АҚШ президенти Дональд Трамп НАТОнинг Брюсселда 11 июль куни ўтган саммитида ташкилотга аъзо давлатларни мудофаа ҳаражатларини олдин эълон қилинганидек, ялпи ички маҳсулотнинг 2 фоизи эмас, балки 4 фоизи даражасида оширишга чақирди.
Трампнинг фикрича, ҳар бир давлатнинг НАТОга тўлайдиган аъзолик бадалини ялпи ички маҳсулотнинг 2 фоизи даражасида ошириш “абсолют минимум” ҳисобланади, 4 фоизлик кўрсаткич эса “исталган меъёр”дир.
Трамп саммиит арафасида Брюсселда қилган чиқишида НАТО давлатлари мудофаа ҳаражатларини келишилганидек 2025 йилдан эмас, бугунги кундан бошлаб кўпайтиришини талаб қилди.
Бугунги кунда НАТОга аъзо бирорта давлат мудофаа учун ялпи ички маҳсулотнинг 4 фоизини сарфламайди. Стокҳольм Тинчлик институтининг билдиришича, АҚШнинг ўзи бу мақсадга ялпи ички маҳсулотнинг 3 фоизини ажратади.
Бироқ Саудия Арабистони, Исроил ва Россия мудофаа учун ҳар йили ялпи ички маҳсулотнинг 4 фоизидан кўпроқ қисмини сарфлайди.
Дональд Трам НАТОдаги иттифоқчиларни танқид қилишда давом этмоқда. Жумладан, у Германияни “Россиянинг гарови” деб атади. Трампга кўра, Германия Россия билан ёнилғи экспорт қилиш бўйича шартномаларни имзоламоқда, бироқ АҚШдан ҳимоя изламоқда. Германия канцлери Ангела Меркель бу айбловларни инкор қилди.