2 май куни Ўзбекистон президенти Шавкат Мирзиëев Наманган вилоятига борди. Озодликка келаëтган маълумотларга кўра¸ Мирзиëев шу куни бориши кутилаëтган туманлар орасида Норин тумани ҳам бор.
Президентнинг кескин баëнотларига қарамай¸ Озодлик гаплашган аҳоли вакилларига кўра¸ Наманган вилояти¸ хусусан¸ Норин туман ҳокимлиги¸ президентни эски услубда кутиб олишга ҳозирлик кўрган.
40 километрлик Наманган-Норин магистраль йўлида бўйида ҳаëт деярли тўхтаб қолди.
Президент матбуот хизматининг ëзишича¸ Мирзиëев вилоятга сафари пайтида 2017 йил июлида қилган ташрифи давомида берилган топшириқ ва вазифаларнинг қандай бажарилганини текширади.
Матбуот хизмати президентнинг айнан қайси туманлар ва қайси объектларга боришини эълон қилмади.
2 май куни Озодлик суҳбатлашган айрим норинликлар¸ маҳаллий халқ орасида тарқаган норасмий хабарга кўра¸ президентнинг Нориндаги 40-мактаб¸ шунингдек¸ Норинкапа қишлоғида ҳашар йўли билан қуриб-битказилган масжидга бориши кутилаëтганини билдирди.
“Кеча¸ 1 май куни мелиса¸ солиқ¸ ҳокимиятдагилар президент ўтадиган бетонка йўл бўйидаги ҳамма кафе¸ ресторан¸ дўкон¸ музқаймоқ ва бошқа майда-чуйда сотадиганларга ўз ишини уч кунга тўхтатишни буюрди. Бетонка йўл бўйида нон ва сомса сотадиганларнинг тандиригача кўчиртирди. Ҳаммаëқни бўм-бўш қилиб қўйишди. Бизнес уч кунга ўлди¸ қисқаси”¸ деди Озодлик билан суҳбатда Наманган марказини Норин тумани маркази Хаққулобод шаҳри билан боғловчи магистраль йўл бўйида яшовчи норинликлардан бири.
Суҳбатдош ўз сўзини қувватлаш учун¸ катта йўл бўйидаги дўкон¸ кафе ва ресторанлар¸ шунингдек¸ Ҳаққулобод марказидаги аксар дўконларнинг 2 май куни ëпиб қўйилгани акс этган суратларни Озодликка йўллади.
Улардан бирида¸ туман марказий хиëбонига элтувчи йўлни бир неча юк машинаси тўсиб тургани кўрилади.
Қамалдаги қишлоқлар?
Катта магистраль йўлга чиқувчи қишлоқ йўллари ҳам¸ Озодлик гаплашган норинликларга кўра¸ 2 май куни бу туманга президент келиши муносабати билан юк машиналари воситасида тўсиб қўйилган.
“Одамлар ўз уйи¸ ўз қишлоғида қуршовга олинди. Бетонкага чиқадиган йўллар тўсилган¸ бир амаллаб йўлга чиқсангиз¸ ҳамма жойда қизил таëқ ушлаган гаичилар¸ гражданскийдаги снбчилар юрипти. Орқангиздан қувлаб¸ юргани қўймайди. Намангандан Андижонга борадиган магистраль Ўзбекистонда тўртинчи катта йўл дейишади. Мана ҳозир чиқиб келдим¸ йўлда деярли ҳаракат йўқ¸ бориям президентни кутишга тайëргарлик қилиб юрганларнинг ўзи¸” деди Озодлик гаплашган норинликлардан бири.
Бу суҳбатдош¸ ўзи яшовчи қишлоқдан катта магистралга чиқиш йўлини юк машинаси тўсиб тургани суратини ҳикоясига илова қилди.
“40-мактабда бир кечада Каримов хиëбони қуришди”
Норин туманидаги энг йирик таълим муассасаси ҳисобланган 40-мактаб президент Шавкат Мирзиëевнинг Наманган сафари кун тартибига киритилган объектлардан бири сифатида кўрилмоқда.
“Президент шу мактабга келаркан”¸ деган хабар ортидан 30 апрель туни билан мактаб ўқитувчилари ва техник хизматчилари йўқ жойдан мактаб ҳудудида Ислом Каримов хиëбони қуришди”¸ дейди мазкур мактаб хизматчиларидан бири.
“Тунги 11 гача ўқитувчи фаррошлар мактабни краска қилдик¸ уйга бориб овқатланишга ҳам рухсат беришмади. Каримовнинг суратларини осиб¸ унинг гаплари ëзилган плакатларни ëпиштириб¸ ўзимизча Каримов хиëбони қилдик. Энди краска ва бўëқларнинг пулини ойлигимиздан олиб қолишармиш¸” дейди мазкур мактабда ишловчилардан бири шахси очиқланмаслиги шарти билан.
Суҳбатдош¸ раҳбарият сезиб қолишидан қўрқиб¸ бу жараëнни сурат ëки видеога олишга ботинмаганини билдирди.
Тадбиркорлар йўл ëқаларида бир кечада қурилиш қилди
“Бу суратда кўриб турганингиз қурилиш¸ бир кунда қилинди. Тумандаги ўзига тўқ тадбиркорларга ҳоким бир қарич ҳам ер бўш қолмаганини президентга кўрсатиш керак¸ давай¸ бир нарса қур¸ дегандан кейин¸ бир кеча-кундузда шлакоблокларни олиб келиб¸ қуриб ташлашди. Нималигини ҳозирча билмаймиз. Президентга буларни “Обод қишлоқ”¸ деб кўрсатишаркан. Президент кетгандан кейин бу жойлар қоладими-йўқми¸ бунисини икки-уч кундан кейин кўрамиз¸" дейди Озодликка боғланган норинликлардан яна бири.
Айрим норасмий маълумотларга кўра¸ президент ўтиши кутилаëтган йўлдаги ўйдим-чуқурларни ëптириш¸ йўл бўйида яшовчи қўли юпқа оилалар ҳовлиси девори ва томини бўяш ҳам¸ шу ҳудудларда бизнес қиладиган тадбиркорларга юкланган.
Озодлик оддий норинликлардан келган бу хабарларга изоҳ олиш мақсадида кун давомида Норин туман ҳокимлиги¸ ички ишлар бўлими ва 40-мактабнинг жамоатчиликка тақдим этилган телефон рақамларига қўнғироқ қилди. Аммо бу қўнғироқларнинг бирортасига жавоб берилмади – афтидан¸ расмийларнинг барчаси президентни кутиб олиш билан машғул бўлган.
Президент ўзини алдамасликни сўради¸ аммо...
13 апрель куни Сирдарё вилоятининг Сайхунобод туманидаги йиғилишда президент Шавкат Миризëев ўзининг вилоятларга қилаëтган сафари олдидан қилинаëтган кўзбўямачиликларни танқид қилган ва маҳаллий ҳокимлардан бу ишларни тўхтатишни сўраган эди.
“Мен осмондан пайдо бўлиб, тушиб келмайман: бир кун олдин қайси вилоятга ташриф буюришим ҳақида маълумот етказилади. Лекин, кўп жойларда кўзбўямачиликка йўл қўйилмоқда. Очиғи, менга бу ноқулай, менда нафрат уйғотмоқда. Ўқитувчиларни мажбурлаб чиқариб қўйиб, ободонлаштириш, уларга кўча супуртириш, тайёргарликка жалб этиш - сиёсатга хиёнат. Бу ҳаракатлар фақат менга эмас, сиёсатга ҳам хиёнат.
Мен девор ортида нима борлигини, Ўзбекистонда қайси кўча супурилгани ё ободлигини жуда яхши биламан. Битта нарсани айтмоқчиман: йўлни супурганингиз билан ҳеч нима ўзгармайди, одамлар раҳмат демайди, лаънат айтади”¸ деган эди президент 13 апрель кунги чиқишида.
Озодлик суҳбатлашган норинликлардан бири¸ Шавкат Мирзиëевнинг ташрифи муносабати билан минглаб одамнинг кундалик ҳаëти ва бизнеси издан чиқарилаётгани ҳақда Президентнинг ўзига бирон норинлик рўпара келиб қолгудай бўлса, "лом-мим демаса керак,чунки бунинг сабаби бор", дер экан собиқ президент давридаги воқеани эслади.
“Биз томонларга Каримов¸ адашмасам бир марта¸ 1996 йилда келган. Ўшанда Ҳамид бува деган чол президентга бор аҳволни дангал айтган¸ “ҳокимлар алдаяпти сизни¸ газ йўқ¸ свeт йўқ¸ иш йўқ¸” деган. Президент кетиши билан¸ уни вилоят ички ишлари олиб кетган. Ҳибсда қаттиқ уриб-қўрқитган шекилли¸ шу одам уйига келганидан бир ҳафта ўтиб-ўтмай¸ ўлиб қолди. Шундан бери биз томонларга яна президент келаяпти. Унга чиқиб¸ бор гапни¸ бу алдов-кўзбўямачиликларни айтадиган Ҳамид бува топилмаса керагов”¸ деди Озодлик суҳбатлашган норинликлардан бири.
Марҳум президент Ислом Каримовнинг вилоятларга сафарлари ниҳоятда кучайтирилган хавфсизлик чоралари остида ўтар ва бу сафарлар давомида маҳаллий аҳолининг кундалик ҳаëт тарзи издан чиқарди.
Шавкат Мирзиëев ҳокимиятга келганининг дастлабки ойларида бундай сафарлар давомида халқ ичига кириб¸ оддий одамлар билан гаплашишга уриниш қилди.
Аммо унинг кейинги сафарларининг олдиндан ҳозирланган дастур доирасидан чиқмаëтгани ва асосан олдиндан тайëрланган¸ нимани гапириши олдиндан текширилиб-тасдиқланган одамлар билан учрашиб қайтаëтгани кўрилмоқда.
