Европа Кенгаши президенти Дональд Туск НАТО саммити арафасида АҚШ президенти Дональд Трампга танбеҳ берди.
Туск Трамп Европани ўз мудофаасига етарлича маблағ сарфламасликда айблаб, деярли ҳар кун танқид қилиб келаётганини айтар экан, АҚШ президентини ўз ҳамкорларининг қадрига етишга ундади.
10 июль куни Европа Иттифоқи ҳамда НАТО ўртасида ҳамкорлик бўйича янги келишув имзоланиши ортидан бўлиб ўтган матбуот анжуманида Туск:
- Президент Трампга мурожаат қилмоқчиман. ... У узоқ пайтдан бери Европани ўз назарида умумий мудофаа учун етарлича маблағ сарфламаётганимиз ҳамда гўёки АҚШ ҳисобига яшаётганимиз учун деярли ҳар куни танқид қилиб келади. Ҳурматли президент Трамп, Американинг Европадан яхшироқ ҳамкори йўқ, бўлмайди ҳам, - деди.
- Ҳурматли Америка, ўз ҳамкорларингизнинг қадрига етинг. Ахир, улар сизда кўп эмас, - дея сўзини давом эттирди Туск.
Европа Кенгаши президенти, шунингдек, Европа давлатларини ўз мудофааси учун кўпроқ маблағ сарфлашга чорлади.
Трамп НАТОга аъзо мамлакатларни ўз ялпи ички маҳсулотининг 2 фоиздан кам қисмини мудофаа лойиҳаларига сарфлаётгани учун қайта-қайта танқид қилиб келади.
Айрим Европа давлатлари етакчилари Трампнинг Европага ташрифи трансатлантик бирликка путур етказишидан хавотирда.
Туск Трампга танбеҳ бераётган пайтда Трамп Twitterда Европа давлатларини мудофаа харажатларини оширишга чақирди.
