaffaqiyatsiz chiqqach 1968-yildagina sahnaga qaytgan, shundan so‘ng yana 28 yil teatrda o‘ynamagan.
Alen Delon hayoti davomida uchta film suratga olgan, 30 dan ziyod filmga prodyuserlik qilgan va yana 10 ta film ssenariysini yozgan.
Delonning to‘ng‘ich o‘g‘li Entoni 1964-yilda tug‘ilgan, uning onasi aktrisa Natali Bartelemi.
Aktyorning model Rozali van Bremen bilan ishqiy munosabatlaridan esa 1990 va 1994-yillarda Anushka va Alen-Fabyen dunyoga kelgan.
Delon xonanda Nikodan ko‘rgan farzandini tan olmagan, uni aktyorning o‘gay bobosi va buvisi tarbiya qilganlar va o‘z familiyalarini berganlar.