Президент Шавкат Мирзиёев Тошкент ҳокимига жаҳонга машҳур бўлган хоккей юлдузларига пойтахтдан квартира ажратиб бериш тўғрисида кўрсатма берди.
15 март куни Humo Arena кўп тармоқли муз саройининг тантанали очилиш маросимида сўзлаган нутқида президент:
-Бу каби комплекс ва марказларни биз келажакда мамлакатимизнинг бошқа ҳудудларида ҳам барпо этамиз. Шу муносабат билан ҳурматли меҳмонларимиз – таниқли спортчилар ва тренерларга, жаҳон спорти юлдузларига мурожаат қилмоқчиман. Биз сизнинг қўллаб-қувватлашингизга, билимингизга, маҳоратингизга ва катта касбий тажрибангизга умид қиламиз. Мен ҳозир улар билан учрашдим, ҳокимга ҳурматли машҳур спортчилар ва тренерларга тез орада биттадан квартира ажратиб бериш тўғрисида топшириқ бердим. Улар бизга меҳмон сифатида эмас, ўз уйларига келгандай келишсин, - деб айтди.
Humo Arena муз саройининг тантанали очилиши маросимида Павла Буре, Валерий Каменский, Виталий Прохоров, Алексей Жамнов ва Александр Якушевдан иборат Россиянинг “Хоккей афсоналари” жамоаси Тошкентга келиб, Tashkent City жамоаси билан хоккей ўйнаган эди.
Humo Arena саройининг очилишида Халқаро хоккей федерацияси президенти Рене Фазель, дунёга машҳур спортчи ва санъаткорлар иштирок этди.