Сурхондарё вилоятининг Сариосиё туманида ери ноқонуний олиб қўйилгани ҳақида ижтимоий тармоқлар орқали гапирган фермерни вилоят телеканали фирибгарга чиқарди.
25 апрель куни Сурхондарё вилояти телеканалида намойиш этилган “Фирибгарнинг юзи шувут бўлди” номли кўрсатувда сариосиёлик Фаррух Соҳибов сал кам 100 ёшлик уруш фахрийси бўлган бобосидан қўғирчоқ сифатида фойдаланиб, ери ноқонуний тортиб олингани ҳақида унинг оғзидан бўҳтон маълумот тарқатганликда айбланади.
Сурхондарё вилоятининг Сариосиё туманида яшовчи 40 яшар фермер Фаррух Соҳибов 25 апрель куни Озодлик билан суҳбатда хорижий ахборот воситаларига ери тортиб олинганини айтгани учун вилоят ҳокимлиги ўзи ва оиласига қарши махсус кўрсатув уюштирганини билдирди:
- Кеча, 24 апрель куни журналистлар бобонгиздан хабар олгани келдик, деб туриб¸ уни ўзлари хоҳлагандай гапиртиришди. Мени эса Би-Би-Си, Озодликка гапиргансан, деб ватан хоинига чиқаришди. Аслида уруш ветерани бўлган бобом гапирган эди, - дейди Фаррух Соҳибов.
Ўтган йил октябрь ойида тадбиркор ўз бобоси Жўрақул бобо Соҳибовнинг видеомуржаатини ижтимоий тармоқларда эълон қилган эди.
Бу мурожаатда уруш фахрийси 2002 йилдан эгалик қилиб келган 1 гектардан зиёдроқ ерини туман ҳокимияти 2014 йилда тортиб олгани ҳақда арз қилган ва президент Шавкат Мирзиёевдан ерини қайтариб беришда ёрдам кутаётганини таъкидлаган эди.
Сариосиёлик тадбиркор Фаррух Соҳибов бобосининг бу видеомуржаати Озодлик ва Би-Би-Си радиосида эълон қилингач, оиласига нисбатан босим кучайгани, ўзи милицияга терговга чақирилганини айтди.
Тадибиркорнинг айтишича, бунгача Сариосиё тумани ҳокимиятидаги айрим расмийлар ер можаросини тезда ҳал қилиб беришни ваъда қилиб, чет эл журналистларига бу ҳақда оғиз очмасликни илтимос қилган.
- Ҳаммаси бу маълумот Би-Би-Си ва Озодликка чиқиб кетганидан сўнг бошланди. Ҳокимга бу ёқмаган. Энди ҳокимият қўли остидаги телеканал журналистлари орқали мени туҳматчига чиқараяпти. Ҳозир ҳам ҳокимиятдан телефон қилиб, нега Озодликка гапирдингиз¸ дейишаяпти. Гапирмай туринг, ҳал қилиб берамиз, дейишади. Лекин, ўзлари журналистларни юбориб, мени туҳматчига чиқаришаяпти, - дейди сариосиёлик тадбиркор.
25 апрель куни Озодлик Сурхондарё вилояти телеканалида эфирга берилган “Фирибгарнинг юзи шувут бўлди” номли кўрсатув муаллифларидан бири билан ҳам суҳбатлашди.
"Ветеран бобосини қўғирчоқ қилиб олган..."
Исми сир қолишини истаган журналист вилоят ҳокимининг илтимосига кўра уруш фахрийси уйига боргани ва кўрсатув тайёрлаганини билдирди:
- Вилоят ҳокими шахсан¸ холис ахборот олиб келинглар менга, деб айтди. Бордик. Бу бола 97 ёшли уруш фахрийси бўлган бобосини қалқон қилиб, бемаза ишларни қилиб юрибди. Аслида бобосига ҳам¸ унга ҳам ер керак эмас. Ҳоким бува ишласа¸ бу болага ер ҳам берамиз, деяпти. Бобони тинч қўйсин, бобони асрасин, 100 га кирса текин машина берамиз, деяпти. Бу бола эса бобосини ҳокимиятма-ҳокимият етаклаб юрибди. Ўтган йили бобосига “Captiva” берилган экан¸ сотиворибди машинани. Бобосини қўғирчоқ қилиб олган, - дейди Сурхондарё вилояти телеканали журналисти Озодлик билан суҳбатда.
Сариосиёлик тадбиркор ери устида келиб чиққан можаро бир неча йилдан буён давом этмоқда.
Фаррух Соҳибовнинг Озодликка айтишича, вилоят Адлия бошқармаси ва Кадастр идораси расмий ҳужжатларида ер уларники бўлгани қайд этилган.
Тадбиркор иддаосича¸ ер ўзига берилгани ҳақидаги асл ҳужжатлар қолиб¸ ҳокимият идоралари бу ерни бошқа бой фермерга сохта шаклда хатлаб берган.
Бу иддао юзасидан изоҳ олиш мақсадида Озодлик мухбири Сариосиё тумани Кадастри бошлиғи Абдураҳмон Бўронов билан боғланганида¸ мулозим телефонни қўйиб қўйди.
Озодлик тадбиркорнинг ери масаласидаги можарога аниқлик киритиш учун Сариосиё тумани ҳокими Асқарали Жўраев¸ қолаверса унинг муовинлари билан телефон орқали бир неча марта боғланди.
Гўшакни кўтарганлар ўзларининг мажлисда экани, телефон орқали суҳбатлашиш имкони йўқлигини айтиш билан саволларга жавоб беришдан бош тортди.
Туман ҳокими муовини Шерзод Хидиров эса беш дақиқадан сўнг ўзи қўнғироқ қилишини айтиб, телефонни қўйиб қўйди ва кун давомида у билан қайта боғланишнинг иложи бўлмади.
