Беларус президенти Александр Лукашенко Ўзбекистон билан ҳамкорликни ривожлантириш тўғрисидаги битимларга содиқ эканини тасдиқлади. Бу ҳақда у, БЕЛТА ахборот агентлигининг хабар қилишича, Ўзбекистон президенти ҳузуридаги Хавфсизлик кенгаши котиби Виктор Маҳмудов билан учрашув чоғида билдирган.
“Ўзбекистон президенти билан келишувларимиз биз учун табаррукдир. Биз зиммамизга олган мажбуриятларни албатта бажарамиз”, деган А.Лукашенко ўтган икки йил ичида икки давлат сўнгги 20 йил ичида босиб ўтолмаган йўлни босиб ўтганини урғулаган.
Лукашенко ўз мамлакати Ўзбекистон билан кадрлар тайёрлашдан тортиб қуролланишгача бўлган тажрибаси билан ўртоқлашишга ҳозирлигини билдирган.
Ўз навбатида, Виктор Маҳмудов икки мамлакатнинг ҳарбий-техник соҳадаги ҳамкорлигида ижобий силжишлар кузатилаётганини қайд этди.
Ўзбекистон президенти ҳузуридаги Хавфсизлик кенгаши котибининг Беларусга сафари 22 октябрдан 25 октябргача давом этади.
Беларусь президенти шу йил сентябрида расмий ташриф билан Тошкентга келганди. Бу А.Лукашенконинг сўнгги 24 йил ичида Ўзбекистонга илк сафари бўлган.