Gallup маркази эълон қилган “Глобал позитивлик индекси”да Ўзбекистон аҳолиси дунëдаги энг позитив миллатлар бешлигига кирди.
Парагвай¸ Коста Рика¸ Панама каби Лотин Америкасидаги мамлакатлар аҳолиси глобал рўйхатнинг биринчи уч ўрнига қўйилган бўлса¸ ўзбекистонликлар Филиппиндан сўнг бешинчи поғонани эгаллади.
Ижтимоий сўров хулосасига кўра¸ греклар асаблари энг толиққан¸ эронликлар эса¸ энг дарғазаб миллат бўлиб чиқди.
Ўзбекистонликлар постсовет ҳудудидаги энг позитив деб топилган бўлса¸ Украина¸ Литва¸ Озарбайжон¸ Грузия ва Беларус¸ индекс тубидаги ўнликдан ўрин олди.
Мазкур хулоса 2016 йил давомида дунëнинг 142 давлатида 149 минг одам билан ўтказилган суҳбатлар асосида чиқарилган.
Gallup маркази вояга етганлардан:
“Кеча яхши дам олдингизми?
Кеча кун бўйи сизга ҳурмат билан муомалада бўлишдими?
Кеча яхшилаб кулдингизми¸ жуда бўлмаса жилмайдингизми?
Кеча бирор қизиқ нарса ўрганиб¸ бирор қизиқ иш қилдингизми?
Кеча бирор нарсадан мазза қилдингизми? деган саволларни сўраган ва бу саволга энг кўп тасдиқ жавоби берганлар дунëдаги энг позитив халқлар рўйхати тепасидан жой олган.
Жорий йил БМТ, Gallup ижтимоий сўров маркази ҳамда АҚШдаги Колумбия университети тадқиқотчилари ҳозирлаган ҳисобот хулосасига кўра¸ Ўзбекистон постсовет ҳудудидаги энг бахтиëр мамлакат бўлиб чиққан эди.
20 март - Бутунжаҳон Бахтиёрлик кунида эълон қилинган ҳисоботга кўра¸ ўзбекистонликлар бахтиëрлик бўйича 155 мамлакат аҳолиси орасида 47-ўринга қўйилди.
Ҳисоботга кўра¸ ҳатто¸ миллионлаб ўзбекистонлик иш излаб борган Россия аҳолиси ҳам бахтиёрлик бўйича улардан икки поғона пастроқда бўлиб чиқди.
