Екатеринбургда 17 апрель куни юз берган ёнғинда ҳалок бўлган тўрт нафар ўзбекистонликдан икки нафарининг жасади ватанига жўнатилди.
Бу ҳақда 21 апрель куни ўзининг Facebook᾽даги саҳифасида маълум қилган Ўзбекистоннинг Екатеринбургдаги бош консули Абдусалом Ҳотамов ҳалок бўлганларнинг ота-оналари ва яқинларига чуқур ҳамдардлик билдирди.
Консулга кўра, 23 ва 21 ёшли йигитларнинг жасадларини Ўзбекистонга жўнатиш билан боғлиқ харажатлар давлат томонидан қопланган. Ҳотамов 31 ва 24 ёшли икки муҳожирнинг жасади ҳақида маълумот бермаган.
Аввалроқ Екатеринбургдаги Ўзбекистон Бош консулхонаси 17 апрелга ўтар кечаси Екатеринбургдаги қурилиш объектларидан бирида тўрт нафар сурхондарёлик меҳнат муҳожири нобуд бўлгани ҳақида хабар берган эди.
Екатеринбургдаги Прохожая кўчасида жойлашган уй ертўласида келиб чиққан ёнғинни бартараф қилиш чоғида 1989, 1995, 1996 ва 1998 йилларда туғилган эркакларнинг жасади топилган. Дастлабки маълумотларга кўра, улар ёнғин ва газдан заҳарланиш оқибатида вафот этишган
Ташқи ишлар вазирлиги расмий сайтида қўйилган хабарга кўра¸ сурхонлик муҳожирлар Екатеринбургнинг Академик туманидаги қурилиш объектларида фожиадан икки кун аввал - 15 апрель куни иш бошлаган.