Линклар

Шошилинч хабар
14 май 2021, Тошкент вақти: 22:26

OzodDayjest: Tanzila Norboyevaga ochiqlik siyosatini Senatdan boshlash tavsiya qilindi


Senat raisasi Tanzila Norboyeva

Senat raisasiga ochiqlik islohotini avvalo yuqori palatadan boshlash tavsiya qilindi. “Qora ro‘yxat”dagi xorijlik tadbirkor O‘zbekistonga ko‘chib keldi. Jurnalist va bloger milliardlab mablag‘ni futbol klubiga bergandan ko‘ra bu pulga maktablar qurish afzalligini aytdi. Joriy hafta o‘zbek matbuoti shu kabi voqealar haqida xabar berdi.

__________________________________________________________

Daryo.uz: Tanzila Norboyeva o‘zi aytayotgan ochiqlik islohotini avvalo Senat matbuot xizmatidan boshlasin

Oliy Majlis Senati raisi Tanzila Norboyeva O‘zbekiston uchun ochiqlik va muloqotdan boshqa yo‘l yo‘qligini muntazam ta’kidlasa-da, aynan Senat matbuot xizmatidan har doim ham ma’lumot olib bo‘lmayapti (www.daryo.uz, 14 - aprel)

Qayd etilishicha, Tanzila Norboyeva Senat raisiga aylangach, O‘zbekiston parlamentining yuqori palatasi eshiklari jurnalist va blogerlar uchun yanada kengroq ochildi. Senat raisi majlislar vaqtida senatorlardan faollik va ochiqlikni talab qilish bilan birga, ularga real vaqt rejimida blogerlar yozayotgan xabar va postlarni o‘qib berishi bugun birovni hayron qoldirayotgani yo‘q. Ammo yuqori palata matbuot xizmatida Norboyeva deyarli barchadan talab qiladigan ochiqlik va muloqot tamoyillariga zid harakat qiluvchilar ham yo‘q emas.

Daryo.uz nashri Senat matbuot xizmatidan bir necha mavzu, masalan, Andijon viloyati hokimi va senator Shuhrat Abdurahmonovning tadbirkorni haqorat qilgani yoki 2005 - yilgacha Qashqadaryodagi aviabazada xizmat qilgan amerikalik harbiylarning radiatsiya ta’siriga uchragani kabi masalalarda tegishli komissiya hamda qo‘mitalarning munosabatini so‘ragan. Ammo oradan bir necha oy o‘tsa-da, javob berilmagan. Bu hol esa axborot olish kafolatlari to‘g‘risidagi qonunchilikka ziddir.

“Rahbarlarning xalq uchun ochiqligi, jamiyatimizning barcha sohalarida ochiqlik – bugungi kun talabi. Boshqa yo‘limiz yo‘q va bunga ko‘nikib, ishimizni qayta ko‘rib chiqishimiz kerak”, degan edi T. Norboyeva majlislardan birida.

Daryo.uz nashriga ko‘ra, Norboyeva xonim o‘zi aytayotgan ochiqlik va oshkoralik islohotini avvalo Senat matbuot xizmatidan boshlashi lozim.

AQSh “qora ro‘yxat”ga kiritgan ukrainalik biznesmen O‘zbekistonga ko‘chib keldi

Ukrainalik tadbirkor va siyosatchi Aleksandr Onishchenko O‘zbekistonga ko‘chib keldi (www.spot.uz, 11 - aprel).

Yoqilg‘i va energetika sohasida biznes bilan shug‘ullangan va bir muddat Ukraina parlamenti deputati bo‘lgan Onishenko 2021 - yil boshida AQSh moliya vazirligining SDN List sanksiyalar ro‘yxatiga kiritilgan. Qo‘shma Shtatlardagi aktivlari bloklangan, shuningdek, Amerika fuqarolarining u bilan operatsiya o‘tkazishi taqiqlangan.

Onishchenkoga ko‘ra, u o‘z biznesini 1997-1998 - yillarda O‘zbekistonda boshlagan. Uning otasi Rajab Qodirov O‘zbekiston ichki ishlar vazirining o‘rinbosari lavozimida faoliyat yuritgan.

Tadbirkor o‘zining ko‘chib o‘tishini Yevropa Ittifoqida biznes inqirozi yuz berayotgani bilan izohlangan: koronavirus iqtisodiyotni yakson qilgan, O‘zbekistonda esa pandemiya yakunlanib, iqtisodiyot gullab-yashnashni boshlagandek go‘yo.

“Bu yerda barcha tabiiy tanlanish hisobiga kasallikka chalinib sog‘aygandek. Kecha boks kechasida bo‘ldim. O‘n ming odam sport saroyida. Hech qanday vahima yo‘q. Bundan oldin o‘n ming kishi Nikolay Baskovning konsertida yig‘ilgandi. Barcha restoranlar ochiq, barchasi ishlayapti. Iqtisod rivojlanmoqda” deydi tadbirkor.

Onishchenko otasi sabab fuqarolikni osonlikcha olishi mumkinligi, biroq avval puxta o‘ylab ko‘rib, keyin qaror qabul qilishini aytgan. 52 yoshli tadbirkor siyosat bilan shug‘ullanishni istamasligi, ot sporti va biznes kifoya ekanini ta’kidlagan.

Jurnalist Muhrim A’zamxo‘jayev: 20 mlrd so‘mni futbol klubiga bergandan ko‘ra maktab qurgan ma’qul

Jurnalist va bloger Muhrim A’zamxo‘jayev “Championat.asia” nashrining “Samisov bilan” loyihasiga bergan bergan intervyusida futbol uchun ajratilayotgan mablag‘lar haqida so‘z yuritdi. Uning aytishicha, bir futbol jamoasiga milliardlab so‘m sarflagandan ko‘ra maktablar qurgan yoki o‘qituvchilarning maoshiga ustama pul qo‘shib bergan ma’qulroq.

“Deylik, bir jamoaga 20 mlrd so‘m sarflanmoqda. 20 milliardga 4 ta zo‘r maktab qursa bo‘ladi. Qayerlardadir bolalar chaylaga o‘xshash maktablarda, vagonlarda o‘qimoqda... Masalan, qishloq vrachlik punktlarini qurish mumkin. Surxondaryoda bir o‘qituvchi 14 km oralig‘idagi ikkita maktabda ishlar, shu masofaga piyoda qatnamoqda ekan. O‘sha 20 milliardga bir nechta o‘qituvchiga velosiped olib berish mumkin, mashina bo‘lmasa ham. Yoki o‘qituvchilarning maoshiga ustama pul qo‘shib bersa bo‘ladi”, degan u.

Avvalroq iqtisodiy tahlilchi va bloger Otabek Bakirov ham futbol klublarining davlat ulushiga ega korxonalar tomonidan moliyalashtirilishiga barham berish lozimligini ta’kidlagan edi.

XS
SM
MD
LG