Линклар

Шошилинч хабар
29 март 2024, Тошкент вақти: 17:17

OzodDayjest: Manfaatlar to‘qnashuvi – vazir o‘rinbosariga aloqador shirkat 10 mlrd so‘mlik tenderda g‘olib bo‘ldi


Uzum ko‘chati (illyustrativ surat)
Uzum ko‘chati (illyustrativ surat)

IIV tizimidagi zo‘ravonlik holatlarini parlament muhokamasiga qo‘yish talab etildi. Qishloq xo‘jaligi vazirining o‘g‘li tenderda g‘olib bo‘lgani e’tirozlar uyg‘otmoqda. Qiz farzand ko‘rgani sabab tahqirlangan ayol o‘z joniga qasd qildi. Joriy hafta o‘zbek matbuoti shu kabi voqealar haqida xabar berdi.

__________________________________________________________

“Og‘zi-burni qon fuqaro” – ichki ishlar xodimlari o‘zini ko‘cha odamlaridek tutyapti

Huquqni muhofaza qiluvchi idoralar xodimlarining arzimagan bahonayu sabablar bilan fuqaroning og‘zini qonga botirayotgan, ayrim holatlarda o‘limiga olib kelgan kaltaklashlariga ko‘p guvoh bo‘lmoqdamiz, dedi Xalq demokratik partiya raisi o‘rinbosari Maqsuda Vorisova (“Mahalla” gazetasi, 18 - sentabr).

Qayd etilishicha, Ichki ishlar vazirligi “holatni tekshiryapmiz” qabilidagi bayonotlar bilan cheklanyapti, xolos, ammo vazirlik qat’iy choralar ko‘rayotganiga jamoatchilikni ishontira olgani yo‘q. Vaholanki, dunyoning rivojlangan mamlakatlarida fuqaro politsiya tomonidan kaltaklansa, ichki ishlar vaziri yoki mansabdor shaxs shu zahoti iste’fo beradi.

Prezidentlikka nomzod M. Vorisovaga ko‘ra, ichki ishlar tizimi jiddiy islohotlarga muhtoj.

“IIVning fuqarolarga oid munosabatini keskin tanqidiy tahlil qilish kerak. Kerak bo‘lsa, masalani Oliy Majlis Qonunchilik palatasiga olib chiqib, vazirlik rahbariyatidan hisob, izoh so‘rash, vazirlikning hududiy boshqarmalari rahbariyati faoliyatiga professional xulosa berilishi maqsadga muvofiq bo‘ladi. Aks holda, quyi bo‘g‘indagi ichki ishlar idoralarning tazyiq va ayrim zo‘ravonliklari to‘xtamayapti. Ba’zida ular o‘zlarini ko‘cha odamlaridek tutishyapti. Shunday ekan, IIVning faoliyatiga tizimli va jiddiy baho berish vaqti keldi”, degan XDP vakili.

Ta’kidlanishicha, bundan keyin davlat xizmatchisining fuqaroni tahqirlashiga yo‘l qo‘yib, toqat qilib bo‘lmaydi.

Vazir o‘rinbosari ko‘p milliardlik shartnomani o‘g‘lining kompaniyasiga ilindi

O‘zbekiston qishloq xo‘jaligi vazirligi huzuridagi Qishloq xo‘jaligida milliy bilim va innovatsiyalar markazi in vitro usulida etishtirilgan 1 mln tup uzum ko‘chatini sotib olish bo‘yicha tender o‘tkazdi (www.gazeta.uz, 21 - sentabr).

9,95 mlrd so‘mlik tenderda qishloq xo‘jaligi vaziri o‘rinbosari, Qishloq xo‘jaligida milliy bilim va innovatsiyalar markazi (buyurtmachi) rahbari Alisher To‘rayevning o‘g‘liga tegishli “De Nova Agro” kompaniyasi g‘olib bo‘ldi. 30 - avgust kuni Qishloq xo‘jaligida milliy bilim va innovatsiyalar markazi mazkur shirkat bilan 9,95 mlrd so‘mga uzum ko‘chatlarini yetkazib berish to‘g‘risidagi shartnomani imzolagan.

Qayd etilishicha, ushbu tenderda manfaatlar to‘qnashuvi ehtimoli bor. “De Nova Agro” shirkatiga 2006 - yilda professor, biologiya fanlari doktori Alisher To‘rayev tomonidan asos solingan. Ayni paytda u Qishloq xo‘jaligi vazirligi huzuridagi markaz bosh direktori hamda qishloq xo‘jaligi vazirining o‘rinbosari hisoblanadi.

“De Nova Agro”ning yagona ta’sischisi (100%) Alisher To‘rayevning o‘g‘li Bekjon To‘rayevdir. Vazir o‘rinbosarining o‘zi hozirda “O`simliklar texnologiyasi” kompaniyasining 50 foiz ulushiga egalik qiladi.

Samarqandda qiz farzand ko‘rgani sabab tahqirlangan ayol va uning 16 yoshli qizi o‘z joniga qasd qildi

Samarqand viloyati Kattaqo‘rg‘on tumanida ketma-ket qiz farzand ko‘rgani sabab qaynonasi va eri tomonidan tahqirlanib kelgan ayol o‘z joniga qasd qildi (www.daryo.uz, 22 - sentabr).

Ma’lum bo‘lishicha, qaynona va uning o‘g‘li oiladagi arzimas sabablarni bahona qilib, ayolni yillar davomida tahqirlab kelgan. 2020 - yilning noyabrida esa er ayolini do‘kondan qaynonasi nomiga qarz olganlikda ayblab kaltaklagan. Er jarohat olgan xotinini uyida davolanishga ko‘ndirib, jazodan qutulib qolgan.

Dekabr oyidagi janjallarning birida qaynona kelinini urib, uning yuziga qaynoq suv sepib yuborgan. Oilaning 16 yoshli to‘ng‘ich qizi buvisi va dadasi tomonidan onasiga muntazam tazyiq o‘tkazilishiga chiday olmay o‘zini osib qo‘ygan. Zo‘ravonliklardan to‘ygan ayol ham qizining yonida o‘z joniga qasd qilgan.

Jinoyat ishlari bo‘yicha Kattaqo‘rg‘on tuman sudida bo‘lib o‘tgan ochiq sud majlisida qaynona va o‘g‘il aybdor deb topilgan. Sudlanuvchi erkak Jinoyat kodeksining 103-moddaga (o‘zini o‘zi o‘ldirish darajasiga yetkazish) binoan 7 yilga ozodlikdan mahrum qilingan. Qaynonaga esa 4 yilga ozodlikdan cheklash jazosi belgilangan.

XS
SM
MD
LG