Ўзбекистон Футбол ассоциацияси Самвел Бабаянни умрбод футболдан четлатиш тўғрисидаги қарорни Тошкентнинг “Бунёдкор” клуби кафолати остида бекор қилган. Бу ҳақда расман 27 февраль куни маълум қилинди.
26 февраль куни Самвел Бабаян футболдан умрбод четлатилганига қарамай, Тошкентдаги “Локомотив” футбол клуби президенти Мансур Ражаповга маслаҳатчи этиб тайинлангани хабар қилинган эди.
2018 йилнинг март ойида эса Самвел Бабаян Латвия чемпиони "Спартак - Юрмала" жамоасига бош мураббий этиб тайинланган эди.
Латвия футбол федерацияси Ўзбекистон томони 2018 йил 1 февраль куни Бабаяндан дисквалификация олиб ташланганини билдирган. Аммо Ўзбекистон футбол расмийлари бу маълумотни тасдиқламаган ва айни пайтда рад ҳам этмаган.
Ўзбекистон Футбол ассоциацияси орадан бир йилдан кўпроқ вақт ўтгачгина Самвел Бабаянга белгиланган жазо бекор қилинганини билдирди.
Ўзбекистон терма жамоаси ва “Пахтакор” клубининг бош мураббийси бўлган Самвел Бабаян 2018 йилнинг 15 январида Ўзбекистон Футбол ассоциацияси қарори билан футболга алоқадор ҳар қандай фаолият билан шуғулланишдан умрбод четлаштирилган эди. Бунга Бабаяннинг шахсий бойлик орттириш мақсадида айрим ноқонуний ҳаракатларга қўл ургани сабаб қилиб кўрсатилган.