Линклар

Шошилинч хабар
19 март 2024, Тошкент вақти: 14:43

Ота 15 яшар қизини зўрлаган шахс очиқда юрганидан шикоят қилмоқда


Балоғат ёшига етмаган қизларнинг зўрлангани тўғрисида Озодлик олдин ҳам бир неча материал эълон қилган эди.
Балоғат ёшига етмаган қизларнинг зўрлангани тўғрисида Озодлик олдин ҳам бир неча материал эълон қилган эди.

Қашқадарё вилоят, Ғузор туманида яшайдиган 8-синф ўқувчиси 3 май куни ўғил туғди. Қизнинг иддао қилишича, чақалоқ уни зўрлаган 53 яшар кўзи ожиз поччасидан бўлган.

Қиз отасининг айтишича, гарчи туман ИИБга бу ҳақда шикоят қилинган бўлсада, қизини зўрлаган шахс очиқда юрибди ва унга нисбатан қамоққа олиш чораси кўрилмаган.

Ғузор тумани ИИБ терговчиси бу иш юзасидан суриштирув олиб борилаётганини айтди.

Ғузорлик 15 яшар 8-синф ўқувчисининг(қиз ва унинг яқинларининг исмлари Озодликка маълум – таҳр.) иддао қилишича, уни ўтган йилнинг август ойида аммасининг 53 яшар эри зўрлаган:

Бақирсам ҳам тўхтамади, у катта одам, жуда кучли эди, тагига босиб олди, қимирлай олмай қолдим


“Кўзи яхши кўрмайдиган катта киши эди. Уйимизга роса кўп келарди. Ўша куни отам сариқ касал бўлиб шифохонада ётган, онам уни кўргани кетган эди. Опам ва укаларим далада эди. Поччам келиб одатдагидек уйга кириб ўтирди. Кейин мени олдига чақириб, қўлимдан ушлади ва мажбурлаб ўша ишини қилди. Бақирсам ҳам тўхтамади, у катта одам, жуда кучли эди, тагига босиб олди, қимирлай олмай қолдим”.

Қизнинг айтишича, поччаси ишини қилгач, бировга айтсанг ўлдираман деб қўрқитгани учун у қўрқиб, бу ҳақда ҳеч кимга айтмаган:

“Орадан бир неча кун ўтиб ҳеч ким йўқ пайтда келди-да, яна зўрлади. Шу билан бошқа келмади. Апрель ойида духтурга олиб боришганда ҳомиладорлигимни билдим”.

Ўқувчи қиз ўғил фарзанд кўрган, лекин уни олишдан воз кечиб, тилхат ёзиб берган.

Қизнинг отаси сўзларига кўра, поччасини ўз оиласининг яқини сифатида кўргани учун ҳам, ҳеч қачон унинг бундай қабиҳликка боришини хаёлига ҳам келтирмаган:

Қизим бақирган, дод деган. Лекин ҳамсояларимиз узоқроқда яшайди, ҳеч ким эшитмаган.


“У доим уйимизга келиб кетарди, кунига ўн мартадан ҳам келарди. Туғишган опамнинг эри, шунинг учун ҳурмат қилардим. Кўзи ғира-шира кўради, ногиронлиги бор. ўша куни қизим бақирган, дод деган. Лекин ҳамсояларимиз узоқроқда яшайди, ҳеч ким эшитмаган. Хуллас, қорни катта бўлганини ўзимиз сезиб, 16 апрель куни дўхтирга олиб бориб текширтирсак, шунақа бўлиб чиқди. Участковойларга айтдим, ўзим эса 4 май куни, қизим туққанидан кейин ариза ёзиб бердим.

Отанинг айтишича, бу воқеа ошкор бўлганидан сўнг аҳоли поччасини маҳалладан бадарға қилган:

Опамдан сўрасам, бўлган иш бўлди, аризангни қайтариб ол, дейди.


“Шу кетганича йўқ. Қариндошларининг уйида яшаб юрган эмиш. Очиқда бемалол юрибди экан. Опамдан сўрасам, бўлган иш бўлди, аризангни қайтариб ол, дейди. Кеча хотинимга терговчи уни қамай олмаймиз, у ногирон деган экан. Очиқда бемалол юрибди. Мен терговчидан сўрасам ҳам, ҳеч бир тайинли жавоб айтмайди. Бундай одамлар жамият учун катта хавф, агар очиқда юрса, яна бошқа ёш қизларни зўрлаб қўймайди деб, ким кафолат бера олади?”

Отанинг айтишича, қизини зўрлаганликда гумонланган шахсга нисбатан Ўзбекистон Жиноят кодексининг 128 моддаси ("16 ёшга тўлмаган шахс билан жинсий алоқа қилиш") биринчи қисми бўйича жиноят иши қўзғатилган:

Бу моддага кўра, “шахснинг ўн олти ёшга тўлмаганлиги айбдорга аён бўлган ҳолда у билан жинсий алоқа қилиш ёки жинсий эҳтиёжни ғайритабиий усулда қондириш - икки йилгача ахлоқ тузатиш ишлари ёки олти ойгача қамоқ ёхуд уч йилгача озодликдан маҳрум қилиш билан жазоланади".

Ғузор тумани ИИБ терговчиси Мансур Саломов бу воқеа юзасидан суриштирув олиб борилаётганини Озодликка айтди:

“Ҳозирча бу ҳақда сизга маълумот беролмайман, раҳбариятдан рухсат олиб икки-уч кун ичида сизга айтишим мумкин”.

Қиз ўқиётган мактаб директори унинг аълочи қизлардан бири эканлигини айтди:

“Бу иш ёзги каникул пайтида бўлган. Биз ҳам билмаганмиз. Лекин бу қизимиз фақат 4-5 га ўқийдиган аълочи қизларимиздан бири”.

Қашқадарё вилоятида балоғат ёшига етмаган қизларга нисбатан жинсий зўравонлик билан боғлиқ бошқа икки ҳолат ҳақида Озодлик илгари хабар берган эди.

Жумладан ўтган йилнинг сентябрь ойида Қашқадарё вилоят, Косон туманида яшайдиган, 21 йил ўқитувчи бўлиб ишлаган 40 яшар аёл 14 яшар қизини зўрлаган шахс жавобгарликка тортилмагани учун бўйнига арқон солиб, жонига қасд қилган эди.

Жорий йилнинг январь ойида эса Косон туманидаги умумтаълим ўрта мактабларидан бирининг 9- синфида ўқийдиган 15 яшар қиз 9 январга ўтар кечаси яшириб юрган олти ойлик ҳомиласидан ажраган эди.

XS
SM
MD
LG